Македонија е на само 6 дена пред историскиот референдум. Историски за нас, но и за целиот свет. Ниту еден народ, ниту една држава во светот, НИКОГАШ под притисок на сосед не си ги променила името и идентитетот.
На само 6 дена од референдумот, се повеќе е јасно дека ценсуз нема да има. БОЈКОТИРАМ ќе успее да ја победи силната и лажна кампања на Владата, со се сите дипломати кои и дојдоа на помош. Не затоа што БОЈКОТИРАМ е силно движење, туку затоа што мнозинството од народот, иако сиромашен, не сака да го даде единственото што му го оставиле предците. Некои прашања не заслужуваат одговор, некои работи не се купуваат со пари. Владата направи се што можеше и сеуште се труди, но веќе и по нивните изјави се гледа дека битката за референдумот е загубена.
По сите лаги за референдумот да успее, денеска министерот за надворешни работи уште еднаш се закани дека не им треба цензус за да го ратификуваат договорот потпишан со Грција. Референдум без цензус е како прием на Македонија во ЕУ без глас од Грција. НЕВОЗМОЖНО! Димитров го знае тоа. Повторно блефира, како кога за малку не си даде оставка по „Илинденска Македонија“, иако на сите ни е сега јасно дека тоа беше само шминка. Трик за да се протурка „Ерга омнес“ за следниот, правиот предлог. Лаже министерот и сега, кога вели дека бојкотот е неодговорен потег со што се остава на другите да решат во ваше име. НЕ! Ако нема цензус, решението сме го донеле ние кои БОЈКОТИРАМЕ! Намерно, плански и организирано! Што тука не е јасно Никола?
Се руши секој збор на кампањата ЗА. Се распаѓаат ветувањата на Заев и дружината. Нема дебата, а ако некој од нив се осмели да влезе во таква екскурзија, ја плаќа цената на неодбранливото. Договорот е толку лош, што не е возможно да се одбрани! НЕМА „Европска Македонија“, НЕМА ЕУ, НЕ Е зајакнат идентиетот, напротив дел се губи, дури и кај јазикот има промена (мене не ми пречи, но промена има!). Македонија не добива апсолутно НИШТО, освен ветување од Грција дека нема да не блокира при интеграции во НАТО и ЕУ. Исто такво ветување Грција потпиша и со времената спогадба, но еве не пак преговараме за тоа!
Се наредија странски премиери, комесари, канцелари... големи луѓе од светската политика, но не донесоа ништо! Ништо не ветија. Освен некоја ситна закана, дека ова ни е последна шанса, друго не чувме. Сега и НАТО не е на чекор до нас, ако го смениме името, туку ќе треба да почекаме 18 месеци! За ЕУ да не зборуваме. На крај се јави Макрон и реално ни кажа. Референдумот не е за ЕУ и НАТО, туку за промена на името! Не е за европска, туку за СЕВЕРНА Македонија. Истото го потврди и ДИК, но Заев и Димитров ова никогаш нема да го кажат јавно, надевајќи се дека народот токму на нив ќе им верува.
27 години на власт во Македонија се изредија „патриоти“, но ова е дното. При една ваква историска пресвртница, волку важен референдум, владата на секој начин се обидува да го излаже сопствениот народ, за да тера своја агенда. Немам јас ништо против никој кој сака да гласа ЗА. Во ред е. Можеме да дискутираме на темата, да спротиставиме агументи и погледи на светот. Да полемизираме, без да се убедуваме во единствен правилен избор. И по 30ти да останеме пријатели, соседи, колеги, без разлика чиј став е подржан од мнозинството. Разирам дека секој од нас има различни вредносни норми во животот. Не се моите вистинските, ниту погрешните. Едноставно се мои и очекувам да ги цените, како што јас ги ценам туѓите. Но, она што не можам да го разберам, ниту простам е ЛАГАТА! Да се лаже цел народ, да се гази закон, устав, да се кријат уставните промени, се со цел да се истурка оваа агенда, тоа никогаш нема да го заборавам, што и да се случи на 30ти. Не го прави ова само Заев и владата. Го прават и новинари, партиски војници, но и обичен народ. Секако, најголема одгворност има кај премиерот, но не знам дали тој го разбира тоа. Затворен во некој свој круг, Заев секој ден тоне се подлабоко. Кога премиер ќе ви каже ЈАВНО и тоа два пати, дека владата намерно не ги открива промените на уставот за на народот да не му биде НЕПРИЈАТНО да гласа, тој всушност признава дека СВЕСНО и ПЛАНСКИ се кријат делови од договорот пред народот. Ова е речиси самоубиство за секој политичар, но Заев си продолжува со агендата.
На крајот, одговорност има и кај секој од нас, обичните граѓани. Одговоррноста не започнува на 30ти септември, туку многу порано. Немам никава намера да влијаам на вашиот став за референдумот. Ваш избор е. Никој нема право да бара одговорност од вас, што и да изберете на 30ти. Вашата/нашата одговорност се состои во тоа, секој од нас да донесе информирана одлука. Никако не смеете/смееме да си дозволиме да дадеме глас или да бојкотираме, без да знаеме за што точно се работи. Верувам дека сте уморни од политика, но секако е пристуна. Да не се лажеме, ретки се денови во кои барем 30 минути не трошите на политички теми. Токму толку ви требаат за да го прочитате договорот со Грција. 30 минути за да донесете информирана одлука! Одлука која може да влијае на сите поколенија што оваа земја ќе ги даде. Само 30 минути бараат од вас вашите деца, внуци, правнуци.... Срамно е на 6 дена до историската раскрница пред која се наоѓа Македонија, само 3% од народот да го има прочитано договорот. Тоа е НЕОДГОВОРНО! Информирајте се и изберете сами! Не дозволувајте некој да ве убеди во своја агенда и без да знаете да решите за туѓ интерес.
Договорот го имате ТУКА, искрено ве молам да го прочитате
Автор: Пацифист
