Братот на пратеничката Мира Стојчевска од вчера е вработен во РЕК „Битола“, објави „Макфакс“. Ова вработување доаѓа истовремено со вработувањето на нејзиниот син Виктор Стојчевски во ЕЛЕМ, на што јавноста реагира дека СДСМ си ги вработува семејствата на најпрофитабилните места.

„Макфакс“ побара одговор од Стојчевска за вработувањето на брат ѝ, но таа вели дека нема информации за ова вработување и додава: „Тој си е фамилијарен човек, јас стварно не знам. Го барав, не ми се јави“.

Министерот за информатичко општество и администрација, Дамјан Манчевски, за вработувањето кадри од СДСМ во државната администрација рече дека два-три случаи на вработување не значат непотизам. Според Манчевски, сите членови на неговата партија 10 години биле најдискриминирани, па, така, го оправдува нивното вработување во јавниот сектор.