Во Србија од денеска почнува исплатата на паричната помош во висина од 100 евра во динарска противвредност, за сите граѓани кои се регистрирани преку телефон или преку веб-страницата idp.trezor.gov.rs. Парите ќе се плаќаат на сметките на околу половина милион граѓани дневно, и се очекува дека со таа динамика сите исплати на оние кои аплицирале за помош ќе бидат завршени до 1-2 јуни.
Рокот за пријавување е 5 јуни, а за оние кои ќе аплицираат на последниот ден, парите ќе бидат исплатени на банкарските сметки до 7 јуни.
Прво, исплатата на оваа финансиска помош за околу 1,7 милиони пензионери започна на 15 мај, а за околу 160.000 корисници на финансиска и социјална помош на 21 мај.
На 24 април, Владата на Србија донесе Уредба за исплата на 100 евра на сите полнолетни граѓани на таа држава, со постојан престој во Србија и валидна лична карта.