Еве колку ќе изнесува минималната висина на К-15 за 2017 година

И годинава вработените во Македонија во приватниот сектор имат право на регрес за годишен одмор, популарно наречен К-15. Според пресметките минимална висина на К-15 годинава ќе изнесува 8.900 денари.

Досега дел од фирмите веќе им го исплатија овој регрес на работниците, а оние кои што тоа не го сториле треба тоа да го направат најдоцна до крајот на декември.

Право на регрес имаат сите работници кои работеле кај истиот работодавец најмалку шест месеци во календарската година.

Законската регулатива вели во случај да не го исплатат регресот за годишен одмор предвидени се затворски и парични казни за работодавците.

Така износот на К-15 се одредува во висина од најмалку 40% од просечната месечна нето плата по работник во Република Македонија исплатена во последните три месеци.

За минатата година, тој износ беше најмалку 8.909 денари, а најмногу до 13.116 денари 40% од просечна бруто-плата објавена во тековниот месец која беше 32.789 денари.

Работодавачите појаснуваат дека бидејќи последните месеци од годинава ќе има зголемување на минималната плата од 10.080 на 12.000 денари, се очекува да има и значаен раст на просечната бруто и нето-плата по вработен во Македонија.

Токму овие промени ќе овозможат до крајот од годината да добијат поголем износ во однос на оној што го примиле во декември 2016 година.

Како на пример, ако се направи пресметка според последните податоци на Државниот завод за статистика објавени за август, може да се согледа дека регресот за годишен одмор ќе изнесува 9.123 денари, а тоа е 40% од износот на просечната нето-плата по вработен која во јуни достигна 22.808 денари, односно максимум до 13.403 денари, што пак е 40% од износот на просечната бруто-плата по вработен 33.509 во јуни.

Според колективниот договор, останува правото на фирмите со финансиски тешкотии да исплатат помалку од минимално утврдената сума. Но постоечкиот колективен договор содржи и одредени нејаснотии во делот дали еден работник кој шест месеци работел во една, а потоа уште шест месеци во друга фирма во иста календарска година, треба да добие К-15 од двете или само од едната фирма.

И годинава вработените од јавниот сектор ќе останат без К-15. Како што појаснува Пеце Грујовски, претседател на Синдикатот на работниците од Управата и правосудството (УПОЗ), во јавниот сектор нема ни колективен договор, а со новата Влада, која е работодавец на овие работници ќе се отворат преговори за негово носење, а со тоа и за правото на овие вработени, конечно, да добиваат регрес за годишен одмор.

Град и дожд го зафати Охрид

Невреме со град и дожд го зафати Охрид

Силно невреме проследено со грмежи, град и пороен дожд попладнево после 14:30 часот го зафати Охрид.

Повеќе улици беа поплавени, што го отежна сообраќајот, а вода навлегла и во дворови и куќи.

Невремето, кое траеше околу еден час, беше пропратено со силен ветер кој искрши гранки и постари дрвја. Екипи на Јавното комунално претпријатие „Охридски комуналец“ се на терен и работат на расчистување на последиците.

Штетите од невремето дополнително ќе се утврдуваат.

Комерцијална,НЛБ и Стопанска остварија над 70 милиони евра профит за шест месеци

Дека за банките во Македонија “нема зима” доказ се објавените финансиски извештаи од најголемите три банки, НЛБ, Стопанска и Комерцијална. Согласно билансите, големата банкарска тројка и нејзините вработени успеале за шест месеци да прокнижат профит од неверојатни 70 милиони евра.

Вкупните приходи од работењето на овие три банки во 2018 година се зголемени за 20% во однос на приходите кои ги оствариле во 2017 година.

НЛБ БАНКА АД СКОПЈЕ: профит од 19,1 милиони евра

Во периодот од 01.01.2018 година до 30.06.2018 година НЛБ Банка АД Скопје работеше согласно усвоената деловна политика на банката за 2018-та година, остварувајќи нето добивката заклучно со 30.06.2018 година во висина од 1.175.932.000 денари или нешто повеќе од 19 милиони евра. Добивката е повисока за 26,5% во однос на истиот период од 2017 година.

НЛБ банка во првите шест месеци од годинава остварила вкупни приходи од над 38 милиони евра. Приходите од камати биле 23 милиони и 442 илјади евра, а од провизии и надоместоци 8 милиони и 515 илјади евра. Како „останати приходи од дејноста“ се заведени 7 милиони и 672 илјади евра.

КОМЕРЦИЈАЛНА БАНКА АД СКОПЈЕ: профит од 21,4 милиони евра

Во периодот од 01.01-30.06.2018 година Комерцијална Банка АД Скопје од своето работење оствари позитивен финансиски резултат во износ од 1.314,7 милиони денари (21,4 милиони евра) наспроти остварениот позитивен финансиски резултат во истиот период минатата година во износ од 39,2 милиони денари.

Вкупните приходи од работењето изнесуваат 2.551,5 милиони денари и бележат зголемување од 10,3% во однос на истиот период од минатата година.

Нето-приходите од камата претставуваат основна компонента во формирањето на вкупните приходи од работењето и на 30.06.2018 година истите бележат намалување од 13,5% во однос на истиот период од минатата година што главно произлегува од

намалена состојба на кредити дадени на секторот нефинансиски друштва. Планот за анализираниот период е остварен со 95,5%.

Нето приходите од провизии и надоместоци на 30.06.2018 година изнесуваат 411 милиони денари и во однос на истиот период од минатата година бележат намалување од 2,1%. Планот за анализираниот период е остварен со 104,2%.

Нето приходите од курсни разлики на 30.06.2018 година изнесуваат 84,7 милиони денари и бележат зголемување од 40,4%. Планот за анализираниот период е остварен со 142,3%.

Останатите приходи од работењето на Комерцијална банка на 30.06.2018 година изнесуваат 771,5 милиони денари и бележат зголемување за повеќе од два пати, при што порастот главно произлегува од приходите од капитални вложувања и капитална добивка од продажба на преземен имот. Планот за анализираниот период е остварен со 129,1%.

СТОПАНСКА БАНКА АД – СКОПЈЕ: профит од 30 милиони евра

Во првите девет месеци од 2016 година Стопанска банка АД – Скопје оствари нето добивка во износ од 1,855 милиони денари, што е за 15,6% повеќе во споредба со истиот период од претходната година. Со тоа банката продолжува да ja реализира поставенaта долгорочна стратегија, фокусирана на оптимизација на сите потребни ресурси, со цел да се подобри ефикасноста во секој аспект од работењето.

Остварените нето приходи од камата во анализираниот период е за 6,8% повеќе во споредба со истиот период од претходната година и нето приходите од курсните разлики изнесуваат 87,1 милиони денари и се за 55,7% повисоки во споредба со истиот период минатата година. Другите оперативни приходи изнесуваат 228,00 милиони денари и во однос на истиот период од претходната година забележуваат пораст од 9,7%.

Mинистерството за финансии крие од каде пари за кампањата за Референдум

Министерството за финансии не дава податоци колку некое од министерствата или другите државни институции до сега доставило до нив извештај колку пари имаат на располагање за референдумската кампања. Од Финансии велат дека очекуваат овие информации да бидат комуницирани од страна на Владата, додека од Владата велат дека парите што министерствата ќе ги издвојат за кампањата нема да бидат средства од предвидените проекти. Поранешниот министер за финансии, Џевдет Хајредини, вели дека фактот дека не се знае колку пари ќе бидат потрошени за кампањата и од каде конкретно ќе се обезбедат, остава простор за манипулација.

- Презентацијата на одлуката на Владата од страна на портпаролот беше целосно нетранспарентна. Ова прашање може да скрие и другите цели, да не бидат транспарентни. Кога станува збор за буџетски промени, Владата мора да излезе со многу прецизни информации. Прво, треба да излезе со буџет за тоа колку ќе ја чини пропагандата за референдумот, а потоа Министерството за финансии да подготви сметка од која позиција тие ќе бидат земени и каде ќе одат. Тоа може да им сугерира на министерствата и на сите други корисници на државниот буџет да одделат од некоја позиција. Не се знае за колку пари станува збор, ако е за 100.000 денари тоа е нешто друго, од презентацијата на портпаролот, ниту пак се знае некоја основна информација за тоа колку пари ќе бидат потребни – изјави Џевдет Хајредини, поранешен министер за финансии.

Експертите предвидуваат дека овие средства што министерствата ќе ги издвојат за референдумската кампања најверојатно ќе бидат од средствата за репрезентација, односно од средства посветени за ручеци, вечери и патувања. Владата веќе започна со референдумската кампања. Вчера премиерот Зоран Заев се сретна со претставниците на македонската дијаспора од Италија, Хрватска, САД, Словенија, Германија, Луксембург и Швајцарија за да побара поддршка за референдумот да биде успешен.

На социјалните мрежи, организацијата „Млади за Македонија“ ја започна иницијативата за собирање потписи за бојкот на референдумот. Се уште не се знае дали опозициската ВМРО – ДПМНЕ ќе иницира кампања против референдумот. Додека датумот на референдумот се приближува, Избирачкиот список од страна на ДИК се ажурира. До 13 часот вчера, 116 лица се отстранети од Списокот, додека јавен увид во канцелариите на ДИК извршиле 2.179 лица.

Популарно