Кумановка 14 години работела како професорка со фалсификувана диплома!

Кумановската полиција поднела кривична пријава против С.Џ.Е. од село Романовце поради сомнение дека сторила кривично дело „фалсификување исправа“ и продолжено кривично дело „употреба на исправа со невистинита содржина“.

Како што информираат од МВР, во текот на 1999 година пријавената набавила фалсификувана диплома од Софискиот универзитет „Климент Охридски“ (Бугарија) при што се стекнала со квалификација од 7. степен, специјалност Педагогија. Дипломата во 2000 година ја приложила како вистинска на универизитетот „Св. Климент Охридски“ – Филозофски факултет во Скопје, за нострификација, за што добила и решение за нострификација.

По ова, во 2003 година пријавената како вистински ги приложила фалсификуваната диплома и добиеното решение за нострификација во општинското основно училиште „Кирил и Методиј“ во село Романовце, Kумановско, каде од 6 октомври 2003 година па до 2009 година ` биле изготвувани договори за работа со заснован работен однос на определено работно време. Во октомври 2009 година добила договор и одлука за трансформација на работен однос од определено на неопределено работно време. Со наведените дејствија пријавената се стекнала со противправна имотна корист во износ од платите што ` биле исплатени од буџетот на државата за наведениот временски период.

Крими техника: Со што биле стрелани момчиња и рибарот кај Смилковското Езеро?

Со две пушки калашников и еден пиштол биле усмрттени четирите момчиња и рибарот кај Смилковското Езеро, на 12 април 2012 година. Ова било утврдена со вештачењето на Крим техника во МВР,  а денеска на судското рочиште за “Монструм”, го појасни крим техничарот Неџат Скулиќ.

Како што рече сведокот во телата на момчињата завршиле 21 куршум, од кои 13 чаури биле испукани од две пушки калашников, а 8 чаури од пиштол долга деветка.

На местото на злосторството биле пронајдени и 8 испукани проектили. Сепак оружјето со кое беа убиени децата и рибарот никогаш не беше пронајдено.

Вештакот исто така напомена дека една од пеестината чаури кои биле испукани кај една фарма во Белимбегово во 2009 година се поврзува со испукана чаура кај Смилковското Езеро. За инцидентот кај Белимбегово на шестгодишна казна затвор е осуден Фејзи Азири обвинет и во случајот “Монструм”.

Си ја убил сопругата, па пукал среде улица

Педесет и тригодишен тетовец синоќа околу 22 часот и 30 минути смртно ја застрелал со пиштол својата една година помлада сопруга по што избегал, информираше портпаролот на СВР Тетово Марјан Јосифовски.

Според неговите првични информации, настанот се случил во куќата на двајцата сопружници на улицата „Љуботенска“ во тетовската приградска населба Мала Речица. По застрелувањето на сопругата тетовецот излегол од куќата по што пукал и кон такси возило, но никого не погодил по што избегал.

Полицијата презема интезивни активности за негово пронаоѓање и приведување. На местото на настанот увид извршиле јавен обвинител и екипа на СВР Тетово, а повеќе информации за настанот се најавени во текот на денот.

Велешанец починал по пад од височина од својот двор

Седумдесет и двегодишниот Б.Ѓ.(72) од Велес починал вчера откако се лизнал додека ги полевал дрвјата во дворот и паднал од висина од околу 10 метри на задниот дел од куќите на неговите соседи.

Како што соопшти МВР, настанот бил пријавен вчера околу 08.40 часот, а се случил на улица „Богдан Прличков“ во Велес.

- Екипа од Итната медицинска помош и полициски службеници го извадиле Б.Ѓ. од непристапниот терен, по што со возилото на Итната медицинска помош бил пренесен во болницата во Велес, каде била констатирана смрт, наведуваат од МВР.

По наредба на јавен обвинител, телото на починатиот било предадено на семејството за погреб.

Популарно