ЧАДОРОТ стана симбол на отпорот против промената на името, идентитетот и уставот

Конечно дојде и тој ден. Македонскиот народ искочи на улица без политичка партија, во одбрана на своето! На снег, на студ, ЧАДОРОТ стана симбол на отпорот против промената на името, идентитетот и уставот.

Не сакам да шпекулирам со бројки, никогаш тоа не бил мој фазон, но вчера во Скопје најмалку 10.000 Македонци го изненадија светот, ги изненадија нашите политичари, па дури и медиумите. Никој не очекуваше ваков одзив. Дури ни организаторите не очекуваа толку народ на такво невреме. Но, на бурата со бура се одговара, а токму тоа вчера се случи. Мирно, достоинствено, без партиски пароли ... црвено жолто, со љубов и верба, Македонците порачаа дека нема предавање без борба, а борбата до прва следува. Следната рунда е веќе во недела, на 4ти Март (13:00 часот), во 14 светски метрополи и повторно во Скопје. Овој пат на плоштадот Македонија под „Воинот на коњ“. Воинот кој пред 3 века ја покори Грција, сега може да биде метафора за нова победа на Македонците. Од нас ќе зависи. Од оние 10.000 Македонци од вчера, но и од другите кои вчера не можеа да помогнат. Битката е започната, исходот ќе го решиме самите. Секој за себе, секој од себе. Без лидери, без политика и партии. Заедно, обединети под едно знаме. МАКЕДОНСКОТО.

И додека Грција и Европа изненадено пренесуваат за новата ситуација на терен, додека збунето го гледаат нашиот измачен народ како излезе од апатија во одбрана на своето, македонските политичари останаа сами. Од другата страна на преговарачката маса, без никаков допир со оние кои ги гласаат и чии интереси мора да ги застапуваат. Не е тоа ништо ново. 27 години на политичката сцена во Македонија не се појави ниту еден политички субјект кој имаше храброст да застане пред и со народот! Затоа сме каде што сме. Дури и оној кој постојано се фалеше со подршката од народот и кој добиваше и по 63 пратеници, кога дојде моментот да застане во одбрана на Македонија, го потпиша „Пржино“. Одби да сноси одговорност за сите свои грешки и го остави народот сам да си ја брани државата. Но, секој ќе си ја добие својата казна или награда. Така ќе биде и со сегашните лидери на државата, затоа што на крајот, народот решава кој е патриот, а кој предавник. Не помагаат ПР спинови, не помагаат ниту тапкања по рамо од странци, ниту деманти. Рекол премиерот за Ројтерс дека предлозите се негови или на Нимиц, сеедно е. Искрено, со неговиот англиски и не би зачудило ако не се разбрал со новинарот. Ја не знам како тој воопшто преговара со Грците и Нимиц, ако воопшто некој нешто го прашува. Едно е да не ти текне некој збор, но да измислиш нов, е тоа е веќе ново ниво на антилингвистика. Дрскоста оди до таму што истиот тој „Енглез“ во истото интервју ни го објаснува значењето на англискиот збор „nationality“. На истиот ден кога Македонците сами излегоа на снегот да се борат за опстанок, Заев лаже дека промена на националноста значи промена на државјанство и сето тоа без промена на Уставот?!!! Истиот ден градоначалникот на Струга со помош на СДСМ го крши Уставот со промена на статусот на општината, со што Албанскиот станува втор официјален јазик! Неколку дена претходно вицепремиерот Османи решава да не ја преставува Македонија на балсканска средба, затоа што Косово не е покането на истата, а Заев го подржува во истото! Поминаа 27 години, а Албанија не ја признала Македонија под уставно име, но Османи нема проблем со тоа. Немал ниту еден политичар од албанскиот блок во Македонија, но за Косово срце даваат. Во Македонија живаеат, работат, земаат плата, но името одма би го смениле без референдум, а за Косово ако треба и во војна би влегле! И ова е ок за Заев (Груевски)? Како што е во ред да го земе во коалиција човекот кој го исмеваше на секој предизборен митинг. Амди со себе носеше морков и зајак, за да се подбива со Заев, но на Зоран тоа не му пречи кога е во прашање ВЛАСТ и поголемо мнозинство во собранието. Бајрам барем си призна, дека неговата цел секогаш е власт и ништо друго. Која е целта на Заев? Веќе е очигледно и ќе стане уште појасно, дека целта на премиерот не се поклопува со онаа на народот. И тогаш ли ПР тимот ќе спинува и демантира? Тоа ли е планот Б, кога планот А вчера тресна од земја?

Колку само нашите политичари живеат во некој паралелен свет, без никаков допир со реалноста, зборува и денешната изјава на оној кој го ословуваат како претседател на Собранието, Џафери. На неполни 24 часа по протестот, на кој народот кажа дека нема апсолутно никаква доверба во ниту еден политичар или политичка опција, тој денеска зборува за меѓупартиски средби со меѓународно посредство! СДСМ и ВМРО ДПМНЕ ќе се договореле за законот за јазиците (албанскиот јазик)! Ќе се договореле да го дополнат деловникот во собранието! Истиот оној при чиј „избор“ се поништи деловникот, сега ќе го дополнува?! ДПМНЕ да се врателе во собранието и што? Во чие име ќе решаваат сите 120 таму? Уште ли не им е јасна пораката или глумат дека не се случило? Ајде во недела да им објанисме. Повторно мирно и достоинствено, без инциденти и само под едно знаме! Сите заедно, без партии, без политичари, без сендвичи, без скриена добивка и профит. СЕКОЈ за себе и сите за Македонија!

П.С. Иако, директна поврзаност во настаните нема, сепак сето ова започна со двестате интелектуалци и нивниот проглас. Ви благодарам што му покажавте на народот дека некогаш и 200 се доволно за да почне лавината.

Автор: Пацифист

СЈО играриите со притворот на Мијалков може скапо да не чинат сите, а најмногу судот кој одработува

Специјалната јавна обвинителка Лиле Стефанова може да има многу желби! Желби рој, ама, за тие желби да станат реалност, некој треба и да ги исполни, да ги реализира. Во случајот со новоопределениот притвор на Сашо Мијалков, желбите на Лиле ќе не чинат сите скапо, а посебно судот, кој „одработи“ без приговор.

Да ве потсетам, Лиле Стефанова е истата обвинителка, која, откако дојде од Радовиш во Скопје, ја запозна јавноста по неколку бомбастични случаи, како „Ликвидација“, „Шпион“, по еден помалку познат со неутврден идентитет за еден мигрант, за кој си играа пинг-понг со тоагаш судечката судијка Весна Димишкова, со која сега гледаме дека се во „љубов“.

Не ви ја споменувам Лиле случајно, зашто за „Ликвидација“ во кој беше притворен новинарот Томислав Kкежаровски, поминавме значајни денови на протести, маршеви, на еден колку што се сеќавам, дојдоа и Зоран Заев, Радмила Шеќеринска, Тито Петковски или цел тогашен СДСМ, а сега Влада. Но, не протестиравме за поддршка на Лиле Стефанова, туку напротив за нејзините (не)законски постапки. Обвинителката стефанова, која сега е дел од СЈО, деновиве пак е во фокусот на вниманието, со постапки кои се граничат помеѓу правното и здраво-разумското расудување, а се се сведува на калкулантство, кое само може да му штети на македонскиот правен систем, каков и да е тој.

На 9 ноември, на предлог на Стефанова, беше определен притвор за 5 лица во случајот „Империја“, каде што второобвинет е Сашо Мијалков. Таа ноќ, која заврши околу 3 часот наутро со определените притвори, Сашо Мијалков не беше ниту повикан на распит, а не пак да му биде определен притвор.

Се сеќаваате, во деновите подоцна и Катица Јанева и Лиле Стефанова, не уверуваа дека нема потреба за притвор кај Мијалков, бидејќи има доволно гаранции (јавување во суд и одземен пасош). Но, 10 дена подоцна, Саш Мијалков заврши во затвор поради „опасност од бегство“ и затоа што имал имот од 8 милиони во земјава и 3 во странство, на сметки на други лица, блиски до него!?

Во 21 век, со цела апаратура на истражни органи, агенции и меѓународна помош од домашно и меѓународно финансиско разузнавање, да дојдете со ваков предлог дека „парите на комшиите се на Мијалков“, секој сериозне судија треба на клоци да ги исфрли обвинителите преку прозор, за да не им текне втор пат да се осмелат да предложат нешто слично.

Посебно што, притворот го бараат на судење кое е во тек и каде што сите мерки за претпазливост се почитувани.

Тука, судијката Џенета Бектовиќ, која 2 години не го почнуваше судењето, зашто чекаше да узреат „црешите во Грција“ паралелно со екстрадицијата на Горан Грујевски и Никола Бошковски, преку ноќ го прифати предлогот и оцени дека ќе бегал, небаре парите Мијалков ги стекнал „вчера“ а не кога било познато обвинението и тоа било познат факт.

Против Мијалков е покренат обвинителен предлог, но бидејќи Таргет и Тврдина се споени, малку похрабри правници имаат дилема дали судијката Бектовиќ, која суди во Совет, можела сама да го донесе решението, вон претреес, на непроменети околности, а плус на крајот под решението да се потпише пак како Претседател на совет?!

За оваа правна дилема можеби ќе гукнеше нешто Кривичниот совет на Апелациониот суд до кого Бектовиќ му даде право на жалба на Мијалков, но вчера му го ускрати тоа право.

Во овие 10 дена, адвокатите на Мијалков поднесоа жалба, предметот стигнал во апелациониот суд, бил даден на милење во СЈО кај самата Лиле Стефанова (најголемиот дефект во Законот за СЈО, немање на двостепеност во постапувањето од различен обвинител) и кога се очекуваше на почетокот на оваа седмица да биде закажана јавната седница и да се разгледа жалбата Џенета Бектовиќ, на предлог на Лиле стефанова го укина решението за притвор, но Мијалков не излезе на слобода, макар и формално на 1 минута помеѓу едно и друго решение, зашто се побара негов притвор, по повеќе основи за „Империја“.

Предметот, за кој реков дека и Јанева и Стефанова не убедуваа дека е покриен со мерки, но, сега покрај опасноста од бегство, притвор е определен и за влијание врз сведоци. Што би рекол еден избеган политичар, да сакал Мијалков да влијае на сведоците, ич немал време да го стори тоа од 9 до 20 ноември, па моорал да падне во затвор, за да се сетат дека може да влијае на сведоци?!

Но, да ги разгледаме желбите и честитките што Лиле ги испорачала, а судот, иако не смеел своерачно ги прифатил и потпишал.

Во време кога предметот е по жалба пред Апелациониот суд, и кога нема списи пред себе, судијката Џенета Бектовиќ ниту можела, ниту смеела да носи решение со кое го укинува притвор. Посебно што и таа и Стефанова знаеле дека судот во краток рок ќе одлучува по жалба и на ваков начин му ги врзале рацете и направиле жалбата да биде беспредметна.

Но, сега Апелациониот суд треба да најде сили, да одлучи мериторно, да ги констатира повредите во решението на кои се повикува одбраната, бидејќи тие се важен сегмент за евентуална постапка во Стразбур.

На ваков начин, се минира работата на Апелациониот суд, се покриваат сопствените грешки, па излегува дека секој може да биде притворен за било што, а тоа решение да не биде контролирано во судска постапка (задолжителен втор степен) што е класична злоупотреба и основ за одговорност и за судијката и за обвинителката. Правото на жалба е неприкосновено, истото не може да се ограничи, но во овој случај, Џенета Бектовиќ го сторила токму тоа.

И сетоа тоа се случувало во саботатта, на речиси 5 минути пред очекуваната одлука на Апелациониот суд.

Па, откако Мијалков бил на фиктивна слобода, ама чуван со специјалци во судот, на ново барање на СЈО, преку истата Стефанова бил изведен и распрашаан пред судијката на претходна постапка Весна Димишкова, која доцна по полноќ, во саботата кон неделата му определила притвор за „Империја' поради опасност од бегство и влијание на сведоци.

Значи, во Таргет-Тврдина веќе нема да бега, ама ќе бега во Империја?

И двете судијки и двете решенија се донесени во сабота, во нерабтен ден и време, иако ништо не укажувало на итност, ниту истекувал притворот со час и датум, ниту имало потреба да се изведат било какви дејствија, што би оправдале итност во постапувањето (итноста во постапување по притворски предмети овде не може да биде императив за преземање на вакви дејствија).

Фалелео само уште да свикаат и Кривичен совет ноќта кој ќе ја потврди одлуката за се да биде наместено, подмачкано, па дур пропеат први петли, да бидат спакувани сите решенија.

Да сме на чисто, секој треба да одговара за тоа што го направил, ако го направил. И мене ми се исправа коса на глава кога ќе го слушнам името на Сашо Мијалков. бидејќи сум еден од дузината новинари кој многу месеци незаконски, без никаков налог сум бил прислушуван од УБК под негово водство, но тоа не значи дека не треба да реагираме и да се бориме за почитување на процедурата до остварување на правдата.

Без процедура како светост, не може да има правда!

Затоа, апелациониот суд во Скопје, сега треба да се одважи и со мериторна одлука да им одржи една „воспитна“ лекција на судиите од единица, бидејќи ваквата злоупотреба на правото не може да се толерира. Овој преседан може да стане правило, бидејќи сега СЈО си најде судии сојузници кај кои им поминува дека и „магарето лета“, но токму тоа треба да биде аларм дека треба итна и поширока реакција од стручната фела за враќање на правото преку процедура. а Судскиот совет, еве му идеална шанса, по службена должност да испитува нестручност и несовесност кај судиите.

Сведок.орг.мк

Миленко Неделковски удри по Груевски: За се е тој крив!

„Вчерашниот протест на ВМРО ДПМНЕ“

Вчера вечер бидна и почетокот на излегувањето на улица на ВМРО ДПМНЕ.

Бројка на излезност, како за старт, сосема задоволителна. Без автобуси, сендвичи, сокчиња или 50 соросови евриња.

Врвот од партијата напред, со традиционално ремплање со рамиња кој да е поблиску до Мицкоски. Народот позади со прашања и дилеми, ќе почне ли конечно битката за уривање на фашистичката диктатура. И прашање број два: ќе се возобноват ли вистинските христијански, вмровски, македонски вредности во таа партија. Или како предходно, ќе остане интересна групировка за државни позиции со можност за чорбиче за пеевче.

Очебијно беше НЕ присаството на сите довчерашни запенавени повикувачи дека “за Македонија се работи, не за личност организатор на протести“, кој не се појавија токму заради личност!!! Лудило, тотално.  Работава, дојдете излезете кај мене на протест, ама на негов протест не излегувам. Себично, антимакедонски. Дијаспората ја прашувам: каде ви беа Пимен и Тодор Петров вчера со народот? Ги напунивте со пари, вие во Штудгард на Пимен и Џип му купивте, ама овдека он си е близок со Заев и со Бејли. Ги немаше и блокирачите Бачев и Филип.

За среќа, обичниот народ, оние кои излегуваа и за Заедничка Македонија, и за Бојкотирам, и за Блокирам и за 27-ми, и за на Тодор говорите, и за на Христијан маршовите – е ти, обични наши сограѓани си беа на улица и синојка. Тоа се вистинските борци, партизани, комити, фаланга…

[Фотографија на Violeta Petkovska.]

ВМРО ДПМНЕ вчера излезе на протест, ама “најголемиот вмровец“ според сопствено признание – Нино Тодоров, не беше ниту со својот народ, ниту со својата партија, ниту со своите сопартијци!!! Од што се уплаши “Министерот Смрт“, кој за да одбегне кривична одговорност од Кацарски судството стана “Министер дојде живот“?! Ако е стварно најголемиот вмровец, што се исплаши баш од ВМРО?!

Вчера го немаше и Мите Лимунада, за да пронајде “кој е тој маж што ќе го избрка од ВМРО ДППМНЕ“! Вели имал градоначалнички обврски! Истите обврски ги немаше неколку дена порано за да тркне до хотел Сириус во Струмица на состанок со Заев!!!

Го немаше вчера и Љубен Арнаудов, кој себе се гледа како војводата Христо Узунов, ама всушност е само еден Коте од Руља. Го немаше и Сашо Василевски кој бил горд на своето гласање, а го немаше и плачкото Крсте Муковски. Ја немаше и снаата на Мијалков, госпожа Александрова.

Ах, да. Ја немаше и Камчевска – Милевска, на која толку важно и беше извинувањето до деранжираните комшии, ама ич не и е гајле за уништувањето на еден цел народ.

Сашо Мијалков беше оправдано отсатен.

Доколку овие ликови беа сигурни во своите тврдења, потези, изјави, гласања, вчера можеа да се појават пред Беко, па на маршот кој одеше покрај Вранглер и Агрохемизација, заврши пред Женска гимназија (локации и термини познати на изумрената  раса стари скопјани).

Јас, на пример, отворено го критикувам ВМРО ДПМНЕ за потезите, раководителите за настапите, пратениците за однесувањето – ама на протестите/маршовите на ВМРО ДПМНЕ излегувам редовно. Оти она што сум го пишал и кажал не е со некоја скриена удбашка или соросовска аѓенда, не е за позиција, не е за спас од кривични гонење – ами е во ИНТЕРЕС НА БОРБАТА ЗА РУШЕЊЕ НА ФАШИСТИЧКИОТ РЕЖИМ ПОСТАВЕН ОД ЏЕС БЕЈЛИ. Кога си без зла намера, чиста ти е душата и мирна совеста.

На протестите не беше и главниот виновник за очајниот кастинг на партијата – Никола Груевски.

Претпоставувам дека му е арно, безбедно и комотно во Будимпешта. Нашите пари за неговата комоција и благосостојба.

Ми пречи, искрен да сум, што покрај целото саблазнување дека “Грујо им го начука“, а Бога ми стварно им го набута својски, се заборава основната причина зошто толкав број предавници седат и седеле во собраниските клупи, државни институции и партиски функции од страната на ВМРО ДПМНЕ.

Чудно ми е што никој и не бара одговорност за изборот на овие луѓе.

Нашиов политички Мурињо, успеа во последните години да го направи најочајниот избор на политички играчи во својот тим. И, никој за тоа не го повикува на одговорност!!! Ниту од партијата, ниту од медиумите, ниту од аналитичарите. Пазете ваму, ај што оваа Аlfa televízió си молчи, ами и сите останати, као нешто анти-вмровски телевизии си молчат. Ни Саки, ни С. Мирчевски, ни Поп Петревски, ни Спец – никој не го покренува тој вапрос. Зошто? Се ли е договорено? Така требало да биде?

Оти Никола Груевски, и НИКОЈ ДРУГ, е одговорен што 10 години континуирано беа министри Нино Тодоров и Камчевска – Милевска. Никој друг, само он е виновен оти само негово е тоа решение. Другите само аминувале.

Само Никола Груевски е виновен за коалицирањето со Лиле Поповска и Павле Трајанов, па малку му беа тие, па и со Амди Бајрам. Само Никола Груевски е виновен за ставањето на добитни позиции на Чедо Саздовски и Владанка Авировиќ. Само тој, и никој друг, е виновен што на добитните места, наместо вмровци со мадиња, беа ставени лигушаана како Нола, Зекир, Владанка, Крсто, Сашо, и другиот Сашо, Љубе, Даниела Рангелова, Лука Кржаловски, Мите Лимунада… Нив ги има избрано лично лидерот. И никој друг.

Од правдата на Кацарски судството Никола може да избега, но историската одговорност, што државата ја предаде и остави на фашисти, а својата армија ја направи група на подмитливи бизнисмени-багабонти – НЕМА ДА МОЖЕ ДА ЈА ОДБЕГНЕ. Не во Будимпешта, ами на Марс со следната сонда на НАСА да отпатува, ова ќе му остане како несакана тетоважа на газот.

Задачата на ВМРО ДПМНЕ, намерно не пишувам раководството, значи задачата на ВМРО ДПМНЕ е да се издигне над предавствата, како што своевремено успеа да го надмине предавството од Љупчо Георгиевски, па од само 6 пратеника за кратко време да успее да ја врати целата сила и да победи на сите можни избори.

Тоа е тешка задача. Во тркалата со кои се движат им се забодени чивии, опструкции, предавници и слиперси има колку сакаш.

Но, тоа не еднаш била судбината на ВМРО и на народот МАКЕДОНСКИ.

Оваа борба е на улица, со лимитирани капацитети, без финасиска помош… За по банкети, приеми, лептир машни, теписи длабоки до глуждови, морски плодови, мерцедеси – си има кадар. Кадар ПРЕДАВНИЧКИ. Борбата на народот е тој кадар да го сруши и набута во затвор, заедно со “нашиве“ кој за брзо време станаа “нивни“.

Миленко Неделковски за Дудинка.орг

Протестите на ДПМНЕ се само алиби за историјата

Последната колумна ја пишував на денот на протестот против промена на уставот организиран од „Бојкотирам“. Од тогаш до денес се случија многу работи, што всушност е тактика на оваа влада. Не верувам дека некој не намерно може да направи волку глупости на дневна база.

Материјал за критикување на Заев и другарчињата и не треба да барам. На секои 5 минути се случува некоја тешка глупост, која во следните 5 минути е уште поголема затоа што актерот се обидел да ја дообјасни или да каже дека не е така. Пример, Шилегов и Макрадули. Министерот не спиел во собрание – читал! А Петре, во свој кафанско, магупски стил, морал да користи мобилен за да го истрпи говорот на Ѓорчев. Не се срами Петре, он е маалски џиљкош, тоа што скопјани го изгласавме за градоначалник не е негова вина. Сериозно, никогаш нема да сфатам, како можеше Скопје да си избере ваков „татко“.  Куќен совет да води во напуштена зграда не би му дал. Туку, не  ми беше Шилегов муабетот, ниту Макрадули, па дури ни Заев. За нив веќе не вреди да се трошат зборови. Ако сеуште има некој кој навистина им верува на било што, советувам сериозни ментални тестови. Муабетот ми е другата страна на политичкава сцена кај нас.

И во времето на владеење на ДПМНЕ јас многу почесто пишував за опозицијата (тогаш СДСМ), па еве и сега повторно за оние кои треба да се коректор на власта, а не се. Моето сфаќање за политиката е дека власта ќе падне во моментот кога опозицијата ќе се покаже како подобра опција. Без разлика дали се предвремени или редовни избори, се додека опозицијата не се докаже како подобар избор, колку глупости и да прави владејачката гарнитура ќе си ужива во фотељата. Така беше со ДПМНЕ 11 години. Во моментот кога СДСМ успеа да ги излаже граѓаните дека се подобра опција, „живот за сите“ а у, дури тогаш падна (иако не ги изгуби изборите) Груевски. Еве и сега во Макеоднија на власт потполно неспособни, самобендисани, арогнатни фашисти, но нема опозиција, нема промени. Макрадули си дреме на раат, а Петре лом праи на КендиКреш и никому ништо. Менуваат име и покрај референдумско НЕ. Бришат АСНОМ од устав. Ќе менуваат учебници по историја. Им кидна Грујо или го пуштија.... Ма да не редам, нема крај! Битно промен НЕМА! А се трудат Заев и другарите. Се од себе даваат, но џабе кога нема опозиција. Кога за (демек) лидер на ДПМНЕ имаш лик како Мицкоски, толку е. Него  сам да го пратиш на избори ќе ги изгуби, па можеби и затоа не ги бара. Не сака човекот избори. Еве и вчера на протесниот марш во Скопје, тој не побара избори, туку кажа дека ќе победел на некои избори. Не на кои, ниту кога, ама ќе победи.  

Во време кога на Македонија и се закнува губење на името, а на Македонците губење на идентитетот, Мицкоски повикува народ на улица за економски теми?! Види Христијан, никој не е толку луд, па ни ти. Јасно е дека ова не се реални протести, туку алиби за историјата. „Еве ние пробавме, викавме народ на улица, ама лошиот Заев си тераше по свое.“  Исто како и во 2004 година и територијалната поделба на Македонија, ДПМНЕ си бара алиби, изговор за утре да може повторно да владее. Не се работи тука за Македонија, ниту за името, за идентитетот, за историјата, туку исклучиво за ситно партиски интереси и власт! Затоа јас не бев вчера на улица. Нема да бидам ни следната среда, ниту таа по неа... Нема да излезам да му плескам со рачињата на Мицкоски додека тој се заканува со тежок пораз на Заев некогаш и негде! НЕ! Ич не ми е гајле кој од вас двајца е на власт, а кој на улица. Ич не ми е гајле кој бира директори и си мести тендери. Дали Анѓушев е новиот Кочан или обратно. Дали Мијалков е со едните или со другите и каде киднал Груевски. Ма не ме занима во која келија лежи Камчев и какво кафе пиеле Заев и Тодоров. Во моментов ме интересира само опстанокот на оваа држава и македонскиот идентитет. ТОЛКУ! Ако Мицкоски е навистина лидер, тогаш нека повика на протест само за тоа! Во спротивно и тој е само соучесник.

Да не се разбереме погрешно, има во Макеоднија многу проблеми. Реално и не гледам сфера во која нема проблем, но сега за мене само овој е важен. Ако успееме некако да го решиме во наша полза. Ако некако падне Преспанскиот договор, тогаш ќе падне и Заев со другарчињата, па дури тогаш можеме да зборуваме за сите други проблеми. Од загадувањето на воздухот, па се до левел 370 на КендиКраш на Петре. Ако Преспаснкиот помине, сите други проблеми ќе треба да ги решаваат Северномакедонците. Јас не сум од нив, па не гледам зошто би се замарал.

Автор: Пацифист

Популарно