11 медицински сестри и болничари останаа без работа

Во осмиот месец од бременоста, по три години работа на клинички, а три месеци пред да и истече договорот на дело, Гордана Јаневска остана без работа. Договорот преку ноќ и станал невалиден, бидејќи така одлучил Управниот одбор на Клиниката за уво  нос и грло. Нема да и биде исплатена ниту февруарската плата. Судбината ја делат уште 11 нејзини колеги. Одлуката им била усно соопштена, без да им бидат врачени отказни решенија.

„Договорите ни истекуваат на 1-ви јуни, но предвреме ни рече одете си, ако имаме потреба ќе ве контактираме, ќе ве вратиме на работа. Мене нормално нема да ме врати бидејќи сум 8-ми месец бремена“, кажа Гордана Јаневска Мишотова, медицинска сестра.

Не се откажуваат од правата, ниту од февруарската плата, особено заради тоа што предвременото прекинување на работниот однос, три месеци пред да им истечат договорите следува во период кога безмалку сите јавни здравствени установи кубурат со средно-медицински кадар. Велат, ќе продолжат да одат на работа, за да не бидат изиграни. Ако не успеат да им го раскинат договорот, се плашат дека ќе ги отпуштат бидејќи три дена по ред не се појавиле на работа.

„Сакаме да откриеме што се крие зад сево ова, да добиеме образложение кое ќе држи место, бидејќи ова е навистина небулозно. Адвокатите со кои разговаравме ни кажаа дека не може да постои таков документ договор на дело, кој е невалиден, незаконски“, кажа Маја Јандриевска, медицинска сестра

Од Клиниката не добивме официјален став, а од Министеството за здравство информираа дека медицинскиот кадар бил ангажиран без согласност од финансии. Двајца од нив со договор за дело на клиниката се подолго од 24 месеци, што исто така е спротивно на законот. Но, бидејќи совесно и професионално ги извршуваат своите работни задачи, веќе се доставени барањата до финасии по што повторно сите 11-мина ќе бидат повикани на работа, соопшти министертвото за здравство.

Весна Јовановска Дојчиновска

Грчки авиони ќе го бранат воздушниот простор над Македонија

Можноста грчкото вoeно воздухопловство да помага во контролата на воздушниот простор (FIR) на Македонија е еден од веројатните договори што ќе се разгледаат.

Според грчката телевизија Open,  како за време на посетата на Алексис Ципрас на Скопје, така и за време на посeтата на министерот за одбрана на Грција, што според истите информации, би следела по онаа на грчиот премиер, јави дописничката на МИА од Атина.

Телевизијата Open објави дека практично, оваа соработка би значело дека доколку се наведе сомнителен случај со непозната авио трага во воздушниот простор на Македонија, тогаш „грчките воени авиони ќе бидат повикани од соседите да се доближат до непознатата трага и да проверат за што станува збор”.

Според телевизијата, станува збор за вообичаена пракса меѓу земјите сојузници на НАТО, кога една држава ги нема неопходните средства, тогаш друга помага. Ваква пракса постои за FIR на Албанија и Црна гора, каде што помагаат Грција и Италија.

Како што веќе објави МИА, посетата на Алексис Ципрас на Скопје се планира за почетокот на следнот месец, а иако грчките медиуми го споменуваат 2 април како можен термин, сепак според информациите на дописничката на МИА од Атина, точниот датум се уште не е одреден.

Самиот Ципрас, при обраќањето на економскиот форум во Делфи рече дека во Скопје ќе допатува со бизнис делегација, но и министри од неговата влада.

Според Open, неколку дена по посетата на Ципрас на Северна Македонија, во Скопје ќе пристигне министерот за одбрана на Грција , Евенгелос Апостолакис за да се разгледаат можностите за билатерална одбранбена и воена соработка, како што се заеднички воени вежби, размена на студенти од воените академии и сл.

Заев призна: Ги амнестиравме зошто ни трбаше 2/3 мнозинство за „Преспанскиот договор“

Премиерот, Зоран Заев, денеска изјави дека нема најави за нова амнестија, ниту од Министерството за правда, ниту од претседателот, кој, како што рече, нема повеќе законска можност за тоа.

Како што рече Заев, Законот за амнестија на обвинети за настаните од 27 април, беше донесен во моменти кога беше потребно двотретинско мнозинство за уставните измени.

„Нема потреба повеќе од таа работа, нема такви случаеви. Ниту некој планирал ниту било што. Законот за амнестија се случи во рамки на помирувањето, тоа е многу сериозен процес, кога на државата и требаше двотретинско мнозинство, јавно го кажувам тоа и не бегам од тоа. Верувам дека парламентот нема потреба повеќе да посегнува по вакви работи затоа што овој случај беше јасно издиференциран, каде се одделија сите кои учествуваа во организација на насилство, од оние кои беа заведени во таквиот случај. Не верувам дека никој од институциите, ниту Министерството за правда, ниту претседателот, ќе отвори ваков случај на амнестија – рече Заев.

Популарно