Ѓорчев: Со пенкало ја напишав крвната група на дуксерот на Села

Кога по една-две минути туркање и пробивање низ толпата, пратеникот на ВМРО-ДПМНЕ Влатко Ѓорчев влегол во прес-салата и ги видел раскрвавените пратеници, нападите кон нив и решил да застане пред нив и да ги брани. Вака започна сведочењето на пратеникот на судското рочиште за обидот за убиство на Зијадин Села.

И тој бил повреден, но не многу, бидејќи како што кажа имало и такви кои поминале полошо.

– Сватив дека целиот периметар пред нив не можам сам да го покријат иако рацете ми беа раширени и почнав да повикувам луѓе кои ги познавам или било кој што сака да помогне да се обидеме да ги одбраниме заеднички – рече Ѓорчев и набројуваше лица кои ги повикал да застанат со него во заштита. Тука тој го посочи еден од десетте обвинети во случајот, Александар Јаневски Тошта. Ѓорчев рече дека Тошта цело време бил таму додека ги бранеле пратениците.

Пратеникот кажа и дека Тошта бил еден ос тое луѓе кои застанале на вратата од прес-салата за да спречат нови луѓе демонстранти да влезат.

Ѓорчев рече дека на почетокот го видел по лидерот на Алијансата на Албанците во ќошот.

– После тоа не знам што се случуваше со него, но мислам дека тој беше лицето кое го видов на подот пред мене. Направив неколку чекори напред видов дека имаше некој на подот, висок човек, но се вратив назад затоа што требаше да бранам 15-20 луѓе позади мене. Јас бев тој кој координирав на некој начин, викав пополни од лево, пополни од десно – раскажуваше Ѓорчев прашан од одбраната.

Меѓутоа, тој на прашањата на обвинителот одговори дека не му е познато како Села од групата пратеници завршил во рацете на напаѓачите.

Пратеникот во судница движејќи се и објаснувајќи со рацете демонстрираше каде се наоѓал во прес-салата, како со раширени раце ги бранел пратениците, колку чекори направил напред за да види што се случува во турканицата каде лежел Села…

Во неговото долго сведочење, тој кажа дека кога видел дека ходникот е чист, им рекол на пратениците да одат по него и ги одвел во неговата канцеларија.

Според неговото сведочење, тој Ѓорчев цело време во Собрание бил растрчан, одел до бифето да земе пакети со вода за пратениците, им покажувал на полицајци каде се наоѓаат канцеларии во собранието, се обидувал да спречи демонстранти да влезат во ходникот кој води кон канцеларијата на претседателот на Собранието.

– Чувме дека Села е потешко повреден и е во канцеларија на вториот или третиот кат. Тогаш заедно со Никола Тодоров, медицинската екипа, мислам дека имаше уште некој, отидовме таму – рече Ѓорчев за тоа кога повторно го видел Села.

На лидерот на Алијансата на Албанците тогаш му бил облечен сив дуксер, Ѓорчев се обидел да разговара со него, но Села едвај зборувал. Пратеникот сакал да му каже дека ќе биде евакуиран, а го прашал и која крвна група е за да знаат во болница во случај Села да изгуби многу крв.

– Со пенкало му ја напишав крвната група на дуксерот за ако затреба да знаат во болницата – рече Ѓорчев.

Имало две опции за да го евакуираат. Едната била на раце да го однесат и да префрлаат до градска болница, а другата, како што всушност и направиле, била со полициско возило преку гаражата да го однесат во државна болница.

Ѓорчев требаше да сведочи во четвртокот, но бидејќи нема да биде во државата беше повикан денес да сведочи. Судењето ќе продолжи во четврток кога ќе се сослушуваат други сведоци предложени од одбраната.

Пендаровски домаќин на Ифтарска вечера

По повод Рамазанските пости и во пресрет на големиот муслимански празник Рамазан Бајрам.

На вечерата присуствуваа претставници од државно-владиниот врв, бизнис заедницата, претставници на верските заедници, претставници од академската заедница, од политичките партии, медиумите и граѓанските организации, како и претставници на дипломатскиот кор, информираа од Кабинетот на претседателот.

Согласно исламските верски обичаи, Поглаварот на Исламската верска заедница Реис-ул-улема Шакир ефенди Фетаи ја одржа завршната молитва.

„Најсветиот месец во Исламот, Рамазан, е време за духовно закрепнување, за обновување на релациите со роднините и пријателите, но и за милост и солидарност кон немоќните. Како што рамазанскиот пост е лично искушение на внатрешно преиспитување на поединецот, така Ифтарската вечера е заеднички чин на социјална правда бидејќи подразбира правење место на трпезата и за оние кои имаат помалку. Тоа е особено важно во време на глобални кризи кои најмногу ги удираат најранливите и најсиромашните“, кажа Пендаровски на вечерата.

Но, освен за продлабочување на верата во животот на верникот, Ифтарската вечера е и можност за продлабочување на соживотот во македонското општество.

„За нашите предци немало поголема чест од тоа, некој со различна вера од нивната, да ги покани на празнична трпеза. Кога муслиман кани на Ифтар, или кога христијанин подарува велигденско јајце, тоа е начин да каже дека ја почитува твојата различност и те прифаќа таков каков што си. Тоа го правиме и ние вечерва“, додаде Пендаровски.

Вработените во здравството најавуваат протест на 8 април

Вработените во здравството нема да добијат усогласување на платите со порастот на минималната плата поради непотпишувањето на анексот на колективниот договор. Поради тоа на 8 април најавуваат протест што ќе почне од пред зградата на Сојузот на синдикати на Македонија, а ќе заврши пред Министерството за здравство.

- Протестот ќе биде токму во насока на изразување незадоволство од непотпишувањето на анексот на колективниот договор којшто веќе беше завршена работа, но поради политичките игри остана непотпишан и со тоа повеќе од 20 илјади работници во здравството остануваат без усогласувањето на нивните плати со порастот на минималната плата, соопшти денеска претседателот на ССМ Слободан Трендафилов. 

Според информациите на ССМ, освен вработените во здравството, усогласување на платите ќе нема и во образованието и во Министерството за внатрешни работи.

- Усогласување со порастот на минималната плата ќе нема и во образованието поради непотпишување на колективниот договор. Според моите сознанија, и вработените во Министерството за внатрешни работи нема да добијат усогласување на палтите, меѓутоа управата на локално ниво, правосудството, Правобранителството, јавнообвинителската служба, судската служба и.т.н. ќе добијат усогласување имајќи предвид дека Синдикатот на УПОЗ потпиша низа колективни договори каде ова право е утврдено меѓутоа и законските решенија, кои се обидуваа на мала врата да ги сменат пред објавата на висината на минималната плата, го овозможуваат тоа, истакна Трендафилов. 

„АЛКАЛОИД“ ПУШТИ ВО УПОТРЕБА НОВ КАПИТАЛЕН ПРОЕКТ ВРЕДЕН 19,4 МИЛИОНИ ЕВРА

Новите капацитети за производство на цврсти фармацевтски форми, со површина од 6.200 м2, се најкрупниот инвестициски потфат на компанијата во изминативе две децении

Во насока на посветеноста за постојана модернизација и за проширување на производствените капацитети, производствените волумени и на асортиманот, „Алкалоид“ АД Скопје ја комплетираше реализацијата на својот најголем инвестициски потфат во последните две децении – новиот погон за производство на цврсти фармацевтски форми Таблетно одделение 2.0 и придружните технички простории.

Новиот техничко-технолошки капацитет, чија цел е повеќе од двојно зголемување на обемот и поголема флексибилност во производството на цврсти фармацевтски форми, зафаќа површина од 6.200 м2 (производствени и технички простории), а за него „Алкалоид“ вложи вкупно 19,4 милиони евра. За изведбата на овој објект, започната во април 2021 година, беа ангажирани 30 домашни и 16 странски компании, а градежните работи и опремувањето се одвиваа под водство на стручните служби на „Алкалоид“ АД Скопје. Просториите се изведени во согласност со строгите норми за добра производствена пракса, а сите процеси се целосно интегрирани и дигитализирани, со автоматско генерирање на сите податоци од процесните контроли.

Во новиот погон за производство на цврсти фармацевтски форми ќе се врши производство на таблети, филмувани таблети, капсули и на двослојни таблети, кои за првпат се воведуваат како технологија за производство во Македонија. Станува збор за таблети што содржат неколку активни супстанции со различни хемиско-физички својства или со различен начин на ослободување на состојките, кои внимателно и прецизно се дозирани, но физички одделени со соодветно обезбедена стабилност и делотворност, овозможувајќи им на пациентите целосната терапија од неколку лекови да ја земаат само преку една таблета. Опремата за производство на цврсти фармацевтски форми е набавена од светски познати производители на опрема од овој вид: GEA (опрема за влажна гранулација), Alexanderwerk (опрема за сува гранулација), Lodige (опрема за хомогенизација), Fette (преси за таблети), Glatt (систем за филм-обложување), De Lama (автоматска машина за перење контејнери) и други.

Со пуштањето во употреба на новата техничко-технолошка единица за производство на цврсти фармацевтски форми двојно се зголемува производствениот волумен, па така, наместо досегашниот капацитет од 2 милијарди таблети годишно, моменталниот проектиран производствен капацитет е повеќе од 4 милијарди таблети годишно.

„Во динамична индустрија каква што е фармацевтската пласманите обично кореспондираат со инвестициите, вештините и знаењето, кои во изминативе две децении ги насочивме кон градење на модерно и конкурентно производствено портфолио. Нашата цел останува да се диференцираме преку знаење и развој на производи со додадена вредност, а на овој курс сме решени да останеме и во иднина, работејќи на натамошна глобализација на брендот ’Алкалоид’, достоинствено и посветено, со практикување на високи етички стандарди, кредибилитет и професионален пристап во севкупните операции“, изјави Генералниот директор и Претседател на Управниот одбор Живко Мукаетов на официјалното пуштање во употреба на новиот оддел, кое се одржа во присуство на високи претставници на менаџментот на компанијата, како и на претставници на медиумите од земјата и од регионот.

Ова е еден од најкрупните инвестициски проекти на „Алкалоид“ АД во изминатите две децении. Компанијата во 2005 година имаше пласмани од 53,1 милиони евра, а во 2023 година прикажа консолидирани пласмани од 268,3 милиони евра. Следствено на овој петкратен континуиран раст, во текот на изминатите 15 години беа реализирани инвестиции во вредност од над 220 милиони евра.

Фармацевтските производи на „Алкалоид“ се присутни на пазарите во повеќе од 40 земји во светот.

Популарно