Мицковски: Кој сум јас да му кажам на Христијан Мицковски дали да гласа или да БОЈКОТИРА?

По долго чекање, конечно синоќа на полноќ го добивме официјалниот став на ВМРО ДПМНЕ за референдумот, преку обраќањето на Христијан Мицкосвки до јавноста. Како и што се очекуваше, Мицковски не кажа ништо ново, ништо драстично, едноставно не кажа! ВМРО ДПМНЕ не застана со народот, не превзема лидерска одговорност што се очекува од партијата која на последните парламентарни избори освои најмногу гласови (посебно кај македонското гласачко тело), туку го повика народот сам да си го понесе товарот. Сличен потег како оној на Груевски по потпишувањето во Пржино и предизборната кампања во која бараше 63 пратеника од народот кој тој го изневери.

Сепак, да бидеме реални, исходот, односно ставот на Мицковски и раководството на ДПМНЕ беше очекуван и тоа од неколку причини.

1. Судските процеси против голем дел од „бившото“ раководство на партијата. Бившото е во наводници, бидејќи по вчерашмниот говор на Мицковски, јасно е дека тој не е лидер на најголемата македонска партија во државава. Освен судските постапки против Груевски и другарите, постојат и шпекулации за отварање на нови, па дури и за Мицковски. Ретко се случува, но ете и Заев некогаш ја зборува вистината. Премиерот, по преговорите со ВМРО ДПМНЕ, неколку пати кажа дека единствено барање на Мицковски било амнестија на обвинетите од прислушкуваните материјали. Односно слобода за „бившото“ раководство.

2. Притворените пратеници обвинети за тероризам на 27 Април.

3. Силниот меѓународен притисок. Сите знаеме дека посетата на Меркел не беше само за да се убеди народот да излезе на референдум, туку и да се притисне Мицковски.

Затоа Мицкосвки половина час зборуваше колку договорот со Грција е лош, штетен, противуставен, за на крајот да не повика на бојкот. Не рече дури ни дека тој ќе бојкотира. Еве не мораше да го повика членството или народот да бојкотира, можеше само да каже дека тој на 30ти Септември ќе си седи дома. Ќе прави ајвар. Ќе оди на планина. Ќе бере детелинки.... само нема да гласа. Но, Мицковски и ДПМНЕ не го направија тоа. Оставија народот сам, без нив, да донесе одлука и сам, без нив, да ја понесе одговорноста. Исплашени за својата слобода, иднината на партијата и веројатноста никогаш да не дојдат на власт, Мицковски и ДПМНЕ ја донесоа единствената МУДРА ОДЛУКА за ПАРТИЈАТА. Можеби кобна за МАКЕДОНИЈА, но се надеваат мудра за ДПМНЕ. Каков ќе биде исходот од референдумот ќе дознаме за 20 дена, но уште денеска е јасно дека политичката кариера на Мицковски заврши вчера. Ако референдумот помине, ДПМНЕ на следните избори ќе доживее дебакал, а ќе ја загуби и позицијата претседател на државата. Ако референдумот падне, Мицковски ќе ја загуби лидерската позиција во партијата пред следните избори. На негово место, најверојатно ќе дојде оној кој ја напушти седницата на партијата при изборот на Мицковски. Во моментов едиснтвениот пратеник на ДПМНЕ кој јавно го бојкотира референдумот.

Лидерот на ДПМНЕ потфрли и во уште еден сегмент, во кој потфрла уште потпишувањето на договорот во Преспа. Не кажа што ако референдумот падне. Да и ДПМНЕ е за во НАТО и ЕУ, но како? Ова прашање му го постави Заев на минатиот дуел на МРТ и Мицковски немаше одгвор, но вчера собра сила да побара нов дуел?! Зошто? За да пак нема одговор? А што ако премиерот го праша дали ќе гласа на 30ти? Математички прецизно ќе му одговори дека народот ќе реши? Дека тој (Христијан Мицковски) гласал или не, не решава за референдумот? Кој сум јас да му кажам на Христијан Мицковски дали да гласа и ако гласа како да гласа? Тоа ли ќе му каже? Јас да сум на место на Заев веднаш би прифатил дуел. ВЕДНАШ! Со или без камшикар.

„Слобода или смрт?“ е паролата на ВМРО. „А може нешто измеѓу? Може протекторат?“ е одговорот на Мицковски. Така Комита не бива, господине Христијан. Тоа не е ВМРО! Сега сте само ДПМНЕ.

И покрај ставот на ДПМНЕ, во кој се осудува договорот, но не се повикува на бојкот, секој од пратениците на оваа партија и секој кој во минатото или сега има некаква функција, секој повиден член, во наредниве 20 дена има шанса да го каже својот став. Повторно, не да повика на бојкот, но да каже дека тој бојкотира или дека ќе гласа. Ова реално не е само шанса, туку и обврска. Сите пратеници, бивши или сегашни, министри, функционери, сте биле избрани од овој народ да ја водите оваа држава. Сега кога државата се наоѓа пред преименување, за што и самите сте свесни, ваша обврска е да го кажете својот личен став и својот личен избор на 30ти.

Сепак, има и нешто добро од вчерашното обраќање на Мицкосвки. Не, нема да читам меѓу редови за неговата порака, како најзагрозените симпатизери и членови на партијата. Нема зошто. Човекот имаше микрофон и вниманието на целата македонска јавност. Ако сакаше да повика на бојкот требаше јасно, а не меѓу редови. Позитивното е всушност токму тоа, што не повика. Што сега е јасно дека  #БОЈКОТИРАМ е чисто, неполитичко, граѓанско движење. Зад него не стојат ДПМНЕ. Целта не е спас на обвинетите за криминал членови на ДПМНЕ на чело со Груевски, туку поништување на спогодбата со Грција! Сега БОЈКОТОТ значи БОЈКОТ и за ВМРО ДПМНЕ и Христијан Мицковски.

Кај ќе ви биде крајот ако/кога референдумот ќе падне? А „Комити“?

Автор: Пацифист

И да го претепате Сергеј, пак ќе сте лошо облечени

Пред некој ден за првпат ја погледнав емисијата на Сергеј Варошлија, за која досега читав разни коментари. Фатив како ги коментира посетителите од неодамна одржаниот Моден викенд во градов и можам да кажам дека речиси за сѐ беше во право.

Проблемот е што никој не сака да му ја плеснат вистината во фаца и тоа не јавно, но тоа е ризикот на кој се изложуваме сите што објавуваме фотографии на социјални мрежи или се сликаме по настани, излегувања и слично.

Пред да ја изгледам емисијата читав како е пропалитет кој сака да си ја врати кариерата, како сѐ е млатење празна слама, ваков бил, онаков бил, ќе јадел ќотек.. И некако негледав. Ми изгледаше премногу „драма“.

Но, каков и да е, единствено тој се осмелува да каже каде грешиме во облекувањето, па биле ние познати или не. Зошто некој друг не го направил тоа до сега? Не се сеќавам на емисија каде било посочувано како треба, па особено за јавни личности.

Она што можеби не ми се допаѓа во емисијата се „јавувањата“ на Мерилин Монро или Анџелина Џоли, но за друго човек треба да му симне капа. Во ова општество, каде никој не сака да слушне ниту да прифати критика, тој е истовремено веројатно и луд и храбар да коментира односно, да кажува што мисли.

И од она што се прикажува во неговата емисија, загрижувачки е како американските медиуми и ѕвезди извршиле грозно влијание врз нашата младина, па и оние во средовечна криза.

Можете да го претепате Сергеј, но тоа нема да го смени фактот дека не знаеме да се облечеме, уште помалку да слушаме. Без разлика дали овој човек ви се допаѓа како човек или не, изгледајте една негова епизода, размислете за тоа што го зборува. Можеби на крајот и ќе му речете – благодарам.

Никој не може да му оспори дека е паметен - прави забава, крева рејтинг, дава конкретни забелешки и решенија за тоа како сте/сме облечени и од тоа заработува.

Дали некој ќе прифати или не, останува на личноста и нејзината перципција на нештата.

Бети, од трети 😊

Името, идентиетот и историјата, носети ги, само Груевски не го чепкајте!

Тринаесети Ноември, денот на ослободување на Скопје од фашистите и денот кога Никола Груевски побегна од Македонија. Имаше и уште нешто друго врзано со датумов, ама ете не ми текнува сега.

13ти Ноември, денот кога бугарските и германски нацисти го напуштија Скопје, а на улиците на денеска главниот град со гордост парадираа партизаните. Оние кои неколку години живееја и делуваа по планини, против многу посилниот противник, славеа со светот и народот во Скопје. Не дека го победија големиот окупатор, но беа дел од победниците во најкрвавата војна што историјата ја памети.

13ти Ноември, денот кога како и Германците, Бугарите и Никола Груевски ја напушти Македонија. Груевски владееше подолго со Македонија од нацистите, а на крајот заврши неславно како нив. Човекот кој сакаше да биде запишан како најголемиот премиер на Македонија избга од татковината, токму кога битката се разгорува. Се предаде исто како што ја предаде и премиерската позиција, како што го потпиша пржинскиот договор... без борба и без жртви. Не се сите родени за партизани.

13ти Ноември, денот кога сите зборуваат за екс премиерот и неговото бегство, но има и нешто друго поврзано со датумов. 13ти Ноември и месеците, годините наназад, во Македонија се работи на промена на името и идентитетот. Издржување на затворска казна на Груевски или неговото бегство, никогаш нема да го промени тоа. Во историјата некаде со мали букви ќе пишува за Никола и неговото бегство, но промената на историјата, името и идентитето ќе се учи како главна лекција. Верувајте, нема да бидеме запомнети како генерација која го преживеала владеењето на Груевски, туку како генерација која го загубила единственото нешто за што се бореле сите пред нас. Сето ова денеска и изминативе денови, циркузот со проверување на возилата пред штабот на ВМРО ДПМНЕ е само цртан филм што треба да го оттргне вниманието од она што се случува во собранието на Р. Македонија. Додека ние се смееме на „продажбата на мерцедес С500, заради заминување во странство“, таму се продава нешто што не сме го заработиле ние, туку генерации пред нас, со многу крв.

Додека јавноста се потсмева на Грујо, ние го губиме македонското во нас. Пратениците ги усвоија нацрт амандманите за промена на уставот, одлуките на АСНОМ летаат од уставот, а рамковниот договор од 2001 година станува конститутивен дел од државноста на Македонија. По новиот устав АСНОМци и Илинденци се бореле за Северна Македонија, а Бугарија едвај чека да почне да брише во нашите учебници по историја. Малцинство никаде немаме, но тоа што избегал Груевски е веста! Пред Собрание секој ден протестира една мала група против смената на името, но пред некој ден пред судот за Груевски се собра солидна бројка на луѓе! Која е пораката? Името, идентиетот и историјата, носети ги, само Груевски не го чепкајте? Ете побегна човекот на безбедно, сега што? Мирно ли ќе спиете? Навистина не можам да разберам како е можно по се што минавме во овие 27 години, а посебно последниве 3-4 години, народот во Македонија сеуште да е под наредба на политичките партии. Зарем има меѓу вас луѓе кои сеуште им веруваат на политичарите? Не ли ни беше доволно? Сериозно луѓе, не ви е јасно дека е истиот политичар на власт веќе 27 години? Да, имиња и ликови се менуваат, но шемата е иста. Кради, дели тендери, билдај администрација за гласови на избори, заканувај се, зароби ги медиумите, слушај ги странците само кога твојот живот е во прашање и ЛАЖИ ЛАЖИ ЛАЖИ!!! Или не им верувате, но ги следите затоа што ви ветиле лична корист? Фино тоа, може и ќе го исполнат ветувањето, ама нема држава ако народот не го интересира општественото добро. Нема правна, функционална држава од општество опортунисти. Не оди едното со другото. Ако мислите само на себе, тогаш и не ни треба името, не ја залужуваме историјата, а идентитетот секако ни е променет. Сами одлучуваме, секој за себе. Секој сам ќе мора сам да ја плати цената на својот избор.

Тринаесети Ноември, денот на ослободување на Скопје од фашистите и денот кога Никола Груевски побегна од Македонија. Нема повеќе партизани на улиците по Скопје, а наскоро ќе го избришеме нивните одлуки и од уставот. Ќе се простиме и од Илинденци и секој еден Македонец од историјата богата со окупации и крвави војни. Ќе остане само бегството на „лидерот“ кој сакаше да биде запишан како најголемиот, но генерациите ќе го помнат како првиот премиер кој побегнал од татковината кога требало да се бори за неа.

Тринаесети Ноември денот на два разлини типови Македонци. Победници – партизани и поразени – груевисти/заевисти. Имаше и нешто друго, ама ете не ми текнува сега...

Автор: Пацифист

Доколку ви значи името, уставот, идентитетот, демократијата - „битка“ ќе има

Демократија или соборност е општествено уредување каде што врховната моќ му е дадена на народот и се извршува непосредно преку него или преку негови избрани претставници во услови на слободен изборен систем. Така вели дефиницијата, но реалноста е сосема поинаква.

Зборот демократија го слушаме секојдневно, бидејќи е единственото општествено уредување оправдано од светот и уредување кое го користат најбогатите и најмоќните држави на планетава. „Владеење на народот“, звучи убаво, но дали е така и што кога не е?

Еве уште една дефиниција: Референдумот претставува најзначајна и најраспространета институција на непосредната демократија во светот. Најзначајна!!! Што ако владата и собранието не го послушаат изјаснувањето на народот? Тоа не е предвидено во уставот, бидејќи уставотоврецот не помислил дека е можно на власт да дојде таква гарнитура која ќе оди против одлуката на својот народ, но и поради тоа што нема кој да превземе нешто против владата и собранието. Нема таква институција! Останува само народот! Да, може уставниот суд да ја бутне одлуката донесена од Собранието, но веќе е јасно дека и таа институција тргна против она што треба да го штити - уставот. Уставните судии повеќе од 2 години не се изјаснуваат за уставноста на СЈО и Пржинскиот договор, а дозволија сложено и тросмислено прашање да се појави на референдум. Нема институција во Македонија која си ја работи работата како што треба. Остана само народот, но без владеењето. Како да си го вратиме?

Можам сега да објаснувам на темава од историски апсект и примери од други државни, но тоа само ќе го развлече текстот, а поентата ќе биде иста. Секогаш и секаде, кога народот сакал да си го врати владеењето во своите раце излегувал на улица! Толку! Нема тука некои сложени дефининиции, социјални варијабли или друг пат. Јасно е се, освен можеби зошто нема народ на улица?

1. Народот е задоволен од Преспанскиот договор и менувањето на уставот и идентитетот на Македонците. Можеби и на народот потајно му пречат одлуките на АСНОМ во преамбулата на уставот, па сега сака место нив да стои „прогласот“. Можеби сите сакаме Рамковниот договор да стои рамен со АСНОМ, иако нема никаква врска со конституирање на Р.Македонија. Можеби и не ни пречи што нашата историја ќе почнува од СФРЈ и „одлуката“ на Тито „да ни даде држава“.

2. Народот е незадоволен, ама веќе не му е гајле. 27 години политичари (кои сами си ги гласавме) не доведоа до состојба на апатија и не направија себични. Сега само сопствената полза ни е важна, додека општественото добро и одговорноста за истото ги чувствуваме како терет.

3. Народот е сериозно незадоволен, но нема лидер кого би го следел. Над 5 века Турско ропство, безброј страдења на сите Македонци кои се дигнале против османлиите. Две страшни Балкански војни, две светски војни и комунизмот во СФРЈ го земаа данокот. Пишував пред неколку месеци дека Македонија денеска не може да роди нов Гоце Делчев, а дури и да се појави, нема да стигне далеку во хиреархијата на моќ во државава. Македонецот стана Македонче, а секој што барем малку ќе биде различен ќе биде обоен како националист, тврдокорен, заостанат.

Реалноста е дека над 600.000 граѓани гласаа за промена на името на Р. Македонија. Сериозна бројка, но ни од далеку доволна. Реалноста е дека пред тоа гласање владата ветуваше дека АСНОМ нема да се чепка од преамбулата, ама ете се шалеле. Дали бројката ќе беше дури и помала, ако Заев ги објавеше „нацрт амандманите“ за промена на уставот пред референдумот, можеме само да нагаѓаме, но сега тоа е неважно. Реалноста е дека референдумот падна, а вољата на мнозинството граѓани се гази. Реалноста е дека нема опозиција која ќе застане пред народот и ќе го сопре менувањето на македонскиот идентитет, туку имаме опозија што ќе ќарува политички поени за следните избори. Реалноста е дека сме оставени сами на себе, без лидер! Но, реалноста е дека владеењето на државата, иако одземено од нас, е само наше! Колку и да сме апатични, исплашени, потрошени, само еден помасовен, мирен протест, со барем 10.000-20.000 луѓе на улица, ќе ја смени играта во корен. Затоа не се откажувајте. Доколку ви значи името, уставот, идентитетот, демократијата... „битка“ ќе има, а се што вие треба да направите е да се појавите. Сега без Делчев, Сандански, без Карев и Гули, без големи лидери и славни војводи. Сами, но сплотени, бранејќи го своето, во име на нашата, но и на следните генерации.

„Никогаш Северна, секогаш Македонија“!!!

Автор: Пацифист

Популарно