ЈО се огласи за притворот на Моника Ристеска: Пронајдени марихуана, шприцови и хашиш во нејзиниот дом

Јавното обвинителство се огласи за случајот со активистката за легализација на марихуаната, Моника Ристеска, на која вчера ѝ беше определена мерка притвор во траење од 30 дена.

Од Обвинителството соопштија дека Ристеска е осомничена дека во текот на 2017 и 2018 година во повеќе наврати неовластено набавила наркотична дрога марихуана, од која со понатамошна преработка добивала наркотична дрога хашиш и други опојни средства, кои потоа ги продавала во Скопје.

Како што наведува Обвинителството, на 29 септември 2017 година во селото Ракотинци при извршен претрес кај осомничената биле пронајдени и одземени: една полиетиленска кесичка со 27,46 нето-грама, два шприца со вкупен волумен од 9 мм и остатоци од шприцовите со наркотична дрога хашиш смола, една дигитална вага со остатоци од марихуана, две шишиња со вкупен волумен од 2.060 мл етил алкохол органски растворувач.

„На 5 јули 2018 година во близина на Канцеларијата за врски на Грција во Скопје од страна на полициски службеници било извршено легитимирање на осомничената и кај неа биле пронајдени два шприца со остатоци од наркотична дрога хашиш смола, а еден шприц со волумен од 2 мл со наркотична дрога хашиш смола е пронајден кај сведок на кого обвинетата му го продала за 3.000 денари“, соопшти Обвинителството.

Оттаму додаваат дека на 8 октомври годинава на улицата Мите Богоевски во Скопје кај осомничената биле пронајдени: четири шприца со вкупен волумен од 39,7 мл наркотична дрога хашиш смола, темнокафеава масловидна материја со волумен од 12 мл наркотична дрога хашиш масло, семки во стаклен сад со нето-маса од 0,42 гр, кои потекнуваат од растение што припаѓа на растителниот род Cannabis – марихуана, растителен материјал во полиетиленски кесички со нето-маса од 7,62 грама, полиетиленско пакување со остатоци од растителен материјал марихуана, пакувања со нето-маса од 30,15 грама марихуана помешана со тутун, две дигитални ваги со остатоци од наркотична дрога, еден мал вентилатор, два електрични блендера со остатоци од наркотична дрога, едно грејно тело марка ИЦМ, еден топломер со остатоци од наркотична дрога, една тегла семки, 19 празни шприцови, две пластични чаши со црвено капаче, во кои има кафеава маст, две пластични проѕирни црева и една празна полиетиленска кеса со остатоци од непозната материја, три стаклени епрувети со држачи и една пластична туба со налепница „етанол“, кои сите биле наменети за производство, а потоа и за продажба на наркотична дрога.

„Во Република Македонија, во согласност со чл. 215, ст. 1 од Кривичниот законик, казниво е неовластеното производство, преработка, продажба или нудење продажба, како и продажба, купување, држење, пренесување или посредување во продажба или купување или на друг начин неовластено пуштање во промет наркотични дроги, психотропни супстанции и прекурсори. Во согласност со чл. 20 од Законот за прекршоците против јавниот ред и мир пропишана е прекршочна одговорност и казнување за уживањето во наркотични дроги, психтотропни супстанции и прекурсори“, наведе Обвинителството во соопштение испратено до јавноста.

Поразителни бројки: Македонија се иселува!

Иселувањето стана сериозен проблем во Македонија. Изминатите денови беа пласирани фрапантни податоци дека за три месеци од почетокот на оваа учебна година од основните и средните училишта во Општина Кочани се отпишале 20 ученици, за кои родителите навеле дека причината е иселување во странство.

За една година, пак, од штипските основни и средни училишта заминале во странство со своите родители вкупно 77 ученици. Податоците на Секторот за јавни дејности во Општина Штип покажуваат дека бројките се поголеми во основните училишта, од каде што биле отпишани 48 ученици, а од средните 29.

Според истражувањата на терен бројката на отпишани ученици поради иселување на фамилиите во странство процентуално е приближно иста како во Кочани и Штип односно изнесува околу десетина проценти на годишно ниво.

Истражувањето на Центарот за истражување и креирање политики покажа покрај тоа дека 76,7 отсто од младите кои живеат во државава размислуваат да се иселат. Клучна причина за иселувањето е лошиот квалитет на живот кој, покрај материјалните аспекти, ја опфаќа целокупната ситуација на политичка и економска несигурност во државата, квалитетот на јавните услуги во образованието, здравството, социјалната заштита, можностите за личен и кариерен развој, вклученоста во процесите на носење одлуки што ги засегаат.

Овие тенденции се сосема спротивни од најавите на актуелната Влада дека ќе ги врати иселените млади лица од државава но реалноста е сосема поинаква до тој степен што во последнава година иселувањето дури и е драстично забрзано.

Мијалков ја прислушкувал и својата сопруга, па дури и својот брат!

Освен стотината политичари, бизнисмени и новинари, тарге на прислучкувањето за кое е обвинет Сашо Мијалков, биле и броевите на Александра Мијалкова, сопругата на Мијалков и на неговиот брат Влатко Мијалков.

Ова денес го откри сведокот Ѓорги Лазаревски, кој на прашање на обвинителот дали имало сензитивни таргети, ги посочи Александра и Влатко Мијалков.

На ова, со гестикулации, негодуваше екс директорот на УБК Сашо Мијалков.

Лазаревски заедно со Звонко Костовски со години прибирале докази од нелегалното прислушување во УБК, и подоцна  ја открија аферата „Таргет“.

Поранешниот градоначалник на општина Ново Село Боро Стојчев пуштен порано од затвор!

Боро Стојчев, поранешниот градоначалник на општина Ново Село кој требаше да биде во затвор шест месеци поради обид за шверц со цигари е пуштен порано на слобода поради примерно однесување. Наскоро во општина Ново Село следуваат избори за избирање на нов градоначалник.

Веста ја потврди директорот на струмичкиот зaтвop, Борче Цветков. Тој информираше дека Стојчев од зaтвop излегол еден месец порано, бидејќи имал примерно однесување и според член 206 од Законот за извршување санкции директорот на затворот може да му одобри 30 денови скратување на казната.

Популарно