Многу дожд и опасност од поплави

Временска Прогноза

на 11.2018

За денеска имаме прилично „интересна“ метеоролошки прогностичка состојба. Имено, нè очекува ден за кој се прогнозира релативно голема количина на врнежи. Ова пред се важи за западниот дел од земјата, особено за планинскиот дел на самата западна граница.

Дел од нумеричките прогностички модели прогнозираат 24 часовна вкупна количина на воден талог над 70 литри на метар квадратен, додека за реканскиот и дебарскиот крај прогнозираат околу 40 литри на „квадрат“. Има реална можност кон крајот на денот овие врнежи да бидат со пороен карактер.

Охридскиот, преспанскиот и пелагонискиот крај очекуваат позначајни врнежи во втората половина од денот, иако во овие региони ќе биде врнежливо речиси во текот на целиот ден.

Источниот крај очекува дел од земјата очекува доста послаби врнежи. Интензивирање на врнежите во овој крај ќе има во ноќта кон среда.

Она што треба да се напомене е дека во текот на денот ќе имаме и адвекција (транспорт) на значително потопол воздух од југ, што ќе допринесе да имаме доста висока висина на нултата изотерма, нешто под 3000 метри, што во комбинација со врнежите ќе услови нагло тоење на снежната покривка која се формираше во текот на викендот.

Треба да се има в предвид дека до височина од околу 1700 метри во текот на викендот паѓаше прилично влажен снег, со релативно голем воден еквивалент, чие топење во комбинација со врнежите со сигурност ќе допринесе за зголемување на нивото на планинските водотеци во крајниот западен регион.

Логично е да се размислува за потенцијален ризик од појава на одрони, особено на патот долж Радика.

Ќе биде и прилично ветровито, на пониските места пред се во источната половина од земјата, а насекаде на повисоките места. Ќе дува умерен југоисточен ветер.

Минималната температура ќе има вредности помеѓу 3°С и 7°С.

Дневната температура ќе има максимална вредност помеѓу 8°С и 11°С во најголем дел од котлините. Потопло, со максимална околу 13°С ќе биде во југоисточниот крај.

За Божиќ вистинска радост за децата

Временска Прогноза

пред 4 месеци

Времето денеска ќе биде променливо облачно, по одделни котлини со услови за појава на утринска магла. Ќе дува умерен, а долж Повардарието повремено засилен ветер од југоисточен правец (над 60 км/час). Кон крајот на денот и во текот на ноќта ќе има локални врнежи од дожд. Минималната температура ќе биде во интервал од 0 до 6, а максималната ќе достигне од 9 до 14 степени.

Во Скопје променливо облачно со појава на утринска магла. Ќе дува умерен, повремено засилен ветер од југоисточен правец. Во текот на ноќта ќе има врнежи од дожд. Минималната температура ќе се спушти до 0, а максималната ќе достигне 11 степени.

Под влијание на циклонска активност до понеделник времето ќе биде претежно облачно со повремени врнежи од дожд кои наместа ќе бидат пообилни (над 20 л/м2).

Во недела во текот на денот поради спуштање на студена воздушна маса врнежите од дожд ќе преминуваат во снег и во повисоките места, особено во западните делови.

Од понеделник ќе дува умерен до засилен ветер од северен правец што ќе предизвика значително заладување во текот на следната седмица.

Во кои делови од Македонија е најстудено, а каде има најмногу снег?

Временска Прогноза

пред 4 месеци

Најстудено со измерени -3 степени целзиусови утрово е во Скопје-Петровец и Берово, снежната покривка во Маврови Анови е 30 сантиметри, соопштија од УХМР.

Во Струмица и Демир Капија се измерени -2 степени, -1 Скопје-Зајчев Рид и Гевгелија, нула во Штип, Куманово, Велес, Кавадарци, 1 степен во Крива Паланка, 3 Прилеп, Дебар, Маврови Анови, Лазарополе и Попова Шапка, 4 Битола, Дојран, Виница, 5 Тетово, Крушево, 6 Претор и 7 степени во Охрид.

Висината на снежната покривка во 7 часот е 12 сантиметри во Крушево и 10 на Попова Шапка.

Времето во текот на ноќта и утрово, како што соопштија од УХМР, е малку до умерено облачно. Во западните делови дувало слаб до умерен ветер од западен и југозападен правец и таму температурата утрово е повисока. Во останатите делови е постудено, а во некои котлини во Повардарието има магла.

Времето денеска во најголем дел од земјава ќе биде сончево и релативно топло со мала облачност. По котлините, особено долж Повардарието постудено со појава на магла, која попладне ќе слабее. Во западните делови ќе дува слаб до умерен западен, а во југоисточните слаб северен ветер. Максималната температура ќе достигне од 8 до 17 степени.

Во Скопје ќе биде магливо и тивко, попладне видливоста ќе се зголеми. Максималната температура ќе достигне 9 степени.

Издаден портокалов аларм во Македонија

Временска Прогноза

пред 5 месеци

Според најновите информации на УХМР, претпладне променливо облачно и студено, понекаде и особено во источните делови ќе провејува слаб снег.

Од пладневните часови во поголемиот дел од земјата ќе биде сончево со мала до умерена облачност.

Ќе дува умерен, а вдолж Повардарието и во источните делови силен ветер од северозападен правец (над 70 км/час).

Во Скопје претпладне променливо облачно, студено и ветровито, а попладне со сончеви периоди. Ќе дува умерен до засилен ветер од северозападен правец, особено изразен на повисоко и во источните делови од регионот, велат од УХМР.