Детектор: Мнозинството граѓани не го поддржуваат прогресивниот данок

Според анкетата која по нарачка на Детектор ја изработи Институтот за политички истражувања Скопје мнозинството граѓани не го поддржуваат прогресивниот данок кој почна да се применува на стартот на оваа година, а ќе биде ставен во мирување на почетокот од наредната.

 42,4% од анкетираните сметаат дека треба да се врати рамниот данок, а поддршка на прогресивниот даваат 25,2% од анкетираните.

Повеќе од една третина од граѓаните се на став дека прогресивниот данок ќе ја зголеми даночната евазија. 38,2% сметаат дека со воведувањето на прогресивниот данок, даночното затајување ќе се зголеми, 18,1% се на став дека ќе остане исто, а 10,4% очекуваат намалување. Интересен е податокот дека дури 52,8% од анкетираните самовработени и сопственици на приватен бизнис сметат дека прогресивниот данок ќе го зголеми даночното затајување.

Дури 61% од граѓаните сметаат дека ако се земе предвид платата која што ја примаат, даноците кои и ги плаќаат на државата се високи. 23,1% од анкетираните мислат дека даноците се соодветни а само 1,9% сметаат дека македонските граѓани плаќаат ниски даноци. Кога би можеле да изберат еден данок или давачка кон државата која е превисока и треба да се намали, 18% би го одбрале персоналниот данок. 14,6% сметаат дека прв за намалување треба да биде данокот на имот, а 14,2% данокот на додадена вредност. 11,8% од граѓаните сметаат дека намалување првенствено треба да има на акцизите, а 9,2% на данокот на добивка, додека 7,4% сметаат дека првото што треба да се намали треба да бидат придонесите за здравствено осигурување. 1,9% се со став дека треба да се намалат придонесите за пензиското осигурување, а 1,2% давачките за царина. Кога станува збор за тоа како државата располага со парите кои ги собира од даноците и другите давачки, мнозинството граѓани изразуваат недоверба и незадоволство. 64,7% од граѓаните сметаат дека македонскиот државен буџет не се троши правилно и наменски за разлика од 9,6% кои се убедени во спротивното. 60,4% од анкетираните велат дека при креирањето на државниот буџет, на прво место се става интересот на политичките партии. 20,2% сметаат дека буџетот се креира според јавниот интерес и реалните потреби а 19,4% немаат одговор. Според мнозинството граѓани, најмногу средства од буџетот треба да се насочат во здравството.

Ваков став имаат 31,2% од анкетираните. 16,3% сметаат дека социјалната заштита треба да биде на прво место во буџетот, а 14,6% образованието. Најмногу средства од буџетот да се одвојат за плати на јавната администрација бараат 9,3% од анкетираните. 8,3% сметаат дека најмногу пари треба да се вложи во капитални инвестиции и инфраструктура, а 5,6% во пензиите. Само 1,4% од анкетираните сметаат дека одбраната треба да биде приоритет за буџетот. 56,5% од граѓаните сметаат дека земјава е високо задолжена, 19,2% задолженоста ја квалификуваат како умерена а 7,3% сметаат дека таа е ниска.

Интересно е што последниот проект на владата кој предвидува поврат на ДДВ преку скенирање на фискални сметки не предизвикува некој голем интерес кај граѓаните. Анкетата на Детектор покажува дека 64,7%, што е речиси две третини од анкетираните воопшто не скенираат фискални сметки, додека 34,2% го прават тоа. Меѓу оние кои ги скенираат најголемиот дел очекува приход меѓу 300 и 600 денари месечно.

Анкетата на Детектор покажува и дека граѓани во најголем дел не се запознаени со висината на помошта која од европските фондови доаѓа во јавниот сектор во државата. 35,4% од анкетираните немаат вакви информации, 22,5% од граѓаните сметаат дека европската помош е ниска, 19,3% дека таа е соодветна а 5,9% ја оцениле како висока Анкетата по нарачка на Детектор телефонски ја спроведе Институтот за политички истражувања Скопје врз репрезентативен примерок од 1101 испитаници во периодот од 25 до 29 октомври годинава со маргина на грешка од плус - минус 3%

Пендаровски домаќин на Ифтарска вечера

По повод Рамазанските пости и во пресрет на големиот муслимански празник Рамазан Бајрам.

На вечерата присуствуваа претставници од државно-владиниот врв, бизнис заедницата, претставници на верските заедници, претставници од академската заедница, од политичките партии, медиумите и граѓанските организации, како и претставници на дипломатскиот кор, информираа од Кабинетот на претседателот.

Согласно исламските верски обичаи, Поглаварот на Исламската верска заедница Реис-ул-улема Шакир ефенди Фетаи ја одржа завршната молитва.

„Најсветиот месец во Исламот, Рамазан, е време за духовно закрепнување, за обновување на релациите со роднините и пријателите, но и за милост и солидарност кон немоќните. Како што рамазанскиот пост е лично искушение на внатрешно преиспитување на поединецот, така Ифтарската вечера е заеднички чин на социјална правда бидејќи подразбира правење место на трпезата и за оние кои имаат помалку. Тоа е особено важно во време на глобални кризи кои најмногу ги удираат најранливите и најсиромашните“, кажа Пендаровски на вечерата.

Но, освен за продлабочување на верата во животот на верникот, Ифтарската вечера е и можност за продлабочување на соживотот во македонското општество.

„За нашите предци немало поголема чест од тоа, некој со различна вера од нивната, да ги покани на празнична трпеза. Кога муслиман кани на Ифтар, или кога христијанин подарува велигденско јајце, тоа е начин да каже дека ја почитува твојата различност и те прифаќа таков каков што си. Тоа го правиме и ние вечерва“, додаде Пендаровски.

Вработените во здравството најавуваат протест на 8 април

Вработените во здравството нема да добијат усогласување на платите со порастот на минималната плата поради непотпишувањето на анексот на колективниот договор. Поради тоа на 8 април најавуваат протест што ќе почне од пред зградата на Сојузот на синдикати на Македонија, а ќе заврши пред Министерството за здравство.

- Протестот ќе биде токму во насока на изразување незадоволство од непотпишувањето на анексот на колективниот договор којшто веќе беше завршена работа, но поради политичките игри остана непотпишан и со тоа повеќе од 20 илјади работници во здравството остануваат без усогласувањето на нивните плати со порастот на минималната плата, соопшти денеска претседателот на ССМ Слободан Трендафилов. 

Според информациите на ССМ, освен вработените во здравството, усогласување на платите ќе нема и во образованието и во Министерството за внатрешни работи.

- Усогласување со порастот на минималната плата ќе нема и во образованието поради непотпишување на колективниот договор. Според моите сознанија, и вработените во Министерството за внатрешни работи нема да добијат усогласување на палтите, меѓутоа управата на локално ниво, правосудството, Правобранителството, јавнообвинителската служба, судската служба и.т.н. ќе добијат усогласување имајќи предвид дека Синдикатот на УПОЗ потпиша низа колективни договори каде ова право е утврдено меѓутоа и законските решенија, кои се обидуваа на мала врата да ги сменат пред објавата на висината на минималната плата, го овозможуваат тоа, истакна Трендафилов. 

„АЛКАЛОИД“ ПУШТИ ВО УПОТРЕБА НОВ КАПИТАЛЕН ПРОЕКТ ВРЕДЕН 19,4 МИЛИОНИ ЕВРА

Новите капацитети за производство на цврсти фармацевтски форми, со површина од 6.200 м2, се најкрупниот инвестициски потфат на компанијата во изминативе две децении

Во насока на посветеноста за постојана модернизација и за проширување на производствените капацитети, производствените волумени и на асортиманот, „Алкалоид“ АД Скопје ја комплетираше реализацијата на својот најголем инвестициски потфат во последните две децении – новиот погон за производство на цврсти фармацевтски форми Таблетно одделение 2.0 и придружните технички простории.

Новиот техничко-технолошки капацитет, чија цел е повеќе од двојно зголемување на обемот и поголема флексибилност во производството на цврсти фармацевтски форми, зафаќа површина од 6.200 м2 (производствени и технички простории), а за него „Алкалоид“ вложи вкупно 19,4 милиони евра. За изведбата на овој објект, започната во април 2021 година, беа ангажирани 30 домашни и 16 странски компании, а градежните работи и опремувањето се одвиваа под водство на стручните служби на „Алкалоид“ АД Скопје. Просториите се изведени во согласност со строгите норми за добра производствена пракса, а сите процеси се целосно интегрирани и дигитализирани, со автоматско генерирање на сите податоци од процесните контроли.

Во новиот погон за производство на цврсти фармацевтски форми ќе се врши производство на таблети, филмувани таблети, капсули и на двослојни таблети, кои за првпат се воведуваат како технологија за производство во Македонија. Станува збор за таблети што содржат неколку активни супстанции со различни хемиско-физички својства или со различен начин на ослободување на состојките, кои внимателно и прецизно се дозирани, но физички одделени со соодветно обезбедена стабилност и делотворност, овозможувајќи им на пациентите целосната терапија од неколку лекови да ја земаат само преку една таблета. Опремата за производство на цврсти фармацевтски форми е набавена од светски познати производители на опрема од овој вид: GEA (опрема за влажна гранулација), Alexanderwerk (опрема за сува гранулација), Lodige (опрема за хомогенизација), Fette (преси за таблети), Glatt (систем за филм-обложување), De Lama (автоматска машина за перење контејнери) и други.

Со пуштањето во употреба на новата техничко-технолошка единица за производство на цврсти фармацевтски форми двојно се зголемува производствениот волумен, па така, наместо досегашниот капацитет од 2 милијарди таблети годишно, моменталниот проектиран производствен капацитет е повеќе од 4 милијарди таблети годишно.

„Во динамична индустрија каква што е фармацевтската пласманите обично кореспондираат со инвестициите, вештините и знаењето, кои во изминативе две децении ги насочивме кон градење на модерно и конкурентно производствено портфолио. Нашата цел останува да се диференцираме преку знаење и развој на производи со додадена вредност, а на овој курс сме решени да останеме и во иднина, работејќи на натамошна глобализација на брендот ’Алкалоид’, достоинствено и посветено, со практикување на високи етички стандарди, кредибилитет и професионален пристап во севкупните операции“, изјави Генералниот директор и Претседател на Управниот одбор Живко Мукаетов на официјалното пуштање во употреба на новиот оддел, кое се одржа во присуство на високи претставници на менаџментот на компанијата, како и на претставници на медиумите од земјата и од регионот.

Ова е еден од најкрупните инвестициски проекти на „Алкалоид“ АД во изминатите две децении. Компанијата во 2005 година имаше пласмани од 53,1 милиони евра, а во 2023 година прикажа консолидирани пласмани од 268,3 милиони евра. Следствено на овој петкратен континуиран раст, во текот на изминатите 15 години беа реализирани инвестиции во вредност од над 220 милиони евра.

Фармацевтските производи на „Алкалоид“ се присутни на пазарите во повеќе од 40 земји во светот.

Популарно