Во првото полуфинале на Европското првенство во ракомет репрезентацијата на Хрватска успеа да победи во драматично полуфинале во Стокхолм. Хрватите ја совладаа Норвешка по четири продолженија со 29-28 (23-23) (11-10). Дуелот беше трилер за антологија, по кој легендарниот Лино Червар ќе има можност в недела да го освои единствениот златен медал кој му недостига.
Дуелот започна со наизменични голови, рано исклучување на Дувњак и четири гола во раната фаза на Сагосен. Но, Червар му даде доверба на Мариќ и овој постигна четири гола од линијата од шест метри.
Први се одлепија Хрватите, благодарение на три одбрани на Шего и голови на крилните ракометари. При 5-7 и 6-8 „каубоите“ имаа напад за +3, но погрешија. Сепак, во 19. минута Шего одбрани нов зицер, а Хорват од транзиција погоди за 7-10.
Избраниците на Берге возвратија и Бергеруд со неколку одбрани беше инспиратор на враќањето на Скандинавците. Сепак, во последните секунди од првиот дел Карачиќ го најде Мариќ, кој со петтиот гол во натпреварот донесе +2 на полувреме за Хрватите.
Вториот дел го отвори Игор Карачиќ со првиот гол во полуфиналето. Следеа два гола на Танген за 12-13, но Скандинавците двапати технички погрешија и Карачиќ и Мандиќ вратија на +3 во 35. минута. Поранешниот вардарец имаше и зицер за 12-16, но Бергеруд чудесно одбрани. Јоханесон и Булеруд постигнаа голови од инвидуални потези и кога Танген израмни на 16-16, Червар повика тајм-аут.
Хрватската игра почна да тоне, Бергеруд одбрани зицер, Мамиќ доби исклучување, а Сагосен со шестиот ја врати норвешката предност (17-16). Хрватите пак покажаа карактер и Шего со одбрана и Матановиќ со гол од контра пак донесоа предност (17-18). Норвежаните двапати останаа со човек помалку, Червар го постави Хорват како десен бек, а Матановиќ од крило погоди за 19-20. Следеше исклучување на Хрстиќ и нов гол на Сагосен за ново израмнување (20-20).
На седум минути до крајот Бергеруд му „скина“ нов зицер на Карачиќ и наместо хрватско, брзо дојде норвешко водство со голот на Булеруд (22-21). Сагосен пак инспирираше, но Ашанин му одбрани седмерец и ја остави својата селекција во игра. Дувњак со петтиот гол, постигнат од чекор, израмни на неполни пет минути до крајот (22-22). Ѕвездата на Кил со нов гол од голема далечина ја врати хрватската предност. На три минути до крајот Степанчиќ беше исклучен, но Ашанин му одбрани седмерец и на Јондал. Хрватите прокоцкаа напад за финале и Норвешка имаше половина минута за израмнување. Јондал брзо погоди, а „каубоите“ не упатија квалитетен удар во последниот напад и дуелот влезе во продолженија.
Првиот екстра период започна со гол на Дувњак, но и одговор на Сагосен. Цели четири минути не беше постигнат гол, а Бергеруд делуваше несовладливо на норвешкиот гол. Второто продолжение го отвори Степанчиќ со „бомба“ за 24-25, но ексреспно возврати Сагосен со десеттиот погодок. Хрватите беа брзоплети и Јондал од полуконтра погоди за предност за Норвешка. Хорват не погоди од крилна позиција и Норвешка доби меч топка за победа. Скандинавците не реализираа и Хрватска доби последен напад за реми. Мариќ се избори за седмерец, а Дувњак од седум метри погоди за 26-26 и нови продолженија.
Шего конечно одбрани клучна топка, а на голот на Хорват возврати Бјорсен. Серија на грешки покажаа дека ракометарите се уморни. Норвежаните го имаа последниот напад, но дирекот ги спаси Хрватите,а им останаа и 15 секунди за победа. Во луд контра напад, Жељко Муса на три секунди до крајот го матира Бергеруд и обезбеди трето финале за „каубоите“ (28-29).
Најефикасни во хрватската репрезентација беа Дувњак со седум и Мариќ со шест гола, а кај Норвешка се истакна Сагосен со десет погодоци. Феноменален беше Бергеруд со 14 интервенции, наспротив девет одбрани на Шего и Ашанин. Во второто полуфинале кое е во тек се среќаваат Шпанија и Словенија.
