ФОТО: Македонски полицаец и бегалката од Ирак се венчаа и чекаат бебе

Нура Аркавази, курдска муслиманка и православниот Боби Додевски се вљубиле набрзо откако се сретнале на калливата граница на почетокот на март, а четири месеци подоцна веќе се венчале, пренесе агенцијата „Франс прес“, пишува српски „Блиц“.

Боби се присетува на дождливиот ден кога првпат ја видел Нора на ничија земја помеѓу две држави, додека случајно бил на должност, бидејќи ја заменил смената со колегата.

- Тоа беше судбина - им рекол 35-годишниот Боби на новинарите на АФП во неговиот стан во Куманово, каде што сега среќно живее со својата млада сопруга.

Нора (20) е од Дијала, провинција во источен Ирак која го тресе насилство. Младата Ирачанка наведува дека екстремистите на Исламската држава го киднапирале татко ѝ, инжењер и дека барале илјадници долари за откуп за неговото враќање. Бегалката од Ирак и нејзините брат, сестра и родители на почетокот во 2016 година го напуштиле својот дом и тргнале на долго патување. Ја преминале границата со Турција, потоа со чамец пристигнале на грчкиот остров Лезбос, од каде што влегле во Македонија. Главна цел им била, како што наведуваат, Германија.

Нејзиното семејство го продолжило патот кон Германија, но Нора одлучила да остане во Македонија откако ја погодила Аморовата стрела.

- Имав едноставен сон да живеам со своето семејство во Германија - навела таа и додала дека не ни замислувала какво изненадување ја чека во Македонија.

Кога првпат го сретнала Боби, Нора имала висока температура и очајнички сакала да дознае дали нејзиното семејство ќе успее да ја помине границата со Србија и да го продолжи патот кон Германија. Балканските земју штотуку почнувале да ги затвораат своите граници за бегалците, па судбината на мигрантите кои тогаш поминувале низ Македонија била неизвесна.

Другите полицајци ја упатувале на Боби, бидејќи тој добро зборува англиски, а тој се погрижил таа и нејзината болна мајка да добијат медицинска помош и ќебиња.

- Ми рече да не се грижам и дека сè ќе биде многу добро во мојот живот - се присетила Нора.

Боби, кој зад себе има два брака, вели дека знае дека пронашол некој посебебн.

- Кога првпат ја здогледам Нора видов нешто добро во нејзините очи - наведува тој.

Наредните денови поминувале повеќе време заедно, а тој ги носел неа и нејзината мајка до локалниот пазар да купуваат храна и облека. Нора, бидејќи зборува шест јазици, почнала да помага во локалниот Црвен крст и вели дека ѝ се допаднало како високиот македонски полицаец си игра со децата на мигрантите.

Една априлска вечер, Боби ја поканил Нора во ресторан на вечера, каде што ненајдено ја запросил.

- Му реков: „Не, ти мора да се шегуваш...“, но тој 10 пати повтори: „Дали сакаш да се омажиш за мене“ - им раскажала Нора на новинарите.

Нора конечно му рекла „да“, но била загрижена за тоа како нејзините родители ќе реагираат на тоа што се мажи за човек којшто не е муслиман.

- Им реков дека одбрав добар човек за да го поминам животот со него, дека ќе се омажам за него и дека не сакам да се мажам за друг. Беа налутени – раскажала Нора. Не сакала многу да зборува за своето семејство, освен што рекла дека се добро и дека живеат на сигурно, во Германија.

Боби и Нора се венчале на 13 јули, на нејзиниот роденден, во Куманово, пред 120 сватови, меѓу кои биле и нејзините колеги од Црвениот крст. Нора и Боби сега живеат со трите деца на Боби од поранешните бракови. И очекуваат Нора да се породи. Никој, вели Нора, повеќе не ја гледа како бегалка.

Дали законот за амнестија ќе важи за Велија Рамковски?

Предлог законот за амнестија на Владата на Р. Македонија, со кој е предвидено на осудениците да им се намали 30 проценти од казната, нема да важи за поранешниот сопственик на А1 телевизија, Велија Рамковски, но и за уште многумина други кои биле осудени за кривичното дело злосторничко здружување.

Во Предлог законот за амнестија, кој допрва треба да влезе во собраниска процедура, пишува дека амнестија не е предвидена за лица кои се осудени за кривичното дело злосторничко здружување. Рамковски, во случајот „Пајажина“, беше осуден и за ова кривично дело.

-Амнестија не се предвидува и за сторителите на кривични дела против избори и гласање (член 158-165-в) од Кривичниот законик, за кривични дела против половата слобода и половиот морал и тоа: (член 186, член 187, член 188, член 189, член 191, член 191-а, член 193, член 193-а, член 193-б и член 194 од Кривичниот законик, за кривични дела против државата (член 305-327) од  Кривичниот законик, за кривични дела злосторничко здружување (член 394-394-г), од Кривичниот законик, како и за кривичните дела против човечноста и меѓународното право (член 403-418-а, 418-в до 422) од Кривичниот законик на Република Македонија, се вели во сооптението на Владата, со кое даваат детали за предлог законот.

Рамковски во март 2012 година беше осуден на 13 години затвор, а во издржаната казна му се пресметува и времето кое го помина во притвор, од декември 2010 година. Ова значи дека Рамковски веќе одлежа седум години од казната, а му остануваат уште шест години. Доколку Законот за амнестија го опфатеше и него, тоа ќе значеше дека ќе му преостанат нешто повеќе од две години за издржување.

Во моментот Рамковски е на слобода, откако на 21 август излезе од затворот „Идризово“, поради привремен отпуст, кој го доби за лекување. Времето кое ќе го помине надвор од затворот, за лекување, не се вклучува во издржаната казна.

30 дена притвор за градоначалникот на Пустец, Едмонд Темелко

Триесетдневен притвор за Едмонд Темелко одреди Кривичниот совет на Основниот суд Скопје 1 на барање на Специјалното јавно обвинителство.

Како што информираат од скопскиот Кривичен суд, мерката притвор од 30 дена ќе важи од денот на неговото наоѓање.

Градоначалникот на општината Пустец во Албанија Едмонд Темелко е обвинет во случајот „Титаник“ за изборни нерегуларности на локалните избори во 2013 година. Темелко е еден од осомничените на СЈО за кривични дела против изборите и гласањето.

МВР ќе ви го смени матичниот број доколку го смените....

Управата за водење на матичните книги треба да го поништи матичниот број, а МВР да му издаде нов на лицето што претходно го променило полот, вакво решение донел Управниот суд, информираат од Здружението на младите правници. Оттаму велат дека првпат е донесено вакво решение од страна на Управниот суд, со кое правно се утврдува промената на полот во матичната евиденција.

„По промената на податоци во матичната евиденција, Управниот суд го задолжи Министерството за внатрешни работи на РМ во рок од три дена да издаде нов матичен број, кој е соодветен на извршената промена. Ова е прво решение на Управниот суд на РМ каде што со полна јурисдикција е одлучено за правото за промена на податоците во матичната евиденција според фактички извршената промена на полот кај трансродово лице“, се вели во соопштението од Здружението.

Оттаму велат дека постапката за промена на полот во матичната евиденција на трансродово лице е подржана во рамките на проектот „Заштита на човековите права на маргинализираните групи во РМ“ спроведуван од страна на македонското Здружение на младите правници. Постапката пред Управниот суд ја водел адвокат Жарко Хаџи Зафиров како дел од тимот на адвокати на МЗМП.

Користејќи го стратешкото застапување пред надлежните судови и други државни органи, МЗМП продолжува да се залага за ефективна заштита на човековите права преку создавање позитивна пракса која води кон општествени промени, велат од Здружението на младите правници.

Популарно