Кој ќе ги збавува скопјани за дочекот на 2017 година на плоштад Македонија?

Објавено на 19 декември 2016, 13:40

СПОДЕЛИ:

Градоначалникот на Град Скопје Коце Трајановски, рече дека програмата за дочек на новата 2017 година почнува од 24 декември. За таа цел градот ќе потроши околу два милиони денари, а останатото е под покровителство на Македонски Телеком и Пивара Скопје.

– Под мотото „Подари среќа“ градот ќе организира новогодишен базар на улица „Македонија“ што ќе работи од 24 до 31 декември од 10:00 до 22:00 часот. Граѓаните ќе имаат можност да купат интересни подароци, рачно изработени предмети, новогодишни украси, дрвени очила, цвеќе, чоколади и многу други производи. Во вечерните часови ќе има богата музичка програма, меѓу кои ќе настапат Сара Мејс, Тумба Салса бенд, Бета хаус бенд, ДЈ Бранчес и други, рече Трајановски.

Посочи дека за најмладите во истиот период е подготвена детска програма од 10:00 до 13:00 часот, што вклучува новогодишно дефиле на Снежната кралица, Дедо Мраз, настапи на Поточиња и Златно Славејче, како и многу други детски игри и претстави.

– Дедо Мраз официјално годинава ќе пристигне на 31 декември во 11:30 часот на плоштадот „Македонија“, рече Трајановски.

Централниот настан на плоштадот „Македонија“ на 31 декември е под покровителство на Македонски Телеком.

Директорот за маркетинг и комуникација на Македонски Телеком Радмила Димова, посочи дека нивната компанија веќе десетта година по ред е дел од прославата за дочекот на новата година на градскиот плоштад во Скопје.

– Забавата ќе започне во 19:30 часот со ДЈ Дуос, потоа следи настапот на Слаткар и Адријан Гаџа. Новата година ќе ја дочекаме со Каролина Гочева, а забавата ќе заврши со настапот на Миле Кузмановски, рече Димова.

На 25 декември ќе се одржи дедомразовска трка под покровителство на „Пивара Скопје“. Катерина Хаџи-Ангелеска Начевска од Пивара Скопје посочи дека дедомразовската трка ја организираат трета година заедно со Градот Скопје и Кока Кола.

– На наше големо задоволство има голем број на заинтересирани луѓе кои се пријавуваат да трчаат како Дедо Мраз. Се надеваме дека ќе придонесеме и ќе ја направиме и оваа година уште повесела и поинтересна за сите, рече Начевска.

СПОДЕЛИ: