Кој ќе ја напушти Македонија? Груевски, „Шарените“ или...?

Велат животот, односно квалитетот на истиот најмногу зависи од перспективата. Еден познат скопски лик вели дека и Париз да го гледаш од канализација е многу смрдливо место. И јас верувам дека во многу што нашите животи зависат од начинот на кој гледаме на работите. Дали ќе се фокусираме на убавите работи кои ги имаме насекаде околу нас или на она негативното што се труди да го изеде општеството и човештвото во целина. Ако кај секого ги гледаме само нагативните особини, тогаш и ние ќе станеме негативни до степен да не можеме сами да се поднесеме. Наспроти, ако во луѓето ги бараме позитивните квалитети, ако на животот погледнеме со розеви очила, лесно ќе најдеме причина за радост, па дури и среќа. Но, сето ова е полесно ако живеете на Тибет и навечер си пиете чај со Далеј Лама. На Тибет прво нема жени (хехехе), нема сообраќај, нема соседи чие бебе плаче цела ноќ, нема терористички напади, нема шарена револуција и разно разни борци за своја демократија. Тука каде 2 години државава ни ја превртуваат раволуционери, протестанти, платени или волонтери, одржувањето на внатрешен мир не е така едноставно како за Шаолините.

park-5-640x480 (1)

Не, ова не е текст против шарените, за нив пишував пред некој ден, а чувствувам дека набрзо повторно ќе се избламираат, па ќе ми ги повлечат прстите кон тастатурата. Ова не е ни текст против нивните идоли во СДСМ. Колку и да им е тешко на некои луѓе да поверуваат, немам јас ништо против Зоран Заев и неговата ниско интелигентна дружина. Не би седел во кафана со нив, али не им замерам за ништо, освен една работа за која сум пишувал најмалку 3 пати. Да не се повторувам на догло, СДСМ се виновни што му дозволија на ВМРО комотна власт веќе 10 години. Без програма и идеја за ништо ново и позитвно, само со негативна кампања, им дозволија на своите политички непријатели да се опуштат во удобните фотељи.Тоа е се, за ништо друго не ја кривам македонската „левица“. Тоа што Заев не почитува институции, не се појавува на суд, гаѓа државен имот со боја, „ја држи државата во заложништво“...тоа не е негова вина, ниту заслуга. За сето тоа се криви оние другите, опуштените.

Пред неколку дена на неколку македонски медиуми се појавија фотографии од претседателот на ВМРО, Никола Груевски, како гледа европско првенство во фудбал во градскиот парк во Скопје. Очигледно и Груевски знае дека некогаш мора да ја смени перспективата и да се препушти на нешто што го опушта и полни со позитивна енергија. Гледам и јас фудбал, уживав вчера кога Италија ја растури Белгија, па не гледам зошто екс премиерот да не гледа. И двајцата сме љубители на спортот, посебно фудбалот, но сепак има една битна разлика. Знаете, ако додека гледате фудбал или турска серија, филм, уживате во добро кафе или чаша вино, ако пукне цевка во кујната, уживањето веднаш ќе престане и ќе викнете водоводџија. И се ќе биде во ред ако тој дојде и ви ја поправи цевката. Но, ако наместо тоа истиот го гледате на фотки како гледа фудбал во градскиот парк додека куќата ви се поплавува, уживањето во вашата омилена активност ќе биде одложено. Или кажано без метафори, не е Заев крив што не ја есапи државата, туку државата што не го есапи него. Не е тој крив што не се појавуваше на суд, туку судот што не прати полиција да го доведе. Полицијата е виновна што во Македонија имаме вандали кои шараат што и да посакаат. Една од нив излезе од полициска станица и пред неколку телевизии ја испраска станицата со боја! Никој не виде?!!! Сигирно 50 пати сум прочитал и чул дека „Заев ја држи Македонија во заложништво“, но ниту еднаш никој од оние кои раководат со државата не ни кажаа што превземаат за да ја избават Македонија од таа ситуација. Се изначитав и изнаслушав за „Сорос“, „Канвас“, „Странски служби“, завери за нафтовод, рудни богатсва, вода за пиење, војна меѓу НАТО (САД) и Русија... што уште не, но на тоа остана. Две години владата која народот ја избра да ја води оваа наша мала држава ни се жали дека СДСМ сака да не запали живи и дека тие ете едвај не бранат. Оние на кои им народот 11 пати по ред им дава доверба да ги реши проблемите сега велат дека истите се многу големи. Имало притисоци од надвор! А каде нема? Кога прифативте да ја водите државава не знаевте дека ќе има? Не знаевте дека Македонија географски е „незгодно“ поставена. Дека на Балканот секогаш е интересно? Дека кога ќе дојде денот САД и Русија пресметката ќе ја почнат токму тука. Не знаевте дека Сорос е присутен во Македонија од 1990 година или мислевте си замина? Странските служби не се измислени во последниве 5 години или мислевте дека ни се пријателски настроени?

Две години народот чека од своите избраници да превземат конкретни чекори за решавање на кризата или да превземат одговорност. Две години куќата ни се полни со вода од пукнатата цевка, но „водоводџијата“ си гледа фудбал. Не бил тој виновен, туку инсталацијата која ја поставил „водоводџијата“ пред него била скапана! Донесена од странски служби, платена со кредит од Сорос!

Господине екс премиер, и јас сакам да гледам фудбал, но сакам и кога нема фудбал на ТВ да се чувствувам убаво во својата татковина. Не ме интересира колкави се проблемите со кои се соочувате, затоа што ветивте дека можете да ги решите. Ако не можете, кажете. Извинете се и напуштите, пред цел македонски народ да ја напушти Македонија. Затоа што „поплавава“ веќе не се трпи и некој ќе мора да си оди. Нема место во волку мала држава за „Шарени револуционери“, „соросоиди“, „Канвас“ и нас обичните граѓани. Почнете со расчистување или оставете некој друг да го направи тоа.

Автор: Пацифист

Еве господине Заев столче за вас. - А не, јас на Пенс у скут ќе му седам

Втори Август 2017 година, Македонија ги одбележува најголемите два празника во својата историја. 114 години од почетокот на Илинденското востание и 73 години од Првото заседание на АСНОМ. Еден датум, а два поводи за славје. Сепак, никој не слави. Мачен е овој празничен ден во Македонија.

Во Крушево никогаш попразно, на Пелинце бетер. Скопје пусто, а во Чаир ниту едно истакнато македонско знаме. Заев во Црна Гора го суша заменикот претседател на САД, Пенс, како го плаши Балканот со лошата Русија, а пропагандата по медиумите и социјалните мрежи го величи премиерот. „Рамо до рамо до Пенс“ е еден од насловите! Па зар у скут да му седне на конференција? „Еве господине Заев столче за вас. А не, јас на Пенс у скут ќе му седам“!!! (Тоа би било добар наслов.... хммм.)

Поминаа 114 години од Илинден и 73 од АСНОМ, а Македонија не била во полоша состојба. Политичката криза која три години ја тресеше државата, дури сега почнува со наплаќање. Цехот допрва ќе го платиме сите. Ок, некои ќе лапнат процент во прв момент, но на крајот и тие ќе платат. Оние кои себе се гледаат како победници со составувањето на новата влада, пополека тргнаа кон целта и личните интереси. Тука не зборувам за Заев и министрите. Ниту за политичарите од било која партија воопшто. Со нив сум одамна на чисто. Едно истражување вели дека 90% од политичарите во светот се психопати, но јас сум сигурен дека тој процент кај нас е над просекот. Токму затоа моето гласачко ливче најмалку 10 години останува неискористено. Она што ме разочарува е народот, или барем дел од народот. Оние најгласните. Победниците.

Шират тези, небулози, лаги... го прават тоа дрско и горди се на себе. Читам денеска дека треба да учиме од Борко Борисов и Талат Џафери кои се поклониле пред гробот на Гоце Делчев и на „Мечкин камен“. Ни одржале лекција со тоа што се поклониле пред нашите херои. Во две реченици се шири опасна лага и се навредува целиот наш идентитет и ниво на свест. Прво, Борисов не се поклонил пред нашиот херој Гоце Делчев, туку пред бугарскиот Гоце Делчев! Според бугарската историја Гоце е Бугарин! Значи, не само што не покажал поштовање кон нас како држава и народ, туку бесрамно ја краде историјата, а вие го фалите! Второ, Талат Џафери нема право да се обрати на „Мечкин камен“ затоа што е нелегитимно избран. Криминално. Ако се тргне ова на страна, спикерот не се поклони пред нашите (Македонците) херои на мечкин камен. Туку пред хероите од Илинден меѓу кој имало и Албанци! Во обид да се покажете како големи луѓе, европејци, либерали, космополити, испаѓате ѓубре, автократи и дискриминатори. Вие им го одземате учеството и заслугите на Албанците во Илинденското востание!

Заев бил премиер со визија и наместо кон историјата гледал кон иднината, при потпишувањето на договорот со Бугарија. Време било да гледаме напред. Борисов вели „ако гледате назад додека одите, ќе паднете“. Ок. Тогаш зошто во договорот се обработува историјата и ќе се формира комисија за утврдување на историски факти кои треба да се вметнат во образовен процес? Ако не гледаме назад кон историјата, од каде потребата да ја менуваме? Или ние (Македонците) не треба да гледаме назад и треба да си ја предадеме историјата (попат и малцинството) за да одиме напред? Тоа ли е визијата?

Гледам добар дел од „Бирото за запослување во Влада“, познато како Твитер заедница, уште се замара со Груевски. Дечки толку ви е капацитетот или за тоа ве платија? Груевски многу одамна не е премиер. Си имаме нов. Визионер е. Пополнети се местатаза советници, ако не ве примиле досега слободно плукајте по нив. Или видете со Бетмен да ви среди некоја комисија у ВМРО ДПМНЕ.

По карактер сум оптимист, но ситуацијава е премногу темна за надежта да опстои. Можеби, само можеби, во зачеток е формирање на трета, неисполитизирана (барем засега), колективна свест. Пензионирани професори, поранешна новинарка и уште неколку паметни луѓе со интегритет и морални вредности, по социјалните мрежи имаат огромен број на следбеници. Можеби конечно во Македонија се раѓа „интелегенцијата“. Рано е да се зборува, но обично се така тивко почнува.

За крај, тотално на друга страна од Европа, но поврзано со Илинден, односно Комитите. ФК Вардар на прагот на историја и плејоф за ЛШ што носи сигурен пласман во групната фаза во ЛЕ. Со 1-0 од Скопје црвоно црните се единствената шанса овој 2ри Август да го паметам по добро. Ајде момци! За вас, за нас, за црвено црна, за Комити, за ИЛИНДЕН!

Автор: Пацифист

Договорот со Бугарија: НЕ ПОСТОЈАТ македонски јазик, народ и малцинство во Бугарија

Дојде и тој ден. Владата предводена од Заев го обелодени на јавноста договорт за добрососедски односи со Бугарија.  Премиерот одржа прес конференција, на која речиси еден час се обидуваше да го објасни како позитивен договорот од 14 члена, од кои само 3 се суштински, а остаокот се само фарба, козметика. Во свој стил, полн со фрази и секако лаги, Заев не одговори директно на ниту едно незгодно новинарско прашање и зборуваше за убава иднина на младите Македонци и Бугари. Час подоцна договорот осамна на веб страницата на Владата на Република Макеоднија и еве што прочитавме таму.

Член 8:

2.Во рок најдоцна до три месеци од влегувањето во сила на овој договор, со цел продлабочување на заемната доверба, двете Договорни страни ќе формираат Заедничка мултидисциплинарна експертска комисија за историски и образовни прашања, на паритетна основа, за да придонесе за објективно и засновано на автентични и на докази засновани историски извори, научно толкување на историските настани. Комисијата ќе поднесува едногодишен извештај за својата работа пред владите на Договорните страни.

Значи, комисијата освен што ќе ја утврди историјата, ќе делува и на образовниот процес на договорените страни! Ако се земе во предвид дека Заев при посетата на Бугарија изјави дека Македонија ќе ги менува учебниците, а Борисов не најави такво нешто за бугарското образование, јасен е резултатот на „научното“ истражување на комисијата уште пред истата да се формира. Всушност, уште вчера осамнаа најави за заедничка прослава на Илинден на втори Август. Што тоа Бугарите ќе слават на Мечкин Камен знае веројатно само Заев.

Член 11:

4.Секоја од Договорните страни има право да ги заштитува правата и интересите на своите државјани, на територијата на другата Договорна страна, во согласност со меѓународното право.

5.Република Македонија потврдува дека ништо од нејзиниот Устав не може и не треба да се толкува дека претставува или некогаш ќе претставува основа за мешање во внатрешните работи на Република Бугарија, со цел заштита на статусот и правата на лица што не се државјани на Република Македонија.

6.Двете Договорни страни ќе преземаат ефикасни мерки за спречување на недобронамерна пропаганда од страна на институции и агенции и ќе обесхрабруваат дејности на приватни субјекти, насочени кон поттикнување на насилство, омраза или други слични дејствија, кои би им наштетиле на нивните односи.

Точката број 4 е сосема во ред и е во согласност со сите европски норми, но.... Веќе во 5тата точка јасно се кажува што е целта на овој член од договорот. Македонија со потписот и ратификација на договорот во собранието, јавно и недвомислено се откажува од македонското малцинство во Бугарија. Додека Бугарија има право да ги заштитува правата и интересите на  сите иматели на бугарски пасоши во Македонија. Токму така, со овој член, не само што ние се откажуваме од Македонците во Бугарија, туку јавно дозволуваме Бугарија да ги заштитува интересите на своите државјани во Македонија. Секој Македонец кој поседува бугарски пасош, има и бугарско државјанство. Што значи дека Бугарија има право да ги штити неговите интереси!

Со еден потпис го „продаваме“ македонското малцинство во Бугарија, а добиваме Бугарско малцинство во Македонија, а договорот носи наслов „Договор за пријателство и добрососедство“?!!!!!

Точката број 6, треба да ги замолкне оние на кои овој договор не им се допаѓа! Баш онака добрососедски!

Член 14:

Потпишан во два оригинални примероци, секој од нив на официјалните јазици на Договорните страни – македонски јазик, согласно Уставот на Република Македонија и бугарски јазик, согласно Уставот на Република Бугарија, при што и двата текста имаат еднаква важност. 

И за крај од договорот, во член 14 ја имаме старата дефиниција на Македонскиот јазик. „Македонски јазик, согласно уставот на Република Македонија“. Токму како што рече министерката за надворешни работи на Бугарија: ништо тука не е сменето. Оваа дефиниција е стара 18 години, и во овој договор не е подобрена. Нема признавање на македонскиот јазик!

Заев се обиде да излаже дека во договорот е признат и македонскиот народ, но и тоа не е вистина. Премиерот на прашање на новинар рече:

Во уводниот дел на договорот има дел во кој индиректно се признава постоењето на македонскиот народ, нешто што досега како отстапка не е добиено од Бугарија. Имено, во него стои:  „Имајќи ја предвид заедничката историја, која ги поврзува двете држави и нивните народи…“

Ова не е признавање на македонскиот народ. „Нивните народи“, не значи македонски народ. Да, дефинира разлика меѓу народите во двете држави, но не посочува кои народи. Ако се земе во предвид, дека во Македонија освен Македонци, живеат Албанци, Турци, Срби, Бошњаци, Роми.... станува јасно зошто никаде во договорот не пишува Македонци! Доколку Бугарија сакаше да го признае македонскиот народ како различен од бугарскиот, тоа можеше да се стави во било кој од овие членови или да се напише нов. Истото се однесува и на македонскиот јазик. Воопшто не е тешко. Еве видете.

Член15

Македонскиот народ е различен од бугарскиот народ и зборува на свој македонски јазик, кој е различен од бугарскиот јазик.

Лесно, нели? Ама член 15 не постои. Постојат само 14, од кои 2 се многу опасни и штетни за Македонија. Се друго во договорот се само глупости. Токму затоа Заев и немаше што да каже на вчерашниот прес. „Полупразна, полуполна чаша“ беше филозофијата на премиерот. Празна е! Капка вода нема во неа! Бугарија ќе го споделела своето искуство за влез во ЕУ и НАТО со нас! Озбилно ова? Баш Бугарија ни треба за ова? Они ли се примерот кој сакаме да го следиме? Од сите европски држави ние ќе учиме од Бугарија? По цена на историјата и малцинството? Ама младите ќе се дружеле многу и ќе сме ја засилеле економската размена! Хахахаха добрососедски договор за младите да се дружат? Озбилно ова? СТРАШНО!

Уште пострашен од овој договор е молкот во Македонија. Ги нема сега „Шарените“, ги нема студентите, „пленумите“, нема ниту една невладина да се побуни. Каде се сега Бубо Каров, „Фчерашни“, Сашо Тасевски, Богоевски, Најчевска, Геровски.... Ало борци?!!! Револуционери! Штама а? Се јавија само неколку „експерти“ кои го подржаа договорт, велејќи дека истиот можел да се раскине и тоа еднострано. Како тоа е најдобриот дел од договорот? Па ако е така, зошто го потпишуваме?  Молк и во  ВМРО ДПМНЕ. Го чекале финалниот изглед на договорот за да се изјаснеле. Владите во Македонија и Бугарија го усвоија договорот, но од ВМРО ДПМНЕ чекаат финална верзија?!!!

Од целата вчерашна прес конференција на Заев, се сложувам само во една работа со премиерот. Сите досегашни влади се заслужни за овој договор. Да, Заев ќе го стави потписот на хартија, но ВМРО ДПМНЕ си молчи. Разликата што Зааев не сака да ја спомне е во тоа што никој друг пред него не сакал да го „продаде“ македонскот малцинство и да ја смени нашата историја, па токму затоа не бил потпишан. Но, од друга страна не гледам некој да се обиде да го спречи. Затоа вина носите сите! 

Автор: Пацифист

Колку милиони долари „лапна“ Бубо Каров за да стане советник на министерот?

Живееме во свет во кој дефинициите го изгубија своето значење. Зборовите се менуваат со нови, „поубави“, позвучни... Се се менува онака како што на некој му одговара. Некој кој има доволно моќ да го менува системот во своја корист. Ние малите, сеуште ќе си ги помниме дефинициите и ќе си ги раскажуваме. Еве една...

Дефиниција за ХИПОКРИТ:

Лице кое глуми дека поседува доблести, морални или религиозни убедувања, принципи, итн., Кои тој или таа не ги поседува, особено лице чии дејства ги газат истите принципи кои глуми поседува.

Ако на ова се додаде и дека истата таа личност им суди на оние кои се однесуваат како него, се добива.... Бубо Каров.

20 и кусур години му се дивев на човеков. Има тој многу подолга кариера од тоа, но јас бев дете, а го запознав преку К15. Нема човек во Македонија кој не го знае Цацко. НЕМА! И не само што го знае, туку и сака. Да, иако фиктивен лик Цацко е во срцето на сите Македонци. И во моето. Но, Бубо Каров не е Цацко. Тоа било само глума.

Кога пред неколку години Бубо застана на барикадите и глумеше револуционер, немав ништо против него. Во ред. Си има човекот политичко убедување. Си има став и решил да го каже. Сосема легитимно право, на секој од нас, уште повеќе на јавните личности. Посебно оние кои 20тина години ја критикуваа секоја власт.

Немав ништо против Бубо и кога се појави како гостин кај Борјан и во своето гостување критикуваше новинари кои толку се промениле што тој не може да ги препознае. Рече дека нему не му е во крв да се однесува како нив. Дека не сака политика и дека нема да влезе во партија.  Рече дека му понудиле 5 милиони долари да влезе во „една“ политичка партија, но дека одбил и дека ич не му е криво... Секако за сето ова не понуди никаков доказ, но....

Пред неколку дена Бубо влезе во политика. Стана советник на министер без ресор! Ги погази своите зборови. Зошто? Ако навистина некој му понудил 5 милиони долари а тој без каење одбил, зошто сега влезе во политика? За 6? 8? 12? За колку?

На крајот од видеото Бубо „чесен пред себе“: Што ќе им кажам јас на децата кога ќе си појдам дома? Не знам Бубо, што им кажа? Други се овие пари? Повеќе? Позелени?

Жалосно е кога еден успешен човек, кој е сакан од народот, во зрела возраст се што градел во животот како јавна личност ќе продаде за да биде советник на министер. Оној кој треба да биде пример за сите млади, а не само за своите деца, се продаде себе и си ја смени крвта. Можеби не за милиони, не знам, но факт е дека Бубу повеќе не е Цацко. 

Автор: Пацифист

Популарно