Донесов одлука за повлекување на одлуките за помилување на сите политички експонирани лица, односно за дваесет и двајца. Сите други лица имаат право да поднесат лични барања во однос на одлуките за помилување.
За вкупно 22 лица, кои се политички инволвирани и активни во земјава, нема да важи одлуката за помилување што ја донесе претседателот Ѓорге Иванов. Тој денеска во обраќање до нацијата истакна дека донел нова одлука, а со која го повлекува помилувањето за политичарите кои беа дел од неговиот список на аболирани лица.
- Денес донесов одлука да поништам дел од одлуките за помилување. Донесов одлука за повлекување на одлуките за помилување на сите политички експонирани лица, односно за дваесет и двајца. Сите други лица имаат право да поднесат лични барања во однос на одлуките за помилување. Ниту еден политичар не е недопирлив. Секој ќе одговара за своите постапки. Одлуката за помилување беше најдобар потег за излез од политичката криза - рече Иванов.
Тој претходно нагласи дека многумина, за жал, не ја разбрале неговата идеја за помилување на политичарите, како и на нивните соработници.
- Не ја разбраа или можеби не сакаа да ја разберат таа одлука. Бев обвинуван дека сум сакал да ги заштитам политичарите, дека сум креирал селективна права. Сепак, благодарение на таа одлука денес имаме здрави институции и македонија успешно се справува со предизвиците, како што е мигрантската криза. Одлуката за помилување беше најдобар потег за излез од политичката криза - рече Иванов.
Одлуката беше донесена на 12 април, а тогаш беше донесена одлука за прекин на постапките против 56 лица политичари и нивни соработници. Во листата се најдоа поранешниот премиер и претседател на ВМРО-ДПМНЕ, Никола Груевски, претседателот на СДСМ, Зоран Заев, поранешниот министер за транспорт, Миле Јанакиески, поранешната министерка во МВР, Гордана Јанкулоска.
Таа одлука беше причина за масовни протести, но и народни собири на кои, како поддржувачите на опозицијата, предводени од невладините организации, така и поддржувачите на актуелната власт, предводени од Граѓанското движење за одбрана на Македонија да излезат масовно на улиците и да побараат повлекување на одлуката за аболиција.