Планот на Заев е да дојде на власт преку коалиција со ВМРО?!

Пред повеќе од една година во еден текст напишав дека до избори, кога и да се, ВМРО ДПМНЕ и Никола Груевски нема потреба да превземаат нешто или да трошат пари за кампања, Заев и СДСМ сами ќе ja \\им подарат победата и ете погодив. Јас не знам дали луѓево не сакаат да дојдат на власт, дали толку им е капацитетот или некој ги лаже, но знам дека на 11ти Декември (ако има избори) ги чека невиден дебакал.

судење-Груевски-Заев-6

Од една страна би сакал да им се случи дебакал, затоа што го заслужија. ВМРО ДПМНЕ им даде толку многу шанси да го придобијат гласачкото тело во Македонија, а тие во моментов „на пазарот“ стојат полошо од колку пред две години, кога започна сето лудило. Од друга страна, демократија без опозиција во една држава не е здрава состојба. Еве гледаме што се случува во последниве години во Македонија и како изгледа сето тоа. Кога нема конкуренција, лидерот се опушта и почнува да се однесува егоцентрично. Тоа е така во секоја област, не само во политиката, а најочигледно е во спортот. Ако лигата е слаба, шампионот (колку и да е силен) нема да се докаже во интернационално натпреварување.

Оние кои следат политика знаат дека овој мој тескт е испровоциран од завчерашната изјава на Заев на гости кај Борјан Јовановски, за ставот на СДСМ да се воведе двојазичност на целата територија на Македонија. Во ред, за едно му честитам на градоначалникот на Струмица. Ни кажа на време. Без криење и лажење. Ако СДСМ победи на следните парламентарни избори, во цела Македонија, албанскиот јазик ќе биде официјален, заедно со македонскиот. Сите оние кои ќе гласаат за Заев, сакаат или барем оправдуваат двојазичност. Е сега прашање е колку такви има. Понатаму во изјавата лидерот на опозицијаа вели дека СДСМ ќе има најмногу гласови од Албанците во Македонија. Повеќе и од албанските партии! Тука во една реченица спомна дека, овој исход би бил таков дури и ако социјал демократите не коалицираат со албанска партија пред избори. Значи постои можност тоа да се случи. Всушност само во таков случај постои некаква логика за изјавата на Заев. Ако СДСМ пред избори коалицира со ДУИ или ДПА, таа албанска политичка опција би требало да искочи како победник кај албанскиот гласачки електорат. И да, во тој случај СДСМ ќе има најмногу албански гласови, веројатно ќе освои повеќе гласови од претходните избори, но колку од тие ќе бидат гласови на Македонци? Колку гласови ќе му одземат на ВМРО или пореално, колку ќе му подарат? Со оваа стратегија СДСМ ќе одработи за својот (можен) албански коалиционен партнер и за ВМРО. Коалицискиот партнер ќе добие албански гласови, а ВМРО македонски. Сепак, СДСМ ќе може да се фали со бројот на албански гласови и како тоа тие се партија за сите националности. Ако, пред избори не дојде до коалиција на СДСМ и една од двете големи албански партии, тогаш изјавата на Заев e политичко самоубиство. Не знам дали некој го лажел, дали воопшто во СДСМ се прават анализи или лидерот слепо се следи, но знам дека во Македонија, ниту има потреба од двојазичност, ниту истата ќе биде прифатена од Македонците. СДСМ изгуби огромен број на симпатизери и нивни сигурни гласови со појавувањето на Заев на фудбалскиот меч на Шкендија, а сега форсираат двојазичност? Како тоа би им донело гласови? Стратегијата е толку очајна, што не може ни да стане збор за стратегија, бидејќи истата паѓа во вода со само едно прашање. Ако СДСМ ги застапува интересите на Албанците во Македонија и сака власт од албански гласови, кој ќе ги застапува интересите на Македонците? Или сега и македонски интерес е да се зборува албански и онаму каде не живеат Албанци? Ако не, еве и по дома да си збориме албански, чисто ради тренинг. Единствен начин СДСМ да дојде на власт со оваа стратегија е ако  успее да освои најмногу албански гласови од албанските гласачи во Македонија, што ќе значи дека треба да направи пост-изборна коалиција(влада) со ВМРО ДПМНЕ!!! Тоа е планот? Па како тогаш ќе го исполнат ветувањето за двојазичност на цела територија на Македонија? Колку што јас знам Груевски и сопартицијте не го делат интересот за офцијален Албански јазик во цела Македонија.

Секогаш кога ја критикувам опозицијата сум обоен во ВМРОвец од страна на симпатизерите на СДСМ и никако не можам да им објаснам една проста работа. Ако сакате подобра власт, опозицијата мора да е на ниво! Без разлика кој е на власт, опозицијата има речиси исто важна улога. Нема да кажам дека СДСМ е виновен за сите лоши потези на ВМРО, но нивната погрешна стратегија не им дозволува на гласачите да ја казнат партијата на власт. Познавам многу луѓе кои би гласале против ВМРО, но немаат за кого да гласаат. СДСМ ни ја одзема таа опција.

Автор: Пацифист

Зошто „гаранцијата“ на Заев не е никаква гаранција?

Кога последната колумна ќе ви биде прочитана повеќе од 40.000 пати, а коментарите на оние кои ја прочитале ќе бидат позитивни, изборот за следниот текст доаѓа сам по себе. Кoлку и да е темата (за мене) разочарувачка, и колку и да повторно не ми се пишува за тоа (без воопшто да се занесам дека мојот став е многу важен) во следниве 50 - 100 реда ќе го изложам.

Ете бидна. Мандатот конечно е кај Зоран Заев. Честитки до сите вас кои тоа го чувствувате како победа. Сочувство до оние кои до вчера бевте на лидерски позиции. И честитката и сочувството се искрени колку ... ќе сфатите сами.

Значи, поразениот на последните парламентарни избори, Заев конечно го убеди Претседателот Иванов да престане да го крши Уставот и да му го врачи мандатот. Мандатот  овој пат не го побара претседателот на СДСМ, туку нелигитмно избраниот претседателна собранието, Телат Џафери. Значи со самиот одговор на ова барање, Иванов од својата позиција претседател на Р. Македонија, му даде легитимитет на Џафери. Ќе повторам, Иванов мораше да му го даде мандатот на Заев уште кога лидерот на СДСМ обезбеди 61+ потписи во собранието. Така немаше да имаме упад во собрание, повредени пратеници и уапсени тепачи. Македонија немаше да биде негативна ѕвезда на сите светски медиуми, а Села немаше да стане маченик, жртва, херој... Или можеби и во тој случај истото ќе се случеше? Кој може да претпостави кај нас што би се случило ако...?

Уставот и законите се јасни, но... На пример, претседателот е должен на лидерот/лидерите на партијата/партиите кој/и принеле доказ за мнозинство во собранието да му додели мандат, но... Претседателот нема право да бара гаранција за зачувување на унитарсноста на Македонија од мандаторот, бидејќи тој нема начин да му ги достави, ниту пак претседателот било каков начин да го казни, ако новата влада скршне од нив! Толку е просто! Изјавата дадена на писемно до Иванов од страна на Заев е цртан филм! ЛУДИЛО!!! Приказна за мали деца! Во изјавата лидерот на СДСМ ветува дека „тие“ ќе го заштитат суверенитетот и ќе работат по Уставот. НО, ПО УСТАВОТ, СУВЕРЕНИТЕТОТ ГО ДАВА И НАРОДОТ, А ГО ШТИТИ УСТАВОТ! Значи самата изјава е кршење на Уставот! Се друго што пишува во изјавата го пишува и во уставот, освен делот кој не е под точка, туку како додатен пасус, во кој Заев изјавува дека ниту една платформа, документ или декларација, спротивни на горните точки нема да бидат услов или основа за формирање влада. На крајот од текстот е потпишан лидерот на СДСМ, но има и печат на партијата. Веројатно тоа значи дека сите 49 пратеници стојат зад изјавата на лидерот. Тоа е во ред, но како тоа 49 пратеници можат да гарантираат такво нешто?  Што приложиле како доказ? Која процедура? Кој процес, решение? Било што? Или на жими мајка? Истиот човек кој во еден ден на Бугарите и Србите им порача дека сме ист народ, сега се потпиша на изјава која е противуставна, повикувајќи се на уставот и сите ние треба мирно да спиеме?

А  што ако Заев се шалел? Што ако уште првиот ден по формирањето на Влада на било кој начин реши да ја руши унитарноста на државата? Што ќе превземе Иванов? Силно ќе се расплаче? Ќе свика прес и ќе мафта со листот со печат од СДСМ? И? Која е санкцијата за прекршување на оваа изјава на Заев во законот во Македонија? Колку што јас сум упатен, за секое прекршување на било кој закон, следува санкција предвидена од истиот закон што е прекршен. Која е санкцијата, казната предвидена за Заев или СДСМ во случај на кршење на изјавата? Каде е запишана? Во кој закон? НЕМА ТАКОВ ЗАКОН, затоа и нема кој тоа да го утврди, ниту кој да го санкционира! Токму отсуството на таков закон, оневозможува и реална гаранција дека истото нема да се случи! Ниту пак кој да утврди или да го санкционира. Приказна за мали деца! Уште една сцена од трагедијата која трае 26 години, наречена независна Македонија.

Потписникот на изјавава, Заев,  завчера во интервју за српска телевизија, јавно си изјави дека Албанските знамиња кои во кабинетот на претседателот на собранието ги истакна нелегитимниот Телат Џафери, се косат со Уставот. И толку! Никој ништо не превзема! Нема санкција! Уставот уште еднаш е скршен, па шо? Во овој случај, закон постои, а кршењето на истиот предвидува и санкција, но никако да се најде институција што ќе реагира. Ако, во случај кога постои закон и јасно утвредни правила, никој не реагира, како листот хартија потпишан од Заев, за кој никој и не може да реагира се нарекува ГАРАНЦИЈА?

Во меѓувреме, од другата страна на политичкиот караван, албанските пратеници и функционери во партиите кои со СДСМ ќе ја составуваат следната влада, јавно на телевизија изјавуваат дека „Албанската платформа“ е жива и дека ќе биде дел од новата владина програма! Ок, тие не ја потпишаа изјавата на Заев и СДСМ за унитарност и бла бла бла, ама некој лаже! Кој и да е тој некој, за 10-20 дена ќе стане министер или премиер. Ама, добро е барем имаме гаранција потпишана од Заев и заведена со печатот на СДСМ.

Вчера читам дека ВМРО ДПМНЕ будно ќе го следи Заев и во случај да застрани од ветеното ќе реагира жестоко во склад на демократските можности и ќе се спротивстави. (Ух ми олесна!) Што значи, ќе свика прес и ќе мавта со листот. Групно патриотски ќе се расплачат! Ќе викаат Заев е лош, ви рековме да ни дадете 63 пратеника!

„За заедничка Македонија“ од улица се преселија во судови. Таму ќе ја бараат правдата. Оние кои себе се нарекуваа НАРОДОТ, сега станаа правници?! Јас не знам за НАРОД(от) кој си ја брани унитарноста на државата тоа да го прави на суд. Барем „шарените“, кои ете и они беа НАРОД, не бараа правда на суд. Ок, нивната игра беше сосема поинаква. Тие не признаваа никакви институции, а бараа истите да гонат други. Ама (морам да повторам) и тие беа НАРОДОТ.

Јас што не бев ни со едните, ни со другите, што сум јас? Што сме сите ние кои не фарбавме згради и не пеевме патриотски песни пред собрание? Вие кои не го рушевте уставниот поредок барајќи власт на улица и не го штитевте не уставниот потег на Иванов да не го даде мандатот, вие не сте НАРОДОТ? Вие кои не сакате ниту криминал, ниту кршење устав и уставен поредок, ниту нелегитимен претседател на собрание, ни тепани пратеници.... вие не сте НАРОДОТ? Вие кои сега ниту славите, ниту сте исплашени за своите кариери, вие .... Ако не сте на ничива страна, туку на денот на избори доколку воопшто сте решиле да гласате, се мислите кое е помалото зло и едвај со пенкалот заокружувате некоја од опциите, вас ИСКРЕНО ве жалам! Само заради вас и го пишувам текстов, но простете ми, немам ништо позитивно да ви кажам. Освен сочувство, немам ништо друго да ви понудам.  Можам да ве лажам, но ќе се налутат ако им ја одземам омилената, единствената работа.

Автор: Пацифист

Дали е ова новото знаме на Република Македонија?

Во мојава неколкугодишна „кариера“ како колумнист имало моменти кога не се случило ништо (за мене) интересно за да ме предизвика да изгубам 30-60 минути на тастатура и да го преточам мојот став во текст до вас. Имало и такви периоди кога се случувале по неколку настани за кои сум сакал да пишувам, па во еден текст сум пишувал за се наеднаш. Денеска, изминативе неколку недели ситуацијата е сосем различна. Случувања има еден куп, ама мене за ништо не ми се пишува. Еве и сега мрзливо ги влечам прстиве по тастатура, со чести скокови до YouTube, FB, Zase.mk,…

Искрено не ми се пишува за политика. Се е веќе кажано. Не ми се пишува за Талат Џафери, нелегимниот претседател на македонското собрание. За неговиот националистички испад со знамињата. За денешното обраќање до амбасадорскиот кор на Албански јазик. Не ми се пишува за исполнувањето на „платформата“ на албаснките партии во Македонија. Оние кои досега не сфатија дека истата е реалност и веќе се исполнува, ни од сега нема да сфатат. Не знам дали не сакаат или фунцкионираат на сосема поинаква фрекфенција, живеат во паралелен универзум од овој во кој јас живеам, но јасно е дека тие не гледаат ни П од платформа. Тоа што избор на Албанец за  претседател на собрание на Македонија е токму прва точка во Платформата и што во истата е јасно приложен правец за влошување на односите со Србија, а Заев веќе го започна уривањето со критиките до Вучиќ... тоа не се аргументи. Не, сите ние кои го гледаме ова сме загорени ВМРОвци. Подржувачи на режимот кои работат во одбрана на криминалот. Не знам како тоа мојот негативен став кон ултиматумот наречен платформа го штити ВМРО ДПМНЕ, но ете така стојат работите во Македонија.

Не ми се пишува ниту за двојните стандарди на европските и светските политичари, ниту за неспособнаста на нашите да се изборат за она што сме ги избрале, а тие го ветиле. Смешно е што политичарите кои побараа од нас да ја водат нашата држава, сега на спас го викаат народот! Па народот го направи своето – ГЛАСАШЕ! Ако треба јас да излезам на улица да ја штитам државава, зошто друг да зема плата како пратеник, министер, премиер, претседател?!!!! Четврт век имаме држава, и освен за НАТО и ЕУ, слушам препукувања кој бил полош! И сега за тоа да пишувам? Да пишувам како во Македонија не смее да има влада без преставник на албанските партии, односно албанското гласачко тело (дури ни сега кога СДСМ има многу албански гласови), но од друга страна е многу коректно ако сите албански партии застанат зад ултиматум наречен платформа. Значи, по автоматизам секое нивно барање мора да биде прифатено! Ако утре побараат на знамето да закачиме орел, а тоа претходно го договориле на тркалезна маса (да, да и тркалезната маса е дел од платформата), македонските партии ќе мора да го прифатат тоа, затоа што не смеат да помислат на влада без албанска партија! Озбилно ли треба да пишувам за ова? Што да пишам? Алооооо!!!!!!

Да пишувам за тоа дека и без политичкава криза Македонија не е држава? Да беше држава, кога се појави политичката криза ќе интервенираа институциите. Оние кои всушност се гарант за државата. Како МВР, ЈО, Уставен, Врховен, па и Ману.... ама ете и повеќе од година дена имаме неуставно СЈО, ама Уставен не смее да се произнесе. По Пржино уставот беше згазен уште неколкупати, но Уставен пак си молчи. Претседателот го гази уставот со недавање мандат, ама Уставен не постои. Се избира претседател на собрание, на НЕ-седница, со НЕ-гласање, но нема институција што ќе превземе нешто. Толпа влегува во собрание и тепа пратеници, но полиција нема во доволен број. Шарени фарбаат згради и палат канцеларија на Претседател, но нема полиција, а кога ја има, јаде балони со боја и запалени контејнери.... Ама се ова е веќе кажано, зошто да се повторувам?

Да пишувам за Јана Бурчевкса и Евросонг? Евровизија не гледам од 2014 година и победата на Кончита. Ич не ми е гајле што се дешава во светот кој преку песна промовира хомосексуалност и извртени вредности. Секако, тоа не значи дека не сум информиран дека нашата преставничка вчера не „шокираше“ со информацијата дека е бремена и дека во живо била запросена од своето момче. Колку и да е ова лош амерички филм, на парот и бебчето им посакувам се најдобро, а на Македонија да не троши 350.000 евра догодина на ваква глупост. Нема потреба на граѓаниве да им приредуваме уште разочарувања, и онака треба само да пуштат вести или да отворат Фејсбук.

Па добро, доволно (не)напишав. До следно читање, поздрав од Пацифист.

По крвта во собранието Македонија е „заедничка“ или „едно општество“ за сите?

Кога пред 3 години Фленсбург го елиминра Вардар во последното коло пред големиот фајнал фор, не гледав спорт 3 месеци. Многу спортски екипи за кои сум навивам губеле, но два пораза секогаш ќе паметам. ФК Вардар – Спарта Прага и вкупниот пораз на РК Вардар со Фленсбург во 2014 година. Три години црвено – црните беа блиску до најголемите 4, но кога оваа сезона стана очигледно дека Германците ќе ни бидат последната пречка, јасно ми беше дека е врме за одмазда. Вардар го најави тоа во првите 60 минути во Германија, па едвај го чекав почетокот на мечот во Скопје. И токму пред да почне.... Кога требаше да ги бодрам и славам... Да славам победа, фајнал фор, ИСТОРИЈА... Мечот го догледав до крај, но чувството за победа, одмазда, величина, не дојдоа во очекуваниот сјај, ако воопшто и се појавија. Вардар и во иднина ќе игра Фајнал фор и ќе испишува нова историја на успеси. Црвено црните станаа ракометен џин за кој е само прашање на време кога ќе ја покори Европа. Во тоа воопшто не се сомневам, но ме плаши дека до тогаш пола Македонија ќе навива за црвениот, а другата половина за црниот дел од дресот на Вардар.

Еве сме утрово онаму каде реков дека ќе бидеме многу одамна. На добар дел од читателите не им се допдна насловот на мојот текст „ВМРО и СДСМ немаат решение – доаѓа војна?“ пред еден месец , па по повеќе поплаки го сменив насловот. Но, види чудо, ситуацијата продолжи по својот пат. Право надолу! Јас не сум видовид (не за се  ), интуиција ми е страна работа, не сум аналитичар, ниту стручњак, но и не треба да си ниедно од наведените за да препознаеш дека приказнава нема да има среќен крај, за НИКОГО!

„Сега кога Уставот не не штити и кога правилата на игра веќе не постојат, кога нема судија, секој одговара за сопствените постапки само пред себе. На секој од нас му е препуштено да одлучи по кој пат ќе тргне. Дали ќе следи партија или она што му вели совеста. Дали ќе го гледа сопствениот ќар или пак доброто за државата за која гинеле генерации. Оставете ги боите, не е важно дали припаѓате на „шарената“ или на „црната“ револуција. партиското знаме не е решение, туку напротив - проблемот. Крајно време е да се сплотиме и заедно да најдеме излез.“, пишував во таа колумна, но она вчера во собранието беше токму спротивното. Најпрво пратениците си тераа свои агенди, па Заев се закани, на што доби иста реторика од „За заедничка Македонија“. Потоа за прв пат во историјата слушнавме пратеник од собраниска говорница да пее химна на туѓа држава (албанската), па видовме избор на претседател на собрание надвор од деловники здрав разум и на крај КРВ!

Повредени пратеници, полицајци и демонстранти. Крв по собранискиот мермер и по улиците. Шок бомби, пендраци по демонстрантите, камења и шишиња по полицијата. Искршен инвентар и новинаркса опрема... И? Подобро ли е сега? Победи ли некој? Имате ли сега решение? Сега Македонија е „заедничка“ или стана „едно општество“ за сите? Во НАТО и во ЕУ кога ќе не примат? Неделава или следната? А платформа има ли? Помина ли?

За лудилото да биде целосно се погрижија и медиумите. Мислиш од две различни држави ти презентираат вести. Се согласија дека имало државен удар, само никако да се договорат кој го направил. СДСМ со албанските коалициони партнери или „За заедничка Македонија“.

Во Јане Сандански немаше два победника, немаше бомби, пендраци, крв... Имаше правила, исти за сите. Имаше битка, машка, гради во гради, без скриени агенди (платформи). Многу пот, борба и на крај победа на подобриот. Фантастична атмосфера и публика која навиваше за црвено-црна ракометна историја. Историја подеднакво црвена, колку и црна, и момци спремни да дадат се за тие бои. Токму затоа Вардар је тресе Европа, а собранието ја тресе и онака не стабилната држава и нејзиниот унитарен карактер.

Ме плаши дека ова не е кулминацијата. Сценографијата и приказната сериозно многу потсетуваат на Украина... Затоа уште еднаш, СЕКОЈ ОД НАС НОСИ ОДГОВОРНОСТ ЗА СВОИТЕ ПОСТАПКИ! Да, одговорноста на политичарите е најголема, но и ние кои немаме функции носиме одговорнсот за своите постапки. Запомнете, оној кој е симпатизер на другите, не е лош човек, само има различно животно искуство од вашето. И тој сака подобро утре за себе и своите деца, а со тоа и за вас и вашите деца. Само идејата за тоа како до поквалиетен живот ви се различни. Ништо друго. 

Автор: Пацифист

Популарно