Шкендија, Балистите и Заев – предавници или патриоти?

По многу години и поразот на Работнички од Лил, во Македонија бевме сведоци на евроспки фудбал во последната декада од Август. Овој пат тоа беше Шкендија. Фудбалерите од Тетово дојдоа до портата за влез во Лига на Европа, но не успеаја. За утеха им остануваат 800.000 евра и подигнато реноме на македонскиот фудбал во УЕФА. Долго ќе се прераскажуваат победите на Шкендија во кругот на фудбалски фанови на тетовчани, но и негативниот набој и крај на приказната што го предизвикаа неколку недомислени, глупави потези.

DCIM100GOPRO

Кога еден тим, аутсајдер игра во реномирано фудбалско друштво, целиот народ застанува зад тимот и ги бодри своите идоли. Така беше кога Вардар рамноправно се носеше со Спарта Прага, но не издржа, така беше и кога Работнички даде се од себе против Лил. Така беше и во првите две кола кои годинава Шкендија ги мина во квалификациите за Лигата на Европа. Не познавам ниту еден човек кој не навиваше за црвено црните од Тетово, но... Синоќа сликата беше поинаква. Од целото мое опкружување, остана само еден Македонец кој навиваше за победа на Шкендија и пласман во групната фаза. Сите други, навивавме за тежок пораз, дебакал на македонскиот преставник. Гент ја исполни фаворитската улога и нашата желба, а Шкендија со наведната глава ја напушти арената Филип Втори.

Веќе 2-3 сезони на секој меч против Вардар на кој домаќин е тимот на Шкендија, има сериозни инциденти и нападнати играчи од шампионот на Македонија. Лани повредија 2-3 играчи од Вардар на терен! Го искршија автобусот на скопјани, а при секоја посета на Филип Втори го демолираат стадионот. Но, и покрај ова, повеќето Македонци навиваа за Шкендија во квалифакициите. Глупостите на „Балистите“ им ги простивме со сличните такви на „Комитите“ (иако публиката на Вардар никогаш не нападнала играч на Шкендија, ниту демолирала автобус), но прекрстување на Филип Втори од страна на истите „балисти“, некои медиуми од Албанија, па и од Македонија, не можевме. Иако управата на Шкендија се огради од тоа, не превзема буквално ништо да го спречи. Дека и тие се виновни за дивеењето на нивната навивачка група покажа и синоќешниот натпревар на кој беше нападнат противничкиот голман. Нема да навлегувам во ментална проценка на неандерталецот кој сакаше да тепа спортист, но јасно е дека обезбедувањето повторно не беше на висина на задачата. За тоа е виновна само Шкендија и никој друг. На трибините имаше многу политички слогани, што во фудбалот се строго забранети и истите мора да се одземаат при влез, како и неколку тепачки.

Очигледно е дека Шкендија сака да гради имиџ на Албански клуб и да форсира меѓуетничка нетолеранција со цел да привлече повеќе албанска публика, но не разбирам зошто ова никој не го казни? На кого му одговара сето ова? Шкендија глуми ривал на Вардар, но за тоа да биде реална слика треба да помине барем една деценија на ова ниво. Ривалство се гради со години, не со камења по автобус. Пред само две недели Вардар ги потопи во Скопје, а лани истото им се случи и во Тетово. На терен се гради ривалитет, не по улица викајќи „Динамо Загреб“! Иако поминаа само 3 кола од макеонското фудбалско првенство, Шкендија е веќе во незавидна позиција и титулата е на Вардар да ја изгуби или одбрани. Освен тешкиот пораз во Скопје, на тетовчани треба да им бидат одземени бодови и за прекршување на правилото и пријавување на тим без играч под 21 година во првото коло. Кога за ривал имате екипа како Вардар, ова е 90% завршено првенство. Сега очекувам повторно закани дека Шкендија ќе истапи од лига и ... па до тука одат заканите, бидејќи реална солуција ако истапат од лига, нема.

И како да не беше сето ова доволно за негативен впечаток, од трибините на Фили Втори синоќа се појави селфи од Заев! Ајде што познатиов знаач и љубител на фудбал дошол да гледа Шкендија – Гент, мораше и да се пофали. Речиси и 100% сум сигурен дека лидерот на СДСМ само затоа и дошол на Филип Втори и дека не знае ниту еден играч на Шкендија. но приказната не завршува тука. Денеска војна по порталите. Едниот табор вели дека Заев е предавник, а другиот го величи патриотот од Струмица! Како тоа? Што на пример го прави патриот? Еве јас не разбирам, како тоа од гледање (или барем седење на трибина) фудбал се станува патриот? Сите ли што беа вчера на стадион се патриоти или само тој? Еве јас не знам и кого тоа предал Заев со тоа што бил на стадион? Знаете дека човекот освен што е претседател на СДСМ е и граѓанин на Р.Македонија и дека има право да навива за кого сака без да сноси никаква одговорност за тоа? Заев синоќа не беше на Филип Втори официјално како претседател на СДСМ или градоначалник на Струмица, туку како сите други 28.000 навивачи. Сите ли се предавници? Којзнае човекот може навивал за Белгијците! (тие во жолто)

zaev-pesevski

По долги години Македонија европски фудбал во Август, но наместо спортско уживање добивме политички игри и провокации. Освен момците кои гинеа на терен, сите други вмешани во ова фијаско треба да размислат, на кого му оди во полза ваквиот расплет и до кога „соживот“ ќе биде само збор на политички митинзи.

Автор: Пацифист

Кечерски меч на Заев и Груевски!

Телевизиските програми во Македонија во последниве 10-15 години се преплавени со турски (претходно шпански) серии и реални шоу програми. Евтин начин за пополнување на програмата, што ете за чудо, кај поголемиот дел од публиката наидува на воодушевување. Останатите се оставени да гледаат серии и филмови онлајн или евентуално нешто спорт. Јас сум од овие „останативе“. Телевизот палам исклучиво за спорт и освен Спорт Клуб и Арена, другите програми не знам на кој канал се меморирани. Не дека не им дадов шанса на Ферхунде и компанија или на Сораја, Станија, Мими Оро и другарките... пробав ама не иде. Турциве се останати у 15 век и многу се трагични. Абе трагедија до трагедија! Само чекаш да се расплачеш! Јас пошто не сум толку во контакт со моите емоции, повеќ би гледал како Јунајтед губи од ВБА по дома. Старлеткив, од друга страна, нит се реални, нит се шоу. Се собрале 10 дрољи со тапија у некоја куќа, со 10 балкански „мачо“ фраери и ми глумат реалност! Па уште некои сериозни муабети вртат и тука Маца Дискреција ми филозофира за животов! Момава има Твитер акаунт на кој отворено си се продава за секс! И мени си има, што колку кошта, ама на ТВ нешо мудра е!

Единствено нешто полошо што имам гледано сегашниов ТВ репертоар, а сум гледал многу ТВ на времето, се кечери. Тоа ти е мешавина на турска серија и реално шоу. Прво имаш карпетини од мужи по хеланки, што многу се мразат и се вреѓаат. Па многу се дерат и на крај...НЕ СЕ ТЕПААТ! Скокаат нешо, глумат а у, ама ќотек нема. Се е однапред истренирано, вежбан и режирано. Сценариото некој друг го пишувал, а дечкиве у хеланки само го глумат. Резултатот одамна позна, но публиката вришти! Има и по некоја трагедија, па клетви, па мешање фамилии, ко у турски серии и секако по некоја старлетка за плакнење очи на публиката. И таа секако е мудра и дели свои погледи на светот. ДНО!

Зошто ми текна да пишувам за Кечери? Затоа што пред некој ден и се случија во Собранието на Р. Македонија. Преносот беше најавен како „Седница за интерпелација на Владата на Република Македонија“, но место тоа некој ни пушти кечери! Луда работа. Прво, неколу дена си се закануваа по медиуми. Па следаше „кавгата“ односно расправата, во која паднаа и клетви. За се да кулминира со финалниот меч Заев – Груевски.  Нормално крв не падна, ниту па некој некого повреди. Резултатот беше познат уште пред седницата да започне, а дел од актерите си гледаа фудбал додека траеше „мечот“. Сите беа дојдени со однапред напишани говори и си ги читаа без разлика на тоа што кажал тој пред нив или што се случува во салата. Па така „шарениот“ Павле Богоевски си читаше нешто за тоа како ситуацијата е многу сериозна и како за тоа требаат сериозни политичари, додека потпреседателот на неговата партија СДСМ, Мухамед Зекири е овековечен како гледа фудбал на телефон! Трагедии колку сакате, единствено фалеа старлети што мудруваат, но да се биде политичар и не е многу далеку од тоа да си старлета. А мудрости имаше! Еден за себе рече дека е Тито и тука изгасив ТВ!

Да бараш седница за гласање на недоверба на Влада, а едвај си собрал 42 потписи за тоа, е потег што бара испитување на менталните способности на барателот. Сериозно! Да зборуваш на мобилен од местото на претседател на Собранието додека треа седницата за интерпелација, без разлика колку противзаконски си седнат таму, е доказ за блага ретардација! Ок, може не е блага, ама ретердација е! Што е бетер од нашиве кечери? Само оние кои веруваат дека стварно се тепаат и кои за следното шоу пак ќе купат карти, односно пак ќе ги гласаат на избори.  Запомнете, кечерите живеат од публика. Без публика нема шоу, нема пари, нема кечери!  Сценариото им го пишува друг, но ако нема публика, нема пред кого да го одглумат!

Автор: Пацифист

Ако Русија го убие Заев, кого ќе ни донесат на власт ЕУ и САД?

Не дека нешто се жалам, ама тешко е да се биде колумнист во последниве неколку месеци. Озбилно. Не дека нема за што да се пишува, напротив, Заев и другарчињата секојдневно отвараат по 10тина теми за колумна, но се е веќе кажано и предвидено. Се чувствувам како да се повторувам во секоја колумна, во секој став и реченица. Кога еднаш ќе напишеш дека со Заев го допревме дното, што да пишеш следно?

Кога имаш пишано најмалку 5 текстови за Тиранската платформа, како сега да пишувам за двојазичност? Ете пишав дека законот е против уставен, ама и овој важечкиов од 2008 година е против уставен и сега?

Кога си пишувал за против уставно, против деловничко избирање на претседател на собрание, како сега да пишувам како тој лик се однесува со новинари? Па зарем треба да сум изненаден? Или како се однесувал на дебата на ТВ, каде новинарката другиот гостин не го ни поканила во студио, туку на Скајп? Тоа ли да ме изненади? Или телевизијата која отворено кажа дека се менува уредничка политика веднаш по смената на власт, сега да ме шокира?

Зарем некој очекува паметен и добар потег од градоначалник кој со DJ отвараше автобуска постројка, каде некогаш имало автобуска постројка? Као следниот негов потег ќе биде нова улица? Не бе дечки, он „Адреналинска жицница“ може да напраи, т.е. да вети. Којзнае дали може да ја напраи. Досега не сме виделе ништо направено, а тешко и дека ќе видиме. 4 години Скопје ќе си остане такво какво ни го остави Коце, освен ако Петре и другарите не срушат уште некој споменик.

Би сакал да кажам дека сум изненаден од протерувањето на рускиот дипломат, ама и тоа е веќе видено. Уште пред неколку месеци Заев си кажа дека Русија сака да го убие! Ок, прво да расчистиме. Ако си премиер на држава како Македонија и Русија сака да те нема, абе има да те нема. Истово важи и ако таква желба има било која друга моќна велесила или средно моќна... па дури и не така моќна. Со други зборови, ако некоја држава сака да ни го ликвидира премиерот, а вие знаете да ја лоцирате таа држава на глобус , Заев е завршена работа. Ако не знаете да ја најдете државата на картата, тогаш Заев е безбеден. Откако го расчистивме ова, со страшаната желба на Русија и „храбриот“ струмичанец, да се потсетиме и дека Шекеринска, ничим изазвана, пред неколку месеци на пресконференција и се нафрли на Русија. Зарем по ова треба да чуди дека кога Британија ќе побара ние да се свртиме против Русија, храбриот ни премиер ќе прифати? Па 27 години во Македонија на власт имаме западно ориениентирани политичари. Ликови кои за секој проблем во државава одма ѕвонат во Брисел и Вашингтон. Или ако сакате со други зборови, политичари избрани на непосредни избори од страна на ЕУ и САД. Да, ние гласаме, ама тие си ги бираат. Сега дури и опозицијата си ја избраа! Затоа за прв пат по осамостојувањето СДСМ и ДПМНЕ имаат исти ставови на одредени теми. Еве и од ВМРО се сложија дека Русија е лоша! Само Иванов нешто се мурти, веројатно зошто ова му е последен мандат, па веќе на зависи од моќниот запад. Или којзнае, може и него така му рекле. Да глуми баланс, за да ние граѓаните добиеме вештачка престава за каква-таква рамнотежа.

И додека СДСм и ВМРО, потпомогнати од дечките што с’скаат пајаци на полицајки кај Мавровка, си договарааат промена на име, идентитет, јазик, отвараат проблеми со Русија, си носат неуставни закони итн итн... кај нас овие два дена во фокусот е сиротоно директорче на Агенција за млади и спорт. Еве да не биде дека не сум го спомнал и јас, па да испадне дека не сум ИН. Лично мислам дека ликот е тотално неспособен. Мое мислење е дека на сабајле некој му помага да се облече. До толку е способен. Ама, не  е само он. Цела оваа гарнитура на СДСМ е таква! Сите до еден! Да имаше еден способен у Агенција за Млади и спорт, ќе го откриеше скандалот пред да се случи, ама таков нема. Нема ни кај Петре у тим, па секој ден си тресат зелени по прес конференции. Исто и кај премиерот, па затоа Заев се поздрави-не се поздрави со Трамп, ама и за ова сум пишувал.

Досадно е веќе да пишувам едно исто. 27 години едно исто. Ликови желни за власт и ништо друго. Послушници неспоспобни за визија, а камо ли за план или реализација. Копии еден на друг, во борба еден против друг. Нема тука помало и поголемо зло, само различни имиња на иста стока (роба де). Ајде може на следните избори ќе ни одберат некој различен или можеби, само можеби, ќе ви текне дека вашиот глас е само ваш и ако го дадете против, место ЗА, ништо не сте направиле. Се додека гласаме против едните, без разлика кои се другите, ќе си тапкаме во место. Јас во продавница не купувам Горенка, зошто сум и лут на Милка. Си купувам тоа што ми се допаѓа или НИШТО! И на избори исто се однесувам. Вие?

Автор: Пацифист

Петицијата на Фејсбук успешна - Законот за јазици падна!

Искрено, тешко ми е да го пишувам текстов. На ваков ден, предизвик е да се остане рационален и да се напише текст без емоци, но еве ќе се обидам.

Овој пат ќе одам со точки:

1. Не сум од оние кои се воодушевени од потегот на Груевски во собранието. Премалку и предоцна. Имаше кога тој да покаже дека уставот, законите, државата му значат нешто. Од моментот на првата објавена бомба, кога МВР под власт на ВМРО мораше да го уапси Заев за нелегално стекнати прислушкувани разговори, па се до 27ми Април. Можеше Груевски да докаже дека е патриот, но напротив, докажа дека личниот интерес му е пред се. Ова вчера беше уште една сцена од глумата на „големиот“ лидер.

2. Кога сме кај екс премиерот, вчера Фокус објави, а многумина споделија „наводен“ документ договор меѓу ДУИ и ВМРО ДПМНЕ, во кој пишува дека и партијата на Груевски се сложила на закон за двојазичност. Не дека текстот е било каков доказ, затоа што и јас сега тука можам да искуцам сличен, но еве да земеме дека е реален и дека договорот постоел. И? Како тоа го оправдува носењето на неуставен закон? Не ве разбирам сите вас кои го споделувате, која ви е поената? Како ако го донел Груевски мора да е добар? Или и сега не чини, ама и Груевски ќе го донел? Па што? Пак исто ќе беше неуставен!!! Разликата е што тогаш вие ќе баравте да биде повлечен, а сега го славите. Зошто е тоа така, тоа вие си знаете.

3. Ако сеуште има граѓани на кои не им е јасно дека законов е НЕУСТАВЕН ќе ви спомнам само три податок, а вие обидете се да излезете од партиско етничкиот балон и размислете.

- Овој закон, изгласан со просто мнозинство (значи 61 пратеник - иако во случајот се 64), менува членови во други закони за чија промена во УСТАВОТ пишува дека можат да се менуваат само со 2/3 мнозинство (80 пратеници)! Јасно е сега?

- Изминаа 30 дена одредени за повторно разгледување на законот. „Ако претседателот на Републиката одлучи да не го потпише указот за прогласување на законот, Собранието повторно го разгледува во фаза на трето читање, во рок од 30 дена од денот на донесувањето“ 

- На сето ова слободно додадете ја процедуарата, во забрзана постапка, без право на амандманска расправа и лажното европско знаменце.

4. Законот, освен НЕУСТАВЕН е непрактичен и неспроведлив, затоа што се коси со многу други закони!

5. Законот нема никаква врска со правата на Албанците, туку само со поени за ДУИ на следните избори. Сето ова од проста причина, дека овој закон никогаш нема да профункционира.

6. Законот е НЕПОТРЕБЕН! Дури и ваков каков што, НЕУСТАВЕН, истиот не е реално решение за потребите на Албанците кои живеат во Македонија. Знам дека албанските политичари го рекламираат пред својот електорат како голема победа, но обичнниот Албанец нема да добие ништо, напротив ќе изгуби.

7. Апсолутно е јасно дека овој закон во многу ќе ја влоши меѓуетничката состојба во Македонија и со тоа сите ќе загубиме, па и Албанците. Верувајте, колку и да им е јасно на Македонците дека сето ова е игра на политичките лидери на ДУИ и СДСМ, на крајот дел од негативната енергија ќе се заврти и кон обичниот Албанец. Не би сакал да е така. Би сакал сите да разбереме дека народот нема никаква врска со законот, без разлика на својата етничка припадност, но моето искуство вели дека поделбата ќе се продлабочи и тоа многу.

8. Законот НЕ може да стапи на сила без потпис на указот од страна на претседателот Иванов, кој веќе најави дека повторно ќе го стопира . Ок, „не може“ е силен термин. Не може ни претседател на собрание да се избере во сред сала без седница со гласање на жими мајка. Не може да се донесе закон без амандманска расправа за која се поднесени 35.000 амандмани. Не може да се направи влада со услов „Тиранска платформа“. Не може .... многу тоа „не може“ веќе видовме. Видовме и „добросодедски“ договор со Бугарија и преговори со Грција без црвени линии! Видовме шарени твитерџии кои се продадоа за ситни парички и фотељи. „Револуционери“ кои се бореа тие да бидат новото ВМРО. Видовме како истиот Иванов побара гаранции од Заев и.... Затоа и ова „не може“ не влева многу сигурност дека законот нема да стане официјален.

9. Ако и тоа се случи, последната бариера е Уставниот суд. Истиот оној кој 2 години не се изјаснува за неуставното СЈО.

10. Откако сите институции ќе потфрлат, народот може да ја земе правдата во своите раце. Во нашиов случај тоа би значело илјадници, ако не милиони статуси на Фб и твитови по Твитер! Има да се распишуваме ко луди за „предавниците“, за мајка Македонија, за погребот на татковината. На улица? На улица, вчера пред собрание, 200 луѓе! И да, атмосфера како за погреб! Седете си дома луѓе и попунувајте петиции на ФБ! Така се брани држава! Еве на пример Франција така го доби спорот со... Не, Грција така... Британија??? Сериозно мислите дека на некој му е гајле колку луѓе потпишале некаква петиција на Фејсбук? Озбилно? Као ако се собереме 100.000 потпишани, законот ќе се самозапали по автоматизам?!!! АААА не со ПЕТИЦИЈА!!!! Не сте ми  јасни. Само вчера прочитав мал милиони статуси против законот за јазици од моите ФБ пријателчиња. Сите бесни, повредени, гневни на Заев и компанија, но никого не видов пред Собрание. Сите им се закануваат на СДСМ и ДУИ со „народот“, но не сакаат да бидат дел од „народот“. Тоа ваљда некој друг треба да излезе на улица и да каже доста е?! Сите чекаат да се роди Гоце Делчев, да се врати Никола Карев, да тргне Даме Груев.... Зарем мислите дека и тие македонски историски великани ќе можеле се сами, без поддршка од месното население. Поддршка што некогаш значела и смрт или данок во крв! Што ќе изгубевте вие ако искочевте вчера пред собрание? Што ќе изгубите следниот пат кога нема да излезете на протест против рушењето на уставниот поредок во Макеоднија? Заев е „црпнат“, кое е вашето оправдување?

Автор: Пацифист

Популарно