Во нас е клучот за спас на Македонија

Во последниве две-недели се случи воен удар во Турција, крвави терористички напади во Франција, Германија и Англија, се случи Пржино 3 и уште многу сериозно негативни моменти низ светов, но нема да пишувам за тоа. Нема да пишувам ни за Илинден и свирењето на политичките лидери во Македонија, ниту пак ќе се обидам да ги споредам сегашните предводници на Македонија со оние од славното востание со седиште во Крушево. Не дека немам што да кажам, но ми здодеа да пишувам на теми на кои ништо не можам да променам. Ердоган ќе си остане Ердоган, Циа ќе си глуми ИСИС, а нашиве денешни лидери ќе продолжат со дневно политичките игри на херои и негативци. Веќе видено, пишувано, разглобено, па затоа и бесцелно. Затоа ќе пишувам за нешто што можеме да промениме, јас и вие кои го читате овој текст.

o-INSTAGRAMMING-FOOD-facebook

Досега најмалку 10 пати, зборувајќи за светска и домашна политика, ми било поставено прашањето - каде е излезот? Што можеме да направиме за да се извлечеме од дупкава (светска и македонска). Одговорот е секогаш ист. За да се подобри ситуацијата кај нас, но и во светот, човекот мора да го подигне нивото на свест. Само така можеме да ја оправиме работава. Добрата вест е дека поддигањето на вашата свест влијаете само вие и никој друг, додека лошата е дека тоа е макотрпна, здодевна и доооолга работа. Значи никој не може да ве спречи, но и на никого не можете да се вадите. Не е Грувски, ниту Заев виновен ако не ви успее. ИСИС нема ништо со вашиот неуспех, а Ердоган колку и да е радикален никако не влијае на процесот. Успехот и неуспехот од овој процес се само ваши, а со тоа и одговорноста, па ако сакате и цената од можниот неуспех.

Како до повисока општествена свест? Едноставно, со подигањето на свеста на секој од нас, и тоа секој за себе. Значи, освен што си го должите ова на себе и на Бог (доколку верувате во креатор), истото го должите и на општеството. На сите околу вас. Како до подигнување на сопствената свест? Методот е едноставен, но задачата тешка. Се почнува со едно обично прашање: ЗОШТО? Одговорот, некогаш лесен, друг пат тежок, мора да биде секогаш искрен. Лесен ќе биде на пример ако се запрашате зошто те седнале да јадете. Одогвор: зошто бев гладен/гладна. Потежок, зошто сте го сликале јадењето и сте го објавиле на Фејсбук? Во најголем број од случаите искрен одговор на ова прашање е „за да се пофалам“. Уште потежок, зошто се фалите на Фејсбук? Зошто имате потреба за себе пред другите да изградите лажна слика? И тука најчесто сите застануваат. Најчестиот одоговор кој сум го добил е „затоа што сите тоа го прават“!!!! Уште во времето на баба ми и дедо ми во Скопје се користеше една прашална поговорка: „Ако скокнат сите во Вардар и ти ќе скокнеш?“. Со тој одговор покажувате дека вашата свест е на пониско ниво од колку на луѓето кои живееле пред 100 години, ако тоа не ви пречи, терајте без да одговорите и да се самоанализирате. Ако во животот оправдување за вашите постапки барате во туѓото однесување и тоа не ви пречи, тогаш немате право да критикувате никого, па ни политичарите. Немате право да се жалите на моменталната состојба во Македонија или светот. Бидејќи по тој рецепт сите сме безгрешни и никој не превзема одговорност. Ако вас ве оправдува постапката на другите, односно „сите така прават“, истото го оправдува и секој следен премиер на Македонија. И тој ќе смее да краде колку сака, затоа што сите пред него „така правеле“. Се додека самите се оправдувате и не сте самокритични, не смеете да побарате поинакво однесување од некој друг. Се додека одите на политички митинг за сендвич, 100 денари, бесплатен превоз, 100 евра, работа.... не смеете да им судите на оние кои се на позиција и својот „труд“ го наплаќаат со милиони. Ако вие глумите „Вмро-вец“ или „СДСМ-овец“ за да грабнете што ќе ви дадат, немате право да им судите на оние кои можат да грабнат повеќе глумејќи патриоти, бидејќи во суштина сте исти. Разликата е само во позицијата од која грабате. Вие сте ниско, па собирате трошки, а тие високо и грабаат од трпезата. И пред да почнете да се браните со сиромаштија и немачка, сфатете дека моменталната состојба во Македонија (сиромаштијата) е резултат на ова однесување кое трае со години, а не обратно. Да „драги“ мои, сите ние со нашето однесување ја доведовме ситуацијата до тука, а не Бранко, Љубчо, Никола и Зоран. Сите заедно сме виновни! Се додека не ја прифатиме нашата вина и не пробаме да се промениме, вака ќе биде. Сиромашни, обесправени, маргинализирани, гневни... ќе си кукаме по улици, клупи, кафани и толку. Секогаш некој друг ќе биде крив, ама ние несреќни ќе си живееме во илузија на вечни жртви.

Секојдневните постапки, кои ги правите од навика, речиси по шаблон, зборуваат многу повеќе за вас од колку што можете да сфатите. Или можеби сте сфатиле, но намерно го игнорирате сето тоа, не сакајќи да прифатите дека сликата која ја прикажувате за себе е лажна, а ликот за кој тврдите дека сте вие е измислен. Намерно или не, заборавате дека измислен лик не може да биде среќен. НИКОГАШ!

Свесен дека текстов личи на солење памет да ви посочам дека намерата воопшто не е таа. Јасно ми е дека и јас не сум совршен, а мојата свест ни од далеку не е она што треба да биде. Секако дека и јас имам дел од одговорноста за моменталната ситуација во светот во кој спаѓа и Македонија. Како што споменав погоре, секој одговара за својот ментален развој и нема право да се вади на надворешни влијаниа. Следствено на тоа, споредбата на една со друга личност е контрапродуктивна.

Автор: Пацифист

Еве господине Заев столче за вас. - А не, јас на Пенс у скут ќе му седам

Втори Август 2017 година, Македонија ги одбележува најголемите два празника во својата историја. 114 години од почетокот на Илинденското востание и 73 години од Првото заседание на АСНОМ. Еден датум, а два поводи за славје. Сепак, никој не слави. Мачен е овој празничен ден во Македонија.

Во Крушево никогаш попразно, на Пелинце бетер. Скопје пусто, а во Чаир ниту едно истакнато македонско знаме. Заев во Црна Гора го суша заменикот претседател на САД, Пенс, како го плаши Балканот со лошата Русија, а пропагандата по медиумите и социјалните мрежи го величи премиерот. „Рамо до рамо до Пенс“ е еден од насловите! Па зар у скут да му седне на конференција? „Еве господине Заев столче за вас. А не, јас на Пенс у скут ќе му седам“!!! (Тоа би било добар наслов.... хммм.)

Поминаа 114 години од Илинден и 73 од АСНОМ, а Македонија не била во полоша состојба. Политичката криза која три години ја тресеше државата, дури сега почнува со наплаќање. Цехот допрва ќе го платиме сите. Ок, некои ќе лапнат процент во прв момент, но на крајот и тие ќе платат. Оние кои себе се гледаат како победници со составувањето на новата влада, пополека тргнаа кон целта и личните интереси. Тука не зборувам за Заев и министрите. Ниту за политичарите од било која партија воопшто. Со нив сум одамна на чисто. Едно истражување вели дека 90% од политичарите во светот се психопати, но јас сум сигурен дека тој процент кај нас е над просекот. Токму затоа моето гласачко ливче најмалку 10 години останува неискористено. Она што ме разочарува е народот, или барем дел од народот. Оние најгласните. Победниците.

Шират тези, небулози, лаги... го прават тоа дрско и горди се на себе. Читам денеска дека треба да учиме од Борко Борисов и Талат Џафери кои се поклониле пред гробот на Гоце Делчев и на „Мечкин камен“. Ни одржале лекција со тоа што се поклониле пред нашите херои. Во две реченици се шири опасна лага и се навредува целиот наш идентитет и ниво на свест. Прво, Борисов не се поклонил пред нашиот херој Гоце Делчев, туку пред бугарскиот Гоце Делчев! Според бугарската историја Гоце е Бугарин! Значи, не само што не покажал поштовање кон нас како држава и народ, туку бесрамно ја краде историјата, а вие го фалите! Второ, Талат Џафери нема право да се обрати на „Мечкин камен“ затоа што е нелегитимно избран. Криминално. Ако се тргне ова на страна, спикерот не се поклони пред нашите (Македонците) херои на мечкин камен. Туку пред хероите од Илинден меѓу кој имало и Албанци! Во обид да се покажете како големи луѓе, европејци, либерали, космополити, испаѓате ѓубре, автократи и дискриминатори. Вие им го одземате учеството и заслугите на Албанците во Илинденското востание!

Заев бил премиер со визија и наместо кон историјата гледал кон иднината, при потпишувањето на договорот со Бугарија. Време било да гледаме напред. Борисов вели „ако гледате назад додека одите, ќе паднете“. Ок. Тогаш зошто во договорот се обработува историјата и ќе се формира комисија за утврдување на историски факти кои треба да се вметнат во образовен процес? Ако не гледаме назад кон историјата, од каде потребата да ја менуваме? Или ние (Македонците) не треба да гледаме назад и треба да си ја предадеме историјата (попат и малцинството) за да одиме напред? Тоа ли е визијата?

Гледам добар дел од „Бирото за запослување во Влада“, познато како Твитер заедница, уште се замара со Груевски. Дечки толку ви е капацитетот или за тоа ве платија? Груевски многу одамна не е премиер. Си имаме нов. Визионер е. Пополнети се местатаза советници, ако не ве примиле досега слободно плукајте по нив. Или видете со Бетмен да ви среди некоја комисија у ВМРО ДПМНЕ.

По карактер сум оптимист, но ситуацијава е премногу темна за надежта да опстои. Можеби, само можеби, во зачеток е формирање на трета, неисполитизирана (барем засега), колективна свест. Пензионирани професори, поранешна новинарка и уште неколку паметни луѓе со интегритет и морални вредности, по социјалните мрежи имаат огромен број на следбеници. Можеби конечно во Македонија се раѓа „интелегенцијата“. Рано е да се зборува, но обично се така тивко почнува.

За крај, тотално на друга страна од Европа, но поврзано со Илинден, односно Комитите. ФК Вардар на прагот на историја и плејоф за ЛШ што носи сигурен пласман во групната фаза во ЛЕ. Со 1-0 од Скопје црвоно црните се единствената шанса овој 2ри Август да го паметам по добро. Ајде момци! За вас, за нас, за црвено црна, за Комити, за ИЛИНДЕН!

Автор: Пацифист

Договорот со Бугарија: НЕ ПОСТОЈАТ македонски јазик, народ и малцинство во Бугарија

Дојде и тој ден. Владата предводена од Заев го обелодени на јавноста договорт за добрососедски односи со Бугарија.  Премиерот одржа прес конференција, на која речиси еден час се обидуваше да го објасни како позитивен договорот од 14 члена, од кои само 3 се суштински, а остаокот се само фарба, козметика. Во свој стил, полн со фрази и секако лаги, Заев не одговори директно на ниту едно незгодно новинарско прашање и зборуваше за убава иднина на младите Македонци и Бугари. Час подоцна договорот осамна на веб страницата на Владата на Република Макеоднија и еве што прочитавме таму.

Член 8:

2.Во рок најдоцна до три месеци од влегувањето во сила на овој договор, со цел продлабочување на заемната доверба, двете Договорни страни ќе формираат Заедничка мултидисциплинарна експертска комисија за историски и образовни прашања, на паритетна основа, за да придонесе за објективно и засновано на автентични и на докази засновани историски извори, научно толкување на историските настани. Комисијата ќе поднесува едногодишен извештај за својата работа пред владите на Договорните страни.

Значи, комисијата освен што ќе ја утврди историјата, ќе делува и на образовниот процес на договорените страни! Ако се земе во предвид дека Заев при посетата на Бугарија изјави дека Македонија ќе ги менува учебниците, а Борисов не најави такво нешто за бугарското образование, јасен е резултатот на „научното“ истражување на комисијата уште пред истата да се формира. Всушност, уште вчера осамнаа најави за заедничка прослава на Илинден на втори Август. Што тоа Бугарите ќе слават на Мечкин Камен знае веројатно само Заев.

Член 11:

4.Секоја од Договорните страни има право да ги заштитува правата и интересите на своите државјани, на територијата на другата Договорна страна, во согласност со меѓународното право.

5.Република Македонија потврдува дека ништо од нејзиниот Устав не може и не треба да се толкува дека претставува или некогаш ќе претставува основа за мешање во внатрешните работи на Република Бугарија, со цел заштита на статусот и правата на лица што не се државјани на Република Македонија.

6.Двете Договорни страни ќе преземаат ефикасни мерки за спречување на недобронамерна пропаганда од страна на институции и агенции и ќе обесхрабруваат дејности на приватни субјекти, насочени кон поттикнување на насилство, омраза или други слични дејствија, кои би им наштетиле на нивните односи.

Точката број 4 е сосема во ред и е во согласност со сите европски норми, но.... Веќе во 5тата точка јасно се кажува што е целта на овој член од договорот. Македонија со потписот и ратификација на договорот во собранието, јавно и недвомислено се откажува од македонското малцинство во Бугарија. Додека Бугарија има право да ги заштитува правата и интересите на  сите иматели на бугарски пасоши во Македонија. Токму така, со овој член, не само што ние се откажуваме од Македонците во Бугарија, туку јавно дозволуваме Бугарија да ги заштитува интересите на своите државјани во Македонија. Секој Македонец кој поседува бугарски пасош, има и бугарско државјанство. Што значи дека Бугарија има право да ги штити неговите интереси!

Со еден потпис го „продаваме“ македонското малцинство во Бугарија, а добиваме Бугарско малцинство во Македонија, а договорот носи наслов „Договор за пријателство и добрососедство“?!!!!!

Точката број 6, треба да ги замолкне оние на кои овој договор не им се допаѓа! Баш онака добрососедски!

Член 14:

Потпишан во два оригинални примероци, секој од нив на официјалните јазици на Договорните страни – македонски јазик, согласно Уставот на Република Македонија и бугарски јазик, согласно Уставот на Република Бугарија, при што и двата текста имаат еднаква важност. 

И за крај од договорот, во член 14 ја имаме старата дефиниција на Македонскиот јазик. „Македонски јазик, согласно уставот на Република Македонија“. Токму како што рече министерката за надворешни работи на Бугарија: ништо тука не е сменето. Оваа дефиниција е стара 18 години, и во овој договор не е подобрена. Нема признавање на македонскиот јазик!

Заев се обиде да излаже дека во договорот е признат и македонскиот народ, но и тоа не е вистина. Премиерот на прашање на новинар рече:

Во уводниот дел на договорот има дел во кој индиректно се признава постоењето на македонскиот народ, нешто што досега како отстапка не е добиено од Бугарија. Имено, во него стои:  „Имајќи ја предвид заедничката историја, која ги поврзува двете држави и нивните народи…“

Ова не е признавање на македонскиот народ. „Нивните народи“, не значи македонски народ. Да, дефинира разлика меѓу народите во двете држави, но не посочува кои народи. Ако се земе во предвид, дека во Македонија освен Македонци, живеат Албанци, Турци, Срби, Бошњаци, Роми.... станува јасно зошто никаде во договорот не пишува Македонци! Доколку Бугарија сакаше да го признае македонскиот народ како различен од бугарскиот, тоа можеше да се стави во било кој од овие членови или да се напише нов. Истото се однесува и на македонскиот јазик. Воопшто не е тешко. Еве видете.

Член15

Македонскиот народ е различен од бугарскиот народ и зборува на свој македонски јазик, кој е различен од бугарскиот јазик.

Лесно, нели? Ама член 15 не постои. Постојат само 14, од кои 2 се многу опасни и штетни за Македонија. Се друго во договорот се само глупости. Токму затоа Заев и немаше што да каже на вчерашниот прес. „Полупразна, полуполна чаша“ беше филозофијата на премиерот. Празна е! Капка вода нема во неа! Бугарија ќе го споделела своето искуство за влез во ЕУ и НАТО со нас! Озбилно ова? Баш Бугарија ни треба за ова? Они ли се примерот кој сакаме да го следиме? Од сите европски држави ние ќе учиме од Бугарија? По цена на историјата и малцинството? Ама младите ќе се дружеле многу и ќе сме ја засилеле економската размена! Хахахаха добрососедски договор за младите да се дружат? Озбилно ова? СТРАШНО!

Уште пострашен од овој договор е молкот во Македонија. Ги нема сега „Шарените“, ги нема студентите, „пленумите“, нема ниту една невладина да се побуни. Каде се сега Бубо Каров, „Фчерашни“, Сашо Тасевски, Богоевски, Најчевска, Геровски.... Ало борци?!!! Револуционери! Штама а? Се јавија само неколку „експерти“ кои го подржаа договорт, велејќи дека истиот можел да се раскине и тоа еднострано. Како тоа е најдобриот дел од договорот? Па ако е така, зошто го потпишуваме?  Молк и во  ВМРО ДПМНЕ. Го чекале финалниот изглед на договорот за да се изјаснеле. Владите во Македонија и Бугарија го усвоија договорот, но од ВМРО ДПМНЕ чекаат финална верзија?!!!

Од целата вчерашна прес конференција на Заев, се сложувам само во една работа со премиерот. Сите досегашни влади се заслужни за овој договор. Да, Заев ќе го стави потписот на хартија, но ВМРО ДПМНЕ си молчи. Разликата што Зааев не сака да ја спомне е во тоа што никој друг пред него не сакал да го „продаде“ македонскот малцинство и да ја смени нашата историја, па токму затоа не бил потпишан. Но, од друга страна не гледам некој да се обиде да го спречи. Затоа вина носите сите! 

Автор: Пацифист

Колку милиони долари „лапна“ Бубо Каров за да стане советник на министерот?

Живееме во свет во кој дефинициите го изгубија своето значење. Зборовите се менуваат со нови, „поубави“, позвучни... Се се менува онака како што на некој му одговара. Некој кој има доволно моќ да го менува системот во своја корист. Ние малите, сеуште ќе си ги помниме дефинициите и ќе си ги раскажуваме. Еве една...

Дефиниција за ХИПОКРИТ:

Лице кое глуми дека поседува доблести, морални или религиозни убедувања, принципи, итн., Кои тој или таа не ги поседува, особено лице чии дејства ги газат истите принципи кои глуми поседува.

Ако на ова се додаде и дека истата таа личност им суди на оние кои се однесуваат како него, се добива.... Бубо Каров.

20 и кусур години му се дивев на човеков. Има тој многу подолга кариера од тоа, но јас бев дете, а го запознав преку К15. Нема човек во Македонија кој не го знае Цацко. НЕМА! И не само што го знае, туку и сака. Да, иако фиктивен лик Цацко е во срцето на сите Македонци. И во моето. Но, Бубо Каров не е Цацко. Тоа било само глума.

Кога пред неколку години Бубо застана на барикадите и глумеше револуционер, немав ништо против него. Во ред. Си има човекот политичко убедување. Си има став и решил да го каже. Сосема легитимно право, на секој од нас, уште повеќе на јавните личности. Посебно оние кои 20тина години ја критикуваа секоја власт.

Немав ништо против Бубо и кога се појави како гостин кај Борјан и во своето гостување критикуваше новинари кои толку се промениле што тој не може да ги препознае. Рече дека нему не му е во крв да се однесува како нив. Дека не сака политика и дека нема да влезе во партија.  Рече дека му понудиле 5 милиони долари да влезе во „една“ политичка партија, но дека одбил и дека ич не му е криво... Секако за сето ова не понуди никаков доказ, но....

Пред неколку дена Бубо влезе во политика. Стана советник на министер без ресор! Ги погази своите зборови. Зошто? Ако навистина некој му понудил 5 милиони долари а тој без каење одбил, зошто сега влезе во политика? За 6? 8? 12? За колку?

На крајот од видеото Бубо „чесен пред себе“: Што ќе им кажам јас на децата кога ќе си појдам дома? Не знам Бубо, што им кажа? Други се овие пари? Повеќе? Позелени?

Жалосно е кога еден успешен човек, кој е сакан од народот, во зрела возраст се што градел во животот како јавна личност ќе продаде за да биде советник на министер. Оној кој треба да биде пример за сите млади, а не само за своите деца, се продаде себе и си ја смени крвта. Можеби не за милиони, не знам, но факт е дека Бубу повеќе не е Цацко. 

Автор: Пацифист

Популарно