Инстаграм воведува нова функција

Инстаграм тестира „рекламна пауза“ што ве принудува да паузирате и да гледате реклама некое време пред да продолжите да се движите низ вашиот “feed”.

Откако самите корисници на социјалната мрежа забележаа дека во апликацијата Инстаграм почнаа да се појавуваат реклами што не може да се прескокнат, платформата официјално потврди дека ја тестира функцијата наречена „рекламна пауза“.

Новиот тип на рекламирање прикажува тајмер над рекламата, кој, додека не истече, ги спречува корисниците да продолжат да скролаат. Со други зборови, Инстаграм тестира сличен модел што корисниците го гледаат на платформата “YouTube” со години.

Кога корисниците ќе ја допрат иконата за повеќе информации за функцијата, Инстаграм прикажува порака која вели: „Паузите за реклами се нов начин за гледање реклами на Инстаграм. Понекогаш можеби ќе треба да погледнете реклама пред да продолжите да скролате“.

„Ние секогаш тестираме формати кои ќе им дадат вредност на огласувачите“, изјави портпаролот на компанијата за “TechCrunch”. „Бидејќи сè уште тестираме и учиме, ќе ја известиме јавноста доколку резултатите од тестот доведат до официјални промени на производот“.

Инстаграм веќе прикажува спонзорирани објави и реклами помеѓу содржините низ кои се движите.

Останува непознато колку луѓе може да ги видат рекламите што не се прескокнуваат, и како и кога ќе заврши тестирањето. Меѓутоа, доколку новата функција стане постојан дел од официјалната апликација, нема сомнеж дека тоа ќе биде многу непопуларен потег.

Многу корисници гласно се пожалија на овие промени преку различни социјални мрежи и форуми. Додека некои велат дека ќе ја затворат апликацијата секогаш кога ќе видат реклами за „рекламна пауза“, други се закануваат дека ќе го намалат времето што го поминуваат на Инстаграм или целосно ќе престанат да го користат.

„Ми недостасува музиката“: Селин Дион се расплака на премиерата на нејзиниот документарен филм

Новиот документарен филм на Селин Дион (56) ја прикажува здравствената борба на пејачката, како нејзината болест ѝ влијае на гласот и како изгледа  нејзиното секојдневие „зад кулисите“.

Во декември 2022 година, музичката дива сподели дека ѝ е дијагностициран синдром на вкочанета личност, кој ги претвора луѓето во живи статуи. Тогаш таа сподели дека ќе ги откаже концертите од нејзината претстојна концертна турнеја.

Синоќа се одржа премиерата на филмот „Јас сум: Селин Дион“ („I Am: Celine Dion“), на која присуствуваше и пејачката.

„Не ми се верува колку сум богата што имам вакви обожаватели во мојот живот“, изјави Дион, која плачела по премиерата на документарниот филм во Њујорк, пренесе „Пипл“.

„Вашето присуство на моето патување беше подарок. Вашата љубов и поддршка ме турнаа напред низ сите проблеми“, изјави емотивната пејачка.

Покрај фановите, пејачката се заблагодари и на својот тим, но и на децата.

„Се разбира, никогаш немаше да застанам пред вас доколку ја немав поддршката и љубовта од моите деца. Од срце ви благодарам на сите што бевте дел од моето патување. Овој филм е љубовно писмо до сите вас“, изјави Дион, за што беше наградена со громогласен аплауз.

Да потсетиме, синдромот на вкочанета личност е ретка невролошка болест со карактеристики на автоимуно заболување. Оваа состојба погодува само еден од милион луѓе, главно на возраст од 20 до 50 години. За жал, нема лек за оваа здравствена состојба, но симптомите можат да се ублажат со соодветни третмани.

Марија Шерифовиќ откри како изгледа таткото на нејзиното дете

Марија Шерифовиќ гостувајќи во забавна емисија, за прв пат проговори за биолошкиот татко на нејзиниот шестмесечен син Марио, кој го доби преку сурогат мајка. Српската пејачка изјави дека нема да го открие идентитетот на таткото, бидејќи во тој случај би можела да биде казнета.

„Тоа се работи за кои не можам и не треба да зборувам поради сите потпишани договори, бидејќи никогаш не се знае дали некој ќе го преведе ова, а потоа (таткото) ќе ме тужи за десет милиони долари, можеби и повеќе“, објасни таа.

Потоа додаде: „Тој е одличен фраер, Европеец“.

Пејачката открила и дека ќе му биде најголемиот поддржувач на нејзиниот син, што и да прави во животот.

Нека биде здраво, паметно и чесно суштество. Што се однесува до мене, тој може да биде и доктор на науки и вулканизер. Ќе се обидам да го слушнам, да го видам, да ги слушам неговите потреби и да му бидам поддршка“, рече таа.

Плажата „Месечев залив“ во Словенија - една од најубавите во светот

Малата карпеста плажа „Месечев залив“ на словенечкото крајбрежје е прогласена за една од најдобрите во светот од страна на „Биг 7 травел“ – глобална интернет-страница за совети за патувања, објави весникот „Словенија тајмс“.

„Плажата не може да се пофали со тропскиот ветар на Карибите, но е неверојатно убава. Благодарение на нејзината изолираност и заштитениот статус, најверојатно ќе го имате целото место за себе“, се вели во описот на „Биг 7 травел“.

„Восхитувајте се на неверојатните погледи на Јадранското Море долж една од неколкуте пешачки патеки што се движат низ резерватот или едноставно впијте го сонцето“, се додава.

Инаку, „Месечевиот залив“ се наоѓа во природниот резерват Струњан и до него може да се стигне само пеш. Тоа е неразвиена плажа без удобности во подножјето на црвеникави карпи коишто постепено преоѓаат во маслинови градини и лозје.

Популарно