Адвокатка пријавила дека за утре било планирано да се бомбардира Основениот суд Тетово,откако во својата канцеларија видела лист со порака потпишана од ОВК, соопшти денес доцна попладне Министерството за внатрешни работи.
Според официјалната верзија на полицијата, триесет и деветгодишната тетовка Н.Ј, денеска околу 8 часот и 40 минути пријавила во Полициската станица Тетово дека утрото кога влегла во нејзиниот деловен објект ( адвокатска канцеларија ), лоцирана на улица „Струшка“ во Тетово, на подот забележала писмо.
Како што се наведува во соопштението, во писмото се наоѓал лист хартија на кој рачно, со кирилично писмо, било напишано: „На 13 април ќе се бомбардира Судот во Тетово, големa количинa експлозија има внатре, доста игравте со народот, соопштение ОВК“.
Од полицијата информираат дека веднаш е известен јавен обвинител кој дал насоки за мерките и активностите што треба да се превземат, по што повеќе служби на СВР Тетово испратени се во и околу објектот на Основниот суд Тетово, а известени се и соодветните служби на Министерството за внатрешни работи во Скопје.
Нешто подоцна, по 13 часот, припадници на Единицата за антитероризам на МВР извршиле комплетно пребарување на внатрешноста на објектот и просторот околу истиот, при што не се пронајдени никакви експлозивни или други средства.
Од МВР наведуваат дека е извршен и комплетен увид, а Секторот за внатрешни работи Тетово работи на расветлување на сите поединости-кој, зошто и со какви мотиви го оставил писмото во адвокатската канцеларија на Н.Ј и која била целта.
