Дали ќи знаете правата? Ако 3 пати ви се расипе телевизорот под гаранција мора да ви дадат нов

Македонија

на 5.2014

Сервисирањето технички апарати бил најголем проблем на кој се пожалиле македонските граѓани во април годинава до Организацијата за заштита на потрошувачите. Најмногу поплаки имало за мобилни телефони, лап-топ, телевизори, како и производи од бела техника меѓу кои се фрижидери, машини за перење и шпорети.

- Проблемот се јавува во тоа што потрошувачите се уште не знаат дека еден производ, согласно Законот за заштита на потрошувачи, може да се сервисира најмногу трипати и доколку се расипе четврти пат тие имаат право да бараат нов производ или поврат на средствата, информираат од Организацијата за заштита на потрошувачите.

Појаснуваат дека сервисирањето на производот може да трае најмногу 30 дена и дека доколку не се сервисира во тој период, потрошувачите имаат право да бараат нов производ или поврат на средствата.

Како што наведуваат, чести се проблемите кога трговците од најразлични компании не ги почитуваат овие права на потрошувачите и често не им даваат нови производи или поврат на средствата. Организацијата информира дека голем ланец маркети кој продава технички производи направил заблуда кај потрошувачите со тоа што издал флаери со погрешно означени карактеристики на одредени производи, па производителот на тие производи се обратил во Организацијата која реагирала веднаш до Државниот пазарен инспекторат тоа да биде спречено.

Потрошувачите реагирале и на купувањето во интернет продавници и неможноста да остварат контакт доколку не се задоволни од производот што го порачале.

- Проблем кој станува се посериозен се нови интернет продавници кои се или не се регистрирани како фирми во централниот регистар и нудат најразлични производи кои можат да се купат единствено преку интернет. Овие производи се доставуваат по пат на брза пошта, а проблемот се јавува кога потрошувачите не се задоволни од производот или кога добиле сосема друг производ од тој што го нарачале и сакаат да го остварат своето право и да го вратат производот во рок од осум дена. Тогаш тие се доведени во една лоша позиција поради тоа што најчесто контакт со трговецот речиси нема, а најчесто има само еден мобилен телефон кој не е во функција. Така тие не можат да го остварат своето право да го вратат производот во рок од осум дена затоа што немаат информација на која адреса треба да се прати, иако многу често на овие веб страници пишува дека производот може да се користи дури и до 60 дена и доколку потрошувачот не е задоволен може да го врати, наведуваат од ОПМ.

Потрошувачите се пожалиле и на јавните претпријатија и телекомуникациските оператори. Најчесто за сметките кои или им стигнувале однапред или пак воопшто не стигнале, потоа биле нереални сметките за вода и смет или парно.

Чест проблем, посочуваат, се и договорите кои се потпишуваат со телекомуникациските оператори кои содржат пасуси со многу мали букви поради што постарите лица не ни можат да ги прочитаат и се јавува проблем кога некој ќе ги извести што точно потпишале. Секако се уште стандарден проблем е со испораката на топлинска енергија, потрошувачите секојдневно се жалат на превисоки суми за парно, како и за паушалите кои се обврзани да ги плаќаат иако не користат парно греење или често воопшто не ни имаат цевки за парно греење кои поминуваат низ нивниот стан, истакнуваат од Организацијата на потрошувачи.

Потрошувачите се жалеле и на готовата храна што се продава во некои супер маркети бидејќи немало наведено декларација со содржината. ОПМ реагирала до Агенцијата за храна и ветеринарство за да се истакнува декларација со цел потрошувачите да бидат информирани за какво јадење се работи и што содржи

Вработена во битолско средно училиште нападната од колешка

Македонија

пред 11 часа

Вработена во средно училиште во Битола нападната од своја колешка.

- На 18.04.2024 во СВР Битола, Х.Т.(28) од Битола пријавила дека во средно училиште во Битола била физички нападната од нејзината колешка Ј.Н., информира МВР.

Се преземаат мерки за расчистување на настанот.

Приватните специјализанти четврти ден на штрајк

Македонија

пред еден ден

Штрајкот на приватните специјализанти продолжува и понатаму. На денешниот, четврти ден од генералниот штрајк, беше изразена осуда за притисоците што ги имаат од клиниките и од постарите колеги специјалисти.

Доктор Христина Илиоска Чешлароска, специјализант по интерна медицина, трета година, рече дека сака да ги охрабри сите колеги приватни специјализанти, да не подлегнат на притисоците од клиниките и да издржат во оваа нивна борба.

– Со оглед на тоа дека Министерството за здравство и министерот немаат слух за нашите барања, односно се изјаснија само за последното трето барање за решавање на нашиот статус, свесни сме и знаеме дека е тоа долг процес и нашиот статус нема така лесно и брзо да се реши, додаде Илиоска Чешлароска.

Таа појасни дека затоа сакале веднаш да се остварат првите две нивни барања, покачување на месечниот надоместок и воведување на здравствено осигурување. Притоа, истакна, дека со оглед на тоа што тие две барања за кои барале итно да бидат решени, не биле решени, тие ќе продолжеле со нивниот штрајк.

-Бидејќи министерот очигледно нема слух и не гледа дека ние штрајкуваме, во понеделник, во пет до 12, пред Министерството за здравство, повторно ќе се собереме на протест, под мотото, „Пет до 12 за македонското здравство“. Со тоа сакаме да упатиме јасна порака до Министерството за здравство и до целата држава. Затоа што, доколку овие 400 приватни специјализанти не ги добијат своите барања, јас сум сигурна дека на половина од нив, веќе, во некој ќош дома им стои куферот и чекаат само да го спакуваат и да заминат, подвлече Илиоска Чешлароска.

На новинарско прашање, таа одговори дека до сите катедри упатиле барање за поддршка. Јавно се заблагодари на професорката од Медицински факултет, инаку од клиниката за ревматологија, што вчера им даде поддршка. (МИА)

Грејната сезона продолжува поради временските услови

Македонија

пред 3 дена

АД ЕСМ ги информира потрошувачите приклучени на системот за централно греење со кој управуваат компаниите формирани од АД ЕСМ, како и подружницата „Енергетика“, дека за 18.4.2023 година се создадени услови за испорака на топлинска енергија.

Оваа информација е во согласност со одлуката на Регулаторната комисија за енергетика и водни услуги на РСМ, а врз основа на прогнозираната средна дневна температура на воздухот во Скопје од 11˚С за 18.4.2023 година од Управата за хидрометеролошки работи. Снабдувањето со топлинска енергија во согласност со регулативата по правило се врши до 15 април, но грејната сезона може да биде продолжена до 30 април во зависност од временските услови, велат од ЕСМ.

Конечната одлука за испорака на топлинска енергија во деновите по 15 април секојдневно ја носи Регулаторната комисија за енергетика и водни услуги на РСМ ако се исполнети условите за снабдување со топлинска енергија, односно доколку прогнозираната средна надворешна температура за наредниот ден е еднаква или помала од 12°С според податоците од Управата за хидрометеоролошки работи на РСМ, се додава во соопштението на ЕСМ.