Витаминка: Наградната игра не беше наместена, туку...

Македонија

на 10.2016

Десетте награди за семејството Талески стави сомнеж на големата наградна игра ,,Стобиранка“, што ја организира ,,Витаминка“ Прилеп.

Милан Талески, неговата сопруга и ќерка добија еден телевизор, два таблети, еден смартфон, три пара слушалки, еден ранец и два пакети производи. Токму нивното презиме, имињата и истата адреса обајвени во известувањето за добитниците, беа главна причина да почне лавина од коментари по социјалните мрежи околу тоа дали е играта регуларна, дали се работи за местенка, чиста случајност или голема и неверојатна среќа.

Талески ја бомбардирале „Витаминка“

Семејството Талески по добивањето на наградите, во разговор со претставници од ,,Витаминка“ раскажале дека испратиле дури 640 пликоа, со по пет празни ќесички од смоки и слични Стоби производи. Таткото Милан работел како дистрибутер на плински боци, мајката во ресторан, а ќерката учела во средно медицинско училиште.

Тие купиле голем број на производи од ,,Витаминка“ со цел да добијат некоја од поголемите награди, меѓу кои што имаше и автомобил и скутер, а бидејќи не можеле да изедат самите се што купиле, производите ги подарувале на соседи, пријатели и блиски луѓе. За да можат да учествуваат со 640 пликоа, Талески купиле дури 3.200 производи на ,,Витаминка“.

За разлика од фамилијата Талески, добитникот на главната награда, автомобил Тојота Јарис, Џетан Цапа од Дебар, испратил само четири пликоа. Тој има 22 години и работи во компанија за осигурување, а минатата година доживеал сообраќајна незгода, поради која што останал без автомобил. Од ,,Витаминка“ велат дека бил пресреќен поради освоениот автомобил. Скутерот го добила девојка од Скопје, чија мајка ги испратила пликоата во нејзино име, а вкупно испратила 12.

Нема простор за какви било пропусти

Извлекувањето на наградите се одвиваше пред шестчлена комисија и се емитуваше на Јутјуб каналот на ,,Витаминка“. Тие ни потврдија дека пристигнале повеќе од 70.000 пликоа. Освен извлекувањето кое што дигна голема ,,прашина“ во јавноста, предвидени се уште две, и тоа на 27 октомври и на 25 декември. Сите неизвлечени пликови од претходните извлекувања учествуваат во секое наредно.

„Витаминка како сериозна компанија ги зеде предвид сите коментари на ФБ кои се однесуваат на наградната игра Стобиранка. Направена е дополнителна проверка на сите добитници и сакаме да ве информираме дека нема ниту една нерегуларност ниту пак злоупотреба на механизмите на наградната игра. Наградите беа извлечени по случаен избор и транспарентно во пренос во живо, пред повеќечлена комисија. „Витаминка“ која е компанија со традиција од 60 години во никој случај нема да дозволи да се случи каков било пропуст што ќе ја доведе во прашање нејзината репутација, а особено поради одговорноста која ја имаме пред своите лојални потрошувачи и пред своите вработени“ – изјавија за ,,Фокус“, преставници од „Витаминка“.

ДИК: Излезноста до 13 часот е 25,48 проценти, поголема во однос на 8 мај

Македонија

пред 13 часа

Излезноста на седумте избирачки места каде денеска се прегласува за парламентарните избори до 13 часот е 25,48 проценти, соопшти Државната изборна комисија.

Од вкупно запишаните 4.514 гласачи гласале 1150 гласачи. Во споредба со гласањето на 8 мај, на ова прегласување се забележува зголемена излезеност за 3,71 проценти на овие избирачки места.

Најголема излезност има на избирачкото место во Желино каде гласале 325 гласачи, а најмала е излезноста во Крушево на избирачкото место 1194 каде до 13 часот гласале 47 гласачи односно 15,77 проценти.

-Во ИМ 2101 во Желино гласале 325 гласачи односно 32,73 проценти. Во ИМ 1194 во Крушево, гласале 151 гласачи, односно 32,20 проценти. Во ИМ 1202 во Крушево гласале 47 гласачи односно 15,77 проценти. Во ИМ 1272 во Охрид гласале 185 гласачи, односно 26.02 проценти. Во ИМ 1470 во Долнени гласале 117 гласачи, односно 17,78 проценти. Во ИМ 1470/1 во Долнени гласале 100 гласачи, односно 15,82 проценти. Во ИМ 1844 во Струга гласале 225 гласачи, односно 29,88 проценти, се наведува во соопштението на ДИК.

До 11 часот на гласање излегле 16,46 отсто од гласачите во седумте избирачки места каде се прегласува

Македонија

пред 15 часа

До 11 чaсот, од вкупно запишани 4.514 гласачи на седумте избирачките места, гласале 743 односно 16.46 отсто од избирачите, соопшти Државната изборна комисија (ДИК).

Во избирачкото место 2101 во Желино гласале 205 гласачи односно 20.64 отсто. Во избирачкото место 1194 во Крушево, гласале 87 гласачи односно 18.55 отсто. Во избирачкото место 1202 во Крушево, гласале 35 гласачи односно 11.74 отсто. Во избирачкото место 1272 во Охрид, гласале 156 гласачи односно 21.94 отсто. Во избирачкото место 1470 во Долнени, гласале 83 гласачи односно 12.61 отсто. Во избирачкото место 1470/1 во Долнени, гласале 31 гласач односно 4.91 отсто. Во избирачкото место 1844 во Струга, гласале 146 гласачи односно 19.39 отсто.

Во споредба со гласањето на 8 мај 2024, до 11 часот, на ова прегласување се забележува зголемена излезеност за 5.35% на овие избирачки места.

Како што се посочува во информацијата, до ДИК се пристигнати два приговори за заштита на личното избирачко право за избирачкото место 1470 во Долнени.

Денеска се прегласува во Петата изборна единица на избирачките места 1194 и 1202 во Крушево, 1272 во Охрид, 1470 и 1470/1 во Долнени и 1844 во Струга, додека во Шестата изборна единица на избирачкото место 2101 во Желино.

Велигденов: Вработените во подружниците на Македонска пошта протестираат, на 7 јуни ќе организираат штрајк

Македонија

пред 15 часа

Вработените во сите подружници на Македонска пошта денеска организираат протест за да го изразат револтот и загриженоста за иднината на компанијата и за зачувување на своите работни места, затоа што подолг период таа се соочува со огромна финансиска криза и со лоша организација на работењето, а со тоа е доведена до тотален хаос и до дното на опстојувањето, истакна на прес - конференција Боро Велигденов, претседател на Синдикалните организации на Македонска пошта.

- Не знаеме кога ќе земеме плата поради тоа што немаме доволно финансиски средства, а и менаџерскиот тим нема одговор на тоа прашање, затоа што чекале некаков прилив. Македонска пошта е доведена до состојба на уништување, опстојувањето е под голем знак прашалник и бараме итна средба со новата влада и да ги решиме состојбите. Она што го бараме со години е да се отпочне веднаш и неодложно со новите реформи и целокупна реорганизација. Постапката за систематизација на новите работни места е темел и основа за понатамошна стабилизација и функционирање на друштвото. Владата треба да се заземе за интересот на Македонска пошта, бидејќи 2.000 вработени ќе останеме на улица и ќе бидеме единствен пример во светот државна пошта да не функционира, односно да не постои, истакна Велигденов.

Синдикалните претставници во Македонска пошта побараа реформите во компанијата да почнат што побрзо, со преземање посериозни мерки за стабилизирање на состојбите.

-Да нема повеќе 15 подружници со 15 директори и илјада соработници, нам ни требаат работници во технолошкиот процес за граѓаните да бидат задоволни од нашите услуги. Идната влада да преземе мерки и за регулаторното тело Агенција за пошти, кое од нас добива добар прилив за плати, тоа треба да работи според Законот за поштенски услуги. Имаме информации дека во нашата држава се дистрибуираат пратки од соседните земји, што е во спротивност со сите меѓународни прописи за поштенски сообраќај. Агенцијата да преземе одговорност спрема другите оператори кои вршат неконкурентна и нелојална достава на пратки, истакна Сашо Димитриески, повереник во Синдикатот на Македонска пошта.

На прес конфренцијата беше побарано да се престане и со партизираната кадровска политика која ја уништила Македонска пошта, а најавен е и штрајк за почетокот на идниот месец.

-Да не ни донесуваат неспособни кадри и менаџери во компанијата, да се насочат вработените кон технолошкиот процес за да генерираме поголеми приходи и самостојно да можеме да функционираме и да исплаќаме редовно плата. Како што најавивме минатиот месец, влегуваме во процес на штрајк бидејќи го допревме дното и немаме што да изгубиме како вработени. Согласно законските регулативи, штрајкот ќе се одржи после 7 јуни и ќе бидеме истрајни до крај, ќе се бориме за опстанок на Македонска пошта, додаде претседателот на Синдикалните организации, Велигденов.