Истражителите на шефицата на Обвинителството за организиран криминал Вилма Рускоска која ја води истрагата за „Рекет“, ја дигнале на нозе Управата за безбедност и контраразузнавање (УБК) кога фатиле да изнесуваат кеси и пакети од депото на зградата, објави САКАМДАКАЖАМ.МК повикувајќи се на извори во МВР.

„Се изнесуваат прислушувани материјали и докази“, била дојавата на совесни вработени во МВР лично до премиерот Зоран Заев. Заев се исплашил и веднаш го побарал министерот за внатрешни работи Оливер Спасовски, за да праша дали повторно УБК прави нешто незаконски како во времето на Горан Грујевски, Сашо Мијалков и Гордана Јанкулоска, велат соговорниците кои биле очевидци на настанот.

По наредба на избеганиот Грујевски, по пуштањето на бомбите во почетокот на 2015 беше изнесена опремата за прислушување од УБК, со која незаконски се прислушувале над 25 илјади граѓани, односно телефонски броеви, а потоа и илјадници списи како доказ дека се прислушувало. Потоа сето ова беше однесено на дробење, топење или палење.

Спасовски го смирил Заев дека во кругот на УБК дошле истражители од тимот во истрагата „Рекет“ да вршат попис на запленетата облека и вредни предмети на осомничениот Бојан Јовановски-Боки 13.

Покрај два персонални компјутера и еден лаптоп што ги користеле Боки 13 и неговата асистентка, одземено е поголемо количество брендирана облека, накит, часовници и уметнички дела, соопшти Обвинителството за организиран криминал и корупција по претресите во домот на неговите родители и неговата канцеларија, заради прибирање материјални доказни поврзани со истрагата за изнудување пари. Тоа беше на 16 јули 2019, ден по апсењето на Боки 13 кој уште е во притвор.

Од тимот кој ја води истрагата потврдуваат дека имало кратко недоразбирање при пописот на запленетите предмети на Јовановски, но велат дека набргу ситуацијата била разјаснета. Оттаму велат дека станува збор за многу скапа облека и накит и вредни уметнички дела. Вкупната вредност на запленетите лични предмети не ја откриваат, бидејќи како што рекоа, тоа е доказ во постапката и можно е да ги купил Јовановски од парите што ги изнудувал од бизнисмени.

До правосилност на постапката, запленетите предмети се во сопственост на Агеницијата за одземени предмети при кривични дела.

Во истрагата „Рекет“, осомничени за изнуда на 1,5 милиони евра со тргување со влијание врз јавен обвинител и перење пари се Бојан Јовановски-Боки 13 и Зоран Милески-Кичеец, кои се во притвор од 15 јули. Денеска за истиот случај беше уапсена и специјалната обвинителка Катица јанева.

Јавното обвинителство за организиран криминал бара притвор за специјалната јавна обвинителка Катица Јанева откако ја прошири истрагата за случајот „Рекет” и попладнево таа беше уапсена. Државниот јавен обвинител Љубомир Јовески рече дека јавната обвинителка ја злоупотребила службената положба, со тоа што преку Бојан Јовановски – Боки 13 и Зоран Милески – Кичеец издејствувала на бизнисменот Орце Камчев да му биде олеснета положбата како осомничен за случајот “Империја”.

Според истрагата, Јанева се стекнала со 298,000 денари имотна корист, претежно во мебел и предмети. Јанева, според обвинителството, имала намера да му ја олесни положбата на Камчев со тоа што под неизменети околности притворот му го заменила со домашен, Камчев требало да стане заштитен сведок или да му биде понудена спогодба, да му се врати пасошот и тој да плати минимална штета за предметот “Империја”.

Пред малку по наредба на шефицата на Обвинителството за гонење организиран криминал и корупција Вилма Русковска уапсена е специјалната обвинителка Катица Јанева.

Откако полицијата ја обиколи куќата на Јанева и изврши претрес во домот на специјалната обвинителка, следуваше нејзинот приведување, што е снимено на следниве видеа:

Инаку, в

чера Јанева, даде изјава за „Рекет“ во јавното обвинителство.  

Во својство на сведок сум повикана, рече Јанева, при што беше прашана од новинарите зошто тогаш има адвокат покрај неа. Одговорот беше следен: Имам правни консултанти секогаш.

На прашањето на новинарот Фуркан Салиу дали гласот од снимките каде што зборува со Камчев е нејзиниот, Јанева вели:

Не смеам да го кажам тоа. Ова е истрага, треба да знаете дека во истрага не се споделуваат информации. Ќе има судење, ќе се гледаме уште. Се форматира и анализира мојот телефон.

Обвинителката одговори дека не чувствува никаква вина, а на прашањето дали има во целиот случај вклучен некој од политичарите рече дека не знае. Додека одговараше на новинарските прашања, адвокатот кој беше во нејзино присуство прикуваше загриженост и постојано и укажуваше дека треба да прекине со одговор на прашањата бидејќи како што рече не е на распит.

На крајот од видеото се слуша како новинарите ја прашуваат обвинителката дали знае кај се парите, при што таа одговара „Да“? Тоа го потврдуваат новинарите кои беа присутни на пресот, кои по неговото завршување велат: Имаше добро прашање дали знаевте кај се парите, рече „Да“ а не го продолживме прашањето.

Јанева потекнува од семејство на познат судија, кој бил и претседател на основниот суд во Гевгелија, а во минатото ја вршела функцијата јавен обвинител во Основното јавно обвинителство – Гевгелија, откако 10 години пред тоа била заменик на јавниот обвинител во градот.

Јанева има завршено и висока обука за борба против мафијата, корупцијата и организираниот криминал во Италија. Таа е долгогодишен јавен обвинител, а поминала разни меѓународни обуки и специјализации пред да застане на чело на СЈО.

Нејзиното име се наоѓа и на листата предавачи на Академијата за судии и јавни обвинители „Павел Шатев“. Пишува дека предава кривично материјално и процесно право.

Катица Јанева во имотниот лист во Антикорупциската комисија има пријавено имот од над 250.000 евра. Наведено дека поседува моторно возило „рено 5 кампус“, трансакциона сметка во две банки. На име на нејзиниот починат сопруг, кој бил ветеринар, се водат плац во селото Конско во вредност од 1.000 евра, земјоделско земјиште од 1.930 квадрати во вредност од 20.000 евра и моторно возило ровер 45 во вредност од 20.000 евра.

Дента, кога јавноста дозна за рекет и беше уапсен Боки 13, Јанева поднесе оставка 

- „Ја депонирам мојата оставка која ќе стане активна тогаш кога политичките партии ќе се усогласат за новото законско решение и ќе го изберат мојот наследник.Чест ми беше да и служам на државата и да бидам на чело на исклучително професионален обвинителски тим, истражителски тим и тим на вработени кои безрезревно и посветено ги извршуваат своите работни задачи. Со месеци ги следам медиумските прилози за преговорите меѓу работните групи на политичките партиите за иднината на Специјалното јавно обвинителство. Јас нема да дозволам моето име да биде искористено за нечие алиби со кое во заложништво ќе се држат судбината на Специјалното јавно обвинителство и Европските интеграции на мојата земја. Дозволете, јавно да се заблагодарам на целиот тим на Специјалното јавно обвинителство со кој испишавме историја. Треба да бидеме горди затоа што претставуваме симбол за бескомпромисна борба против највисоките облици на организиран криминал и корупција, напиша Јанева за оставката.

Истиот ден кога Катица даде оставка Обвинителството за организиран криминал и корупција отвори истрага за случајот „Рекет“, по што Бојан Јовановски познат како Боки 13 и Зоран Милески беа осомничени и завршија во притвор за изнуда на пари.