По 70 години се затвори Тетекс - ги упропастивме домашните брендови за да молиме за странски инвестиции

По 70 години се затвори Тетекс. Од европски и југословенски гигант до македонска трагедија. Газела, Годел, Треска, ФАС 11 Октомври, од врвот до дното.

Ги упропастивме домашните брендови за да молиме за странски инвестиции.

Уште една фирма замина во историја. 

Вработените жалат и се сеќаваат како било во Тетекс порано, како што велат тие, златни години.

Од  фабриката соопштуваат дека по 70 години Тетекс го затвори погонот за тешка конфекција главно поради ниските цени и конкуренцијата на земјите од Далечниот Исток.

Деновиве се затвори и погонот Конфекција, кој беше последен што работеше. Пред една година престана да работи погонот Трикотажа, а минатиот месец и Ткајачница. Единствено работи Предилницата за производство на волница, но таа е дадена на странска фирма.

Волнарскиот комбинат „Тодор Циповски-Мерџан“ започна со производството на 25 мај 1951. Во годините и децениите што следеа, „Тетекс“ израсна во вистиски текстилен гигант на југословенските простори. Во 1991 година започна неговата трансформација од општествено претпријатие во акционерско друштво. Во 1987-1988 година, комбинатот имаше 8.800 вработени во неколку производствени погони и во голема трговска мрежа. Во последниве две децени, од година во година, поради потешкотии во работењето постојано се намалуваше бројот на вработените и еден по еден се затвораа производствените погони.

Иста судбина како Тетекс имаа многу фирми во Македонија, кои беа гиганти на времето. Многу работници останаа на улица. 

Даниловски бара да се прави разлика од тие што умреле од Ковид и со Ковид

Епидемиологот Драган Данаиловски при вчерашното гостување во емисијата 360 степени и препорача на Комисијата за заразни болести да го смени начинот на водење статистика за починати од корона вирус.

Дефинитивно мора да се корегира начинот на регистрирање на причината за смрт од Ковид-19. Вака како сега што се прави, кога сите позитивни починати во државата, независно какви коморбидитети и независно од која причина умреле, се водат како Ковид-19, тоа само непотребно ја зголемува бројката на починати кај нас и споредено со другите земји излегуваме на врвот. Мора да се разграничат, кои се починати од Ковид како основна причина за смрт, и кои со Ковид. Тоа не значи дека евиденцијата за позитивните, за овие со Ковид ќе се изгуби. Таа ќе се регистрира и можат како посебен контингент да се соопштат. Ама кога смртноста се соопштува меѓународно дефинитивно е неопходно да се разграничат овие две категории, препорачува Данаиловски.

СОНК бара да се плати прекувремената работа на наставниците и хроничните да работат од дома

Исплата на надомест за прекувремени часови поради зголемен обем на работа на просветните работници, бара Синдикатот за образование и наука.

Претседателот на СОНК Јаким Неделков истакна дека тоа е законска обврска и обврска од Колективниот договор, а зголемениот обем на работа во училиштата се појавува во паралелките со физичко присуство каде учениците се поделени на две групи.

СОНК поради ширењето на епидемијата, бара и Министерството да ја преиспита одлуката за физичко присуство за првите три одделнија во основните училишта за да не се зголемува ризиокот по наставниците.

Неделков истакна и дека секој наставник кој сака и има услови да му се овозможи онлајн работа од дома, а не тоа да биде одлука за сите наставници.

Големениот обем на работа во училиштата се појавува во паралелките со физичко присуство каде учениците се поделени на две групи

Караџовски: „Бројките се страшни. Да не се занесуваме, Ковид е опасна зараза“

Жарко Караџовски од Комисијата за заразни болести гостуваше во емисијата „Само интервју“ на Канал пет и ја коментираше актуелната состојба со коронавирусот во Македонија.

Караџовски уште еднаш повтори дека најважно е сега носењето на заштитни маски, држење дистанца, миење раце и избегнување групирања. Доколку се почитуваат овие мерки, може да очекуваме намалување на бројките.

Тој исто така посочи колку Ковид-19 е опасно заболување:

„Да имаше толку многу хоспитализирани и починати колку што имаме периодов, ниту една држава немаше да може да се справи со сместувачките капацитети за пациентите. Ова е опасно заразување, да не се занесуваме. Сите сме во опасност, постарите генерации се поизложени на вирусот, но може да почине и човек без хронично заболување“, изјави Караџовски во емисијата.

„Според Комисијата за заразни болести, почитувањето на мерките може да доведе до намалување на бројот на заразени. Ние никогаш не сме кажале дека пандемијата е завршена, а сега се менуваат работите и бројките се страшни“, потенцираше Караџовски.

Популарно