Филипче: Повеќе од 80 отсто од децата со акутни леукемии се излекувани

Во чест на сите деца кои се борат со малигни заболувања, денеска на градскиот плоштад во Скопје се одржа настан во организација на Универзитетската клиника за детски болести, со кој се одбележа „Златен септември“ – месец за поддршка на децата со малигни заболувања, под мотото „Убаво е да бидеш јас“.

Целта на „Златен септември“ е да се подигне свесноста кај јавноста за овие болести кај децата и адолесцентите, за сите аспекти на нивната борба со канцер, како за времето поминато во болница така и за периодот по враќањето дома.

„Септември е месец за подигнување на свесноста за детските малигноми. Во нашата земја, најтешките случаи на деца кои имаат малигна болест се лекуваат на Клиниката за детски болести, благодарение на инфраструктурата и секако огромната експертиза којашто ја имаат лекарите кои работат на оваа клиника. Во изминатиот период инвестиравме многу. Нема дете за коешто нема биолошка терапија. Успешноста на лекување на детските малигноми е над 80%. Во овој момент целосно се реновира одделението за детска онкологија. Малку се успорија работите поради коронакризата, меѓутоа договорена е динамика со којашто целосното реновирање треба да заврши на почетокот на 2021 година во месец јануари“, изјави министерот за здравство, Венко Филипче.

Министерот Филипче рече дека во соработка со здружението САНО, која започна пред 2 години се вклучија како волонтери сите деца кои прележале малигна болест за да им помогнат на дечињата кои сега се лекуваат на детската клиника преку психолошка поддршка, одредени активности како читање на книги, анимирање итн.

Д-р Наташа Најдановска Алулоска, директорка на Клиниката за детски болести, вели дека Одделот за хематологија и онкологија при Клиниката е единствена специјализирана педијатриска болница во земјава каде се дијагностицираат и лекуваат деца со малигна болест на возраст до 14 години.

„За дијагноза и лекување на хемато-онколошкото одделение се применуваат современи терапевтски протоколи во согласност со препораките на Интернационалната педијатриска асоцијација. Леукемиите во детската возраст се лекуваат согласно протоколи кои се применуваат во сите Европски земји. Со овие терапии, се постигнува излекување кај повеќе од 95 отсто од децата со акутна лимфобластна леукемија, успех со кој се гордееме. Им благодарам на моите колеги и медицински сестри кои работат на овие одделенија. За нив нема пауза и во време на пандемија, приоритет без исклучок имаат децата“, изјави директорката Алулоска и истакна дека за овие деца и во овој тежок период беше обезбедена терапија во континуитет и ниту една терапија не беше одложена.

Министерството за здравство и Комисијата за заразни болести ги одобрија европските и светски протоколи за тестирање на децата за Ковид пред секое отпочнување на хемо-терапија, за да може терапијата да тече безбедно.

Годишно во земјава се откриваат 35-40 нови случаи на деца со малигна болест. Најчеста малигна болест во детската возраст е акутната леукемија, која се открива кај 30-35 проценти од децата од сите малигдни заболувања. Најчеста меѓу нив е акутната лимфобластна леукемија, АЛЛ, која се открива кај 80 проценти од децата со леукемии.

Од почетокот на 2020 година до денес дијагностицирани се вкупно 22 пациенти со малигна болест, од кои 14 деца се со акутна леукемија.

Здружението Билка повторно бара легализација на канабисот за лична употреба

Легална употреба на канабисот до 50грама и дозволено одгледување до 10 стебла за рекреативна употреба, формирање на посебна агенција за канабис, формирање на институт за канабис при министерството за земјоделство, освен јавното здравство дозвола за препис на лекови да има и приватното здравство. Ова се барањата на здружението Билка за употребата на канабисот во земјава. Активистите велат дека доколку надлежните ги прифатат нивните барања државата би имала економски и здравствени бенефити.

Еден од основачите на Билка, адвокатот Јанаки Митрoвски вели дека побарале средба со премиерот Зоран Заев, министерот за здравство Венко Филипче и министерот за правда Бојан Маричиќ, но одговор до сега не добиле. Инаку денеска и утре се одржува првиот македонски канабис форум.

Во градинките досега позитивни на Ковид-19 се регистрирани 33 деца и 109 вработени

 Од отворањето на градинките на 9 септември до денеска регистрирани се вкупно 33 деца позитивни на корона-вирусот и 109 вработени. Во моментов во изолација се 107 вработени и 650 деца, информира министерката за труд и социјална политика Јагода Шахпаска. Таа посочува дека поголемата бројка на деца во изолација е поради тоа што еден позитивен негувател или воспитувач во изолација повлекува цела група од најмалку 15 деца и еден негов колега.

Шахпаска оцени дека состојбата во градинките е под контрола и оти тоа, како што рече, може да се види од досегашниот број позитивни случаи и лица во изолација, ако се има предвид дека во моментов околу 11 илјади дечиња се згрижени во овие установи.

-Кога зборувам за изолација не сакам јавноста да биде дезинформирана. Тоа е вкупен број на лица ставени во изолација поради контакти. Тие не се позитивни. Нагласувам дека лицата што се ставени во изолација не се позитивни. Велиме дека состојбата е стабилна врз основа на фактот што 11 илјади деца во моментов претсојуваат во градинките. Од тие 11 илјади во изолација се ставени околу 650 дечиња. Будно ја следиме состојбата и како ќе се одвива епидемиолошката состојба така и ќе бидат одлуките што ќе ги носи и министерството и владата, рече Шахпаска одговарајќи на новинарско прашање по потпишувањето на Договор за грант за изградба и реконструкција на градинки со градоначалникот на Гостивар Арбен Таравари.

Во општина Гостивар од отворањето на градинките се регистрирани три позитивни вработени и само едно дете.

Ова како што истакна градоначалникот Таравари говори дека доколку се почитуваат протоколите за работа епидемијата нема да се шири.

– Доколку се придржуваме на протоколите и ние како граѓани и тие што работат во училишта и градинките нема да има голем број инфицирани, рече Таравари.

Тој смета дека како што почнаа со работа градинките и настава со физичко присуство за децата до трето одделение, требало да одат на училиште сите деца .

-Мислам дека и учулиштата требаше да почнат со цел капацитет само со скратени часови, а сите ученици да одат на настава, бидејќи ако се придржуваат до протоколите оптимист сум оти се би поминало без огромни или големи последици, рече Таравари. 

Медицинските сестри изоставени од наградата 13 Ноември: Разочарувачки е, се уште сме невидливи за нашата земја

Унијата на ЗМСТАС предводена од здружението на медицински сестри, техничари, акушерки и стоматолошки сестри „За нас” апелира медицинските сестри да не бидат изоставени од здравствените тимови, особено од оние кои се наградувани, како во случајот со добитниците на наградата „13ти Ноември” што ја доделува Град Скопје за успешно извршување на првата трансплатација на срце во нашата земја. “Ние сме горди на сите колеги од тимовите, сите успеси се и наши успеси но, не можеме да го премолчиме фактот дека често се заборава дека во здравствените тимови спаѓаат и медицинските сестри. Впрочем ние сме и носители на здравствените тимови, најважната алка во целиот здравствен систем.

Во моментов кога се уште немаме закон за професијата и имаме само еден член во Законот за здравствена заштита кој не опишал како дел од здравствените тимови, деградирачки е дури и тој да не биде испочитуван. Ја прашуваме комисијата која за награда го одбрала тимот кој ја извршил првата трансплатација на срце каде се медицинските сестрите на списокот? Зарем тимот го сочинуваат само докторите? Инсистираме медицинските сестри да бидат достојно прикажани  како што и заслужуваат. Доколку вие ја немате листата ова се нашите медицински сестри кои беа дел од тимот и на кои сме особено горди и кои претставуваат пример за професионалност на идните кадри:

 мед.тех. Слаѓана Гроздановска,

мед.тех. Јелена Жарковиќ,

дип.мед.тех Имран Елези,

мед.тех. Мартина Караѓоска

и мед.тех. Кристина Николовска – инструментарки од УК за Државна Кардиохирургија;

мед.тех. Магдалена Станчева

и мед.тех. Анита Колевска – анестетичарки од УК за Државна Кардиохирургија;

мед.тех Александра Темелковска,

мед.тех. Бранко Чочек,

и мед.тех. Игор Каевски – перфузионисти од ЕКЦ тимот на Жан Митрев Клиник;

дип.мед.тех Катерина Ристовска

и дип.мед.тех. Александра Ристовска Тунев – инструментарки од Жан Митрев Клиник;

и дип.мед.тех. Весна Наумовска – анестетичарка од Жан Митрев Клиник.

Во оваа година на сестрите, прогласена од Светската здравствена организација срамно е да се молиме за да ни се признае трудот, срамно е да го немаме законот за професијата и да бидеме само бројки за смена и ротација. Покрај толку јавни епитети за нашата работа: островот на спасот, херои, промотори на здравјето, здравствени воспитувачи… недолично е се уште да бидеме на маргините и да се злоупотребува нашата трпеливост. Неколегијално и непрофесионално е да се одликува тимот за награда без медицинските сестри.„ – истакнуваат од извршниот одбор на Унијата.

Популарно