Почина легендарниот xоливудски актер

Сидни Поатје, легендарниот актер и првата црна ѕвезда на Холивуд, почина во 94-та година, соопшти во петокот владата на Бахами, татковината на актерот.

„Загубивме великан, јунак, учител, борец и национално богатство“, напиша на Facebook потпретседателот на бахамската влада, Честер Купер, без да ја наведе причината за смртта и покрај поодминатата возраст.

Актерот познат во „Бегство во синџири“ и „Во жештината на ноќта“ по игра на случајот е роден во Мајами на Флорида, на 20-ти феврурари 1927 година, додека неговите родители од соседните Бахами дошле во посета во САД, па така имаше и американско и бахамско државјанство.

Поатје беше првиот афроамериканец кој уште во 1964 година го освои Оскарот за најдобар актер во филмот „Полските лилјани“ (Lilies of the field).

„Беше потребно долго време да се дојде до ова“, позната е неговата тогашна изјава искажана примајќи го признанието.

Кога во 37-та година од животот го прими Оскарот, актерот со шармантна насмевка беше единствената холивудска ѕвезда со темен тен.

„Филмската индустрија тогаш сѐ уште не беше подготвена да создаде повеќе од една ѕвезда меѓу актерите припадници на малцинствата“, напиша Поатје во својата автобиографија „Овој живот“.

„Во тоа време (…) ги преземав врз себе надежите на цел еден народ. Не можев да влијаам на содржината на филмот (…), но можев да ја одбијам улогата, што го сторив безброј пати“, додава актерот во своите сеќавања.

Истата 1963 година за улогата во споменатиот филм му е доделена наградата Златен глобус. Покрај тоа, беше лауреат на три награди Хенриета (1969, 1970, 1971), признанието на Сесил Б. Демил (1982), почесен Оскар (2002).

Забележителна улога остварува во „Погоди кој доаѓа на вечера?“ од 1967 година, филм кој привлекува внимание за расизмот во тој период.

Но не помалку забележителни се и ролјите кои всушност го прославиле во филмовите „Пркосните“ (The Defiant Ones, 1968), „Порги и Бес“ (Porgy and Bess, 1959), „Во жештината на ноќта“ (In the Heat of the Night, 1967), „На учителот со љубов“ (To Sir, with Love, 1967), „Погоди кој доаѓа на вечера?“ (Guess Who’s Coming to Dinner, 1967), „Бак и проповедникот“ (Buck and the Preacher, 1972)… Во текот на кариерата, Поатје играл во повеќе од 40 филмови.

Во 2002 година Сидни Поатје беше награден со Оскар за животно дело за неговите „исклучителни достигнувања, достоинството, стилот и талентираноста“.

Како препознатлива и почитувана личност, беше ангажиран и во дипломатијата на неговата татковина, имено од 1997 до 2007 година, Поатје неше амбасадор на Бахами во Јапонија.

Се преврте брод кај Тунис, 76 лица исчезнаа

Најмалку 76 лица се водат како исчезнати, откако се преврте брод во близина на брегот на Тунис, соопшти денеска Меѓународната организација за миграција.

Се додава дека 24 лица се спасени од бродот, што испловил од брегот на плажите на Завара во Либија и потонал крај брегот на Сфакс во Тунис, јавија британски медиуми.

Изминатите месеци, десетици луѓе се удавија во близина на брегот на Тунис, бидејќи се зголемува бројот на мигранти, кои се обидуваат да дојдат од Тунис и Либија, во Италија.

Во напад во училиште во Tексас убиени 19 ученици и двајца наставници

Најмалку 19 ученици и двајца возрасни се убиени во пукање во основно училиште Роб во Увалде. Осомничениот, 18-годишник Салвадор Рамос, исто така беше убиен од полицијата во грозоморниот чин во основното училиште на 130 километри од градот Сан Антонио. Локалната полиција потврди дека е убиен и наводниот убиец, за кој што се верува дека делото го извршил сам.

На социјалните мрежи осамна видео на кое се гледа моментот кога напаѓачот влегува во училиштето во момент пред да ги застрела невините жртви. Неколку други, и ученици и возрасни, се згрижени поради повреди.

Американскиот претседател Џо Бајден апелира за построги закони за носење оружје и прашува – кога ќе се спротиставиме на лобистите?

Инаку Ева Миралес, вработена како наставничка во училиштето е првата идентификувана жртва. Работела во училиштето 17 години и предавала во четврто одделение. На веб-страницата на училиштето пишува дека таа била мажена за полицаец и зад себе оставила ќерка. Според полициски извори наставничката загинала во обид да ги заштити децата од убиецот кој отворил оган во основно училиште.

Исто така, пријател на Рамос изјавил дека неколку дена пред да го изврши крвопролевањето му испратил фотографии од огнено оружје и кеси со муниција. Неговиот пријател потврдил дека Рамос бил исмеваан постојано поради неговата облеката и финансиската состојба.

Гувернерот на Тексас, Грег Абот, потврди дека Рамос го оставил возилото и влегол во училиштето вооружен со пиштол и полуавтоматска пушка. Сенаторот од Тексас, Роланд Гутиерес, изјави дека Рамос го најавил нападот на социјалните мрежи и дека оружјето со кое го извршил нападот го купил за својот 18. роденден.

Медиумите во САД објавија дека осомниченото лице претходно ја убило баба си пред да се упати кон училиштето. Полицијата соопшти дека неговата баба е хоспитализирана и е во критична состојба. Според бројот на загинати, пукањето во основното училиште Роб е најсмртоносно, уште од 2012 година, кога во основното училиште Сенди Хук загинаа 20 деца и шест други лица.

СЗО за мајмунските сипаници: Нема да биде потребна масовна вакцинација

Од Светската здравствена организација осврнувајќи се на проблемот со мајмунски сипаници во неколку земји, наведуваат дека не веруваат дека епидемијата на мајмунски сипаници надвор од Африка ќе бара масовна вакцинација бидејќи мерките како што се добра хигиена и безбедно сексуално однесување ќе помогнат да се контролира ширењето, пренесуваат медиумите.

Ричард Пебоди, кој го води тимот на СЗО за патогени со висока закана за Европа, изјавил дека сегашните залихи на вакцини и антивирусни лекови се релативно ограничени.

Неговите коментари следеа откога американскиот Центар за контрола и превенција на болести соопшти дека се во процес на пуштање на некои дози од вакцината „Џиннеос“ за употреба во случаи на мајмунски сипаници.

Германската влада рече дека ги проценува опциите за вакцинација, додека ОК веќе има понудено вакцини на некои здравствени работници, анализираат медиумите.

Според нив, јавните здравствени власти во Европа и Северна Америка истражуваат повеќе од 100 сомнителни и потврдени случаи на вирусната инфекција.

Примарни мерки за контрола на епидемијата се следење на контакт и изолација, рече Пебоди, истакнувајќи дека не се работи за вирус кој лесно се шири, ниту пак досега предизвикал сериозно заболување. Вакцините што се користат за борба против мајмунски сипаници може да имаат некои значајни несакани ефекти, додал тој.

Не е јасно што ја предизвикало појавата, а научниците се обидуваат да го разберат потеклото на случаите и дали нешто се променило во врска со вирусот. Нема докази дека вирусот мутирал, соопшти агенцијата на ОН претходно оваа недела.

Многу од заразените, но не сите на кои им е дијагностицирана актуелната епидемија на мајмунски сипаници биле мажи кои имале секс со мажи, покажале анализите според агенциите.

Повеќето од потврдените случаи не биле поврзани со патување во Африка, што укажува на тоа дека може да има многу неоткриени случаи, кажал Пебоди.

„Значи, го гледаме само врвот на ледениот брег“, рекол тој.

Со оглед на темпото на избувнувањето и неизвесноста за тоа што ја води, постои загриженост дека големите настани и забави ова лето би можеле да ги влошат работите, оценил тој.

„Не им велам на луѓето да не се забавуваат и да одат на разни настани, важно е што прават луѓето на забавите. Значи, станува збор за безбедно сексуално однесување, добра хигиена, редовно миење раце, сите овие работи ќе помогнат да се ограничи преносот на овој вирус“, изјавил Пибоди.

Популарно