Одбраната смета: Ударите кои ги задала обвинетета Клементина не придонеле кон смрта на Денис Тот

Ударите кои ги задала Клементина во никој случај не можат да придонесат за смрт, смета одбраната на обвинетата Клементина Левковска во врска со случајот за убиството на хрватскиот ракометар Денис Тот, кој беше претепан до смрт пред ноќен клуб во Градскиот парк.

Одбраната на Левковска, во изјава за медиуми по денешната расправа од случајот пред Кривичниот суд во Скопје кажа дека сметаат дека квалификацијата на кривично дело „убиство“ кое ѝ се става на товар на обвинетата е неосновано.

– Ние ја брнаиме дека го нема направено кривичното дело што ѝ се става на товар, изјави адвокатот Бојан Василевски.

Одбраната не сакаше да ги коментира тврдењата на вештите лица и посочи дека во вештачењето стои дека е друга причината на смрта.

– Тврдењето и вештачењето на денешните излагања на вештите лица се релативизира откако им беше предочено дека во вештачењето има друго напишано. Се релативизира како е настаната таа повреда, имаме уште две лица за испрашување, ќе видиме понатаму, беа согласни адвокатите Бојан Василевски и Емил Гугутчески.

Согласно обвинителниот акт, Левковска, заедно со обвинетите Анџело Ѓоргиевски и Андреј Костовски се товарат дека на 7 април, пред ноќен клуб во Градскиот парк во Скопје, заеднички го лишиле од живот оштетениот Денис Тот.

– По кратка расправија, сите тројца му нанеле повеќе удари и тешки телесни повреди од кои кај оштетениот најпрво настанала коматозна состојба, а следниот ден починал, се вели во соопштението од Обвинителство објавено на 21 јули годинава.

Денешното рочиште за случајот продолжи со изведувањето на доказите на обвинението со сведочење на вештите лица Александар Станков и Рената Јанкова од Судска медицина при Медицинскиот факултет во Скопје.

Вештите лица на денешното рочиште беа согласни дека повредите кои ги задобил сега покојниот се класифицирани како тешка телесна повреда со опасност по живот и истите се поврзани со смртниот исход на оштетениот.

– Како причина за смрт наведено е дека смртта настанала заради нагмечување на големиот мозок и нагмечување на рбетниот мозок, меѓутоа, како критична повреда од настапување на смрт врз основа на целокупната клиничка слика кај сега починатиот е повредата на почетен дел од рбетниот мозок, појасни вештото лице Александар Станков.

Вештото лице Рената Јанкова кажа дека некои повреди може да се квалификуваат изолирано, па потоа да се зборува за севкупно дејство на повредите.

– Меѓутоа, ако ги разгледуваме поеиднечно, на пример една од повредите, да ја земеме повредата која што довела до неконкретна скршеница на носната коска, може да биде телесна повреда, меѓутоа, ако истата таа повреда довела до потрес на мозокот во тешка форма, тогаш е тешка телесна повреда, рече таа.

Тие беа вкрстено испрашани и од одбраната на обвинетите во однос на подробни прашања во врска со наводите од извештаите за вештачење и обдукција, а обвинетиот Анџело праша дали е утврдено од кој тапотврд удар е доведено до ротација на главата и повреда на рбетниот мозок.

– Не можеме да го конкретизираме. Ние можеме да знаеме само тоа што ќе го видиме и да ги знаеме механизмите, тоа е во доменот на нашата струка, одговори вештото лице Јанкова, дополнувајќи дека ако можело да се утврди, вештите лица би се произнеле по тоа.

Одбраната во своите воведни зборови кажа дека не смета дека правната квалификација за кривичното дело „убиство“ кое им се става на товар на обвинетите за смртта на хрватскиот ракометар е одржлива и дека ќе докажува дека не постои умисла за истото.

Обвинителството, пак, на првото рочиште истакна дека располага со две ЦД-а од безбедносни камери од кои јасно може да се види целиот настан кој се случил критичната вечер, а пред сѐ, поединечно, дејствијата на секој од обвинетите кои ги презеле тој ден.

Обвинетите за убиството на хрватскиот ракометар пред Судечкиот совет во Основниот Кривичен суд – Скопје, изјавија дека не се чувствуваат виновни за кривичното дело кое им се става на товар.

Процесот го води судијката Елена Илиевска Јосифовиќ, а застапник на обвинението е обвинителката Тања Трајчевска. Судењето продолжува на 3 октомври.

Пендаровски: Лоши сме во битката против корупцијата

Лоши сме во битката против  корупцијата, а немаме капацитет за ветинг, оцени претседателот Стево Пендаровски, во синоќешното гостување во емисијата „Патот кон“ Алсат М, прашан за процесот на ветинг.

Според него, правосудниот систем во земјава испорачува слаби резултати, но, како што укажува,  не е само тој надлежен за борбата против корупцијата.

-Нашето однесување, на политичарите на локално и централно ниво во однос на непотизам, тендери, наддавање, е примарен генератор за корупцијата да биде на вакви размери. За волја на вистината, перцепцијата за корупцијата е прилично поправена како оценка, но не е доволно и во западно-балкански рамки. Треба да бидеме најдобри на Западен Балкан и да почнеме да се мериме со европскиот просек. Далеку сме од просекот, посочи претседателот.

Тој е за ветинг, но прашува кој ќе го спроведува.

-Околу ветингот, секој од нас од политичарите особено после изјавата на американската амбасадорка дека дошол некој посебен тим кој ќе прибира информации, дава некави изјави, но еве прашувам кој ќе го спроведува? Кој орган? Дали е тоа истиот човечки материјал кој доведе до овие осум проценти доверба во правосудството? Подобро е со личен пример да покажеме дека сме насочени кон тоа да имаме нула толеранција кон корупцијата, први кај нас и во нашето непосредно опкружување, рече Пендаровски.

Пендаровски најави дека е можно да се кандидира за втор мандат на наредните претседателски избори.

-Ако граѓаните се задоволни од мојот мандат, здравје Боже до 2024 година, и се разбира ако добијам политичка поддршка од коалицијата што ме поддржуваше во претходните два пати, ќе размислам на таа тема, рече Пендаровски.

Се празнува 8 Декември – Св. Климент Охридски

Во земјава денеска со низа настани се одбележува 8 Декември – Денот на Св. Климент Охридски. Пред споменикот на Св. Климент Охридски пред Националната универзитетска библиотека во Скопје, собраниска и владина делегација ќе положи цвеќе, а во Собранието ќе биде врачена државната награда „Св. Климент Охридски“.

Во состав на владината делегација ќе бидат заменик министерот за правда Агим Нухиу, заменик министерот за финансии Филип Николоски и заменик министерката за животна средина и просторно планирање Христина Оџаклиеска, а во состав на собраниската делегација потпретседателот Горан Мисовски, Даниела Марковска и Велика Стојкова-Серафимовска.

Државната награда „Св. Климент Охридски“ се доделува за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност.

Во областа на воспитанието и образованието, годинава наградата ќе му биде доделена на универзитетскиот професор д-р Африм Османи, наградата за остварување во областа на културата и уметноста им се доделува на писателот – академик Влада Урошевиќ и на ликовниот уметник Исмет Рамиќевиќ, а наградата за остварување во областа на здравството му се доделува на кардиохирургот професор д-р. Сашко Јовев.

Св. Климент Охридски е патрон и на Охрид каде празнувањата почнаа завчера. Чествувањата продолжуваат и денеска со поклон пред моштите на Свети Климент Охридски во манастирот „Свети Климент и Пантелејмон” на Плаошник. Потоа предвидено е полагање цвеќе на споменикот на Свети Климент Охридски во училишниот двор на ООУ „Свети Климент Охридски“ и на монументалниот споменик на Свети Климент Охридски на Градскиот плоштад, како и врачување награди на најдобрите поетски творби на наградниот ученички литературен конкурс по повод Патронот на Охрид.

Програмата ќе се заокружи со настап на Македонските фолклорни ансамбли во чест на Свети Климент Охридски на големата сцена во центарот за култура „Григор Прличев“.

Денешниот ден е прогласен за неработен ден во државата. 

Минималната потрошувачка кошничка во ноември 51.714 денари

Минималните месечни трошоци на едно четиричлено семејство во ноември изнесувале 51.714 денари и се за 200 денари зголемени во однос на октомври, а за 1.490 денари во споредба со септември.

Според пресметките на Сојузот на синдикати на Македонија, за храна во ноември биле потребни минимум 19.518 денари, а за режиски трошоци 12.983 денари што е повеќе од половина од синдикалната минимална кошничка.

Останатите средства, односно 3.668 денари се минимум потребни за превоз, 2.986 денари за хигиена и 2.250 денари за облека или обувки. За културни активности, според синдикалната минимална кошничка, остануваат 1.067 денари, а за здравствени услуги само 799 денари. 

Популарно