Дел од српските медиуми објавија фотографии за кои тврдат дека се од тројца од српските напаѓачи кои загинаа во инцидентот во Бањска на Косово во неделата.

Едниот од нив И.М.(50) бил татко на две деца, а работел како возач на брза помош во Клиничкиот болнички центар во Косовска Митровица. Втората жртва е С.Н.(31) од Звечан. Според локалните медиуми и мештаните, С.Н. бил чесен и добар човек, а вчера бил ранет и им подлегнал на повредите. Б.М., кој исто така беше убиен вчера, пред неколку месеци стана татко, но за жал им подлегна на повредите.

Четврто тело на убиен напаѓач беше пронајдено на 1,5 километар од местото на инцидентот, потврди обвинителот Наим Абази.

Еден од напаѓачите кој беше повреден и однесен во болница во Приштина е опериран и е во стабилна состојба, пренесува српскиот медиум Косово онлајн.

Српската листа на Косово вчера најави дека ќе побара истрага за убиствата на најмалку двајца Срби.

Утринава српската листа прогласи тродневна жалост во општина Звечан.

„По повод трагичните настани и смртта на наши сограѓани во трагичниот настан во Бањска, во општина Звечан, 26, 27 и 28 септември се прогласени за Денови на жалост“.

Косовскиот министер за внатрешни работи Џелал Свечља побара од Србија да ги екстрадира српските напаѓачи кои побегнаа по судирот со косовските полицајци на северот на Косово, во кој беа убиени тројца напаѓачи и еден косовски полицаец.

Тој информираше и дека шестмина повредени членови на вооружената група се хоспитализирани во јужниот српски град Нови Пазар, во близина на границата на северот на Косово.

Косовската полиција досега во Звечан заплени 150 парчиња експлозив, динамит, 23 електрични детонатори, близу 20 пригушувачи за АК47 и над 230 магацин за АК47. Покрај оружјето, пронашле и други алатки за работа, шипки, лопати, копачи и рачни пили – околу 50.

Најголемата партија на косовските Срби, Српска листа, прогласи тридневна жалост за смртта на тројцата Срби, кои беа убиени во Бањска, по нападот врз косовската полиција во неделата, јави дописникот на МИА од Приштина.

Преку објава на својата страница на Фејсбук, партијата го нарече настанот трагичен.

Според соопштението, „во српските средини на територијата на Косово ќе бидат откажани сите забавни настани организирани од органите и институциите на локалната самоуправа, а знамињата на Република Србија во сите институции ќе бидат спуштени на половина копје“.

– Од името на Српската листа и српскиот народ од Косово и Метохија изразуваме длабоко сочувство до семејствата на жртвите, а на повредените им посакуваме брзо закрепнување, се вели во објавата на СЛ.

Група од над триесет вооружени и маскирани лица рано наутро на 24 септември убија еден полицаец и ранија уште еден во селото Бањска, во северно Косово. Во акцијата што уследи на косовските специјалци беа убиени четворица од напаѓачите и уапсени шест лица. Другите членови на групата, меѓу кои имало и ранети, првично се засолнија во православниот манастир во Бањска, а потоа побегнаа во Србија, соопштија официјални косовски извори.

Претседателката на Косово, Вјоса Османи, го одликува со орденот „Херој на Косово“ полицаецот Африм Буњаку, кој беше убиен вчера во северно Косово од организирана група од триесетина маскирани и вооружени лица, кои од косовските власти, но и од повеќе западни центри, беа оквалификувани како терористи, јави дописникот на МИА од Приштина.

На церемонијата, на која им го предаде орденот на децата на убиениот Буњаку, Османи рече дека тој паднал во одбрана на достоинството на Република Косово.

– Денеска му оддаваме почести на еден храбар и несебичен полициски наредник кој го жртвуваше својот живот за заштита на нашите граѓани. Африм Буњаку и другите припадници на полицијата беа предизвикани од криминалната банда. Нашиот херој, Буњаку беше силен столб на косовската полиција. Тој беше посветен слуга на татковината. Тој остана цврст во одбрана на законот и против терористичките групи поддржани од Србија, чија цел беше да го вознемират не само Косово, туку и регионот, рече Османи.

Таа порача дека битката за воспоставување ред и мир е еден од најголемите предизвици во секое општество, додека наследството на Буњаку треба да послужи како потсетник дека хероите се секогаш меѓу граѓаните на земјата.

Османи му оддаде признание на полицаецот Буњаку, затоа што, како што рече, „го стави интересот на Републиката пред личната судбина“.