Арачиновец заврши во притвор

Основното јавно обвинителство Скопје поведе истражна постапка против 33-годишник од Арачиново, бидејќи постои основано сомнение дека сторил кривично дело – Убиство според член 123 став 3 во врска со член 19 (во обид). Освен тоа, за осомничениот е поведена постапка и за – Предизвикување општа опасност по член 288 став 1 од Кривичниот законик.

На 11 септември, осомничениот се обидел со умисла да лиши од живот две лица, кои вербално протестирале затоа што со голема брзина управувал автомобил „Ленд ровер“ по плочникот кај трговскиот центар „Бисер“ во Аеродром, предизвикувајќи значителна опасност за животот и телото на луѓето.

Во моментот кога оштетените му забележале за опасноста што ја предизвикува, тој завртел со возилото и со голема брзина се упатил кон нив со намера да ги прегази. Тие се тргнале, па осомничениот излегол од автомобилот со нож во раката и на двајцата им нанел по четири убодни рани, предизвикувајќи им повеќе тешки телесни повреди.

Во тој момент се собрала поголема група граѓани кои почнале да викаат и му се спротивставиле на осомничениот со што го спречиле да го доврши кривичното дело, па тој се вратил во неговото возило и веднаш го напуштил местото.

Јавниот обвинител до судијата на претходна постапка од Основниот кривичен суд Скопје попладнево достави предлог за определување мерка притвор за осомничениот, бидејќи постојат околности што укажуваат на опасност од бегство, можност да ја попречува кривичната постапка со влијание врз сведоците и особени околности кои го оправдуваат стравот дека ќе го доврши обиденото кривичното дело.

Градски паркинг-Скопје утре нема да наплаќа за паркирање во зоните А, Б, Ц и Д

ЈП Градски паркинг-Скопје соопшти дека утре, на празникот Свети Климент Охридски, нема да се наплаќа зонско паркирање на јавните површини со кои стопанисува ова јавно претпријатие односно на  зоните А, Б, Ц и Д. 

Како што информира, редовна наплата ќе се врши на паркиралиштата:  Зона А0- Водно, катни гаражи „Беко“ и „26 Јули“ и јавните паркиралишта „Кочо Рацин, „Треска“, Градска болница, „Нова Македонија“, АМСМ, „Народен фронт“ и Клинички центар „Мајка Тереза“.

Општина Центар: Препорака до угостителските и јавните објекти во следните два дена да ја прилагодат музиката

Општина Центар по повод трагичната смрт на 14-годишната Вања Ѓорчевска, ученичка во 9-то одделение во ООУ „Јохан Хајнрих – Песталоци“ со препорака до сите јавни и угостителски објекти на територија на општината во следните два дена да ја прилагодат музиката.

– Општина Центар и градоначалникот Горан Герасимовски изразуваат сочувство за трагичниот настан во кој животот го загубија 14-годишната ученичка Вања и 74-годишниот велешанец Панче Жежовски, се вели во соопштението од Општина Центар.

Во основното училиште каде учеше Вања денеска е отворена книга на жалост.

Вања беше пријавена за исчезната во понеделникот, а нејзиното беживотно тело беше пронајдено вчера во близина на Скопје.

Министерството за внатрешни работи и Основното јавно обвинителство Скопје денеска на прес-конференција изнесоа детали според кои Вања била грабната во влезот на зградата во која живее, врзана на рацете и нозете и покриена со вреќа за спиење била ставена во багажникот на возилото „цитроен“ и однесена на локација во близина на Скопје каде е убиена истиот ден кога е грабната. Според првичните сознанија, информацијата за нејзиното движење, сторителите ја добиле од нејзиниот татко.

Првоосомничениот Љупчо Палевски Палчо, кој е организатор и извршител на делото, е во бегство, а на тројца им е изречена мерка притвор во траење од 48-часа. Вчера на распит бил и таткото на девојчето.

Сеуште се трага по ученичката од Песталоци која исчезнала на пат кон училиште

Изгубено е девојче во Скопје кое последен пат е видено во Дебар Маало на патот кон Песталоци. Нејзината мајка преку објава на фејзбук бара апел за помош.

Таа утрово во 7:20 излегла за на училиште и оттогаш и се губи секаков траг.

Сеуште не е пронајдена никаква трага и се очекува во потрагата да се вклучи и полицијата.

Популарно