Вјоса Османи го прогласи за „Херој на Косово“ полицаецот кој загина во вчерашниот напад во северно Косово

Претседателката на Косово, Вјоса Османи, го одликува со орденот „Херој на Косово“ полицаецот Африм Буњаку, кој беше убиен вчера во северно Косово од организирана група од триесетина маскирани и вооружени лица, кои од косовските власти, но и од повеќе западни центри, беа оквалификувани како терористи, јави дописникот на МИА од Приштина.

На церемонијата, на која им го предаде орденот на децата на убиениот Буњаку, Османи рече дека тој паднал во одбрана на достоинството на Република Косово.

– Денеска му оддаваме почести на еден храбар и несебичен полициски наредник кој го жртвуваше својот живот за заштита на нашите граѓани. Африм Буњаку и другите припадници на полицијата беа предизвикани од криминалната банда. Нашиот херој, Буњаку беше силен столб на косовската полиција. Тој беше посветен слуга на татковината. Тој остана цврст во одбрана на законот и против терористичките групи поддржани од Србија, чија цел беше да го вознемират не само Косово, туку и регионот, рече Османи.

Таа порача дека битката за воспоставување ред и мир е еден од најголемите предизвици во секое општество, додека наследството на Буњаку треба да послужи како потсетник дека хероите се секогаш меѓу граѓаните на земјата.

Османи му оддаде признание на полицаецот Буњаку, затоа што, како што рече, „го стави интересот на Републиката пред личната судбина“. 

Силен земјотрес во Србија

Два земјотреси рано утринава се регистрирани во Петровац на Млава, Србија.

Првиот земјотрес бил со јачина од 4,1 степени, додека вториот 2,4 степени според Рихтеровата скала, објавено е на официјалната веб-страница на Сеизмолошкиот завод.

Двата земјотреси се регистрирани на длабочина од седум километри.

Во овој град земјотрес беше регистриран и во неделата на 3 декември. Тогаш исто така беа забележани два земјотреси, првиот со јачина од 3,8 степени според Рихтеровата скала, додека вториот 2,6 степени.

Состојка опасна за црниот дроб и белите дробови е пронајдена во чај од Хрватска направен од листови нане од Србија

Системот за брзо предупредување за безбедност на храна на Европската унија (RASFF) на својата веб-страница објави дека се повлекува уште еден производ во Хрватска.

Станува збор за чај од нане од Хрватска со суровина, листови од нане, набавен во Србија. Пиролизидинските алкалоиди се пронајдени во чајот.

Како што предупредува RASFF, ризикот по здравјето може да биде сериозен, пренесува N1.

Пиролизидинските алкалоиди (ПА) можат да бидат многу токсични за луѓето. Пиролизидинските алкалоиди ги произведуваат растенијата за да се одбранат од штетници и тревопасни животни и се идентификувани во приближно 6.000 ботанички видови.

Овие состојки можат да бидат многу опасни за црниот дроб и белите дробови, а случаите на токсичност на црниот дроб од внесување растенија со овие супстанции датираат од 1920-тите.

Хрватската агенција за храна (ХАХ) наведува дека во високи дози може да доведе до откажување на црниот дроб, што може да резултира со смрт.

Приведени двајца ученици во Србија: Испраќале мејлови за поставени бомби во училишта

Припадници на МВР во Србија, во соработка со Антитерористичката служба, идентификувале и пронашле двајца ученици од основно училиште на возраст од 12 и 13 години кои, како што се сомнева, во претходниот период праќале мејлови за поставени бомби во основните и средните училишта на подрачјето на Нови Пазар, како и во маркет.

Полицијата извршила разговор со момчињата во присуство на нивните родители и го известила Вишото јавно обвинителство во Нови Пазар и Центарот за социјална работа во овој град.

По наредба на Вишото јавно обвинителство Нови Пазар, поднесена е прекршочна пријава против родителите на момчињата поради постоење основи на сомнение дека сториле прекршок со тоа што не извршиле уреден надзор над децата.

Инаку, по пријави за поставени бомби, сите студенти, вработени и граѓани беа евакуирани, а припадници на полицијата извршија увид во објектите и утврдија дека секоја пријава е лажна.

Припадниците на полицијата дополнително го зголемија присуството во училиштата и училишните зони за учениците и сите вработени да бидат уште побезбедни и како и досега веднаш ќе постапуваат по секоја пријава и во соработка со надлежните институции ќе ги преземат сите мерки и дејствија.

Популарно