Потона турски товарен брод со 12 членови на екипажот

Турски товарен брод со 12 членови на екипажот вчера потона за време на невреме во близина на турскиот брег на Црното Море, изјави денеска министерот за внатрешни работи Али Јерликаја.

Капетанот на бродот „Кафкаметлер“, што пловел под турско знаме, вчераутро пријавил дека бродот пловел кон пристаништето кај Ерегли, во северозападната турска провинција Зонгулдак, соопшти претходно канцеларијата на гувернерот на покраината.

Министерот Јерликаја кажа дека бродот потонал откако удрил во заштитниот ѕид на пристаништето.

 Регионот вчера беше зафатен од силни бури, а канцеларијата на гувернерот соопшти дека лошото време ги спречи авионите и бродовите да го бараат бродот.

-Кога ќе се подобрат неповолните временски услови, веднаш ќе почнат активностите за пребарување и спасување, изјави Јерликаја.

РЗС: Просечната возраст на населението во Србија е 43,9 години

Просечната возраст на населението во Србија е 43,9 години, притоа просечна возраст на жените изнесува 45,3 и на мажите 42,5, години, покажуваат денеска објавените податоци на Републичкиот завод за статистика, јави дописникот на МИА од Белград.

Најголем број жители, 63,3 отсто, се граѓаните на возраст од 15 до 64 години, потоа следат граѓаните на возраст од 65 години и постари (22,3 отсто), а најмалку ги има најмладите до 14 години (14,4 проценти).

Минатата година во Србија починале повеќе лица отколку што биле родени или имало 61.052 живородени, а 97.081 умрени.

Просечната возраст на починатите е 72,6 години за мажи и 77,8 за жени.

Кога станува збор за раѓањето деца во Србија, просечната возраст на мајката при раѓањето на првото дете во 2023 година била 29 години.

Минатата година, во повеќе од две третини од случаите, живородените деца се родени во брачна заедница  или 70 проценти.

Бројот на живородени деца од мајки помлади од 25 години е намален од 2003 година од 29.637 на 11.382 деца, што е пад од 61,6 отсто.

Од друга страна, во Србија има зголемување на бројот на живородени деца кај мајки на возраст над 40 години, што изнесува 74,9 отсто, во споредба со 2003 година кога имало 1.679 деца, годинава има 2.937 деца.

Најчести имиња на женските деца родени во 2023 година се: Софија, Дуња, Мила, Теодора и Маша, додека најчести имиња на машките деца се Лука, Василије, Лазар, Богдан и Вук. 

Грчката фрегата во Аденскиот залив интервенирала и соборила дронови

Грчката фрегата „Псара“, дел од европската операција „Аспидес“ (Штитови) во Црвеното море, утрово интервенирала против четири беспилотни летала (UAVs) во Аденскиот Залив, што биле упатени кон трговски брод и соборила два од дроновите, објавија грчките медиуми, повикувајќи се на воени извори, јави дописничката на МИА од Атина.

Со цел да го заштити трговскиот брод, фрегатата, употребила анти-дрон систем и отворила оган против четирите беспилотни летала, од кои две биле соборени, а другите се повлекле и оддалечиле.

Според истите извори, „Псара“ регуларно ја продолжува својата мисија.

Грчката фрегата вчера наутро ја посетија министерот за одбрана на Грција Никос Дендиас и високиот претставник на Европската Унија за надворешна политика и безбедност Жозеп Борел.

Поскапуваат патарините во Србија

Од 10 јули ќе се плаќа поскапа патарина во Србија. Имено, Владата на Србија даде зелено светло за новиот ценовник на Јавното претпријатие Путеви Србије.

Новите цени на патарините ќе важат од 10 јули, стои во новата Одлука за висината на посебната такса за користење на јавниот пат, неговиот дел и патниот објект, што ја донесе Јавното претпријатие Путеви Србије.

Ова се новите цени на поединечните делници на српските автопати:

Белград – Шид: нова цена 500 динари (сега 450 динари),

Обреновац – Прељина: нова цена 560 (510 динари)

Белград – Суботица: нова цена 800 (730 динари)

Белград – Врбас: нова цена 470 (420)

Белград – Ниш југ: нова цена 1.130 динари (1.020)

Белград – Димитровград: нова цена 1.670 (1.510 динари)

Белград – Баточина: нова цена 500 (450)

Популарно