Бебе во Америка починало откако мајката го ставила да спие во рерна

Бебе починало откако неговата мајка по грешка го заспала во рерна, изјави обвинителот. Мараја Томас од Канзас Сити, Мисури беше обвинета за загрозување на благосостојбата на дете.

Во петокот попладне полицијата реагираше на пријава за бебе кое не дише. Во изјавата за веројатната причина се наведува дека брзата помош го нашла детето со видливи изгореници. Бебето е констатирано мртво на местото на настанот.

Во соопштението за медиумите се наведува дека сведокот рекол дека мајката „го заспала детето и случајно го ставила во рерна наместо во креветчето“. Полицијата не прецизираше како точно дошло до грешката, пишува Sky News.

„Ја препознаваме ужасната природа на оваа трагедија и нашите срца се тешки поради загубата на овој скапоцен живот. Веруваме дека системот на кривичната правда соодветно ќе одговори на овие ужасни околности“, рече окружниот обвинител на округот Џексон, Жан Питер Бејкер.

Големи поплави во Германија, се заканува да пукне брана

Состојбата со поплавите во јужна Германија и понатаму е напната. Германската метеоролошка служба повторно предупреди на обилни врнежи од дожд. Невреме со грмотевици може да се очекува до пладнево.

Повеќе од 1.800 луѓе од Федералната агенција за техничка помош сега се на должност во јужна Германија. Паралелно со нив, дежураат пожарникари и други работници за итна помош.

Пожарникар (42) загинал при операција за спасување на семејство во Баварија.

Портпаролот на окружната канцеларија изјави дека чамецот се превртел за време на операцијата околу 23.30 часот синоќа, а пожарникарот бил пронајден во неделата наутро.

Во чамецот бил со тројца колеги кои биле спасени. На еден од нив првично му била укажана помош во болница, а другите двајца веднаш биле пуштени дома.

Поплавите предизвикуваат штети не само во јужна Германија, туку и во Хесен. На А7 се случи несреќа откако автопатот беше поплавен. Водата на некои места била висока 80 сантиметри. Во Алсфелд имаше неколку одрони, а со вода беа поплавени и подрумите.

Германските железници ги прекинаа меѓуградските услуги меѓу Штутгарт и Аугсбург по штетата од невремето. Прекини имаше и на други врски од Минхен, Карлсруе и Штутгарт.

Во саботата вечерта, два вагони на брз воз со 185 патници излетаа од шините во Швебиш Гмунд, Баден-Виртемберг, по одронот. Според портпаролот на железницата, патниците биле неповредени и биле евакуирани од возот во текот на ноќта.

Во неделата претпладне врнежите од дожд стивнаа на југ, а на некои места нивото на водата веќе паѓа.

Сепак, поплавите сега се движат низводно – од Швабија кон Долна Баварија и Горен Пфалц. Меѓу другите места, може да бидат погодени Нојбург, Келхајм, Регенсбург, Штраубинг.

Во Елдерн се заканува да пукне брана. Се повикуваат жителите да се подготват за евакуација и да ги префрлат своите лични вредни предмети во повисоките области на зградите. Во случај на опасност од поплави, беше предупредено, да не се влегува во подруми и подземни гаражи.

„Погодената област треба да биде широко заобиколена, а поплавените патишта повеќе да не се користат. Треба да ги следите упатствата на итните служби, да им помагате на децата и на другите луѓе на кои им е потребна помош, но без да ја загрозите сопствената безбедност’, соопштија локалните служби за итни случаи.

За време на невремето во изминатите денови на места за 24 часа наврна повеќе дожд отколку за еден месец.

Континуираните врнежи во делови од германските сојузни покраини Баварија и Баден-Виртемберг доведоа до пораст на нивото на водата што статистички се случува само еднаш во повеќе од сто години.

Во Кислег во Баден-Виртемберг во петокот за еден ден паднале 130 литри на метар квадратен, нормално паѓаат 118 литри месечно. Во Бад Верихофен во Баварија за 24 часа паднале 129 литри, додека просекот е 101 литар месечно.

Трамп за 24 часа по пресудата добил над 50 милиони донации

Раководителите на кампањата на републиканскиот кандидат за претседател на Соединетите Американски Држави Доналд Трамп објавија дека во првите 24 часа откако беше прогласен за виновен за фалсификување документи собрале повеќе од 50 милиони долари донации.

„Тоа е повеќе од два милиони долари по час“, соопштија тие.

„За неколку минути по прогласувањето на пресудата нашиот систем за донации беше преплавен со поддршка, а и покрај неколкуте прекини поради преголемиот сообраќај, претседателот Трамп успеа да собере 34,8 долари помали донации“, соопштија Крис Ласицита и Сузи Вајлс.

До синоќа тој износ се качил на 52,8 милиони долари, пренесува Франс Прес. Така веќе утринава тој бил двојно поголем од вообичаениот дневен приход на Винред, републиканската платформа за донации. Околу 30 отсто пристигнале од нови донатори.

Поранешниот американски претседател Доналд Трамп, кандидат на републиканците за изборите во ноември, во четвртокот беше прогласен за виновен за фалсификување документи со цел прикривање на исплатата за молчење на порно ѕвездата Сторми Дениелс пред изборите во 2016 година.

Поротата го прогласи Трамп за виновен по сите 34 точки од обвинението, со што тој стана првиот американски претседател осуден за кривично дело. Му се заканува максимална казна од четири години затвор иако останатите осудени за такви дела често добиваат помали парични или условни казни.

Почина 12-годишно девојче откако со месеци било малтретирано од таткото и маќеата

Малинда Хогланд (12) била пронајдена од полицијата на 4 мај, откако нејзиниот татко Рендал Хогланд се јавил на 911 и тврдел дека со велосипедот удрила во дрво.

Малинда, која тежела само 22 килограми, починала неколку часа по пристигнувањето во болница. Персоналот бил шокиран од нејзината физичка состојба. Имала модринки, скршеници и оштетен црн дроб.

Хогланд (52) и неговата свршеница Синди Ворен (45) беа обвинети за нејзината смрт два дена подоцна.

„Дејли мејл“ ги прегледа објавите на парот на социјалните мрежи. Тие забележале дека таткото престанал да објавува фотографии од неа на почетокот на јануари, но продолжиле да објавуваат фотографии од синот Гевин, за кој полицијата вели дека не бил малтретиран. Девојката, пак, на последните фотографии кои ги објавил нејзиниот татко изгледала слабо, а нејзината рака изгледала покриена со модринки.

Маќеата на девојчето во 2009 година се изјаснила за виновна, затоа што не го спречила нејзиниот поранешен сопруг да го претепа неговиот тригодишен син Исаја. Тој е осуден на затворска казна за злоупотреба на момчето, но и за убиството на двегодишната ќерка од претходната врска.

Полицијата соопшти дека Малинда престанала да оди на училиште во декември и често била врзана за мебелот во подрумот. Се појавувала на онлајн предавања, но била врзана за да не се гледа на камерата.

На видеата, кои парот ги избришал, наводно се гледал степенот на малтретирање на девојката. На некои од нив Малинда била принудена да спие на под, без перница или ќебе. И кажале дека не треба да очекува појадок, ручек или вечера. Тие, исто така, ги избришале пораките пред да се јават на 911. Меѓутоа, полицијата успеала да ги врати пораките во кои разговарале за нејзината влошена здравствена состојба.

И двајцата се обвинети за обид за убиство, напад и киднапирање, а истражителите велат дека се можни дополнителни обвиненија.

Популарно