Во голем број училишта во Србија денеска нема настава или е скратена, поради протести на просветните работници организирани на плоштадите и пред училишните управи откако репрезентативните синдикати на просветните работници не го прифатија предлогот на Владата за зголемување на платите од јануари за 12 отсто, јави дописникот на МИА од Белград.

Четири репрезентативни синдикати во Србија – Синдикатот на просветните работници на Србија, Синдикатот на образованието на Србија, ГСПРС „Независност“ и Синдикатот на просветните работници на Србија бараат Владата да ја изедначи почетната плата на дипломираните наставниците со просечната плата во Србија, да им исплати новогодишен бонус и итно да донесат измени на законот со кои ќе се зголеми заштитата на наставниот кадар од се почестите напади од ученици и родители.

Претседателот на Форумот на средните стручни училишта, Милорад Антиќ, за новинарите изјави дека просветните работници само бараат да имаат иста просечна плата како и другите вработени во земјата и да им се гарантира законски безбедноста во образовните институции каде што работат. Просветарите го изразија своето незадоволство и од досегашните преговори со претставници на Владата за зголемување на платите.

Форумот на белградските средни училишта во соопштението наведува дека Главниот одбор на таа организација одлучил да го поддржи штрајкот не само затоа што се незадоволни од решенијата што ги нуди владата, туку и поради лицемерниот обид на претставници на министерствата за финансии и образование за поделба на вработените на наставен и ненаставен кадар.

Просветните работници порачаа дека доколку не им се исполнат барањата на 2 октомври, повторно ќе штрајкуваат.

-Ова е нашиот крик, доста е, изјави Снежана Романдиќ од Синдикатот на просветните работници на Србија за Н1 по протестот во Белград.

Романдиќ рече дека според проценките на синдикатот во Белград, во штрајкот учествувале околу 70 отсто од училиштата.

Во средата започна новата учебна година во училиштата во соседна Грција со низа промени кон кои ќе треба да се прилагодат и учениците и наставниците, со цел поквалитетно да се искористи времето поминато во училишните клупи и вниманието на учениците да биде целосно фокусирано на наставата која се модернизира. Имено во училниците се веќе поставени 28.504 интерактивни табли, до училиштата се доставени 177.112 нови роботски системи (Robotics Kits), а наставниците добиваат нови, интерактивни системи за учење.

Учениците ќе ги прошируваат своите хоризонти преку документарни филмови, видеа и симулации, додека образовната заедница сега ќе има пристап и до архивски материјал од други организации, вклучително и државната телевизија ЕРТ, водечки институции и музеи. Од минатата учебна година Грција воведе Платформата за борба против насилството и малтретирањето во училиштата која се надградува за спречување на врсничкото насилство.

Имено, грчката влада на премиерот Кирјакос Мицотакис вчера и официјално ја објави одлуката со која строго се забранува користењето на мобилните телефони во училниците па учебната година ја стартуваше под мотото „Мобилен во чанта“.

Конкретно, на учениците им е дозволено да поседуваат мобилен телефон, се додека го имаат во чантата и не е на видно место. Доколку се прикаже мобилниот телефон, учениците добиваат еднодневна суспензија. Доколку ученикот ги снима/фотографира/ своите наставници или соученици, казната е тридневна суспензија. Доколку фотографирањето/снимањето се однесува на лични податоци на трети лица, тогаш Наставничкиот совет е должен да ја спроведе педагошката мерка за промена на училишната средина.

Има новини и во однос на изостаноците, иако вкупниот број на изостаноци останува ист, но разликата сега ќе се прави меѓу оправдано и неоправдано отсуство. Присуството ќе се смета за „соодветно“ кога, во текот на целата учебна година, изостаноците не надминуваат 50 или кога не надминуваат вкупно 114, од кои повеќе од 50 се оправдани. Отсуството ќе биде внесено и поради задоцнето пристигнување во училница.

Се воведува нова дигитална алатка за родители и старатели наречена е-Родители преку која се обезбедуваат информации за бодовите на учениците како и за соопштенија и известувања на училишната единица. Се очекува, сепак, во текот на учебната година да се прошират можностите на конкретната апликација со информации за изостаноците на учениците, за напредокот на наставниот материјал и за планирање на средби меѓу родителите и наставниците.

Новиот правилник за работа на училиштата носи построги последици за учениците. Помеѓу другото, директорот на училиштето сега може да одлучи до тридневна суспензија на ученик, а претходно максимално беше еден ден. Дополнително, Наставничкиот совет може да одлучи да изрече суспензија до пет дена наместо досегашните три дена. Наставничкиот совет исто така може да одлучи – доколку смета дека е потребно – за промена на одделението или училишната средина како и исклучување од акции, културни или спортски настани, едукативни патувања и патувања.

Во случај на оштетување/уништување, делумно или целосно, на училишни згради, простории и логистичка инфраструктура што му се припишуваат на одреден ученик, трошоците за реставрација се на товар на ученикот (доколку е полнолетен) или на неговите родители и старатели. Откако ќе се утврди висината на трошоците за рехабилитација, родителите/старателите мора да ги покријат трошоците. Доколку не се согласат, трошокот се потврдува и следи процесот на наплата.

Главната иновација оваа учебна година за грчките ученици е проектот „Дигитална училница“. Пилот проектот ќе започне на 16 септември за 3 Интернати Конкретно, секој апликант за прием во високото образование, преку државните испити, ќе има можност да присуствува на вечерни предавања во живо за целиот материјал од курсевите што се испитуваат, вклучително и специјални курсеви како линеарен и архитектонски дизајн, германски и француски јазик. Во контекст на современото образование, учениците ќе имаат можност за интерактивно учество и персонализирана поддршка од 98-те наставници, кои ја презедоа дополнителната настава по 45-те предмети, кои се испитуваат на национално ниво во јуни во општите и средните стручни училишта. Ќе бидат опфатени уште 10 специјални курсеви за унифицирани специјални средни стручни училишта и гимназии.

Дополнително, во Дигиталната училница сите ученици ќе можат да ја следат целата наставна програма во електронски формат. Материјалот од наставата по грчки јазик и математика е достапен за сите гимназиски паралелки. До крајот на 2025 година ќе бидат објавени 2.500 разбирливи и дигитализирани видеа за вкупно 49 предмети од 5-то одделение основно до 3-та година средно училиште.

Грција е првата земја што ја усогласи својата наставна програма со 17-те цели за одржлив развој на ОН. Целта е студентите да се оспособат за здрав живот, грижа за животната средина, општествена одговорност и креативно размислување. Преку работилниците за вештини, наставните програми се збогатени со акции за справување со врсничкото насилство и малтретирање, заштита на животната средина, општествена одговорност и помагање на сограѓаните, притоа нагласувајќи ги училишните денови посветени на љубовта кон животните, спортот, менталното здравје и друго.

Членови на семејствата и граѓани утринава се собраа на протест пред полициската станица во северниот дел на Косовска Митровица, барајќи ослободување на четворицата српски младинци, уапсени во вторникот.

Насобраните го изразуваат своето незадоволство со свирежи, извикувајќи „Пуштете ги децата!“ и со транспаренти „Полиција Куртиленд“ и „Дали ЕУ е загрижена“.

На протестот се и претседателот на Српската листа Златан Елек, претседателот на Привременото тело на општина Косовска Митровица Иван Запорожац и други членови на Српската листа.

Во северниот дел на Косовска Митровица синоќа околу полноќ, косовската полиција уапси четворица млади момчиња од српска националност, на кои им е одреден притвор до 48 часа поради сомнение за наводен напад врз службено лице при вршење на должноста.

Раде Недељковиќ, таткото на Растко, еден од уапсените, изјави дека засега немаат официјални информации за момчињата.

„Немаме сигурни информации, ниту можевме да ги видиме, ниту пак можеме да слушнеме за нивната состојба“, изјави Недељковиќ.

Тој додаде дека момчињата, според некои информации, биле брутално претепани.

Таткото на уште едно од уапсените момчиња, Срѓан Јовиќ, изјави дека неговиот син при апсењето бил повреден од припадници на косовската полиција и дека сега се наоѓа во станица во јужниот дел на градот.

„Тие беа однесени во полициската станица во јужниот дел, одреден им е притвор. Ја ангажиравме адвокатката Јелена Кривокапиќ и сега чекаме да го однесат кај обвинител.

Не сум бил во контакт со мојот син. Адвокатката зборуваше и вели дека има рани по телото, има повреди. Ќе видиме колку е сериозно. Чекаме изјава“, рече Јовиќ.

Тој додаде дека и неговиот син и кажал на адвокатката дека не е виновен за тоа што го обвинуваат и дека пред бруталното апсење и физичкиот напад врз нив имало само вербален конфликт.