Од денеска намалени цените на пет патарини во Грција

Македонија

пред 3 часа

Намалувањето на цените на пет патарини во централна Грција, на автопатот Солун – Атина најавено минатиот месец, од денеска стапува во сила со што патувањето со автомобил ќе биде за околу 17 отсто поевтино, јави дописничката на МИА од Атина.

Грчкиот премиер Кирјакос Мицотакис на Фејсбук напиша дека „октомври започнува со уште едно намалување во патниот транспорт, овој пат со намалување на патарините на делницата Малиакос-Клиди“ и објасни дека со ова намалување, вкупната наплата за минување низ петте станици за 2024 година е 13,70 евра од 16,50 евра колку што е денес, додека во 2025 година наплатата ќе биде 14,40 евра од 17,40 евра што возачот ќе требаше да плати доколку не беше воведено намалувањето.

-Ова стана возможно бидејќи избравме бенефитот од рефинансирањето што го обезбедивме да го искористиме до крајот на 2025 година во корист на нашите сограѓани, наместо да го префрлиме износот во државниот буџет. Па така од денеска оние кои минуваат низ централна Грција ќе плаќаат намалени патарини од 2,8 до 3 евра, напиша Мицотакис.

Како што објави МИА на почетокот на септември, намалувањето на цените за 17 отсто за лесните возила и пет проценти за тешките возила ќе важи 15 месеци, до крајот на 2025 година и е резултат на искористување на 15,8 милиони евра, што произлегоа од рефинансирањето на договорот за концесија на конкретниот дел на автопатот.

Петте патарини се во централниот дел на Грција, во близина на градовите Катерини, Лариса, Волос и Ламија.

Дополнително, од 6 октомври ќе се намали и цената на патарините на обиколницата „Атики одос“ во областа, Атика поширокиот регион на Атина од 2,80 на 2,50 евра.

Изминатата недела 45 случаи на Ковид-19, починати две лица

Македонија

пред еден ден

Регистрирани сe 45 нови позитивни случаи на Ковид-19 од 23 до 29 септември. Пријавени се две починати лица со Ковид-19, се наведува во најновиот извештај на Институтот за јавно здравје (ИЈЗ), објавен попладнево.

- Во тековната недела, регистрирани се заболени лица во општините од 10 градови. Најголем дел од регистрираните случаи се од Скопје, a највисока инциденца е регистрирана во Демир Хисар. Регистрирани се заболени лица во сите возрасни групи, со најголем број случаи пријавени во возрасната група над 60 години. Во текот на минатата недела со статус „оздравени“ се стекнале 68 лица. Во текот на минатата недела, пријавени се две починати лица асоцирани со Ковид-19, од Демир Хисар и Охрид, од возрасната група над 65 години. Лицата се вакцинирани со две и три дози против Ковид-19, поминати се три години од последната доза вакцина, со регистрирани коморбидитети. Едното позитивно лице е починато во болнички, а другото во домашни услови, појаснуваат од ИЈЗ.

Годинава, заклучно со вчерашниот ден, регистрирани биле вкупно 1.669 заболени и 23 починати лица асоцирани со овој вирус.

Од појавата на првиот случај на Ковид-19 во Република Северна Македонија, на 26 февруари 2020 година, а заклучно со вчерашниот ден, пријавени биле вкупно 351.985 заболени со Ковид-19 и 10.002 починати лица асоцирани со него. Најголем дел од заболените биле регистрирани во Скопје, Битола и Куманово, а највисок морбидитет бил регистриран во Кавадарци. Највисок морталитет бил регистриран во Охрид, Кавадарци и во Прилеп. Највисок леталитет во Струга и во Крива Паланка.

- Се препорачува следење на основните мерки за превенција на Ковид-19 и останати респираторни заразни заболувања. Вакцинацијата останува специфична превентивна мерка обезбедувајќи заштита од тешки форми на болест, иако овој заштитен ефект со тек на време се намалува. Продолжува препораката за вакцинацијата на лицата со висок ризик од тешки форми на болест и лош исход - како што се повозрасните лица, се додава во извештајот на ИЈЗ.

Десетти хуманитарен пикник за вработените во „Алкалоид“: Околу 2 милиони денари за организацијата „СОС Детско село“

Македонија

пред 2 дена

„Алкалоид“ АД Скопје ја продолжи хуманата мисија на 10-тиот по ред донаторски хепенинг по неколкугодишна пауза која се должеше на пандемиските ограничувања. Хуманитарниот пикник беше спроведен под закрила на Фондацијата „Трајче Мукаетов“ во присуство на вработените, членовите нанивните семејства и/или нивни пријатели.

„Денес заокруживме значаен, 10-ти јубилеј на колективна солидарност на собирот кој прерасна во празник на хуманоста за сите алкалоидовци. Околу три илјади наши колеги и пријатели донираа средства преку Фондацијата ’Трајче Мукаетов’, кои ќе бидат наменети за СОС Детско село. Со оваа организација отпочнавме стратешка соработка во 2022 година со цел да ги олесниме тековните трошоци за децата под нивна закрила, едукативна поддршка, пристап до професионално советување и слично зашто секое дете заслужува посреќно и побезгрижно детство.“

Директорката за обезбедување фондови и комуникации на СОС Детско село, Силвија Брајовиќ, истакна : „Со ’Алкалоид’ веќе три години нè поврзува едно прекрасно партнерство, кое не само што ја покажува нивната посветеност како компанија туку и искрената грижа за најранливите во нашата заедница – децата без родителска грижа. Донацијата претставува продолжување на трета година кумство и поддршка на едно згрижувачко семејство за тековни животни трошоци и развојни потреби на децата, кои добиваат не само материјална помош, туку и љубов, сигурност и припадност“

Соработката на „Алкалоид“ со македонската гранка на организацијата „СОС Детско село“ отпочна во 2022 година кога една од куќите на локалитетот во населба Ченто беше именувана во „Бекутан куќа“, за која компанијата ги покри трошоците за секојдневното функционирање. Во 2023 година, по повод 45-годишниот јубилеј на брендот „Бекутан“, се издвојуваше одреден процент од продажбите на оваа детска колекција и беа собрани над 2 милиони денари донирани на оваа организација. „СОС Детско село“ во моментов се грижи за близу 500 деца и младинци во земјава кои се без родителска грижа или се во ризик да ги изгубат своите родители. Организацијата функционира на принципот на донации од индивидуалци, компании, институции и разни форми на партнерства. Секој може да донира, а донираните средства се користат исклучиво за потребите на згрижените деца.