Трогателна порака на актерката Весна Петрушевска која на социјалните мрежи проговори за траумите кои ги доживеала нејзината ќерка

„Мојата ќерка е најхраброто дете на овој свет, во последниве пет дена ми покажа како се соопштува вистината, како да се соочи со најголемото зло што може да му се случи на едно дете, да ги издржи сите предизвици, да ми откине парче од моето срце полно со очај, чемер, бес, лудило и на крај да ми соопшти: ‘Јас ова го кажав за да не им се случува на другите дечиња, не сум виновна, нели мамо?’“. Ова е трогателната порака која актерката Весна Петрушевска ја објави на својата страница на „Фејсбук“, со што јавно проговори за траумите што ги доживеала нејзината ќерка. Станува збор за случај кој го обелодени полицијата уште минатата недела, а кој ја вознемири јавноста. Станува збор за напад на малолетно девојче од страна на возрасен маж, кој се случил во саботата во темна гаража кај Млечниот ресторан во населбата Капиштец.

Благодарение на пријавата во полиција, насилникот е откриен. Обвинителството соопшти дека му е одреден триесетдневен притвор на 44-годишниот В.Л. од Скопје, кој се сомничи дека во саботата во населбата Капиштец извршил напад врз малолетно девојче.

Истрагата утврди дека околу 19:30 часот, педофилот го сретнал 12-годишното девојче, кое се возело со велосипед по булеварот „Иво Лола Рибар“ и улицата „Анкарска“. Детето му побарало 20 денари за сладолед, а тој ветил дека ќе и' даде 500 денари, но само доколку дојде со него до блиската гаража. Девојчето се согласило, по што осомничениот го извршил половиот напад. На заминување, на малолетничката и' се заканил да не кажува никому, но таа уште вечерта и' се доверила на мајка си, по што случајот е пријавен во полиција. По три дена, педофилот е пронајден и приведен.

Во статусот на „Фејсбук“ им порачува на родителите да си ги чуваат децата, оти тие се „вашата вистина, поука, храброст, жестина, жилавост, врела солза, насмевка, надеж, љубов, вашата стерна...“.

„Дајте им го сето време на овој свет, оти кога ќе помислам што се случувало кога се соочила со монструм, ми оди да ги срушам сите планини на овој свет, да ја гушнам и никогаш да не ја пуштам. Моето дете е херој и секогаш верувајте на нивната љубов и искреност. Моето дете кое ги сака сите луѓе и им верува бескрајно“, порачува Петрушевска.

Изминатиот викенд, кога се случил грозоморниот настан, девојчето било на гости кај Млечниот ресторан во Капиштец. Како што дознаваме, и притворениот педофил живеел во најблиското соседство и добро го познавал девојчето.

Против него, сега е поднесена кривична пријава за полов напад врз дете кое не навршило 14 години.