Промена на договорот од Преспа, Заев пред суд, Албанец за претседател, Зоки во вилата на Водно?!

На само една недела до претседателските избори во Македонија, редно време е и јас да го кажам својот став на темава. По неколку неделна кампања и досега три телевизиски соочувања, сликата за понудата на тројцата кандидати е веќе јасна.

Искрено, не сум ја прочитал програмата на ниту еден од нив, ниту имам намера. Моите ставови се изградени на нивните јавни настапи низ цела држава и уште повеќе на трите телевизиски дебати. Нема да зборувам за гафовите и глупостите што ги изнагледавме во предизбориево, нема да се задржам ниту на валканата кампања, за тоа секако би требале најмалку 100тина страни. Ма може филм да се сними, само жарнот не знам како да се определи. Трагично-комичен-хорор со несреќен крај?! Ок, уште не сме до крајот, но токму за крајот сакам да пишувам. Односно, што практично ќе значи победа на Река, Силјановска или Пендаровски.

На гласачкото ливче под број еден ќе го имаме професорот Река

Победа на Река, колку и да е нереална, би значела Албанец за претседател на државата за прв пат во историјата. Од една страна позитивно, затоа што нашите сограѓани Албанци ќе се почуствуваат ценето и конечно во Македонија, таткото на државата ќе биде Албанец. Од друга страна негативно, затоа што се трга од етничка припадност на кандидатот. Веќе 5 години слушаме една иста парола „дојдено е времето Албанец да е претседател на државата“, но токму оние кои ја кажуваат им го замрзнуваат патот на Албанците кандидати. Се додека се повторува дека време е Албанец да е претседател, тоа е всушност игра на етничките и национални чувства, што значи дека кампањата ја прави етничка и во старт ги губи гласовите на другите етнички заедници во Македонија. Затоа Река нема гласови од Македонци. Нема ни да има, а и не може да има. Кога првото нешто што го кажувате при кандидатурата е дека сте влегле во трка за Албанците да имаат за кого да гласаат, јасно започнувате етничка кампања и веднаш ја губите поддршката на Македонците и останатите етнички заедници, освен Албанците. Никој не сака да гласа за кандидат кој на прво место става друга  етничка група различна. Затоа Река е свесен дека нема да победи. Негова цел е да освои што повеќе албански гласови во првиот круг, за да ја ослабне позицијата на ДУИ во владата. Доколку, за некое чудо, успее да влезе во вториот круг го чека тежок пораз.

Следна на листата за гласање и Силјановска

Победа на кандидатката поддржана од ДПМНЕ ќе донесе неколку промени. Најпрво, нејзина победа ќе значи владеење на правото во претседателската вила. Очекувајте враќање на еден куп закони назад во Собранието затоа што се косат со уставот. Не зборувам тука само за спорни закони, туку и за закони изгласаани со консензус во Собранието, но не  усогласени со другите закони и уставот. Ова ќе ни покаже колку се правно неписмени нашите политичари, но во реалноста нема да значи многу за народот. Победа на Силјановска ќе значи предвремени избори во Македонија, најдоцна во Септември. Предвремени избори на кои СДСМ ќе доживее ДЕБАКАЛ! Пораз што досега не е виден во Македонија. Пораз што ќе ги закопа Заев и другарите, најпрво во политичка пензија, а многу скоро потоа и во суд! Да, РЕФАНШИЗАМ ќе има! Тоа нема да е добро за државата, ниту за народот, но осветата на ДПМНЕ по нивно враќање на власт е лесно предвидлива. И за крај, дали победа на Силјановска ќе значи промена на договорот со Грција и бришење на Северна пред Македонија? НЕ! Верувам дека професорката, доколку стане претседателка на државава, никогаш нема да рече Северна. Верувам и дека ќе формира тим што правно ќе се бори за промена на договорот, дека секаде во светот ќе зборува за неправдата, за прекршената волја на граѓаните изразена на референдум... но името и договорот ќе останат. Не само затоа што претседателот нема ингеренции да го поништи, туку затоа што ДПМНЕ нема да и помогне. Пред неколку месеци ова јасно го кажа Груевски. Сега не е време за поништување на договорот со Грција, напиша поранешниот премиер и сегашен почесен претседател на ДПМНЕ. Сега е време за промена на власт, за нова влада што ќе ги исполни Копенхашките критериуми и ќе влезе во ЕУ, а тогаш-некогаш, некоја нова влада, од внатре од ЕУ, ќе бие битка за враќање на името на државата и бришење на Северна. Очигледно е дека ДПМНЕ ја следи оваа стратегија, иако на митинзите зборува за „горда Република Македонија“, но дури ни Мицкоски немаше одговор на прашањето на Заев, дали ќе го искине договорот од Преспа и што потоа. Значи, накратко, победа на Силјановска ќе значи победа на ДПМНЕ на следните предвремени парламентарни избори и влада која ќе го исполнува минимумот од договорот со Грција, но нема да го поништи!

Со број три на гласачкото ливче ќе биде Пендаровски

Ако Стево Пендаровски стане претседател на Република Македонија, ние ќе добиеме претседател на Северна.  Односно, на секоа негово обраќање, како и до сега, тој упорно по 15 пати ќе повторува СЕВЕРНА, СЕВЕРНА, СЕВЕРНА.... Оваа стратегија на СДСМ и целата владина коалиција со која се обидуваат да го навикнат народот на новото, наметнато име, засега не раѓа со плод, но нема да се откажат. Победа на Стево, всушност ќе значи комплетна власт на Заев во Македонија. Пендаровски ниту ќе биде камшикар, ниту ќе има свој став. Всушност тој и никогаш немал став. За ова сведочат многу негови видео изјави во минатото, кои сега ги порекува. Или со една реченица, Пендаровски е Заев! Исто лажат, исто менуваат ставови, исто се извадени од контекст. „Народот е СТОКА“ и „Ќе јадам живи луѓе“ се двете најпознати извадени од контекст изјави на политичкиве браќа. Затоа Стево е идеален кандидат на СДСМ! Тој е човек кој сака да стане Заев еден ден. Си призна човекот дека Зоки му е идол, кога кажа дека се исти со премиерот, односно 102.5% исти. Потоа, нормално се вадеше дека тоа се однесувало само на дел од политичката програма, но секако такво нешто не споменува во оригиналната изјава или наједноставно кажано, ЛАЖЕ! Всушност, како и Заев и Пендаровски ЛАЖЕ, МНОГУ ЛАЖЕ!!! Неговата победа само ќе му ја олесни работата на Заев и владата и ќе им даде за право (по нивната логика) да убедуваат дека народот го прифатил новото име и дека се сложува со нивните политики. Изборите, по евентуалната победа, ќе ги крастат „ВТОР РЕФЕРЕНДУМ“ за името и ќе тврдат дека народот стои зад противуставната промена на името. Владата ќе продолжи да шлајфува во место, се до корпата од Брисел во Јуни и недобивањето на датум за преговори, за што секако Стево и Заев ќе го обвинат Мицкоски, односно Груевски.

Автор: Пацифист

Героски: Мрчи Берлин, мрчи Париз… Се намножија „мрчатори“, друже Заев!

Некои луѓе во Македонија, особено такви случајно влезени во политиката, што ќе рече без елементарни познавања за тоа како се игра тој „спорт“ во нормалниот свет, не сфаќаат дека странските амбасадори во една земја се персонификација на шефовите на своите држави. Поинаку кажано, новата американска амбасадорка е Трамп во Скопје, германскиот амбасадор е фрау Меркел, додека францускиот амбасадор е Макрон.

Што значи тоа? Многу просто – кога разговарате со човек како францускиот амбасадор Кристијан Тимоние, формално или неформално, на конференција или на пријателски ручек, вие мора да сте свесни дека разговарате со неговиот шеф. Ама баш со Макрон лично. Се убедувате со него, но не се карате, бидејќи знаете дека неговото мислење може битно да влијае врз вашите амбиции, планови и постигнувања. Се сеќавате, после последната берлинска турнеја на премиерот Зоран Заев, јавно го опоменав дека во Берлин не се разговара како во Струмица или во Валандово, на пример, а на Меркел не ѝ се спомнуваат Русија и Кина, како наши „адути“ во битката за датум за преговори за ЕУ.

Амбасадорот Тимоние е еден многу интересен лик. Нетипичен амбасадор. Страшно интелигентен, необично отворен, духовит и со одлични, но и одлучни анализи на состојбите во Македонија. Во својот последен јавен настап, тој ни порача да не се опседнуваме со датумот и опиша некои многу сериозни слабости со кои се соочува нашето општество. Тоа на многумина не им се допадна. Тоа „мрчење“.

Во Струга, вели Тимоние, градоначалникот се однесува скандалозно. Хм, тоа е нешто ново? УНЕСКО ќе ни го одземе статусот на Охридско Езеро. Го знаеме и тоа. Имаме толку многу корупција. Е што, да не немаме? Се менуваат директори на школи на дилетантски начин. Знаеме и за тоа. Што од сето ова не е точно, другарчиња?

„Блесаво е да барате датум за преговори во овој период, имате толку многу проблеми, ќе треба уште да работите за да бидете спремни за датум, чудна ми е таа ваша опседнатост со датумот. Ние не треба да ве оставиме изолирани без пат кон ЕУ, но не треба ниту да ви прогледуваме низ прсти“, категоричен е претставникот на Макрон во Македонија.

Се извинувам, а што бараме ние – да ни се прогледа низ прсти?

Целиот текст на Плусинфо.мк

Кој ни кажа дека ако го смениме името сигурно добиваме преговори и брз датум за членство?

Сите во одделение сме имале другарче кое е фино, простодушно, не прави проблеми, се труди да се допадне на сите, има добри оценки, но нема свое јас, плашливо е, страв му е да каже што мисли и се обидува да се согласи со најважните шизици во одделение, ама, никој не сака да го дружи. Не е тоа другарче лошо, не е ни омразено, туку едноставно е безбојно, невидливо, неинтересно па дури и наставниците од толку што е блах, му го забораваат името.

Е па дечки, знаете што? Тоа е Македонија за ЕУ и за нашите "другарчиња" од Европа.

Македонија - државата, треба да размисли каква порака испраќа, која е нејзината репутација и имиџ што вака си поигруваат со неа и баш им е гајле дали ќе имаме уште една политичка криза. Да, не е фер што името го сменивме за пустите ЕУ преговори, а тие ни викаат, чекајте ја Албанија, која во моментов гори. Нo, кој ви кажал дека политиката е фер, посебно меѓународната?! И кој ни кажа дека ако го смениме името сигурно добиваме прегпвори и врз датум за членство?!

Никако да сфатиме дека покажување карактер и грижа за сопствената држава, имање на своја, автентична агенда за развој и не одење слепо по тоа што другите ти викаат дека треба да правиш по дома и како треба да се однесуваш кон самиот себе, да имаш свое јас е првиот и основен чекор за да седнеш со најважните шизици во Унијата или одделението.

За жал, немаме ниту една политичка опција од '91 до сега што го направила тоа. Да, сте правеле компромиси со ДУИ и сте го доуништиле системот, сте го утепале Собранието, судовите, Уставот.... сè, за "големата слика" и "поважните работи".

Сега тоа СÈ, ни се мава на сите од глава. Додека не научиме како се сака и се работи за интересите на државата, ќе се однесуваат вака со нас, на истиот начин како што ние се однесуваме кон самите себе и нашата држава.

А во меѓувреме, повторно ќе ни го заборават името.

Не пееше ДПМНЕ, туку незадовлното мнозинство од народот во Македонија

Сеуште под емоции од европската круна на РК Вардар, со болки во грлото од 3 дена бодрење пред тв и на плоштад, ќе посветам уште еден текст на црвено црната боја. Поточно, на политиката и поделбите во македонското општество, дури и при ваков ОГРОМЕН успех на момците со две срца.

Најпрво, ВАРДАР е шампион на Европа! Тоа е насловот! Вардар! Не Груевски, не Заев, ниту Мицкоски, Шилегов... Никој од нив никогаш не бил на врвот од Европа! НИКОЈ! Само Вардар! Вчера и завчера се славеше европска титула на Вардар! Не беше тоа политички митинг. Не беше поразен СДСМ, не победи ДПМНЕ! НЕ! Победи Вардар, победи Скопје, победи Македонија, Балканот и сите што навиваат за црвено црните! СИТЕ! Без разлика на национална, верска, политичка...припадност. Сите кои искрено навиваат за Вардар се победници и никој нема право да им забрани да се чувствуваат така. НИКОЈ! Вардар има љубов за сите, почнувајќи од најверните, „Комитите“, па се до малите дечиња кои вчера на ушка на татковците присуствуваа на прославата на плоштад! Црвно црната обединува, не е извор на поделби. Поделбите се резултат на политика и немаат никаква врска со Вардар!

Нашето општество е поделено многу оддамна, уште во СФРЈ. Поделбите, посебно по етничка линија, продолжија и по 91 година. Последниве неколку години сме сведоци на нова поделба. Поделба во македонското ткиво. Од „патриоти и предавници“, „антички и словени“, „Македонци и Северџани“, „тврдокорни и слободоумни“. Поделби конструирани од политичарите од сите политички партии, со цел да ја полесно да ја „продадат“ својата програма и да дојдат на власт. Немало политичар во Македонија зад кој застанал цел народ, па затоа сите кои досега се појавиле на политичката сцена им се обраќаат само на „своите“. Го мотивираат своето членство и истомислениците да излезат на гласање и да гласаат за нив. За спротивниот табор многу често имаат погрдни зборови. Најочигледен пример за ова се политичарите од албанскиот блок, во чии програми СЕКОГАШ во прв план е етничката програма. Да, во програмата се зборува за целата држава, економија, здравство, право, но акцентот е секогаш на правата на Албанците. Слични, до пред неколку години беа и програмите на македонските политичари, но по поделбата во македонското гласачко тело, разликите во програмите се однесуваат на Македонците. Всушност тие и ја предизвикаа оваа поделба, па сега борбата е кој подобро ќе ја искористи. Тоа воопшто не го кријат, па при последните претседателски избори, партиските штабови се фалеа кој колку гласови освоил по етничка припадност! ДУИ и СДСМ се расправаа кој колку албански гласови донел, додека ДПМНЕ се фалеше со поддршката од Македонците! Истите оние кои ни зборуваат за соживот, при своите јавни анализи ги делат своите гласачи по етникум!

Премиерот, Зоран Заев и „Шарената револуција“ го донесоа слоганот „Едно општество за сите“, но и тоа се однесуваше само на нивните истомислении. Всушност, најголемата поделба меѓу Македонците е заслуга токму на владејачката гарнитура со газењето на референдумот за Преспанскиот договор. Токму Заев, кој се самопрогласи за обединувач на народот во Македонија, ја направи најголемата поделба со менувањето на уставот и уставното име и покрај мнозинската желба на граѓаните тоа да не се случи. Премиерот јавно кажа дека референдумот пропаднал, но дека „мора“ да ја послуша волјата на малцинството, намерно и свесно газејќи ја волјата на мнозинството. Затоа вчера на плоштадот се пееше „Никогаш Северна, само Македонија“! Не пееше ДПМНЕ, туку незадовлното мнозинство од народот во Македонија. Таа порака не е од Мицкоски или Груевски, туку од обасправеното мнозинство! Обесправени од својата влада, од своите лидери! Не беше тоа порака за поделба, туку порака како резултат на поделба од страна на власта. Лошото е што сега таа порака, повторно ќе биде причина за зголемување на јазот меѓу спротиставените страни, затоа што во Македонија дискусија не постои. Постојат само дијаметрални ставови и омраза меѓу групите. Токму затоа денеска Столе Стоилов е херој за едните, „тврдокорен националист“ за другите! Без разлика дали со неговиот став се согласува поголем или помал дел од народот, никој не го анализира ставот на капитенот на Вардар, туку се се сведува на идеализирање или критика на неговата личност. Уште пострашно е што добар дел тоа го прават затоа што така мислат „нивните кланови“. Доказ за тоа се променетите ставови на повеќе политичари и јавни личности од СДСМ, за кои до пред некоја година Вардар беше ЗЛО, а сега слават титула! Самсоненко беше државен непријател број 2 (број 1 секогаш е Груевски), а денеска истиот беше кај Шилегов, Заев и Пендаровски и доби 700.000 евра државни (наши) пари! Токму таа промена на ставови кај политичарите треба јасно да ви укаже дека тие всуност и немаат став, туку интерес! Само ИНТЕРЕС и ништо друго! Јас го сакам Вардар откако знам за себе и никогаш за мене не постоел друг клуб. Да, навивам за Манчестер Јунајтед, навивав и за Милан во раните 90ти (пред да ја откријам Премиер лигата), симпатична ми е и Валенсија (од времето на Мендиета и Клаудио Лопез), навивам за Хјутсон Роктес во НБА... навивам за секој спортски колектив од Македонија кога игра во Европа, но само Вардар го сакам! Јас имам јасен став, затоа што се водам од емоција, затоа што не сум политичар и не гледам да исполнам некој свој интерес. Политичарите и клановите околу нив функционираат исклучиво од таа гледна точка. Интерес, власт и ништо друго. Токму затоа деновиве сите политичари се обидоа да ќарат по некој поен од титулата на Вардар. Се јави дури и азилантот од Унгарија. Преку Фејсбук го поздрави големиот успех, но не пропушти да го подели народот со тоа што посочи дека на СДСМ му е непријатно што народот се радува. Мицкоски беше во Келн и објави фотографии од преполаната сала во дрес на Вардар. Заев честиташе преку ФБ, а Пендаровски во друштво на поранешниот член на Вардар и македонската репрезентација Мојсоски, сподели афектни фотографии. Дали некој од нив навистина навива за Вардар? Не знам, но знам дека сите секогаш ќе се обидат да ќарат некој поен кај гласачите. Тоа им е секогаш приоритет. Доказ за тоа е видеото кое се врти по интернет, на кое Шилегов тажно дреме во некој ќош на плоштадот во Скопје. За него титулата не е доволна за радост, треба да е во центарот на вниманието за да покаже (лажна) емоција.  На искрен навивач, не му треба публика. Тој пее и плаче и кога е сам.

Државата, односно оние кои ја водат (сега и во минатото) се причината за поделбите, затоа е нелогично во нив да го бараме решението. Од таму нема да дојде! Концептот подели, па владеј е постар од сите нас, па нема потреба да ви го објаснувам. Старата доктрина одлично функционира во Македонија. Одлично за оние кои се на власт или се стремат да дојдат. За нас, граѓаните НЕ! Затоа ние мора да ги спречиме поделбите, ние мора да се сослушаме и да се разбереме. Не велам дека треба да се сложите со оној со спротивен став, различна религиска или етничка припадност, но мора да се разберете. Мора да се ПОЧИТУВАТЕ! Јас никогаш нема да ја признаам „северна“, но имам блиски луѓе кои гласаа на референдумот и кои и денеска мислат дека тоа е правиот пат. Шансата да се сложиме на таа тема, не постои, но почитта кон различниот став секогаш постои. Аргументите, секако се на моја страна (најмногу заради референдумот), но тоа не значи дека ќе го сменам моето мислење за нив, дека ќе престанам да ги сакам или ценам. Истово се однесува на секоја разлика во општеството. Јас никогаш не сум имал проблем испровоциран од меѓуетничка или меѓурелигиска разлика, но решението е повторно истото. Дискусија, разбирање на другиот и почит како на еднаков на себе. Време е да ги закопаме „воените секири“ и да им покажаме на политичарите дека напразно не делат. Во спротивно, титулите на Вардар, Шкендија, Работнички, Пелистер, Победа, Гостивар....ќе бидат само бројки во светот на омраза во кој живееме.

За крај порака до КОМИТИ: Дечки, ајде вие први! Покажете дека сте големи, дека ги заслужувате името што го носите и боите на дресот што го љубите. Без, „клети“, без „чиста Македонија“, без „гасни комори“. Не велам дека вие сте единствените виновници, но вие сте единствените ЕВРОПСКИ ШАМПИОНИ! Промента мора некаде да почне, а јас можам да го побарам тоа само од вас.

Автор: Пацифист

Популарно