РЕШЕНО Е: Два народа – две Македонии!

Девет дена по аболицијата на Иванов и само неколку часа пред најавените најмасовни протести на симпатизерите на СДСМ (протестирам) и ГДОМ (ВМРО), би сакал да им порачам по нешто и на двете групи, кои сами за себе велат дека се на браникот на Македонија.

13001293_1271707389523896_4956019827693147160_n

И двеет групи себе се именуваат како „народот“, што по автоматизам значи дека во Македонија живеат два народа, со дијаметрално спротиставени ставови. И „двата народа“ се Македонци и се обидуваат да ја одбранат државата од другите. Двете групи имаат само уште една заеднича особина: двата табора бараат повлекување на аболицијата од претседателот Иванов. Тој пак, иако избран од народот, тврдоглаво стои зад својот став дека токму тој е заштитникот на Македонија. Уште еден херој, а ги има многу деновиве. Сите не спасуваат, а ние тонеме се подлабоко. Би било смешно, да не тажно.

Осум дена протести, а денеска финале. Во него од една страна ќе играат оние што протестираат пред СДСМ бидејќи Заев втор пат е аболициран, иако ниту Заев, ниту СДСМ донеле таква одлука. Против, од другата страна, оние кои тепаат полиција, бојат згради и споменици на луѓе кои направиле повеќе за Македонија од 10 нивни поколенија заедно, го плукаат и навредуваат секој кој мисли различно од нив, и тоа се во името на демократијата. Кој и да е исходот од финалево, Македонија ќе загуби. Всушност исход нема ни да има. Немаше ни лани кога во два дена „двата народа“ одржаа масовни митинзи. Со недели се фалеа дека на нивниот собир имало двојно повеќе од колку на оној другиот. Еве деновиве сме сведоци дека пак на ист начин се бројат и ја легитимират својата идеологија. Пишав и лани, ќе пишам и сега. Колку и да излезете вечер и утре и задутре.... пак ќе бидете помалку од нас кои не сме на улица. Најмогу 1/10 од народот за кој велите дека го преставувате. Народот кој му го одземавте правото на протест, во име на ваша демократија. Не, овој пат не се криви политичарите. Не е виновен Заев или Груевски, ниту нивните експерти, новинари, гласноговорници. Туку вие кои се продадовте за да излезете на улица. Знам дека во двете толпи има искрени луѓе кои навистина излегле да го искажат својот револт, но повеќето од вас се таму по наредба, по пари, по слава! Едните организирани по СМС пораки со „задолжително“ присуство, другите диригирани од српски „воџи“ платени од туѓи пари. Вие сте криви што сме тука каде сме, затоа што бескичмењачки му го одземавте правото на народот за протести. Затоа што секој спонтан протест или протест од мака го крадете за политички цели. Вие кои се преставувате како „Народот“, сте убијци на истиот. Одете си дома луѓе, доста не браневте! Кој ќе не брани утре од вас, ако го добите тоа што го барате?

За лудилото да биде уште поголемо, едните излегоа со листа од 8 барања, од кои барем 4 се ван здрав разум. Групата која нема лидер, нема тело, нема простории, побара да седне на маса при решавањето на кризата во Македонија?! Кој од нив ќе седне? Сите? Кој им дава легитимитет и кој ќе сноси одговорност за нивните грешки? Дали „протестирам“ прифаќа одговорност за хулиганите на протестите? Или тие беа вметнати од другите? Ако одговорот е да, зошто бараа да бидат ослободени приведените при првиот протест? Следно што бараат е одложување на изборите од 5ти Јуни! Како тоа? Прво, Вељановски и да сака не може да го направи тоа. Второ, од каде им легитимитет за ова барање? Следното налудничаво барање е преодна Влада! Пак рушење на Уставот во име на „демократијата“! (да не се потворувам, ни за ова немаат легитимитет. Всупност за ништо и немаат). И последно од глупоста барања, е формирање на Специјален суд, односно одделение на Кривичниот суд, што ќе решава за обвиненијата на СЈО! Паралелен суд? Затоа што овој не чини? Ок, еве да претпоставиме дека сте во право и дека македонското судство не е независно, како тоа овој оддел ќе биде? Кој ќе ги одбере судиите? Вие? Или Заев? Не ви е доволно неуставното СЈО? Зарем уште циркузи ни требаат?

За да не бидат покуси и оние од другата страна имаат барања. Да бидам реален нивните се само две и се реални. Бараат избори на 5ти Јуни, а истите се веќе распишани и бараат да се повлече аболицијата. Сепак нелогично е што избори бараат од опозицијата, а протестираат пред распуштено собрание. Додека за аболицијата протестираа на Бихачка пред СДСМ! Да бидеме искрени, тие не се на улица за да бараат нешто, туку да покажат дека и другата страна има народ зад себе. Да покажат дека овие првите не се народот, заборавајќи дека на тој начин докажуваат дека и самите не се народот.

И така на улица имаме два народа, две демократии, две Македонии! И едните и другите се таму за „наше добро“ и не бранат од лошиот странец, од „режимот“, го штитат името, се борат за нашите деца, за Македонија... И ќе останат таму за да не спречат нас да излеземе, ние да кажеме што мислиме. Ќе удираат по полиција, ќе бојат згради, силно ќе плачат по социјални мрежи дека се тепани, а немаат ни една модрица. Ќе не плашат со заговори, распарчувања, менување на име. ..Се со цел да бидат во центарот, што поблиску до зграбување на функција, пари и моќ.

Не сте вие „народот“ другари. Вие сте хиени кои се обидуваат да го однесат и она малку што ни остана. Нормално, се во името на демократијата.

Абтор: Пацифист

Зоран Заев има двојник?!

Иако не сум љубител на филмскиот жарн „научна фантастика“, имам изгледано барем 20тина такви филмови. Се сеќавам дека некои од нив беа блокбастери во деведесетите. Рушеа рекорди по гледаност и профит. 21 век во дел од нив беше преставен како утопија, а човештвото живееше во потполна хармонија.  Е ама изгледа негде свртевме на погрешна кривина...

21 век, 2017 година, светот технолошки се издигна на ниво на кое речиси сите сме поврзани, но... 21 век, а ние во „утопична“ Македонија 3 дена се „расправаме“ дали Заев се сретна со Трамп или не. Не, не зборувам тука за вчерашната средба, на официјалниот прием, од која има и фотографија со сопругите на премиерот на Р. Македонија и претседателот на САД. Зборувам за онаа фотка чкрапната од, во тој момент пресреќниот министер за надворешни работи на Макеоднија, Димитров. Министер за надворешни работи, оној кој треба да се бори за нашите интереси и стратегијата на Македонија надвор од неа, оној кој е платен за тоа, тој со телефон во рака чека Трамп да се поздрави со Заев, за да не излаже дека имало средба?! И не само „средба“ туку и порака од Заев до Трамп за подршка, бла бла бла... Барем така пишува на официјалната страна на ФБ на премиерот на Македонија, но и на официјалната страна на Влада на Р.М.!!!

Откако следниот ден беше објавено видеото од салата, на кое се гледа дека поздавувањето траеле 1,2 секунди, и дека во толку кратко време Заев немал шанса да ги изговори тие зборови (ни на струмички дијалект, а камо ли со неговиот раскошен англиски), владата искочи со некакво си соопштение дека средба немало, ама имало .... Абе утопија!

И таман некако го преживеавме ова, се јавија подржувачите на името и делото на Зоран Заев и рекоа дека не бил тој виновен, туку оние кои му го работат Фејсбук профилот! Премиерот не бил ни свесен дека така го изработила на ФБ! А во Влада тие што објавија? Или истите се? Веројатно тие се истите што му рекоа да каже/излаже дека се сретнал со првиот човек на Мосат, на камера на ТВ Телма, пред некој месец. Истите оние кои му кажаа да лаже дека се сретнал со амбасадорот на Италија во Македонија, кога не се појави на суд. Истите кои пред формирање на Влада му рекоа да каже дека за промена на банкноти и униформи на војска и полиција мора да се менува устав, а ете сега владата пробува тоа да го промени со закон. Оние кои му рекоа да лаже дека не постои Албанска платформа/декларација. Мора да се тие некои многу лоши луѓе! МНОООГУ ЛОШИ!!!!

Страшното е што, по коментарите на социјалните мрежи дел од народот поверува во приказнава или барем се правеше дека верува. И тогаш Заев реши да ги разреши сите дилеми. Најпрво од Њујорк, овој пат на видео, порача дека истурањето на боја врз главата на уредник и новинар во Македонија е знак за слобода, за подоцна да му се извини на Геровски за истото и да го осуди  настанот. Во 5 часа, премиерот смени став. Тука веќе позицијата стана неодбранлива! Има две опции:

1. Зоран Заев многу лаже.

2. Зоран Заев има двојник со дијаметрално различни ставови.

Да биде уште потрагично, денеска Заев оствари официјална средба со Трамп. Се што требаше да направи тимот околу Заев и лично тој е само да почека 2 дена за да се пофали. Не дека средбата со Трамп  нешто ќе и смени на Макеоднија и на нас обичните граѓани ќе ни го подобри животот, но ете, ако веќе толку сакале да се пофалат, требало да почекаат. Зарем толку не можеа да издржат, па мораа да лажат? Или двојникот заеба?

На крајот, средба имаше и кога требаше се да се смири, министри од владата излегоа на протсети за чист воздух во Скопје, заедно со организаторите на протестот! А против кого протестираа? Против воздухот? Пошо само така би имал смисла протестот. Искачаш на протести, му се дереш на воздухот и тој види невиди се чисти. Сам, од срам. Друга логика нема! Во светот се протестира надвор од оваа логика. Таму се протестира пред институциите кои се задолжени за решавање на проблемот. Во овој случај пред министерството за животна средина и пред владата. Па надлежните под притисок од протестите, односно јавноста, да го решат проблемот. Кај нас, заменикот министер за животна средина, Јани Макрадули, протестираше со граѓаните! И тој протестира против загадениот воздух со слоганите „нема воздух,нема мир” и „сакаме воздух, не се дише”. Нема мир?!!! На кого тоа Макрадули му се заканува? На себе или на воздухот? Трета опција е дека и тој има двојник. И Петре Шилегов и Дамјан Манчевски, Роберт Поповски,  Стефан Богоев, Саша Богдановиќ, Златко Марин, сите имат двојници.  Па додека оригиналите работат 24 часа за нас, за подобро утре, реформи за „животот“, двојници им се шетаат по улица и праат глупости. Ок, оној на Заев и до Њујорк стигна, ама тој е двојник на премиер. Му се може.

Двојници! Тоа е проблемот на Македонија во моментов. Не знам како не ми текна порано, а толку беше очигледно. Невозможно е некој толку многу да лаже, а на Фејсбук да му стои слоганот: „ЗБОРОТ Е ЗБОР“, ако нема двојник. Е сега, кој од двојниците ја води државава, дали оној кој ќе донесе „живот“ или оној кој потпишува договори со Бугарија и носи против уставен закон за јазици (читај Албански јазик), тоа е ваше да си процените. Едно е сигурно, кога на избори гласате за едниот, ги добивате двајцата.

Автор: Пацифист

Да ги дувнеме ги свеќичките и да замислиме желба

Доколку постојат паралелни универзуми, веројатно во некои од нив, токму сега јас пишувам текст за 26 години самостојна и независна Македонија. Иако, шансите од наша перспектива се мали, можно е во некој од паралелните патеки да сум среќен додека пишувам за нашата држава. Можно е да пишувам за хармонија, просперитет, за општествени вредности, постигнати успеси во минатото и светлата иднина. „Македонија – татковината на мирот, соживотот и просперитетот“ е првиот наслов што и денеска би сакал да го напиша, но....

Паралелните универзуми се теорија на квантната механика, и можно е да ги има од 2 до бесконечно многу. Можеби нема, само овој е, а можеби се милиони и во секој од нив, освен во нашиов, Македонија е земја од бајките, никој не знае. Она што е сигурно е дека во овој, нашиов универзум, во нашата реалност бајките одамна завршија. Сега се само четива кои ни ги раскажуваат пред избори, оние кои Македонија ја претворија во земја за подсмев.

Демократијата е концепт при кој во теорија владее мнозинството со свои преставници кои треба да ја водат државата во правец во кој бара мнозинскиот дел од населението. Во пракса, демократијата е систем во кој 10 политичари прават што сакаат додека го лажат народот дека се многу фини момци и дека без нив ситуацијата би била мноооогу полоша. Ова не важи само за Македонија, но денеска на неа и е роденден, па затоа ќе се фокусирам само на нашите „демократски лидери“.

26 години на власт во Македонија имаме 2 македонски политички партии и неколку албански. Две опции на секои избори, а јас не се сеќавам кога последен пат сум застанал зад параванот со пенкало во рака. Опција е чуден збор. Се употребува и кога избор реално не постои. 26 години се употребува и како фраза „единствена опција“. Ако е единствена, не е опција, не е избор. „Единствен“ и „избор“ се контрадикторни зборови, но на македонските политичари тоа не им пречи, па од 91ва до денес слушаме како Нато и ЕУ ни се единствен избор!

- Добар ден, ме интересира дали имате фармерки?

- Да, секако. Повелете изберете.

- Но, тука има само еден пар?!

- Да, да. Слободно изберете!

Од прилика толку глупо звучи таа фраза, но ја слушаме 26 години. Исто како што 26 години слушаме дека Македонија има многу надворешни непријатели, кои сакаат да ја снема или да функционира на начин кој му одговара на непријателот. Затоа си сменивме име (привремено), знаме, се откажавме од малцинство во соседните држави, прифативме Рамковен договор (иако, во него има и позитивни работи), сменивме територијална организација, помилувавме терористи и воени злосторници, потпишавме дека сме (речиси) Бугари, прифативме и имплементираме Албанска платформа/декларација, носиме неуставен закон за употреба на јазици... итн итн. За се е крив лошиот непријател од надвор. Барем за оние кои биле на власт кога сето тоа е прифатено. Не можело поинаку, затоа што во спротивно независна и самостојна Македонија ќе ја снемало. Затоа ние ги слушаме овие (лошиве) од надвор. За да бидеме независни и самостални!!!

26 години Македонија е најнапатената и најомразената држава. По 500 и кусур години турско ропство, па Балкански војни и поделба на Македонија, 45 години сојузна република во СФРЈ, конечно самостални, но многу не мразат! Тоа би била приказната на нашиве лидери, кои ние некако си ги гласаме. Ок, не јас, ама ете ние. Не е дека политичарите ни се лоши или неспособни, туку ете толку се може. Тек да не беа они... Другите држави не се соочуваат со вакви проблеми, пошо никој не ги мрази. На пример ниту една држава од поранешниот СССР нема проблем со Русија денеска. Русија воопшто не се обидува да го задржи своето влијание во нив. Или Шведска и Финска, не се мразат воопшто, пошо Шведска 3 века ја имало окупирано Финска! Ма неее, сега се во љубов. Србија и Хрватска. ЕУ и САД само во Македонија терааат свои политики и визии. Во секоја друга држава нудат само помош, а за возврат не бараат влијание во водењето на политиката на таа држава. Ма не ова ни во паралелен универзум го нема. СИГУРНО!

Секоја држава на светов, се обидува во рамките на својата моќ да влијае на геополитичкиот систем во светот. Ова е прва лекција, ма не е ни лекција, вовед можда, во меѓународна политика. Што е тука ново? Ако Македонија за 26 години успееше да се изгради како вистинска држава, со општествен, економски, правен... ситем, и со тоа успееше на маѓународен план да додјде до влијание, зерем мислите дека сеуште ќе преговаравме со Грција за името? Ако ние имаме моќ да ја натераме Србија да ја признае афтокефалноста на Македонската православна црква, зарем уште ќе имавме спор? Ако влезевме во ЕУ и Нато пред 20 години, зарем мислите дека ќе го потпишевме договорот со Бугарија? Веројатно во таков случај Грција, Бугарија и Србија ќе кукаа од лошите непријатели од надвор и како тоа светот ги мрази, но тоа е приказна од некој паралелен универзум. Во нашиов, Македонија е напатената. Македонските политичари жртвите, а народот е секогаш крив т.е. во право и кога греши, па на ВМРО ДПМНЕ не му даде 63 пратеници за да не брани од лошите.

Тоа што ниту една институција во Македонија не функционира, тоа што секаде владее корупција и непотизам, што имаме твитерџии за совеници, што со години ни се распаѓа образованието... тоа не е вина на лидерите во Македонија. Немаат време луѓето. На браникот се! Нонстоп!

За роденден се дуваат свеќи и се замислува желба. Не знам како оди тоа со државите, но доколку Македонија има право на една, би сакал да ја посакам место неа. Не, нема да посакам потоп на Грција, пад на САД од лидерската позиција во светот, смена на власта во Македонија, пораз на Путин на следни избори.... Не. Нема да посакам нити економски развој, хармонија и проспиритет во Македонија, затоа што за исполнување на овие желби не се сонува, туку се работи. Посакувам одговорност од сите минати, сегашни и идни политичари!  Сега и тука! Денес! Или барем утре, во скоро. Доста е момци! Баталете. Сериозно! Не ве бива. 

Автор: Пацифист

Еве господине Заев столче за вас. - А не, јас на Пенс у скут ќе му седам

Втори Август 2017 година, Македонија ги одбележува најголемите два празника во својата историја. 114 години од почетокот на Илинденското востание и 73 години од Првото заседание на АСНОМ. Еден датум, а два поводи за славје. Сепак, никој не слави. Мачен е овој празничен ден во Македонија.

Во Крушево никогаш попразно, на Пелинце бетер. Скопје пусто, а во Чаир ниту едно истакнато македонско знаме. Заев во Црна Гора го суша заменикот претседател на САД, Пенс, како го плаши Балканот со лошата Русија, а пропагандата по медиумите и социјалните мрежи го величи премиерот. „Рамо до рамо до Пенс“ е еден од насловите! Па зар у скут да му седне на конференција? „Еве господине Заев столче за вас. А не, јас на Пенс у скут ќе му седам“!!! (Тоа би било добар наслов.... хммм.)

Поминаа 114 години од Илинден и 73 од АСНОМ, а Македонија не била во полоша состојба. Политичката криза која три години ја тресеше државата, дури сега почнува со наплаќање. Цехот допрва ќе го платиме сите. Ок, некои ќе лапнат процент во прв момент, но на крајот и тие ќе платат. Оние кои себе се гледаат како победници со составувањето на новата влада, пополека тргнаа кон целта и личните интереси. Тука не зборувам за Заев и министрите. Ниту за политичарите од било која партија воопшто. Со нив сум одамна на чисто. Едно истражување вели дека 90% од политичарите во светот се психопати, но јас сум сигурен дека тој процент кај нас е над просекот. Токму затоа моето гласачко ливче најмалку 10 години останува неискористено. Она што ме разочарува е народот, или барем дел од народот. Оние најгласните. Победниците.

Шират тези, небулози, лаги... го прават тоа дрско и горди се на себе. Читам денеска дека треба да учиме од Борко Борисов и Талат Џафери кои се поклониле пред гробот на Гоце Делчев и на „Мечкин камен“. Ни одржале лекција со тоа што се поклониле пред нашите херои. Во две реченици се шири опасна лага и се навредува целиот наш идентитет и ниво на свест. Прво, Борисов не се поклонил пред нашиот херој Гоце Делчев, туку пред бугарскиот Гоце Делчев! Според бугарската историја Гоце е Бугарин! Значи, не само што не покажал поштовање кон нас како држава и народ, туку бесрамно ја краде историјата, а вие го фалите! Второ, Талат Џафери нема право да се обрати на „Мечкин камен“ затоа што е нелегитимно избран. Криминално. Ако се тргне ова на страна, спикерот не се поклони пред нашите (Македонците) херои на мечкин камен. Туку пред хероите од Илинден меѓу кој имало и Албанци! Во обид да се покажете како големи луѓе, европејци, либерали, космополити, испаѓате ѓубре, автократи и дискриминатори. Вие им го одземате учеството и заслугите на Албанците во Илинденското востание!

Заев бил премиер со визија и наместо кон историјата гледал кон иднината, при потпишувањето на договорот со Бугарија. Време било да гледаме напред. Борисов вели „ако гледате назад додека одите, ќе паднете“. Ок. Тогаш зошто во договорот се обработува историјата и ќе се формира комисија за утврдување на историски факти кои треба да се вметнат во образовен процес? Ако не гледаме назад кон историјата, од каде потребата да ја менуваме? Или ние (Македонците) не треба да гледаме назад и треба да си ја предадеме историјата (попат и малцинството) за да одиме напред? Тоа ли е визијата?

Гледам добар дел од „Бирото за запослување во Влада“, познато како Твитер заедница, уште се замара со Груевски. Дечки толку ви е капацитетот или за тоа ве платија? Груевски многу одамна не е премиер. Си имаме нов. Визионер е. Пополнети се местатаза советници, ако не ве примиле досега слободно плукајте по нив. Или видете со Бетмен да ви среди некоја комисија у ВМРО ДПМНЕ.

По карактер сум оптимист, но ситуацијава е премногу темна за надежта да опстои. Можеби, само можеби, во зачеток е формирање на трета, неисполитизирана (барем засега), колективна свест. Пензионирани професори, поранешна новинарка и уште неколку паметни луѓе со интегритет и морални вредности, по социјалните мрежи имаат огромен број на следбеници. Можеби конечно во Македонија се раѓа „интелегенцијата“. Рано е да се зборува, но обично се така тивко почнува.

За крај, тотално на друга страна од Европа, но поврзано со Илинден, односно Комитите. ФК Вардар на прагот на историја и плејоф за ЛШ што носи сигурен пласман во групната фаза во ЛЕ. Со 1-0 од Скопје црвоно црните се единствената шанса овој 2ри Август да го паметам по добро. Ајде момци! За вас, за нас, за црвено црна, за Комити, за ИЛИНДЕН!

Автор: Пацифист

Популарно