Богоевски за Апасиев: Гајле му е за името, само за политичкиот профит

Единствена причина зошто толку се пенавеше за работничките права во минатото е бидејќи тоа му беше политички профитабилно. Исто како што сега му се профитабилни името и измислената закана против македонската нација, вели во свјот пост на фејсбук поранешниот пратеник Павле Богоевски. Тој зборува за лидерот на Левица Димитар Апасиев тврдејќи дека сега „левото“ во Левица е заменето со „десно“.

„Левица сега нема никаква допирна точка со идеалот кој го претставуваа младите луѓе што ја оформија во жарот на протестите. Сега, левото е заменето со десно, "работникот" со "народот", активизмот е заменет со хонорарите, а од нивната мултиетничност остана само албанскиот превод на името на партијата во називот на нивната фб страна - како тажен спомен за идеалите кои требаше да ги претставуваат, пишува меѓудругото Богоевски.

Додава и дека според него Апасиев никогаш не бил левичар. 

„Никогаш не му било гајле за работничките права, освен кога тој лично не бил засегнат. Единствена причина зошто толку се пенавеше на овие теми во минатото е бидејќи тоа му беше политички профитабилно. Исто како што сега му се профитабилни името и измислената закана против македонската нација. А верувајте, гајле му е и за името, и за нацијата, а најмалку за работникот. Воопшто немаше да се замарам со него, доколку тој се' уште не се обидуваше да капитализира на сметка на Шарената револуција - на протестите кои не само што не ги поддржуваше вистински, туку и активно се обидуваше да ги подрие, напиша Богоевски.

ЕУ ќе и додели 160 милиони евра на Северна Македонија за спас од економскиот колапс од пандемијата со ковид-19

Европската комисија одлучи на Северна Македонија да и додели 160 милиони евра од пакетот за макрофинансиска помош, МФП, како поддршка на економијата во земјата која е погодена од корона вирусот. Целиот пакетот кој се однесува на 10 земји, е тежок вкупно 3 милијарди евра и е наменет за зајакнување на фискалното управување и транспарентноста, борбата против корупцијата, подобрување на финансискиот сектор и на деловното опкружување и справување со невработеноста кај младите.

„Комисијата договори Меморандуми за разбирање за програми за макрофинансиска помош (МФП) со осум партнери. Договорите се дел од Пакетот за МФП од вкупно 3 милијарди евра за десет земји кои се во процесот на проширување и за земји од соседството, со цел да им се помогне да го ограничат економскиот колапс од пандемијата. Тековната и брза имплементација на овие програми е важен показател на солидарноста на ЕУ во време на криза од претходно невидени размери“, се вели во соопштението испратено од Брисел.

Инаку, Меморандумите за разбирање се веќе договорени со Албанија, Грузија, Јордан, Косово, Молдавија, Црна Гора, Северна Македонија и Украина, а документите се официјално потпишани со четири од нив: Косово, Молдавија, Северна Македонија и Украина. Во тек се преговорите со Босна и Херцеговина и Тунис.

Валдис Домбровскис, извршен потпретседател за економија која базира на социјална праведност и просперитет, изјави: „Како дел од глобалниот одговор на ЕУ на пандемијата со корона вирусот, се трудиме да им помогнеме на нашите соседни земји да го ублажат најлошиот економски удар. Овие „кризни програми за МФП“ ќе бидат дефинирани со конкретни реформски обврски. На тој начин ќе им се помогне на соседните земји да ги покријат потребите од надворешно финансирање во периодот 2020-21 година, во справувањето со економскиот удар од пандемијата.“

Според Паоло Гентилони, Комесар за економија, пандемијата со ковид-19 има невидени економски и социјални удари врз земјите од целиот свет. „Оние кои се во процес на проширување, како и земјите од соседството се сериозно погодени, а ние како Унија имаме финансиска сила да им помогнеме да го ограничат економскиот колапс“, рече тој.

Според договорите, Албанија ќе добие 180 милиони евра за зајакнување на јавните финансии и отпорност на финансискиот сектор, подобрување на владеењето и борбата против корупцијата и унапредување на социјалната заштита, Грузија 150 милиони евра, Јордан 700 милиони евра, Косово 100 милиони евра, Молдавија 100 милиони евра, Црна Гора 60 милиони евра и Украина 1,2 милијарди евра.

Меморандумите се чекор кон првото доделување на средства во рамки на програмите, што е условено со политички предуслови, почитување на демократските принципи, човековите права и владеењето на правото. Земјите-кориснички би требало да се корисници и на програмата за финансиска помош од ММФ.

МФП е дел од поширокиот ангажман на ЕУ со земјите од соседството и оние кои се во процес на проширување и е наменета како инструмент за реакција во случај на кризи. Одлуката за доделување на оваа помош на десет земји, во контекст на ковид-19 пандемијата беше предложена од Комисијата на 22 април и усвоена од Европскиот парламент и Советот на 25 мај годинава.

СДСМ ЈАВУВА: Мандатар за состав на новата влада ќе биде Зоран Заев

И утрово соопштение од СДСМ, во кое за разлика од претходните нивни дописи до јавноста, сега тврдат дека нивниот лидер Зоран Заев ќе биде мандатар за состав на новата влада.

Дали значи дека има напредок во преговорите.

„Претседателот на Социјалдемократскиот сојуз на Македонија, Зоран Заев ќе биде мандаторот за состав на новата Влада која ќе ја води државата напред во следните четири години.

Во тек се сериозни разговори за формирање стабилно парламентарно мнозинство и владина коалиција со полн, четиригодишен, стабилен мандат.

Затоа што, успешните политики на СДСМ и Владата која ја предводи се потврдија и на последните парламентарни избори“, пишуваат од СДСМ. .

Граѓаните го одбраа концептот кој ја води државата напред, концептот кој ги враќа парите назад кај граѓаните и со своето избирачко право потврдија дека сакаат да продолжат по тој пат. Кон градење на нова развојна економија, која креира нови работни места и создава шанса за секој.

„Покажавме дека и во време на најголемата светска криза се грижиме за сите граѓани. Преку антикризни мерки со цел зачувување на работните места и оддржување на бизнисите во живот, наместо ставање клуч на врата.

Љупчо Николовски: Јас и Заев се откажуваме од патните трошоци

Генералниот секретар на СДСМ, Љупчо Николовски, на својот профил на Фејсбук објави дека тој и претседателот на владеачката партија Зоран Заев вчера потпишале нотарски изјави со кои и двајцата се откажуваат од исплатата на патните трошоци.

Тој ги повика и останатите пратеници да го следат нивниот пример и да го направат истото.

„Укинувањето на патните трошоци за пратениците е изборно ветување на СДСМ и наша програмска определба. За да дадеме пример, да бидеме оние од кои оваа иницијатива тргнува во пракса, вчера заедно со претседателот на СДСМ, Зоран Заев, ги потпишавме изјавите со кои јас и тој, официјално се откажуваме од средствата кои ни следуваат на имe на патни трошоци.

Ги охрабрувам колегите од сите партии да го следат овој чекор. Да дадеме мал придонес во насочување на што повеќе пари кај граѓаните, кај оние на кои им се најпотребни“, напиша Николовски.

Сепак, јавноста очекува, доколку СДСМ повторно состави нова Влада, Николовски и Заев да не бидат пратеници во Собранието на РСМ.

Популарно