Загина 25-годишен ловџија погоден со куршум од лице со кое бил на лов

Дваесет и петгодишен прилепчанец денеска им подлегнал на повредите откако бил погоден со куршум од ловечка пушка во атарот на селото Витолиште, Мариово.

Според Сања Стаматова, портпарол на СВР Битола, прилепчанецот со иницијали Ѓ.Х. бил погоден со куршум од лице од група која била на лов.

– Денеска во 11 часот и 6 минути во прилепската полициска станица било пријавено дека во атарот на селото Витолиште, 25-годишниот прилепчанец бил погоден од куршум од ловечка пушка од едно лице од група која била на лов. Во 14,55 часот од екипа на итната медицинска помош било констатирано дека Ѓ.Х. им подлегнал на повредите, соопшти Стаматова.

Увид направиле полицијата и јавен обвинител при основното јавно обвинителство од Прилеп. Наредена е обдукција.

Од СВР Битола соопштуваат дека се преземаат мерки за целосно расчистување на случајот. 

Велосипедист тешко повреден во сообраќајка во Скопје

На 02.03.2021 во 19.25 часот во СВР Скопје било пријавено дека на ул.„Алија Авдовиќ“ во Скопје се случила сообраќајна незгода во која учествувале патничко моторно возило „пежо 308“ со скопски регистарски ознаки, управувано од Л.Р.(26) од Скопје и велосипед, управуван од Ш.А.(73) од Скопје, информира МВР.

Во незгодата, велосипедистот се здобил со тешки телесни повреди, констатирани во Комплексот клиники „Мајка Тереза“.

Извршен бил увид на местото на настанот од увидна екипа од СВР Скопје.

Ја изгуби битката со коронавирусот, почина легендарниот кошаркар Миленко Савовиќ

Поранешниот кошаркар Миленко Савовиќ почина на 61 година. Савовиќ беше примен во болницата пред околу еден месец по проблеми предизвикани од коронавирусот, а понатамошните компликации доведоа до негова смрт. Миленко Савовиќ е роден 1960 година во Требиње, а почина во неговиот роден град.

Кариерата ја започна во Партизан во 1977 година. Iграше за „црно-белите“ 12 сезони и беше капитен и миленик на навивачите.

По Партизан, Миленко играше за Гранада и Војводина, каде ја и заврши кариерата. Со Партизан беше шампион на Југославија три пати, освои три купа „Радивоје Корач“ и два трофеи во Купот на СФРЈ.

Инаку, Миленко беше и вицешампион на Европа со репрезентацијата на Југославија.

Девојче загина во тешка сообраќајна несреќа на Пониква

Едно лице загина, а две се потешко повредени во тешка сообраќајна несреќа што околу три часа по полноќ се случи во месноста Аеродром на Пониква.

Патничко моторно возило „фолксваген туарег“ со бугарски регистерски таблички, кое се движело во правец на Кочани, наместо да сврти десно кон градот, продолжило право и излетало во бездната висока неколку десетици метри.

– Изутринава околу 3:15 часот добивме повик за интервенција за спасување повредени лица од сообраќајната несреќа кај Аеродромот, при што од превртеното возило извлековме безживотно тело на девојче кое настрадало на лице место. Другите две лица, момче и девојче кои се здобиле со потешки повреди беа префрлени со возило на итна помош во кочанската болница. Поради специфичноста на стрмниот терен и можноста возилото дополнително да излизга, бевме принудени да го осигураме со јажиња, исткна Благој Паунов, командир на Територијалната противпожарна единица од Кочани.

Трите лица кои се наѓале во превртеното возило се од кочанскиот регион и се на приближно иста возраст.

Увид на местото на настанот извршија јавен обинител и екипа од Полициската станица од Кочани.

Популарно