Грешки на родителите што водат кон тврдоглаво дете

Ниту еден родител не е совршен и одвреме-навреме греши во воспитувањето, но некои грешки може сериозно лошо да влијаат на однесувањето на детето – особено во позрелата возраст. Социјалната работничка од САД, Тензин Чодон открива какви грешки прават родителите и несвесно, несакајќи, одгледуваат тврдоглави деца.

– (Децата) треба да знаат дека ги слушате, дека нивното мислење вреди и не ги игнорирате кога разговараат со Вас. За разлика од други деца, на некои бесот им е најлесниот начин да го добијат она што го сакаат… А, токму улогата на родителите е пресудна во одредувањето дали нивното дете ќе порасне во тврдоглава личност, објаснува Чодон.

Следат шесте најчести грешки на родителите, коишто резултираат со тврдоглави деца.

Родителот не поставува јасни правила

Во воспитувањето треба да постојат одредени правила и граници кои детето мора да ги почитува.

– Во ред е детето да ја изразува сопствената желба и волја, но не секогаш. Родителите не смеат да им попуштат на децата кога се во прашање некои правила. Дури и ако тоа понекогаш значи ограничување на нивната слобода, децата треба да знаат што е правилно, а што погрешно однесување, вели Чодон.

Недоволна комуникација со детето

Меѓу најважните работи за успешно воспитување е комуникацијата. Ако ја нема, стручњаците предупредуваат дека детето може да порасне во тврдоглава личност. Зошто? Комуникацијата е клучот за воспоставување квалитетен однос родител – дете. Ако родителите немаат доволно време или не сакаат да го слушнат своето дете, голема е веројатноста дека и тоа нема да сака да слуша подоцна, според Чодон.

Запоставување на потребите на детето

Можеби најголемата грешка на родителот, е игнорирањето на потребите на своето дете, без разлика дали е тоа разговор, слушање, разбирање или, просто – внимание. Имено, доколку детето забележи дека неговото мислење не се цени или дека не му се обрнува внимание, ќе се потруди да привлече внимание со своето тврдоглаво однесување. Она што е проблем е фактот што детето ќе се обиде да привлече внимание со лошо однесување.

Преголема критичност на родителот кон детето

– Родителите се обидуваат детето „да го изведат на вистинскиот пат“, но понекогаш одат и предалеку. Прекумерната критика и очекувањето совршени резултати од детето може да резултира со тврдоглаво однесување бидејќи ниедно дете не сака притисок. На крајот на краиштата, сите ние понекогаш грешиме и тоа е нормален дел од животот, појаснува социологот.

Недоследност во своите одлуки

– Доколку Вашето дете случајно забележи дека како родители не сте доследни, неговото однесување може да се промени, како и неговото почитување кон Вашите правила и граници. Имено, секое отстапување од одлуките или зборовите, кај Вашето дете може да резултира со тврдоглава реакција и однос… Без разлика дали се работи за казна, ограничување или награда, предупредува Чодон.

Викање и казни

Нормално е детето одвреме – навреме да противречи, но важно е и тоа – како возрасниот ќе реагира притоа. Наместо да вика и казнува, родителот мора да се обиде мирно да му објасни на детето што згрешило. Имено, начинот на којшто реагира има значително влијание врз однесувањето на малечкото кое секогаш го гледа, слуша и проучува својот повозрасен пример, кого го следи во животот.

Утре е строг пост, се празнува Крстовден

Утре се празнува Крстовден (Воздвижение на Чесниот Крст).

На овој ден се празнуваат два настани поврзани со Чесниот Крст: прво, пронаоѓањето на Чесниот Крст на Голгота, и второ, враќањето на Чесниот Крст од Персија во Ерусалим. Обиколувајќи ја Светата Земја Св. царица Елена намисли да го побара Чесниот Крст на Христос. Некој старец Евреин, по име Јуда, единствен знаеше за местото каде што се наоѓаше Крстот, па принуден од царицата изјави дека Крстот е закопан под храмот на Венера, којшто на Голгота го подигна царот Адријан. Царицата нареди и го разурнаа оној идолски храм, па копајќи во длабочина најдоа три крста. Додека царицата беше во недоумение како да го распознае Христовиот Крст, покрај местото поминуваше поворка со мртовец. Тогаш патријархот Макариј рече да ги полагаат крстовите редум врз мртовецот. А кога го ставија врз него третиот крст, покојникот оживе. По тоа познаа дека е тоа вистинскиот Христов крст, чесен и животворен. Потоа го положија врз една болна жена и жената оздраве. Тогаш патријархот го крена крстот за да го види сиот народ, а народот со солзи пееше: „Господи помилуј!“ Царицата Елена направи ковчег од сребро и го положи во него Чесниот Крст. Подоцна, кога царот Хозрој го зазеде Ерусалим, многумина ги одведе во ропство, а Крстот Господов го однесе во Персија. Во Персија Крстот лежеше четиринаесет години. Во 628 година грчкиот цар Ираклиј го победи Хозрој и со слава го поврати Крстот во Ерусалим. Влегувајќи во градот царот Ираклиј го носеше Крстот на своите плеќи. Но одеднаш застана и не можеше да зачекори ни чекор. Патријархот Захариј виде ангел којшто му попречуваше на царот во раскошни облеки да оди под Крстот, по оној пат по којшто Господ одеше бос и понижен. Тоа видение патријархот му го објави на царот. Тогаш царот се слече, па босоног и во бедна облека го зеде Крстот, го изнесе на Голгота и го положи во храмот на Воскресението, на радост и за утеха на целиот христијански свет.

Тропар- Спаси ги, Господи, луѓето Твои, и благослови го наследството Твое, победи на благоверниот народ наш над непријателите давајќи му, и со Крстот Твој заштити го Твоето жителство.

Кондак- Ти, Кој доброволно на Крстот се искачи, на Твојот нов народ што го носи Твоето име, дарувај му ги Твоите добрини; дај му сила на Твојот народ набожен, давајќи му победа над непријателите, имајќи го за помош Твоето оружје на мирот, непобедливата победа.

Во народните верувања, на денот кој се нарекува Крстовден, се смета дека сите молитви ќе се остварат.

Според народните верувања од Крстовден почнува есента. Се вели дека денот и ноќта се крстосуваат, а температурата почнува да се намалува.

Од Крстовден почнува гроздоберот, а првото откинато грозје мора да се однесе во црквата, за да се освети. Почнува и сеидбата на зимските житни култури.

На Крстовден највозрасните жени во домот е потребно да испечат специјален обреден леб, украсен со голем крст на средината. Лебот се раздава, кога целото семејство е на масата и се вели Крстец крст да боли мене, крст да не боли. Се смета дека со овие зборови луѓето се штитат од болки во грбот за време на работа.

На Крстовден се почитува и строг пост – не треба да се јаде ништо црвено како пиперки, домати, ’родокви, црвени јаболка и друго. На трпезата освен обреден леб задолжително треба да присуствува печена тиква и грозје. Во народните верувања се вели дека сите молитви ќе бидат слушнати на овој ден.

Се проценува дека во ноќта спроти Крстовден, Господ слегува на земјата и ја исполнува секоја посакана желба.

Усните како аларм: Знаци за овие четири болести кои можеме да ги откриеме на усните

„Нашите усни можат да ни испраќаат сигнали за здравјето на телото“, предупредил стоматологот Бернард Хенеси.

Како што открил за британски „The Sun“, знаците на дури 4 болести се откриваат токму на усните. Тој вели дека нашите усни минуваат низ различни промени во текот на животот, а понекогаш можат да укажуваат на одредени болести“.

„Некои од овие промени може да укажуваат на медицински проблем, па затоа не треба да ги игнорираме доколку ги забележиме“, тврдел Хенеси.

ХИВ

Во случај да се појави необјаснив чир во или од внатрешната страна на нашите усни кој не исчезнува, може да биде знак за ХИВ. ХИВ (вирусот на човечка имунодефициенција) го напаѓа имунолошкиот систем на телото и, во ретки случаи, може да доведе до СИДА. Не постои лек за ХИВ, но постојат лекови кои им овозможуваат на лицата со овој вирус да живеат долг и здрав живот, под услов да се открие навремено.

Пневмонија

Секој добива испукани усни од време на време и тоа обично не треба да биде причина за грижа. Но, во некои случаи, особено кај децата, лупењето на усните може да биде знак за пневмонија. Според „NHS“, состојбата обично започнува со треска, кашлица, проблеми со дишењето и слаб апетит.

Рак

Рана на усните која не зараснува може да биде знак за карцином, објаснил стоматологот. Стапките на орален карцином, вклучително и ракот на усните, се двојно поголеми во последните 20 години – покажуваат податоците на „Фондацијата за орално здравје“.

Во 2021 година биле дијагностицирани околу 8.864 случаи, што е зголемување за 34% во однос на пред 10 години.

Ракот на усните се јавува на кожата на усните, но најчест е на долната усна. Според клиниката „Мајо“, повеќето карциноми на усните се сквамозни карциноми, прилично лесни за лекување. Ракот на усните може да биде предизвикан од прекумерно изложување на сонце и пушење.

Синдром на иритирани црева

Испуканите усни, особено во аглите на усните, може да се поврзат со синдром на нервозно дебело црево. Кожна состојба позната како ангуларен хеилитис предизвикува суви, црвени дамки на аглите на устата кои можат да пукнат. Неколку студии покажале дека 60% од луѓето со „IBS“ може да страдаат од орални здравствени проблеми, од кои еден е ангуларен хеилитис.

Пиете вода во текот на оброците? - Тоа не е добра идеја

Распространета е навиката меѓу луѓето да пијат вода за време на оброците, меѓутоа, експертите истакнуваат дека таа може да биде бескорисна, па дури и штетна за дигестивниот процес.

Водата има многу придобивки за нашето здравје – го поддржува варењето, ја одржува кожата хидрирана, помага при слабеење и обезбедува енергија. Се препорачува да се консумираат најмалку два литра вода дневно за да се одржи оптимално хидрирано телото. Сепак, важно е да се одвои внесот на вода од оброците.

Експертите предупредуваат дека комбинирањето на вода со храна за време на оброкот може да ги разреди дигестивните ензими кои се клучни за варење на храната. Ова може да резултира со дигестивни проблеми, вклучително и запек. Покрај тоа, пиењето вода за време на оброците може да предизвика зголемување на нивото на инсулин, што го зголемува ризикот од складирање на маснотии во телото и може да доведе до дебелеење.

Експертите препорачуваат да не се консумира вода половина час пред оброк и најмалку час по оброкот за да се избегнат потенцијални дигестивни проблеми. Доколку се чувствувате непријатно додека јадете и сакате да испиете голтка вода, подобро е тоа да го правите постепено, во мали количини, наместо да пиете големи количини вода за време на оброкот. Овој пристап може да помогне во одржување на ефикасно варење и одржување на добро здравје

Популарно