Брегот на Измир сведочи за несреќата во која загинаа 11 луѓе, од кои осум деца

Детски чевли и облека, фотографии, пасоши и прслуци за спасување беа исфрлени од морето на брегот на турскиот град Измир, откако потона чамец со мигранти, при што загинаа 11 луѓе, од кои осум деца.

Чамецот со 19 луѓе, кои сакале да стигнат до грчкиот остров Хиос, се преврте во водите на Егејското Море.

Жителите на измирската населба Јали слушнале повици за помош од правецот на морето, по што ја известиле полицијата.

Таа утврди дека се превртел чамец со мигранти, при што од морето се спасени осум луѓе и се пронајдени 11 тела. Дополнително било утврдено дека станува збор за мигранти од Сирија и дека чамецот се превртел зашто на него имало премногу луѓе.

(Фото) Портет за Блаже Конески во грчкото списание за литература „КАРТА“

Новинарот и писател, Томислав Османли, преку неговиот фејсбук-профил ја пренесе информацијата дека грчкото месечно електронско списание за литература „Карта“ ("Χάρτης", Νο.18, Ιούνιος 2020) објави извонреден портрет на Блаже Конески насловен „Житија на Блаже Конески“ ( Συναξάρια του Μπλάζε Κόνεσκι ), проследен со преводи на седум песни од поетската ризница на нашиот најистакнат книжевник и лингвист, именувајќи го „корифеј на духовниот живот на соседна Северна Македонија“. Уредништвото изразува жалење што преводите се посредувани, направени преку англиски преводи на поезијата на Конески, додавајќи: 

- „Бидејќи не знаеме македонски, а со цел песните на Конески да стигнат до грчкиот читател, овој избор беше направен и покрај неговите очигледни ограничувања“. 

Пријателски интонираниот текст - илустриран со сјајниот портрет на академик Конески, дело на академик Димитар Кондовски - завршува со изразување надеж „дека наскоро ќе има преведувачи кои ќе се заложат да ја препорачаат работата на Конески во нашата земја директно од оригиналот“. Османли посочува дека независно од напишаното преводите се многу добри. – „За поздравување се, особено, благородноите намери што стојат зад оваа бележита објава на нашите грчки колеги по чисто книжевно перо и по искрена καλοκαγαθία (добронамерност).“

Постои можност Грција да не ја отвори границата за Македонија на 15 јуни

Не се исклучува можноста границата меѓу Грција и Македонија да не биде отворена на 15 јуни, изјави грчкиот државен министер, Јоргос Герапетрис во интервју за радио „Солун“. Тој посочи дека имале навистина отежнувачки индикатори за тоа, поради зголемениот број случаи на коронавирус кај нас.  

- „Би сакал да потсетам дека додека разговараме не е дозволено поврзување со Македонија до 15 јуни, како што не е дозволено ни со Албанија. Ќе биде направена проценка на состојбата, но 90 проценти од одлуката зависи и што ќе одлучи секоја земја за своите граници. Ние ги следиме епидемиолошките податоци. Очигледно ако состојбата продолжи да се влошува ќе бидат продолжени и рестрикциите за пограничниот сообраќај.“ – посочи Герапетрис.

(Фото) Во Шпанија пациентите со ковид-19 ги носат на плажа како дел од процесот на закрепнување

Пациенти кои се заразени со новиот коронавирус во Шпанија се носат покрај море на плажите во Барселона како дел од процесот на закрепнување.

Медицински тимови од болницата „Дел Мар“ во Барселона се фотографирани додека ги носеле заболените на плажа, објави „Би-би-си“.

Шпанија беше една од најпогодените европски земји од пандемијата, но во последните неколку недели ситуацијата се става под контрола. За да го спречат ширењето на коронавирусот, шпанската влада воведе рестриктивни мерки, па луѓето не можеа да излезат да вежбаат на отворено, а децата со недели имаа забрана за напуштање на домовите.

Сега, рестриктивните мерки постепено се олабавуваат, а во средата премиерот Педро Санчез побара од парламентот продолжување на вонредната состојба до 21 јуни.

Денеска од шпанската влада соопштија дека во рамки на процесот на попуштање на мерките на 1 јули е планирано да се отворат границите за странски туристи. Од 22 јуни, пак, Шпанија ќе ги отвори копнените граници само со соседните Португалија и Франција.

Популарно