Дваесет и три плажи на бугарското крајбрежје на Црното Море ќе понудат бесплатни чадори и лежалки - објави министерката за туризам Николина Ангелкова во Сончевиот брег.

Според предвидувањата на почетокот на годината, очекуваниот раст на туризмот беше 10 отсто, но неочекуваната и непредвидлива криза предизвикана од коронавирусот промени сè во еден момент.

По разговорите меѓу премиерот Бојко Борисов и неговите колеги од Грција, Србија и Романија за отворање на заеднички граници за туризам на 1 јуни, Бугарија ќе смета на туристи од соседните земји чии граѓани претежно патуваат со патнички возила. Во однос на другите пазари, министерот за туризам го истакна субвенционирањето на чартер-летовите како многу важна мерка за поддршка на овој сектор. 

Николина Ангелкова изрази надеж дека ова ќе доведе до раст на одредени пазари, особено што се однесува до организираниот туризам. Сепак, на прво место, државата ги става домашните туристи кои ќе бидат привлечени од пониските цени на услугите на плажоте. Бугарите се по предвидливи потенцијални корисници на морски одмор кај нас, имајќи ја предвид ситуацијата во која се наоѓаат Европа и светот.

„Ние правиме се што е можно за да привлечеме туристи и да го олесниме бизнисот во секторот кој е меѓу најпогодените од светската криза предизвикана од коронавирусот“, рече министерката Ангелкова.

"Од особена важност е да понудиме квалитетен производ и да се заштити здравјето на луѓето. Една од основните мерки што ги презедовме е да ги намалиме цените на чадорите и лежалките. Според законот, тие мора да бидат барем 50 проценти пониски од минатата година."

Чадорите и лежалките ќе бидат бесплатни на 23 од 132 плажи, додека на останатите нивната цена ќе биде од 1 до 5 лева. Во летното одморалиште Златни Песоци, туристите ќе плаќаат 2 лева за чадор и лежалка, во Албена - по 1 лев, во Балчик - по 1,50 лева, додека нивната цена во Созопол ќе биде од 3 до 5 лева.

Секој што управува со плажите е должен да понуди намалување на цените на чадори и лежалки за најмалку 50 проценти, а за неисполнување на ова барање е предвидена казна од 50 илјади лева. Казната за повторена повреда е 100 илјади лева. До 30 мај годинава, министерот за туризам мора да ги извести концесионерите и закупниците на плажите за намалувањето на концесиската такса и закупнината врз основа на реципроцитет. Во овој поглед, владата ќе донесе посебна методологија.

Силно невреме погоди повеќе региони во Грција, донесе грмежи, молњи и обилни врнежи од дожд. Невремето однесе најмалку еден живот.

Обилните дождови, претежно проследени со град и силен ветер, зафатија најголем дел од Грција и, според метеоролозите, ќе траат до петок.

Една жена загинала  од гром на островот Скопелос, пренесува „Грик Репортер“. Невремето ја погоди и Атина, каде имало силни врнежи и грмежи.

Драматично е и на Халкидики, каде паднал град. На регионалниот пат Полигирос-Солун патничките возила и камионите стојат неколку часови поради големата количина мраз на патот, пренесува „Блиц“.

Во некои области, поради напаѓаниот град пејзажот изгледа како да наврнало снег, има поплавени патишта и полиња. Екстремните временски услови се одразија и на југот на Каламарија и Олимпија.

Откако хрватскиот министер за туризам го претстави планот за отворање на летната туристичка сезона, во кој се предвидува дека до крајот на мај патувањето ќе биде олеснето за Словенија, Австрија, Унгарија, Чешка и Словачка, а во текот на јуни за Германија, Полска и други земји, хрватскиот туристички сектор, преку Хрватското здружение за туризам, презентираше план за отворање на туристичките капацитети и препораки за туристички патувања во Хрватска.

Планот за отворање на туристички објекти предвидува отворање на камповите во Истра, Кварнер и Далмација, како и некои хотели до крајот на мај, а целосното отворање на повеќето хотели и сите други туристички услуги на дестинациите се очекува во текот на јуни.

Хрватските граници се отворени за туристи. По влегувањето, туристите мора да имаат потврда за резервација за сместување, а на границата ќе добијат упатства за безбеден престој во земјата.

Исто така, се изработува и туристичка апликација, со која гостите ќе можат однапред да го најават своето пристигнување и којашто ќе им овозможи побрзо да ја преминат границата. Апликацијата ќе овозможи воведување и на брз режим на влез на туристите во Хрватска до крајот на месецот.