Францускиот амбасадор Тимоние: Препораката за членство во ЕУ виси, поради начинот на кој е донесен Законот за јазиците

Препораката за членство во ЕУ виси, поради начинот на кој е донесен Законот за јазиците, изјави  Францускиот амбасадор Кристијан Тимоние.

Според него, може да се проблематизира безусловната препорака за почеток на преговорите за членство во ЕУ поради начинот на кој вчера беше донесен Законот за употреба на јазиците во Собранието.

– Вчера беше разочарувачки ден бидејќи видовме настани за кои мислевме дека веќе сме им го свртиле грбот, дека немало минимум консензус за процедура за усвојување закон и нема цивилизациска дискусија за теми од интерес на граѓаните. Не е мое да судам, но глетката што ја видовме беше сѐ само не глетка од еден парламент на европска држава – изјави Тимоние.

Нема починати лица а регистрирани се 108 нови случаи на Ковид-19 во земјава

Согласно податоците од Институтот за јавно здравје, Министерството за здравство информира дека во последните 24 часа:

Направени се 1411 тестови, а регистрирани се 108 нови случаи на КОВИД-19: Скопје – 70, Битола- 13, Штип – 7, Кавадарци – 3, Прилеп, Велес,Гостивар, Кичево и Неготино – по 2, Тетово, Охрид, Гевгелија, Свети Николе и Дебар – по 1.

Од вкупниот број на позитивни (108), регистрирани се 8 реинфекции.

Регистрирани сe 77 оздравени пациенти од: Скопје – 56, Битола – 7,Прилеп – 4, Гостивар, Берово и Кичево – по 2, Кавадарци,Гевгелија, Кочани и Ресен – по 1.

Во текот на изминатите 24 часа не се пријавени починати лица. Согласно Регистарот на умрени лица со дијагноза КОВИД-19 од Мој Термин дополнително не се регистрирани починати лица.

Направени се 1411 тестови преку: ИЈЗ-190, ЦЈЗ Скопје-32, ЦЈЗ Битола-52, ЦЈЗ Прилеп-18, ЦЈЗ Тетово-15, ЦЈЗ Куманово-32, Клиника за инфективни болести и фебрилни состојби-0, Судска медицина-0, лабораторија болница Козле-17, УК Пулмологија со алергологија–5, ГОБ 8-ми Септември-0, Институт за микробиологија–59, Жан Митрев (Филип Втори)-24, Авицена-33, Биотек-42, Систина-37, лабораторија Лаор-16, Синлаб-17, Ремедика - 16, Плодност-10, Генеа-25, Никоб Лаб-66, ВФВ Медикал-27, Ели МедикаПлус-6, Ројал Медика–3, Спектра-ММ-7, Рапид Лаб–12 Жан Митрев Струмица–4, Нова Лаб Дијагностика–3 Рамус-4, ЈЗУ и ПЗУ (рапид тест)– вкупно 639.

Досега во земјата се направени вкупно 2.049.946 тестирања на КОВИД-19. Вкупната бројка на КОВИД-дијагностицирани лица во нашата земја од почетокот на епидемијата изнесува 311.592, бројот на оздравени пациенти е 301.728, на починати е 9.300, а бројот на активни случаи изнесува 564.

Без струја и вода неколку скопски општини

Без струја денеска ќе бидат корисниците од општините Сопиште, Центар, Аеродром, Карпош, Чучер Сандево и Ѓорче Петров, а без вода дел од корисниците во општините Центар, Кисела Вода и Сарај.

Како што соопшти Регионалниот центар за управување со кризи на Скопје, по добиеното известување од ЕВН, заради технички зафати во дистрибутивната електро мрежа, без електрична енергија од 8:30 до 12 часот ќе останат дел од корисниците лоцирани на патот од село Сопиште кон село Горно Соње во Општина Сопиште.

Од 9 до 12 часот, без струја ќе бидат дел од корисниците од дел од булевар „ВМРО“ (спроти Пошта) во Општина Центар, од 9 до 15 часот, корисниците од улица „Илија Димовски – Гоче“ во Општина Аеродром, од 9 до 15 часот, корисниците од улиците: 1513, 1515 и крак 2 од улица „Саса“ во населба Пинтија во Општина Карпош, од 9 до 15 часот, корисниците од викендиците во село Побожје во Општина Чучер Сандево и од 9 до 15 часот, корисниците од дел од село Бардовци, (место викано Рупа) во Општина Ѓорче Петров).

Регионалниот центар за управување со кризи на Скопје, по добиеното известување од ЈП Водовод и канализација, соопшти дека поради отстранување дефект на водоводна мрежа со пречник од ф -80 мм на улица „Јордан Хаџиконстантинов Џинот“ бр. 21, од 8:30 часот до завршување на интервенцијата, без вода ќе бидат корисниците од истата улица, како и дел од булевар „Илинден“ и дел од улица „Аминта Трети“ (потегот околу градски парк) во Општина Центар.

Поради отстранување дефект на водоводна мрежа со пречник од ф -100 мм на улица „Димо Хаџидимов“ бр. 64, од 9 часот до завршување на интервенцијата, без вода ќе останат корисниците од дел од истата улица, како и дел од улиците „Божидар Аџија и „Михаил и Ефтихиј“ во Општина Кисела Вода.

Поради замена на затворачи во резервоарот за питка вода во село Копаница, од 7 часот до завршување со работните активности, без вода ќе останат корисниците од селата Копаница и Буковиќ во Општина Сарај.

Се преврте брод кај Тунис, 76 лица исчезнаа

Најмалку 76 лица се водат како исчезнати, откако се преврте брод во близина на брегот на Тунис, соопшти денеска Меѓународната организација за миграција.

Се додава дека 24 лица се спасени од бродот, што испловил од брегот на плажите на Завара во Либија и потонал крај брегот на Сфакс во Тунис, јавија британски медиуми.

Изминатите месеци, десетици луѓе се удавија во близина на брегот на Тунис, бидејќи се зголемува бројот на мигранти, кои се обидуваат да дојдат од Тунис и Либија, во Италија.

Популарно