Тарантино: Повеќе нема вистински филмски ѕвезди во Холивуд

Квентин Тарантино тврди дека во Холивуд „нема повеќе вистински филмски ѕвезди“.

Додека ја промовира својата нова книга „Киношпекулации“ во поткастот на комичарот Том Сегура, режисерот добитник на „Оскар“ се насочи кон филмскиот универзум на „Марвел“ сугерирајќи дека ликовите на суперхероите станале попознати од актерите што ги играат.

„Дел од чудото на Холивуд, ги имате сите овие актери што се прославија играјќи ги овие ликови (суперхерои). Но, тие не се филмски ѕвезди. Нели?“, рече Тарантино и продолжи:

„Капетан Америка е ѕвезда. Или Тор е ѕвезда. Мислам, не сум првиот што го кажува тоа. Мислам дека е кажано милион пати, знаете, но како што знаете, овие ликови од франшизата стануваат ѕвезди“, рече режисерот.

Тарантино во неколку наврати во последните години зборуваше против филмовите на „Марвел“. Минатиот месец тој објасни зошто никогаш нема да режира филмови на „Марвел“.

„Треба да си платеник за да ги правиш тие работи. Јас не сум платеник. Не барам работа“, изјави тогаш за „Лос Анџелес тајмс“.

Режисерот еднаш изјавил дека модерната филмска ера е „најлошата во историјата на Холивуд“ и дека размислува да се пензионира, пренесува NME.

Падна во вода свадбата на Безос од 600 милиони долари!

Основачот на Амазон, Џеф Безос ги демантираше гласините дека ќе се ожени со Лорен Санчез на раскошна церемонија по Божиќ.

Во странските медиуми се прошири веста дека Безос наскоро се жени во Аспен и дека за венчавката ќе потроши околу 600 милиони долари (околу 576 милиони евра). Тој зборуваше за тоа.

На Икс, тој одговори на твитот во кој сподели напис за неговата наводна венчавка објавена од Њујорк Пост, кој цитираше извор на Дејли Мејл.

„Целата работа е целосно лажна – ништо од ова не се случува. Старата поговорка „не верувај се што читаш“ сега е повистинита од кога и да е. Лагите можат да го обиколат целиот свет пред да се дознае вистината. Затоа, бидете внимателни и не бидете лековерни“, напиша тој.

Уште две лица се под истрага за смртта на Лијам Пејн

На двајца вработени во хотелот „Касасур“ во Буенос Аирес, Аргентина, каде што, пред смртта, престојувал Лијам Пејн, им било кажано дека официјално се под истрага. Со тоа истрагата за неговата смрт се прошири на пет лица, пренесува аргентинскиот портал „Инфобае“ (Infobae).

Судијката Лора Брунијард донесе одлука истрагата за смртта на британскиот поп-рок пејач кој падна од третиот кат во хотелот да ја прошири со две лица, порачувајќи им да ангажираат адвокати и дека ќе треба да дадат изјави. Меѓу новоосомничените е рецепционерот Естебан Рејналдо Граси, кој се јавил на 911 кога се случила несреќата, а бил еден од тројцата мажи кои го носеле Лијам низ ходникот непосредно пред трагедијата.

Однесувањето на вработените и нивната одлука да не го остават пејачот во фоајето додека чекаат помош, покрена сомнеж. Вработените во хотелот ќе бидат сослушани следната недела, меѓу 17. и 19 декември, а наскоро се очекуваат и изјави од државните правобранители.

Инаку, три недели по смртта на поранешниот член на британскиот состав „Уан дајрекшн“ (One Direction), обвинителите ја отфрлија можноста за самоубиство како причина. Наводите говорат дека тој најверојатно бил во несвест кога паднал од балкон.

Популарно