Напад на паника и срцев удар? Лекарка објасни како да ги разликувате симптомите

Често е тешко да се направи разлика помеѓу паника и срцев удар, што може да предизвика дополнителна паника и стрес.

Симптомите се појавуваат одеднаш: чувствувате притисок во градите, срцето ви чука побрзо и почнувате да се потите. Ако сте ги почувствувале симптомите на напад на паника, сигурно сте мислеле дека се работи за срцев удар.

Паниката му штети на кардиоваскуларниот систем

Често е тешко да се препознае разликата, а тоа може да предизвика дополнителна паника и стрес. Овие настани се сериозни и важно е да научиме како да ги разликуваме симптомите за правилно да се лекуваат. Кардиологот Мистијан-Блу Милер објаснува дека овие две состојби се различни, но и по што се слични.

Симптоми на срцев удар

Тоа е состојба кога срцето не прима доволно крв, а вообичаените симптоми вклучуваат: болка и притисок во градите, брзи отчукувања на срцето, ладна пот, болка во горниот дел од телото (вилица, рака), отежнато дишење (краток здив), гадење или повраќање и чувство „пропаѓање“.

Срцевиот удар може да биде многу опасен, затоа не чекајте симптомите сами да исчезнат, туку веднаш побарајте лекарска помош.

Симптоми на напад на паника

Нападот на паника е ненадеен напад на голем страв или вознемиреност (анксиозност) кај некоја личност, обично предизвикан од некоја траума или непријатен настан. Иако нападите на паника сами по себе не се опасни по живот, тие во голема мера го попречуваат квалитетот на животот и психолошката благосостојба. Луѓето кои имаат редовни или чести напади на паника може да имаат панично растројство, еден вид на анксиозно растројство. Но, секому може да му се случи изолиран напад на паника, дури и без дијагноза на панично растројство, известуваат од Клиниката во Кливленд.

Може да му се случи на секого и симптомите често вклучуваат: силно чувство на страв или вознемиреност (анксиозност), болка во градите, проблеми со дишењето, чувство на „проспаѓање“, забрзано чукање на срцето, потење, треперење на телото, вртоглавица или слабост, болка во стомакот или гадење.

Бидејќи симптомите се многу слични, важно е да се препознае разликата, вели д-р Милер.

Како да се разликуваат симптомите на напад на паника и срцев удар?

Место на болка: Иако и во двата случаи ќе се појави непријатно чувство во градите, кога станува збор за срцев удар болката се шири и на други места, како што се раката, вилицата или вратот, вели д-р Милер и додава дека ако е во прашање напад на паника, болката најверојатно ќе остане само во пределот на градниот кош.

Вид на болка: Во случај на срцев удар, се појавува чувство како слон да ви стои на градите, може да се појави чувство слично на рефлукс. Нападот на паника често предизвикува чувство на прободување, што не е често кај срцевиот удар. Се појавува и непријатно чувство во градите кое тешко се опишува, заедно со забрзано работење на срцето.

Предизвикувачи: Срцев удар често се случува по физички напор или замор, што не е случај со нападот на паника. Значи, срцев удар може да настане откако ќе го исчистите снегот, но нема да дојде до напад на паника, освен ако не постои и емоционален стрес како компонента.

Не правете ги овие грешки, чувајте си ја насмевката

Забите не треба да се мијат веднаш по јадење бидејќи забите и непцата омекнуваат за време на оброкот, па полесно може да се оштетат доколку веднаш ги триеме со четка.

Експертите советуваат да се почека од 30 до 40 минути.

Други совети од експертите се и да не се дозволи водата од базенот да влезе во уста, бидејќи средствата за дезинфекција и одржување на водата содржат состојки штетни за забите.

Стоматолозите, исто така, препорачуваат кафето да се испие што е можно побрзо, а не подолго од 20 минути бидејќи на тој начин се овозможува повеќе време за кофеинот да ги уништи непцата и бојата на забите.

Експертите советуваат и забите секогаш да се мијат одвоено, а не за време на капење или туширање, бидејќи тоа е процес на кој треба да се посветиме.

Исто така, не се препорачува пирсинг на јазик ниту џвакање мраз, бидејќи и двете работи ги оштетуваат непцата и забите и можат да предизвикаат испаѓање на пломбите.

Дебелината и прејадувањето се симптоми, а не причина

Дебелината и прејадувањето се симптоми, а не причина. Причина за тоа се негативните чувства кои не се разрешени и произлегле од специфични случувања од минатото, кои се собираат во текот на времето.

Сите имаме такви чувства кои ги носиме во системот, најчесто не сме ни свесни за тоа, а создаваат немир.

Некои ги смируваат со храна, некои со други деструктивни однесувања како алкохол, дрога, лекови, претрпување со работа и слични облици на самоказнување, како што е започнување и останување во врски кои создаваат негативни чувства.

Дебелината е здравствен проблем, многу истражувања ја имаат поврзано со многу болести кои можат да бидат и смртоносни. Дебелината е проблем и за самодовербата, многумина мислат дека не се привлечни, а проблем прави и за нашата флексибилност, сила и општото чувство на контрола врз телото.

Сите знаеме дека ако јадеме квалитетно и избегнуваме штетна храна и дека ако повеќе се движиме или вежбаме – ќе бидеме здрави и витки. Тоа не е нешто многу комплицирано, но и покрај тоа постојано се мотаме околу фрижидерот.

Треба да целиме кон коренот на проблемот, да „копаме длабоко“ со одење во минатото и да ги пронајдеме настаните од кои произлегле тие негативни чувства и ограничувачки уверувања. Силата на волјата и самоконтролата кај повеќето луѓе не е долгорочна и најчесто резултира со диети по кои бргу ги враќаат килограмите.

Запрашајте се себеси: Кога почнавте да се дебелеете?

Нема единствен шаблон за тоа што предизвикува немир кај луѓето или пак универзална причина поради која луѓето посегнуваат по храна. Понекогаш случувањата не мора дури ни да бидат поврзани. Но, прашањето кое останува, а чиј одговор ќе ви помогне да почнете да размислување за промена на навиките е: „Како вие ги решавате вашите немири?“

Вкупно 20 случаи на голема кашлица во Скопје, зголемен и интересот за вакцинација со Ди-Те-Пер

Вкупно 20 случаи на пертусис, или народски кажано голема или магарешка кашлица, се евидентирани на територија на Скопје до овој момент, потврди за МИА, доктор Лулзиме Бајрами од Центарот за јавно здравје. Но, таа нагласи дека бројот се менува од час во час.

Претходно денеска, во Вакциналниот пункт „Букурешт“ во Скопје информираа дека зголемен е интересот за вакцинирање по зголемениот број случаи со голема кашлица, а најавено е и двосменско работење и работа во сабота.

- Од утрово до 11 часот имавме околу 60 дечиња вакцинирано. Ако вообичаено бројките на дневно ниво ни се меѓу 20 и 30, денеска и тоа засега, бројката ни е двојно поголема. Тука е нели стравот на родителите, но и мерката за забрана во градинките за невакцинираните, изјави Сања Цилевска Младеновска, доктор педијатар.  

Деновиве заседаваше и Комисијата за заразни болести и донесе препорака за прогласување епидемија на голема кашлица во Скопје.

Здравствените власти периодов апелираат до граѓаните да се вакцинираат и себеси и најмладите, со цел да се заштитат од пертусис. Како што нагласуваат, вакцината која се прима на 2,4,6,18 месеци и на 7 години е клучна за да се спречи понатамошно ширење на болеста.

- Од Комисијата за заразни болести има заклучоци и истите треба да бидат одобрени на владина седница. И во закон стои дека секое дете, кое што нема примено одредена вакцина, не ќе може да биде дел од системот на детска заштита. Ќе ги провериме градинките и нашите инспекциски служби ќе видат каде треба да интервенираме, за тоа да биде пракса и за да го спречиме ширењето на оваа епидемија, барем во Скопје, како жариште во овој момент, изјави вчера министерот за труд и социјална политика во техничката Влада, Ѓоко Велковски.

Министерот за здравство во техничката Влада, Фатмир Меџити вчера рече дека препораката од Комисијата за заразни болести за забрана за прием на невакцинирани деца во градинките треба да се сфати во позитивен контекст.

- Ова не е дека е некоја забрана или сакаме некого да казниме. Ова е тоа што сакаме да ги стимулираме, сакаме нивните деца да бидат здрави и живи, да имаме подобра иднина како држава. Апелирам до сите родители, ве молам, вакцините заштитуваат живот, подвлече Меџити, кажувајќи дека ќе го потпише документот за прогласување епидемија.

Во државава има хоспитализирани деца, но и возрасни со пертусис. Надлежните сепак велат оти кај нас состојбата е стабилна и за разлика од други држави во регионот, за среќа немаме смртни случаи.

Популарно