Поевтинуваат и бензините и дизелот, одлучи денеска регулаторната комисија за енергетика.

Според последната одлука, Еуросупер 95 поевтинува за половина дена и сега ќе се точи за 74 денари литар.

За 2 денари по литар поевтинува Еуросупер 98 и неговата нова цена е 76,5 денари.

Дизелот од полноќ ќе биде поевтин за 1 денар по литар и ќе се точи по 68,5 денари.

Ова е најниска цена на горивата во последните неколку години.

Последен пат дизелот под 68,5 денари се продавал во мај лани, а бензинот немал пониска цена во последните повеќе од 2 години.

По осум дена е ставен под контрола големиот пожар во Мариово, но екипи остануваат на теренот поради опасноста од разгорување на жариштата. Таква ситуација имало ноќеска кај манастирот „Свети Никола“ во Прилепец каде контролираат 20 луѓе.

-Би рекол 99 проценти пожарот е под контрола, но внимаваме на жаришта да не се разгорат. Во ноќните часови се појави едно критично жариште кое се рашири кај манастирот на околу 300 до 400 метри. Со брза интервенција во раните утрински часови, тој дел е ставен под контрола и се чува да не дојде до негово возобновување, изјави Јован Аврамоски, инспектор за заштита и спасување при ДЗС.

Според Аврамоски, пожарот во Мариово е во категоријата катастрофални пожари, а големи размери зеде и се прошири во трите дена кога немаше воздушна поддршка. Опфати од 150 000 до 200 000 хектари, главно ниска вегетација и трева и огнена линија од 200 километри. Директните, посебно индиректните штети, еколошките, се големи.

-Не направи големи штети со шумите, изгорената трева ќе порасне. Со денови големиот број професионалци и од здруженија бранеа 10 до 15 села и објекти. Немаме зафатени црковни објекти, селата се спасени, но голема е еколошката штета, не само загадувањето туку тешко ќе оди обновата на земјиштето, рече Аврамоски.

Во осумте дена беа ангажирани повеќе од 1 200 луѓе, од кои 500 припадници на АРМ, 120 од ЕБР, 80 од ДЗС, од ЈП Национални шѓуми, ловочувари, од здруженија, пожарникари од повеќе градови.

Под контрола е и пожарот кај селата Дрен и Смолани.

Сите 815 образовни асистенти до крајов на неделава ќе започнат со работа во училиштата гарантира министерката за обвразование. Некои утре ќе потпишуваат договори, други веќе ќе почнат да работат со децата со попреченост, пренесе Сител. До крајот на септември треба сите најавени 1.115 да почнат со работа. Училишната година започна без асистенти бидејќи немало предвидено средства во буџетот, но министерството за образование од следната година системски ќе го решава овој проблем.

Министерката Јаневска планира и законски да се регулира асистентот кој е доделен на детето, да продолжи да работи со него низ годините, односно да не им се менуваат асистентите на децата кои веќе се навикнале да работат со нив.

Менувањето на асистентот на децата со попреченост во училиштата може да има влијание врз нивниот секојдневен живот велат психолозите. Да предизвика дополнителен стрес, да се изгуби желбата за учење, да предизвика иритации и вон училиштето.

И Комисијата за спречување и заштита од дискриминација реагираше за доцнењето на ангажманот на асистенти во училиштата и апелираше до МОН да ја почитува обврската за обезбедување на правото на образование за секое дете без дискриминација.

Во Македонија во образовниот процес има вклучено околу 2000 деца со попреченост во основните училишта, во средните според информациите на МОН се 300. Еден асистент може да покрива и до три деца, но министерката Јаневка вели, ако има потреба, откако ќе направат проценки училиштата ќе се ангажираат и дополнителни асистенти.