Нема да го објавиме идентитетот поради револтот на јавноста, на осомничените им е одреден адвокат по службена должност

Осомничените за киднапирањето и убиството на Вања и Панче, случај кој ја вознемири македонската јавност, ги застапува еден адвокат, одреден по службена должност, дознава ,,Фокус” од сигурни извори.

Откако осомничените беа уапсени, низ социјалните мрежи се ширеше апел ниту еден адвокат да не прифати ангажман, а на истото повикуваа дури и адвокати. Сепак, за да случајот добие судска разрешница, неопходно е осомничените да имаат бранители, поради тежината на кривичното дело и притворот, поради што и им е одреден по службена должност.

,,Фокус” засега нема да го објави неговиот идентитет, поради револтот на јавноста за овој случај.

Ова не значи дека истиот адвокат ќе ги брани осомничените и во судница. Нивните семејства ќе можат и лично да ангажираат адвокати, но поради сензитивноста на случајот, тоа нема да им оди лесно. Затоа поверојатно е дека ќе мора да ги застапува адвокат одреден по службена должност.

Имено, овие адвокати тешко можат да го одбијат ангажманот, поточно мораат да имаат добра причина, односно не можат да го сторат тоа поради убедување. Штом се достапни во моментот и одговориле на повикот мораат да си ја извршат професионално својата работна задача.

Првоосомничен за грабнувањата и свирепите убиства на 14-годишната Вања Ѓорчевска и 74-годишниот Панче Жежовски е Љупчо Палевски – Палчо, кој беше фатен во Турција и во моментов во тек е постапка за негова екстрадиција. Како соизвршители се гонат уште неколку лица, а на листата осомничени е и таткото на Вања кој според првичните сознанија од предистрагата, на Палевски му давал информации кога девојчето ќе биде само.

Зоран Љутков најави реконструкција на локалитетот „Залив на коските“ на Охридското Езеро

Реконструкција и модернизација на системот за наводнување на комплексот „Залив на коските“ кај Градиште, повторно ставање во употреба на терасата на објектот за пријатен престој на посетителите, а од следната година и интензивни зафати за санација на платформата на наколната населба „Миќов град“ и кровните конструкции на колибите. Тоа денеска од Охрид го најави министерот за култура и туризам, Зоран Љутков, кој беше во посета на локалитетот.

Љутков по обиколката на комплексот заедно со директорот на Музејот и со стручните лица од Заводот за заштита на спомениците и музеј – Охрид посочи дека целиот комплекс е оставен на забот на времето без какви било интервенции за негово одржување, уште помалку некакви вложувања во него.

Бидејќи станува збор за исклучително важен локалитет во Охрид и еден од најпосетените места за туристите што остварува и економски бенефит, Љутков најави дека веднаш ќе се отпочнат поголем број проектни активности во насока на доекипирање и подобрување на условите за работа во комплексот, со цел натамошно нормално функционирање на комплексот.

Вршителот на должноста директор на Заводот за заштита на спомениците на културата и музеј од Охрид, Горан Патчев, од своја страна посочи дека понекогаш не се во прашање само средствата, туку и лошото менаџирање во управувањето со објектите што масовно се посетени од туристите и слабата поддршка од повисоките инстанци.

– Комплекот се одржува тековно, но може да се санира само онолку колку што се парите. Инаку „Заливот на коските“ на национално ниво е на второто место според приходите, и согласно тоа треба да се инвестира. Ние имаме изработено физибилити студија, така што треба да ги послушаме само добрите предлози и да одиме напред со добри практики, рече Патчев.

Инаку, Љутков уште ја искористи можноста да истакне дека во програмата на работата на Министерството за култура и туризам е предвидено културата да стане профитабилна дејност.

– Затоа и го споивме туризмот заедно со културата, бидејќи сметаме дека со развој и културниот туризам, културата може да стане значајна стопанска гранка, рече тој. 

(Видео) Нова инвестиција во Кисела Вода, ќе има нови 300 вработувања

Градоначалникот на скопската општина Кисела Вода Орце Ѓорѓиевски најави голема инвестиција вредна 20 милиони евра.

На површина од 22 илјади метри квадратни ќе се гради една од најголемите фабрики за производство на кондиторски производи со логистички центар.

Планирано е вработување на 300 лица, а производството е наменето за извоз.

- Големите работи доаѓаат со истрајност и со вистинска соработка. Гордост ми е да најавам дека во општина Кисела Вода ќе започне со изградба на една од најголемите фабрики за производство на кондиторски производи, како и логистички центар. Ова е македонска инвестиција со странски партнер, кои ќе изградат фабрика на површина од 22 илјади метри квадратни. Планирано е вработување на 300 лица, а производството е наменето за извоз. Вкупната инвестиција е 20 милиони евра. Од општина која беше пред банкрот, до општина со која сите се гордееме и каде почнуваат големи инвестиции. Да ни се множат успесите, изјави градоначалникот  Ѓорѓиевски кој сподели и видео на својот фејсбук профил.

Целото видео погледнете го ТУКА

Малолетниците кои беа најдени дрогирани се во стабилна состојба

Во свесна состојба се сите четворица малолетници кои вчера со тешка здравствена слика беа примени на Клиниката за токсикологија.

Директорот на Клиниката, Андон Чибишев утрово потврди дека децата се со стабилни витални параметри.

- Кај сите е докажано присуство на психоактивни супстанци. Не е докажано присуство на алкохол и немаат посериозни повреди, вели Чибишев.

Тие остануваат на Клиниката за токсикологија каде ќе продолжи нивното лекување и надзор.

Продолжува и истрагата за расчистување на целиот случај со малолетниците кои вчера во безсознание беа пронајдени во куќа во Скопје, а по пријава за нарушен јавен ред и мир. 

Популарно