Вие сте нов политичар на македонската политичка сцена. Може ли да се претставите?

Доаѓам од среднокласно работничко семејство, каде од мали нозе не учеа, мене и брат ми, дека во животот ништо не е невозможно. Доколку работиш со многу труд и волја може да се постигне се и дека клучот кон успехот ќе дојде само ако инвестираме во нашето образование за подобар личен развој и прогрес во животот за наше идно вработување. Дипломирав на ЈИЕУ во Тетово, на Факултетот за јавна администрација и политички науки. Се стекнав со многу знаења и вештини преку учество во неколку проекти финансирани од Европската Унија и Ромскиот Образовен Фонд во Будимпешта за подобрување на животниот, образовниот и економскиот стандард на Ромите во Северна Македонија. Работев во Управата за наменско производство на вооружување и воена опрема ВВО за вооружените сили при Министерството за економија како в.д. директор со 4 годишен ма дат. Последните неколку години активно работам во call center на германски јазик како специјалист за корисничка поддршка на Deutsche Telekom.

Вашата политичка партија Аваја, во име на своите гласачи, Ви ја даде довербата да бидете иден претставник во македонското собрание. Која е вашата политичка програма што ја ветувате на гласачите во вашата изборна единица?

Доколку ја добијам поддршката од гласачите во 6-тата изборна единица верувам дека ќе започнеме нова ера и надеж за сите помали заедници во Собранието. Како пратеник ќе се трудам максимално да ја оправдам довербата дадена од народот за да се слушне и гласот на Ромите за нивните секојдневни проблеми и недостиг на кадри во соодветните служби, бидејќи тие треба да работат за граѓаните, не за партискиот интерес. Аваја ветува прогрес и напредок на сите граѓани за членство во ЕУ. Нашата програма се стреми кон охрабрување на сите млади да учествуваат во политичките процеси при креирање нови политики на национално и локално ниво во интерес на народот. Ќе промовираме подобри услови за образование на нашите деца со подобра наставна програма и стручни кадри. Нашата програма ветува достоинство на Ромите и враќање на довербата при избирање на пратениците. Нуди можност да бидат активни во делот на бизнис сферата со поттикнување на претприемачите да креираат нови идеи и работи за младите во Македонија.

Какви се реакциите на јавноста во однос на вашите ветувања? Задоволни ли сте од досегашниот тек на кампањата, која завршува за неколку дена?

Отсекогаш велев остави делата да покажат дали Аваја ќе биде новата и идна опција на сите Роми. Аваја за кратко време успеа да се оформи, регистрира и појави на македонската политичка сцена. Секој почеток е тежок и тоа добро го знаеме. Уште сега ги планираме следните чекори, план и програма за локалните самоуправи, односно локалните избори. Време е да се има Роми советници во општините од каде што доаѓаат. Како што Италијанците знаат да направат добра пица, Германците одлични возила, доста беше неромите да креираат политики и буџет кој не се во интерес на помалите заедници. Лека полека се буди нашиот народ. Верувам дека сме брзо растечка млада партија полна со енергија, амбиција и желба за дебатирање и докажување на правата загарантирани со Устав и законите во Северна Македонија.

Постојат ли притисоци врз гласачите и врз вас. На кој начин се справувате и соочувате со нив?

Ние знаеме дека од неромите и поголемите политички партии поткупуваат гласови со пари на сиромашните граѓани. Но, како што велеше мојот покоен татко,  на се му доаѓа крајот. Така ќе дојде време кога Ромите нема да бидат манипулирани, уплашени и слободно ќе гласаат по своја волја. Аваја остро го осудува секое дело на поткуп на глас и јавно го осудува тој криминален начин на доаѓање на власт.

Како ќе ја претставувате вашата заедница во Собранието и за што ќе се залагате? Набројте три работи кои ќе ги реализирате за гласачите во вашата изборна единица?

Со огромна почит кон покојниот Фаик Абди, еден од првите визионери и борци за нашите права. Верувам дека ќе бидат голем борец за правата на Ромите и помалите заедници. Нема да поддржувам политики и закони спротивни на нашите стратешки цели, план и програми. Ќе се залагам да се дадат еднакви можности за вработување и образование на Ромите и секако, санкционирање на говорот на омраза, владеење на правото, слободата на медиумите и конечно, да се случат демократски европски избори, без директна или индиректна дискриминација или корупција кон помалите заедници. Да се доведе до минимум доколку сакаме да бидеме земја членка на ЕУ. Набројав повеќе од три, но тоа секако е само за доброто на Македонија.

Водачите на палестинската милитантна група Хамас не успеаја да постигнат напредок на вториот ден од разговорите во Каиро со посредниците од Египет и Катар за примирје со Израел и остануваат на барањето секој договор да вклучува крај на војната во Појасот Газа, соопштија палестинските власти.

Неименуван палестински функционер запознаен со разговорите изјави дека делегација на Хамас пристигнала во Каиро со намера да постигне договор, „но не по секоја цена“.

„Со договорот мора да се стави крај на војната и Израел да биде протеран од Појасот Газа, но Израел сè уште не се обврза дека ќе биде подготвен да го стори тоа“, рече палестинскиот претставник.

Израел сака договор што ќе ослободи барем некои од околу 130-те заложници кои сè уште ги држи Хамас, но израелски официјален претставник вчера истакна дека основната позиција не е променета и дека Израел „под никакви околности“ нема да се согласи на договор за ставање крај на борбите кои ги води со цел да се разоружа и трајно да се уништи Хамас.

Друг палестински функционер потврди дека разговорите се „пред предизвик затоа што Израел одбива да се обврзе на сеопфатно примирје“, но додаде дека делегацијата на Хамас сè уште е во Каиро со надеж дека посредниците би можеле да извршат притисок врз израелската страна да ја промени својата позиција.

Мониста и штрас или пропалестински демонстрации и пароли? Изборот за песна на Евровизија, кој започнува во вторник во шведскиот град Малме, годинава е во сенка на војната во Газа. Посебно за одбележување е учеството на Израел на речиси 70 години старото натпреварување, на кое годинава учествуваат 37 земји, а завршува со финалето на 11 мај.

Жителот на Малме, Андерс Пухел, изјави за АФП дека ќе учествува на протестот на 9 мај, кога Израел ќе се натпреварува во полуфиналето. „За време на војната, учеството на Израел треба да биде забрането на ист начин како што ја забранија Русија“, рече Пухел.

Во 2022 година, руските радиодифузери беа исклучени од Европската радиодифузна унија (ЕБУ), која го организира натпреварот, по инвазијата на Москва врз Украина. „Пораката беше дека не ни се допаѓаат луѓето кои не се придржуваат до демократските стандарди“, рече антропологот и евровизиски специјалист Лизан Вилкен.

Од почетокот на годината беа покренати неколку петиции со кои се бара исфрлање на Израел од натпреварувањето. Директни закани добија и Еден Голан, пејачот кој го претставува Израел, што ЕБУ брзо ги осуди.

„Иако силно ја поддржуваме слободата на говорот и правото на изразување мислења во едно демократско општество, ние силно се спротивставуваме на каква било форма на онлајн злоупотреба, говор на омраза или вознемирување насочена кон нашите уметници или кои било поединци поврзани со натпреварот“, велат организаторите.

Во арената Малме, организаторите ги забранија сите знамиња, освен за земјите-учеснички и знамињата на виножитото, што е старо правило на ЕБУ. „Сигурен сум дека некој ќе успее да донесе палестинско знаме и да го развее, но помалку е сигурно дали тоа ќе се види на телевизија“, рече Пухел.

Илјадници луѓе се очекува да присуствуваат на пропалестинските митинзи во текот на целата недела во градот украсен со разнобојни знамиња. „Никогаш не мислев дека ќе станеме таков политички настан на светската сцена“, рече Карин Карлсон, која беше повикана од градот Малме да го координира музичкиот натпревар.

Со повеќе од 360.000 жители и 186 националности, „целиот свет живее во Малме и сите конфликти се собрани на многу мала област, што создава раздор“, изјави за АФП Андреас Онерфорс, професор по историја на идеи и специјалист за Евровизија.

Мнозинството шведски жители со палестинско потекло, исто така, живеат во пристанишниот град, трет по големина во земјата, кој очекува приближно 100.000 посетители. Безбедноста предизвикува голема загриженост, особено откако Шведска минатата година го крена алармот од закана од тероризам на второ највисоко ниво, по серијата протести во кои беше запален и оштетен Куранот.

Зголемен е бројот на безбедносни проверки, особено кога се влегува во различни места, каде торбите генерално ќе бидат забранети. Зголемено е и присуството на полицијата, пристигнувањето на засилувања од Норвешка и Данска, а полицајците ќе бидат посилно вооружени од вообичаено во текот на неделата.

„Се чини дека е безбедно“, рече Еба Адиелсон, извршен продуцент на настанот за шведскиот јавен радиодифузен сервис СВТ, кој ја организира Евросонгот заедно со ЕБУ. „Полицијата е исклучително активна и одвои многу ресурси“ за да го заштити настанот, додаде Адиелсон.

Протестите ќе бидат строго контролирани, а како мерка на претпазливост, затворските ќелии се испразнети, а затворениците се испратени на други места во Шведска за да направат простор во случај на зголемување на апсењата.

„Евровизија, можете да ја видите низ градот и за неа многу се зборува. За жал, фокусот заврши на други работи наместо на музичкото натпреварување и радоста“, се пожали фан на АББА, Андерс Персон.

Оваа година се одбележуваат 50 години од победата на шведската поп група на натпреварот со песната Ватерло, која го отвори патот на АББА кон светската слава. Неколку шведски уметници кои требаше да учествуваат на споредните свечености се повлекоа, навестувајќи ја контроверзноста околу натпреварот.

Свеченостите ќе продолжат да се одржуваат, но на помирен начин. „Малме е град за забави, најтажно е што можеби помалку жители на Малме ќе учествуваат“, рече Карлсон. ЕБУ го усвои слоганот „Обединети од музиката“, позајмен од натпреварот во 2023 година, кој беше организиран во Обединетото Кралство затоа што воено разурната Украина, победничката на натпреварот во 2022 година, не можеше да биде домаќин.

„Ливерпул беше огромна забава минатата година, тоа беше прослава фрлена во лицето на Путин“, рече Вилкен, мислејќи на рускиот претседател кој ја започна инвазијата на Украина во 2022 година, а сега настанот е „обележан“ од ситуацијата во Газа.

Друг жител на Малме, Јаир Елснер, исто така организира митинг на 9 мај, но за да го прослави учеството на Израел. „Ќе бидеме таму со шведски и израелски знамиња“, изјави тој за АФП, додавајќи дека тие имаат намера да покажат „нешто позитивно“.

Елснер, член на малата еврејска заедница во Малме, рече дека не забележал никакви промени во ставовите кон него од почетокот на војната, но призна дека постои распространето чувство на „несигурност“.